Lesona 6

E Alolofa Le Tama Faalelagi Ma Iesu Ia Te Au

Faamoemoega

Ia fesoasoani ia lagona e tamaiti taitoatasi e alolofa le Tama Faalelagi ma Iesu Keriso ia i tatou uma taitoatasi.

Sauniuniga

1. Ia suesue ma le agaga tatalo le Mareko 10:13–16, Ioane 3:16; ma le 3 Nifae 17:11–12, 21–24.

2. O Mea e Faaaogaina:

   1. O se Tusi Paia ma se Tusi a Mamona.

   2. O se tamai faaata laititi.

   3. Ata 1-1, O Le Lalolagi (62196); ata 1-3, O Iesu Keriso (Taga o Ata o le Talalelei 240;62572); ata 1-4, O Le Uluai Faaaliga (Taga o Ata o le Talalelei 403;62470); ata 1-19, O Iesu Keriso ma Tamaiti (Taga o Ata o le Talalelei 216; 62467); ata 1-20, Iesu o lo o Faamanuia Fanau a Sa Nifaē.

3. Ia faia sauniuniga e talafeagai ai mo so o se Gaoioiga E Faamauoa Ai e te manao e faaaoga.

Gaoioiga E Aoao Ai

Tofi se tamaitiiti e faia le tatalo amata.

Gaoioiga e Faatosina Mai Ai:

Lulu lima ma faatalofa atu i tamaiti taitoatasi. Tau le igoa o le tamaitiiti/teineitiiti ma tau atu se mea e te fiafia ai ia te ia.

Fesili i tamaiti taitoatasi e tau mai se tagata e alofa ia te ia ma tau mai se mea e faia e lena tagata na te iloa ai e alofagia o ia.

Faamalamalama o lenei lesona e faatatau i tagata se toalua e alolofa ia i tatou uma lava. Sa laua aumaia lenei lalolagi matagofie ma le talalelei ma le Ekalesia.

Gaoioiga e Faatosina Mai Ai:

• O ai ia tagata e toalua e alolofa i tagata uma? (O le Tama Faalelagi ma Iesu Keriso.)

Tala:

Faaali atu ata 1-4, O Le Uluai Faaaliga. Fai i tamaiti e fesoasoani atu ia te oe e faamatala le tala o le mea o lo o tupu i le ata.

Tala:

• E te manatua o ai tagata o lo o i le ata?

• O a latou mea o lo o fai?

E tuuina mai e le Tama Faalelagi ma Iesu Keriso ia i Tatou Faamanuiaga

Faamanatu i tamaiti ae tatou te le i o mai i le lalolagi, sa tatou nonofo faatasi ma le Tama Faalelagi ma Iesu Keriso. Sa la fuafuaina tatou te o mai i le lalolagi ina ia tatou aoao ma ola ai. O lo o laua silafia ma naunau mai mo i tatou.

Faaali le ata 1-1, O Le Lalolagi.

• O le a le mea na poloaiina ai Iesu e le Tama Faalelagi e fai mo i tatou?

Faamatala na poloaiina Iesu e le Tama Faalelagi e faia se lalolagi ma mea uma o i ai. Fesoasoani ia malamalama tamaiti sa fuafuaina e le Tama Faalelagi ma Iesu mea uma tatou te ola ma fiafia ai. E faamanatu mai i nei mea lo laua alolofa mo i tatou.

• O a mea e faamanatu mai ai ia i tatou le alolofa o le Tama Faalelagi ma Iesu? (E mafai ona taua i tali mea e pei o le aiga, uo, le Ekalesia, laau toto, ma manu.)

Pese:

Usu pe faitau upu o le pese: “E Alofa Mai Lo’u Tama Faalelagi” (Tusi Pese a Tamaiti) faaaoga taga o lo o faatonuina. Faatutu tamaiti tou te pepese faatasi. Pe a ou faalogo (tuu lima i taliga) i manulele (tatala ma tapuni tamatamai lima pei se gutu o se manu)

pe ou te vaai (tilotilo i luga) i le lagi, (sii malie ae i luga lima),

Pe a paū mai le timu (faataitai i tamatamai lima le pau mai o mataua o le timu)

Ma agi mai foi le matagi, (fefaafoiai i luma ma tua lima),

Pe a ou tago i se rosa (faafoliga o lo o e sogisogi i se fugalaau)

Po o se laau manogi, (savali i lou tulaga)

Ou te faafetai mo le lalolagi

Ua faia e le Tama mo au (faamafola i autafa lima).

Faaali le ata 1-3, O Iesu Keriso.

Pese:

• O ai lenei?

• O ai le tama o Iesu?

Faitau le vaega muamua o le Ioane 3:16 (faagata i lona Atalii) ma faamatala atu o le faamanuiaga silisili lea ua tuuina mai e le Tama Faalelagi ia te i tatou o le auina mai lea o Iesu Keriso i le lalolagi.

Sa faaalia e Iesu Keriso lona alofa i tamaiti

Tala

Faaali le ata 1-19, O Keriso ma Tamaiti. Faamatala le tala i le faamanuiaina e Iesu o tamaiti i Ierusalema o lo o maua i le Mareko 10:13–16.

Faamanino atu sa faaavanoaina e Iesu le taimi e faaali atu ai lona alofa ma faamanuia tamaiti e ui lava ina sa le fiafia nisi sa mulimuli ia te ia aua sa manatu i latou e le tatau ona faalavelave ane fua tamaiti ia te ia.

Tala

• O le a le mea sa faia e Iesu ina ua o mai tamaiti? (Tagai i le Mareko 10:16.)

• Faamata o le a se lagona o tamaiti ia Iesu?

Pese:

Ia fai faatasi ma tamaiti upu: “E Alofa Iesu I Tamaiti” (Children’s Songbook).

E alofa Iesu i tamaiti laiti,

Laiti e pei o au nei

E faamanuia ma fesoasoani ia i latou

Ma sii latou i ona aao.

Tala:

Faaali le ata 1-20, O Iesu O Lo o Faamanuia Fanau a Sa Nifaē. Faamatala atu ina ua mavae le maliu o Iesu, sa ia asiasi atu i tagata i Amerika. O Amerika e mamao ese lava ma le mea sa nofo ai Iesu i le lalolagi.

Faamatala le tala i le faamanuiaina o tamaiti sa Nifae, o lo o tusia i le 3 Nifae 17:11–12, 21–24. Faamatala na faamanuia taitoatasi lava tamaiti e Iesu.

Tala:

• Na faapefea ona faaali atu le alofa o Iesu i tamaiti?

• E faapefea ona e iloa e alofa Iesu ia te oe?

Gaoioiga:

Faitau faatele faatasi ma tamaiti le fuaiupu lea, ma fai taga o lo o faatonuina:

E alofa Iesu I Tamaiti Uma

E alofa Iesu i tamaiti (faamafola i tua lima),

O tamaiti laiti (faaaoga lima e faatusa i le maualuga o tulivae)

O le pepe meamea o lo o sapai (faaaoga lima e pei o lo o sapai se pepe)

O e ua matutua ma uumī (sii lima i luga ae o ulu).

(From Finger Fun for Little Folk by Thea Cannon. Copyright © 1949 by the Stndard Publishing Company, Cincinnati, Ohio. Used by permission.)

E Alolofa le Tama Faalelagi ma Iesu Keriso Ia Te I Tatou Uma Lava Taitoatasi.

Fesoasoani ia malamalama tamaiti e taua i latou uma lava taitoatasi i le Tama Faalelagi ma Iesu. Faamalamalama atu e alolofa le Tama Faalelagi ma Iesu ia te i tatou taitoatasi ma e laua te silafia i tatou i o tatou igoa.

Gaoioiga:

Tuu i luga le fa’aata ma valaau taitoatasi mai tamaiti i luga. A o tilotilo le tamaitiiti i le faaata, ia e fai atu, “ O (tau le igoa o le tamaitiiti/teineitiiti) lenei, ma e alolofa tele le Tama Faalelagi ma Iesu ia (igoa o le tamaitiiti/teineitiiti).”

Molimau:

Tuuina atu lau molimau o lo o soifua le Tama Faalelagi ma Iesu ma e alolofa i laua ia te i tatou uma taitoatasi. Tau i tamaiti ou lagona faafetai mo ou faamanuiaga e tele ua tuuina mai e le Tama Faalelagi ma Iesu ia te oe.

O Isi Gaoioiga e Faamauoa Ai

Filifili nisi o nei gaoioiga e faaaoga i le taimi o le lesona.

1. Usu pe tauloto faatasi upu o le pese: “Iesu O La Tatou Uo Pele” (Tusi Pese a Tamaiti) Tufatufa ia tofu tamaiti ma le kopi o le “O Iesu O La Tatou Uo Pele” (o lo o i tua o le lesona), e fetagofi e valivali.

2. Usu pe faitau faatasi upu o le pese: “Ou te Iloa O Lo o Soifua Lou Tama” (Tusi Pese a Tamaiti) po o le “O Lo o Ou Faalogoina Le Alofa O Lo’u Faaola” (Tusi Pese a Tamaiti)

3. Faaali atu ata o mea na tuuina mai e le Tama Faalelagi ma Iesu ia te i tatou, e pei o se malumalu, manu, fugalaau, aiga, meaai, fale, falelotu, po o tusitusiga paia. (E mafai ona maua mai ata i le potu tusi o le falelotu, le Taga o Ata o le Talalelei, po o mekasini a le Ekalesia.) Fesoasoani ia malamalama tamaiti na tuuina mai nei mea e le Tama Faalelagi ma Iesu ona o lo laua alolofa tele ia te i tatou.

4. Aumai se mea pei o se atigi (faguinu), se mea e mafai ona vili pei se faasino tusi. Faanonofo tamaiti i lalo o le fola i se lio ae faataatia le atigi fagu i le ogatotonu. Vili le atigi fagu i luga o le fola. A tusi i se tamaitiiti, ona tau mai lea e le tamaitiiti lena se mea na foaiina e le Tama Faalelagi ma Iesu ona o lo laua alolofa ia te i tatou. Fesoasoani i tamaiti taitoatasi mo se tali pe a oo mai lona taimi. A uma ona tali mai le tamaitiiti, ona tago lea o ia e vili le fagu ina ia tusi i se isi tamaitiiti.

5. Saunia se pusa po o se taga o mea eseese tatou te faaaogaina a o tatou ola ai i le lalolagi, e pei o meaai, vai, po o lavalava. Tau atu na fuafuaina lenei lalolagi e le Tama Faalelagi ma Iesu mo tatou ina ia tatou nonofo ai. Faamatala i ai o le pusa po o le taga o lo o i ai nisi o mea tatou te moomia i lenei olaga. Tau i tamaiti ni faamatalaga e taufaaataata atu ai se tasi o mea seia oo lava ina mateia. A mateia, ona aveese lea o lena mea mai le pusa po o le taga. Fai pea lenei taaloga seia mateia e tamaiti mea uma o lo o i totonu o le pusa po o le taga.

6. Fai se pine o lo o i ai le igoa “E alolofa le Tama Faalelagi ma Iesu ia te au” mo tamaiti taitoatasi e ave i le fale. E mafai ona faapipii le pine i le ofu o le tamaitiiti, po o le faamau i se manoa ona asoa lea i le ua. E mafai foi ona e nanaina pine i lalo o nofoa a o le i amataina le vasega ae tuu i tamaiti e sue.

Gaoioiga Faaopoopo mo Tamaiti Laiti

1. Faitau faatasi ma tamaiti le fuaiupu lea, ma fai taga o lo o faatonuina:

   Afai e te umī tele, (Tutetee ma aapa i luga lima),

   O lo o i ai se nofoaga i le lotu mo oe.

   Afai e te laititī tele (faanounou i lalo)

   O lo o i ai se nofoaga i le lotu mo oe.

   Umī (Tutetee)

   Laitiitī (faanounou)

   Umī (Tutetee)

   Laitiitī (faanounou)

   O le Tama Faalelagi ma Iesu e alolofa mai.

2. Faitau le fuaiupu lea ma fesoasoani i tamaiti e fai taga o lo o faatonuina:

   Ua Silafia Au E Le Tama Faalelagi

   Ua silafia au e le Tama Faalelagi (tusi i le tagata lava ia)

   Ma mea ou te manao e fai.

   Na te silafia lo’u igoa ma le mea ou te nofo ai (fai se taualuga o se fale i le faafepaiai lea o tumutumu o tamatamai lima o lima uma e lua)

   Ou te iloa o au o lo o alofa mai i ai (kolosi lima ma tuu i luga o tauau ma fusimau).

   Na te silafia le mea ou te fiafia ai (tuu tamai lima i le gutu ma eu i luga i foliga fiafia)

   Na te silafia le mea ou te faanoanoa ai (tuu tamai lima i le gutu ma toso i lalo i foliga faanoanoa)

   Ou te iloa o au e fia fesoasoani mai i ai (tusi i le tagata lava ia)

   Ma o le mea lena ou te fiafia ai!

Jesus with children

Jesus with children