E Mafai Ona Avea A’u Ma Se Faataitaiga Lelei

Faamoemoega

Ia fesoasoani i tamaiti taitoatasi ina ia latou faia ni faataitaiga lelei mo isi e ala i le mulimuli i faataitaiga a Iesu.

Sauniuniga

Aoao ma le agaga tatalo le Mataio 4:19; Luka 19:1–10; Ioane 13:15; ma le 3Nifae 17:11–24.
O Mea e faaaogaina:
1. O se Tusi Paia ma se Tusi a Mamona.
2. O ni ata o tulagavae sa ‘oti mai pepa.
3. Ata 1-3, O Iesu Keriso (Taga Ata o le Talalelei 240;62572); ata 1-63, O Sakaio i luga o le Laau; ata 1-64, O Iesu o lo o Tatalo ma Tagata Sa Nifae (62542).
Ia faia sauniuniga uma e talafeagai mo so o se Gaoioiga E Faamauoa Ai e te manao e faaaoga.

Gaoioiga E Aoao Ai

Tofi se tamaitiiti e faia le tatalo amata.

Gaoioiga e Faatosina Mai Ai:

Fai faatasi ma tamaiti upu o le pese: “Faataitai Mai” (Children’s Songbook, p.276). Ia mulimuli tamaiti i au taga uma lava e fai, e pei o le lola faataavale o ou lima, patipati ou lima, po o le faafoliga foi o lo o e lele pei o se manulele.

Faataitai, mai ia te au;
Faataitai, mai ia te au!
Po o luga po o lalo,
Vave po o le gese,
Faataitai, mai ia te au!
Faataitai, mai ia te au!

Faamalamalama i tamaiti o lo latou faia o taga e tasi na e faia, o lo latou mulimuli foi lena i au faataitaiga. O lo tatou mulimuli i faataitaiga a se isi, o lo tatou faia lena o mea o lo o ia faia. Faamatala i tamaiti na fetalai mai Iesu, “Mulimuli mai ia te a’u” (tagai i le Mataio 4:19).

Sa auina mai e le Tama Faalelagi Iesu i le lalolagi ina ia fai ma faataitaiga ia te i tatou

Faaali le ata 1-3, O Iesu Keriso. Faamalamalama atu o le tasi mafuaaga na afio mai ai Iesu i le lalolagi ina ia avea ma faataitaiga mo i tatou ma faaali mai ia te i tatou le auala tatou te ola ai. E atoatoa Iesu. O lona uiga na ia faia mea uma i le ala sao. O le ala sa ia soifua ai i le lalolagi, o le ala foi lena e tatau ona tatou ola ai.

Faitau le Ioane 13:15 i tamaiti. Ta’u i tamaiti o saunoga nei a Iesu. Faamamafa atu, e tatou te mananao ia faapei o Iesu ma mulimuli i ana faataitaiga.

Pese

Fesoasoani i tamaiti e usu pe tauloto upu o le vaega muamua o le pese: “Ou Te Fia Faapei o Iesu” (Tusi Pese a Tamaiti).

Ou te fia faapei o Iesu;
Ou te mulimuli i ona ala.
Ou te fia alofa e pei o ia,
I upu ma mea ou te fai.

Pese

O a amioga e tatau ona tatou faia pe afai o lo o tatou taumafai ia faapei o Iesu?

Tala

Faaali le ata 1-63, O Sakaio i luga o le Laau, ma faamatala le tala ia Iesu ma Sakaio, o lo o maua i le Luka 19:1–10. Faamatala sa faia e Iesu se faataitaiga lelei mo i tatou ina ua ia agalelei atu ia Sakaio. E ui lava ina e lei fiafia isi tagata ia Sakaio, ae sa manao lava Iesu la te o ma Sakaio i lona fale ma avea o ia ma ana uo.

Tala

Na faapefea ona agalelei Iesu ia Sakaio? (tagai i le Luka 19:5.)
Faamata o le a se lagona o Sakaio ina ua agalelei atu Iesu ia te ia?

Pese

Usu pe tauloto upu o le pese: “Fetalai Mai Iesu E alofa Atu I Tagata Uma” (Tusi Pese a Tamaiti) ma ia faaaoga ai taga o lo o faamanino atu i lalo:

Ua fetalai mai Iesu (fofola lima i luma);
Ia e alofa atu (lue i luga ma lalo le ulu).
E alofagia ai oe (tuu lima i luga o le fatu),
E tagata uma (tago e fusi oe lava).

Tala

Faaali le ata 1-64, O Iesu O Lo o Tatalo ma Tagata Sa Nifae, ma faamatala le tala ia Iesu o lo o tatalo mo fanau a Sa Nifae, o lo o maua i le 3 Nifae 17:11–24. Faamalamalama sa faaalia e Iesu e ala i ana faataitaiga le tatau ona tatou tatalo mo isi.

Tala

O ai na talosia e Iesu? (Tagai i le 3 Nifae 17:21.)
Faamata o a ni lagona o tamaiti ina ua tatalo Iesu mo latou?
O ai e mafai ona tatou talosia?

Talanoaina tagata e mafai ona tatou talosia, e pei o tagata o o tatou aiga, tagata mamai, o faifeau talai, ma o tatou taitai o le Ekalesia.

Gaoioiga

Faaali le ata 1-63, O Sakaio i Luga o le Laau i le tasi itu o le potu, ma le ata 1-64, O Iesu O Lo o Tatalo ma Tagata Sa Nifae i le isi itu o le potu, ma tuu ata o tulagavae i luga o le fola e agai atu i ata taitasi. Ia toe usu pe fai foi e tamaiti upu o le vaega muamua o le pese: “Ou te Taumafai Ia Pei o Iesu” a o mulimuli atu i tulagavae i ata taitasi.

Tutu i ata taitasi ae toe faamatala e tamaiti mea uma o le tala e mafai ona latou manatua. Fesoasoani i tamaiti e mafaufau i ala e mafai ai ona avea i latou ma faataitaiga lelei e pei o Iesu i ata taitasi. Mo se faataitaiga, e mafai ona latou taaalo ma se tamaitiiti o lo o moomia se uo (Sakaio) i a latou mea taalo, ma e mafai ona tatalo mo se tasi o lo o mai po o manaomia foi se fesoasoani faapitoa (tatalo mo tamaiti sa Nifae).

Fesoasoani ia iloa e tamaiti, afai latou te faaali atu le alofa i isi e ala i lo latou agalelei atu ma le tatalo mo i latou, o lo latou mulimuli lava lea i faataitaiga a Iesu. O lo latou faia foi lena o faataitaiga lelei mo isi tagata.

Pese

Usu pe fai upu o le tali o le pese: “Ou Te Fia Faapei o Iesu” (Tusi Pese a Tamaiti) ma fai taga o lo o faamanino atu i lalo:

Alofa i lou uso e pei o Iesu (fusi oe lava ia).
Ia agalelei ma ia filemu (faatalofa ma se isi tagata).
Ia fiafia i mea lelei (faapea o le isi ou lima o se manu, ae tago le isi ou lima e milimili),
Faapei ona fai e Iesu (tuu faatasi lima ma fofola faasaga i luga alofilima, e pei o se tusitusiga paia).

E mafai ona avea i tatou ma faataitaiga lelei i isi

Faamatala e pei lava ona mulimuli tamaiti i faataitaiga a Iesu, e matau foi e isi tagata a latou amioga e fai ma faataitai i ai.

Gaoioiga

Vaai se tamaitiiti e sau i luma o le vasega ma avea o ia ma taitai. Ia taitai le tamaitiiti lea i le faiga o ni taga a e mulimuli i ai tamaiti, e pei o le patipati o lima, feliua’i, po o le oso i luga ma lalo. Toe fai ma saga fai le gaoioiga seia maua uma e tamaiti taitoatasi le avanoa e avea ai ma taitai.

Faamalamalama atu e tele auala taua e avea ai ma faataitaiga nai lo le femigoia’i o o tatou tino. Fai i tamaiti e mafai ona avea i latou ma faataitaiga lelei e ala i lo latou faia o mea lelei, e pei o le tautala sa’o, usitai i o latou tina ma tama, fetufaai o a latou mea taalo, faaaloalo i le lotu, ma le fesoasoani i o latou aiga.

Gaoioiga

O le a se mea e mafai ona e fai ina ia avea ai oe ma faataitaiga lelei i isi?

Fai i tamaiti taitoatasi e mafaufau i se auala e mafai ai ona avea ia ma se faataitaiga lelei ma faamatala i le vasega po o le a le mea o le a na faia.

Molimau

Faamatala se taimi sa e mulimuli ai i se faataitaiga lelei a se isi tagata. Faamatala foi ou lagona i le taua o le mulimuli i faataitaiga a Iesu. Uunai tamaiti e faia faataitaiga lelei mo isi e ala i le faia o mea e fai e Iesu.

O Gaoioiga e Faamauoa ai

Filifili nisi o nei gaoioiga e faaaoga i le taimi o le lesona.

Fai se palealii faigofie po o se pulou pepa mo tamaiti taitoatasi. Tusi upu ia i luga o le pulou, E mafai ona avea au ma se faataitaiga lelei. Talanoaina ni auala e mafai ai ona avea tamaiti ma faataitaiga lelei i lenei vaiaso.
Usu le pese: “Sa Tamaitiiti O Iesu” (Tusi Pese a Tamaiti), “E manao Iesu Ia Ou Fai Ma Sulu” (Tusi Pese a Tamaiti) po o le “Pei A’u O se Fetu” (Tusi pese a Tamaiti).
Faaali atu se moli uila po o se isi tama’i moli. Ki le moli ma talanoa le ala o lo o fesoasoani ai le malamalama o se moli i tagata pe a susulu. Faitau leotele le fasi fuaitau muamua o le 3 Nifae 12:16. Faamalamalama i tamaiti o i latou e pei lava o ni malamalama laiti pe a latou faia ni faataitaiga lelei, aua o isi tagata o lo o matauina ma faataitai ia te i latou. Ia uu e se tamaititi le moli e taitai faataamilo ai isi i totonu o le potu. Ia faia pea seia tofu taitai uma tamaiti e fia fai ma taitai.
Faatutu i luga tamaiti e fai taga o le fuaiupu faagaoioiga lea:

E Alofa Iesu I Tamaiti Laiti

Sa i ai ni tamaiti sa taufetuli agai i lalo o le auala pefua (tamoemoe i mea o lo o tutu ai),

Taufetuli televavave i o latou vae laiti e lua (tusi lima i vae).

Sa faavava atu i le motu o tagata e sue se tulaga lelei (faafoliga o lo o tautulei i le tumutumu o tagata)

Ia latalata atu ai ia Iesu, ma ona foliga ia iloa lelei (tutetee ma autilo solo).

O nisi tagata matutua sa fai mai, “Tutuli ese atu i o” (faaloaloa le lima e “taofi”).

“E le o avanoa o Ia mo tamaiti i le asō” (pupula faanoanoa ma lulu ulu).

Peitai sa fetalai mai Iesu, “Ina tuu maia o tamaiti e o mai ia te au” (talotalo mai le lima).

“E taua tele i latou ma e alofagia foi e au” (fusi oe lava).

(Adapted from Margaretta Harmon in Bible Story Finger Plays and Action Rhymes [Cincinnati, Ohio: Standard Publishing, 1964], p.27).

O Gaoioiga Faaopoopo Mo Tamaiti Laiti

Fai i tamaiti e toe fai le upu faataitaiga. Fai i ai o se faataitaiga lelei o se tasi lea e te manao e te ola ae ua e soo i ai. E mafai ona avea o tatou matua ma faataitaiga lelei ia te i tatou. Fesili atu i tamaiti po o a mea e fai e o latou matua e faafiafia ai i latou ma tausia lelei.
Ia ‘u’u lima o tamaiti ma fai se li’o a o usuina pe tauloto foi upu o le pese: “Pe a Tatou Fesoasoani” (Tusi Pese a Tamaiti). Pule oe pe faafia ona fai, sui le upu tina i le, tama, tuagane, uso, tina matua, po o tama matua.
Fai le “Mulimuli i le Taitai” ma tamaiti. Fai i tamaiti e tutu i se laina. O le tamaitiiti muamua i le laina e tamoe, musa, tafue pe fai foi se isi taga aga’i i le isi itu o le potu. Ia faataitai e isi tamaiti le mea sa fai e le tamaitiiti muamua. Ona alu lea o le tamaitiiti sa muamua i le siusiu o le laina, ae faasolo ifo le isi na sosoo i ai e avea ma taitai. Ia fai pea seia tofu tamaiti uma ma avea ma taitai.