Tuuina Atu O Aoaoga Mai Lenei Tusi Lesona

Tusi Lesona ma le Taimi o Fetufaaiga a le Peraimeri

Ua saunia i totonu o lenei tusi lesona, lesona mo le aoaoina o fanau e atoa le tai tolu tausaga le matutua i le aso 1 o Ianuari. E mafai foi e faiaoga ona faaaogaina le tusi lesona faatatau mo tamaiti e tai sefuluvalu masina e oo atu i le tolu tausaga le matutua. Afai o lo o auai i le Peraimeri tamaiti e i lalo ifo o le tolu tausaga le matutua, ona tatau lea ona auai i latou i se vasega pepe ia ese mai tamaiti e tai tolu tausaga le matutua, vagana ai e matua toaitiiti lava le uarota po o le paranesi. Afai o lo o i ai i se uarota po o se paranesi ni tamaiti e sili atu i le toavalu po o le toa sefulu e tutusa o latou tausaga, ona mafai lea ona vaeluaina le vasega.

E tatau i faiaoga o le vasega pepe ona tagai i le “Faaaogaina o le Tusi Lesona Faatatau i le Vasega Pepe,” e amata atu i le itulau ix, e faaopoopo atu i lenei vaega. E tatau i taitai ma faiaoga ona iloiloina ma le agaga tatalo le ala sili e faatulagaina ai vasega, ma faaaoga lesona ma gaoioiga o lo o i ai i lenei tusi lesona e faamalieina ai manaoga o fanau o lo o i ai i le latou uarota po o le paranesi.

O le Vasega a Tamaiti e Tai Tolu Tausaga le Matutua

O tamaiti ua atoa le tai tolu tausaga i le aso 1 o Ianuari, e auai i latou i le vasega a tamaiti e tai tolu tausaga le matutua.

Faamoemoega

O le faamoemoega o le vasega e tai tolu tausaga le matutua, o le fesoasoani lea i tamaiti e faatupuina le malamalamaaga i le alofa ma ia alolofa i le Tama Faalelagi ma Iesu Keriso, ia faia o mea lelei i le Peraimeri, ma tutupu ae ai i lagona e taua tele i latou lava.

Tatalo

E tatau ona amataina ma faaiuina vasega taitasi i le tatalo e saunia e se tamaitiiti. E masani lava ona saunia le tatalo amata i le amataga o le lesona, ma le tatalo faaiu e faia i le faaiuga o le vasega. Aoao tamaiti ia faia tatalo pupuu faigofie. Ia fesoasoani ia i latou pe a tatau ai.

Faasologa o le Taimi

O le vasega lenei e saunia ai tamaiti i le suiga faifai malie mai le vasega pepe agai atu i le auai i le Peraimeri e masani ai. I le faagasologa o le vaega muamua o le tausaga, atonu e manaomia ai le faataunuuina o le fetufaaiga ma gaoioiga i totonu o o latou lava potu. I le faagasologa o le vaega atoa o totoe o le tausaga, e mafai ona latou o atu ai faatasi ma isi tamaiti o le Peraimeri mo taimi o le fetufaaiga. O le matutua o tamaiti o lo o i ai i le vasega, e fuafua i ai le taimi e fai ai le suiga. Ia maitauina lelei tamaiti ina ia iloa ai le taimi e saunia ai i latou, ma ia faafesootai le au peresitene o le Peraimeri ina ia iloa ai le taimi e faatino ai lea suiga. E mafai e tamaiti e tai tolu tausaga le matutua ona o atu faatasi ma isi tamaiti o le Peraimeri e auai i sauniga amata ma sauniga faaiu i le faagasologa o le tausaga atoa.

E tasi le itula ma le fasefulu minute le umi o taimi o le Peraimeri. O sauniga amata po o sauniga faaiu e luasefulu minute le umi, ma le lima minute mo tamaiti e o atu ai i o latou potu. Afai o lo o faataunuuina le fetufaaiga a tamaiti e tai tolu tausaga i totonu o o latou lava potu o vasega, ona fitusefulu-lima minute lea le taimi o le vasega. O le faasologa fautuaina o lo o i lalo e mafai ona fetuunai ia talafeagai ma manaoga i totonu o outou lava atunuu:

Taimi o le Faafeiloaiga:	10-15 minute
Taimi o le Lesona:	25-30 minute
Taimi o le Fetufaaiga ma le Gaoioiga	20-25 minute
Taimi Faaiu:	10-15 minute

Afai e auai tamaiti e tai tolu tausaga le matutua faatasi ma tamaiti uma o le Peraimeri i le taimi o le fetufaaiga, o le umi la o le taimi o le vasega e fasefulu minute, ma o le a aofia ai le taimi o le lesona ma taimi pupuu e faaaluina i le faafeiloaiga ma le faaiuga.

Taimi o le Faafeiloaiga: O le faamoemoega o le taimi o le faafeiloaiga, o le faaavanoaina lea o tamaiti e talatalanoa ma fetufaai ma le faiaoga faapea foi le tasi i le isi, i se tulaga faasamasamanoa. O le a lagona ai e tamaiti le saogalemu ma le toafimalie i le Peraimeri ina ua latou saoloto e gaoioi solo i lea taimi.

Fesoasoani i tamaiti taitoatasi ia ona lagonaina lona taliaina ma le saogalemu i le vasega. Ia faaalia le agaga o le alofa, naunau, ma le faaaloalo i au upu atoa ma gaoioiga. Ia talanoaina mea e manaomia ma mea e fiafia i ai tamaiti. O mea nei e mafai ona aofia ai i autu e talafeagai ai, e ao ona talanoaina:

O ni mea lata mai na tutupu i olaga o tamaiti, e pei o le fanau mai o se pepe fou i totonu o le aiga po o se tafaoga faaleaiga.
O aso malolo faapitoa.
O le Tau
O le matauina o laau toto, o le tau, ma isi mea faapena o le natura.
O le Tomai i le vafealoai e pei o le faalogo, fetufaai o mea taalo, po o le faaaogaina o uiga faaaloalo.
Gaoioiga e faaalia ai le agalelei.

O le faaaogaina o tamatamailima i taga o solo pupuu, o le ifo, punonou, ma taga faasaosao ai tino, atoa foi ma pese i lea lava taimi, e fesoasoani i tamaiti ia alo ese ai mai le ulavavale.

Taimi o le Lesona: Ia mulimuli i le otootoga aoao o lesona taitasi, ma fetuutuunai e pei ona tatau ai mo lau lava vasega. Ia tulimatai le malamalamaaga ma mea e fiafia i ai tamaiti. Ia filifili tala ma gaoioiga o le a sili atu ona aoaoina ai tagata o lau vasega i mataupu faavae taua o le lesona. Ia filifili mai le vaega “O Isi Gaoioiga e Faamauoaina Ai,” so o se gaoioiga e te lagona o le a talafeagai lelei ma tamaiti o lau vasega. Ia faaaoga nei gaoioiga i so o se taimi lava e te manao ai a o faia le lesona. E vave ona aoaoina tamaiti e ala i le faia soo o se mea, atonu la o le a e manao e faaaogaina le gaoioiga lava e tasi, pese, tala, po o se mau ia sili atu i le taimi e tasi, i le taimi o le lesona po o isi lesona e sosoo ai.

E vave ona aoaoina tamaiti e ala i le faia soo o se mea, atonu la o le a e manao e faaaogaina le gaoioiga lava e tasi ia sili atu i le taimi e tasi, i le taimi o le lesona po o isi lesona e sosoo ai.

Ia aoaoina atu lesona i le faasologa sao lava e tatau ai, vagana ai le lesona 45 ma le 46 (Eseta ma le Kerisimasi).

Taimi o le Fetufaaiga ma le Gaoioiga: Afai e faia le fetufaaiga a tamaiti i totonu o le vasega, ae le o faatasi ai ma isi tamaiti o le Peraimeri, ona faaaoga lea o gaoioiga o lo o i lesona, faapea ma gaoioiga o lo o i le vaega “Isi Gaoioiga e Faamauoaina Ai,” mo taimi o le fetufaaiga. Atonu o le a e manao e toe fai gaoioiga e sili ona fiafia i ai tamaiti mai lesona ua uma ona faataunuuina. Ia aofia ai ma le taimi e usuina ai pese o le Peraimeri (tagai i le Musika i Totonu o le Vasega, itulau vii). Ia uunaia tamaiti ia auai ma fetufaai o latou manatu o le tasi i le isi.

A mavae ona amata ona auai tamaiti e tai tolu tausaga i le taimi o fetufaaiga faatasi ma isi tamaiti o le Peraimeri, ona talosagaina lea o i latou i lea taimi ma lea taimi e tuuina atu a latou polokalama i le taimi o fetufaaiga. Ia fuafuaina se polokalama faigofie o le talalelei o le a mafai ai ona faaaogaina uma ai tamaiti o lo o i ai i le vasega. Atonu o le a e manao e -

Fesoasoani i tamaiti latou te faatino i taga se tala po o se mea na tupu mai se tasi o lesona.
Tuu atu i tamaiti e faaaoga ata e fesoasoani i le faamatalaina o se tala mai se tasi o lesona.
Tuu atu i tamaiti taitoatasi e faamatala se ata po o se manatu e uiga i se mataupu faavae o le talalelei.
Tuu atu i tamaiti latou te lagiina se pese e uiga i se mataupu faavae o le talalelei sa aoaoina.

Taimi o le Faaiuga: Ia iloilo ma aofai manatu autu o le lesona. Ia tau faapitoa ni mau pupuu se tasi pe lua mai le lesona, ma ia faamamafaina atu manatu autu ina ia mafai e tamaiti ona latou faamatalaina atu foi ia mau i o latou aiga. Ia valaauina se tamaitiiti na te saunia le tatalo faaiu.

Sauniuniga o Lesona

O le manatu taua muamua lava e ao ina manatua, ia lelei ona aoaoina tamaiti ina ia malamalama lelei, ma alolofa ia i latou. Ia iloa lelei ma faaaoga igoa o tagata o lau vasega pe a e talanoa atu ia i latou. Ia e fai faapei o se tasi o i latou ma ia iloa ma aoao e uiga i o latou olaga.

Ia silasila totoa i auala e mafai ona faaaoga ai tamaiti i lesona, ma ia saunia lelei lesona ina ia matua talafeagai lelei ma i latou taitoatasi. Ia faaalia le alofa faamaoni e tatau ai mo i latou, faapea foi ma le fiafia mo tamaiti uma o lo o i ai i lau vasega. O le manatu taua lona lua e ao ona faia, o le saunia lelei lea. Ia amata ona saunia lesona taitasi ia le itiiti ifo ma le vaiaso a’o le i aoaoina. Faitau le lesona atoa, ona suesue lea i ai ma le agaga tatalo ina ia iloa ai le ala sili, e aoao atu ai mataupu faavae i tamaiti o lau vasega. Ia filifili mai Gaoioiga e Faamauoaina Ai e faaopoopo atu i gaoioiga o lo o i ai i le lesona, ma taumafai e faatumauina le fiafia o tamaiti atoa foi ma lo latou auai i mea e fai. Ia fuafua ni gaoioiga eseese, ma ia fetuutuunai le faaaogaina o ia gaoioiga ina ia fetaui ma manaoga o tamaiti.

Ia e matua iloa lelei le lesona ina ia aua ai nei e faitauina mai le tusi lesona, ma ia taumafai e faatumauina le vaai sao i mata o tamaiti i taimi uma. Ia tatalo e le aunoa a o e saunia lesona taitasi, ma ia saili i le Agaga mo le taitaiina o oe a o e saunia ma aoao atu.

Aoaoina Atu o Lesona

A o e aoaoina tamaiti i mataupu faavae o le talalelei, e tatau foi ona e uunaia i latou ia fiafia i le talalelei. E mafai ona fesoasoani ia te oe fautuaga o lo o i lalo ina ia saunia lelei ai le Peraimeri e avea ma mea e fiafia i ai tamaiti o lau vasega:

Tuu atu i tamaiti le tele o avanoa e talanoa ma auai i mea e fai.
Faalogo lelei a o tautatala tamaiti, ma ia taumafai e tali lelei atu ma ia talafeagai lelei.
Ia e maelega. Afai e fiafia le faiaoga i le Peraimeri, o le a fiafia foi tamaiti i le Peraimeri.
Tautala atu i le leo malu ma le agalelei.
Onosai, agalelei, ma alofa, aemaise lava i le taimi ua vaivai tamaiti pe ulavavale foi.
Ia maitau lelei o latou uiga faaaloalo, ma ia aua nei amanaiaina uiga le faaaloalo po o le ulavale i so o se taimi lava e mafai ai.
Saunia ia tele ni ituaiga o gaoioiga ma ia fetuutuunai lo latou faaaogaina ina ia faamalieina manaoga o tamaiti. O fanau laiti e puupuu lava lo latou naunau atu i se mea, ma o lea e tatau ai ona faagasolo vave ma lelei le lesona.
Taumafai e taitai pe sui se isi mea fou i tamaiti pe afai e tupu mai se fefinauaiga.
Ia manatua lelei e fiafia tele tamaiti laiti i tala, fesoasoani vaaia, musika, ma gaoioiga. E fiafia tele i latou i gaoioiga ma pese e fai soo, aemaise lava gaoioiga ma pese latou te iloa lelei.

Musika i Totonu o le Vasega

O lo o aofia ai i lesona taitasi o lo o i ai i lenei tusi lesona, pese e fesoasoani i le faamamafaina atu atili o aoaoga o le talalelei. E le faapea seiloga o oe o se tagata e tomai i musika ona faatoa mafai lea ona malie ma tausaafia musika po o pese e usuina i totonu o le vasega. O le a le iloa e tamaiti pe lelei pe le lelei lou leo pe a e pese; pau lava le mea latou te iloa o oe e te fiafia e te pese. Ia aoao lelei pese taitasi, ma ia faataitaiina pea e avea ma se vaega o le sauniuniga o lau lesona.

O le faia e le aunoa o pesepesega, o le ala sili lena e aoaoina atu ai pese i tamaiti. Atonu o le a mafai ona e faaaogaina le pese lava e tasi i le tele o taimi, i le faagasologa o se lesona. E mafai ona fesoasoani nai taga faigofie e fai, e faa-auai tamaiti laiti i le lagiina o se pese. Afai e i ai se pese e iloa lelei e tamaiti ma e fiafia foi e usuina, ona lagiina lea i le tele o taimi o lesona po o taimi foi o fetufaaiga ma gaoioiga.

O le aoaoina atu o se pese fou po o se fuaiupu i tamaiti —

Ia taulotoina muamua le pese po o le fuaiupu mai le gaoioiga a o lumanai le vasega.
Ia faailoa atu le pese fou po o le fuaiupu mai le gaoioiga, i le usuina lea po o le faitauina atu i tamaiti. Ia faamamafaina atu taga, pe afai e i ai.
Ia valaauina tamaiti e usuina pe taulotoina faatasi ma oe upu. O le a le vave ona latou iloa ia upu ae afai e te usuina soo le pese po o le fuaiupu, o le a mafai ona aoaoina ma maitau ai e i latou upu.
Ia faagesegese le usuina o le pese ina ia malamalama tamaiti i upu ma taga.
Ia faaaogaina fesoasoani vaaia i lea taimi ma lea taimi ina ia fesoasoani ai i le tuuina atu o le pese po o le fuaiupu mai le gaoioiga. O le a faalogo lelei tamaiti ma vave ona aoaoina e i latou se mataupu, pe afai o i ai ni mea faitino o lo o latou tilotilo i ai.
Ia faapuupuu le pese po o le fuaiupu pe a ua vaivai pe ulavavale foi tamaiti. Afai e umi le pese po o le fuaiupu o le gaoioiga, atonu e te manao e fesoasoani i tamaiti i le faia o taga a o e usuina le pese pe faia foi na o upu.

E masani lava ona le mananao fanau laiti tou te usuina faatasi le pese, peitai o le a fiafia i latou e auai i le faalogologo lea i le pese.

Fesoasoani Vaaia

E taua tele fesoasoani vaaia i le aoaoina o fanau laiti. O ata, ata tipitipi, mea faitino, atoa ma isi fesoasoani vaaia, e mafai ona faatosina mai ai le faalogo po o le vaai a tamaiti, ma fesoasoani foi i tamaiti e manatua mea o lo o e aoaoina atu.

O ata ma ata tipitipi o lo o taua i lesona, o lo o faapea ona aofia ai i totonu o le tusi lesona. I le vaega o “Sauniuniga” o lesona taitasi, o lo o tusia ai ata o lo o faaaogaina i lena lesona i tafatafa o le autu po o le igoa ma le numera. O numera o lo o puipuia o lo o faaalia ai ata taitasi (po o se ata e foliga i ai foi) o lo o i ai i le Taga Ata o Ata o le Talalelei (34730 po o le 34735) ma o lo o i ai foi i totonu o le potutusi o le falelotu. O lo o tusia foi i le vaega o “Sauniuniga” ata tipitipi taitasi i o latou numera i le tusi lesona, atoa ma le seti o Ata Tipitipi o Fesoasoani Vaaia a le Peraimeri (33239 - 33250 po o le 08456) o lo o maua ai foi ata tipitipi faapena.

E mafai ona avea mea faitino ma ni fesoasoani vaaia lelei, aemaise lava pe afai o ni mea e masani ai e mafai e tamaiti ona pai i ai pe uuina foi. Afai e te faamatalaina se tala mai tusitusiga paia, ia faaaoga au lava tusitusiga paia po o tusitusiga paia mai le potutusi o le falelotu e fai ma fesoasoani vaaia.

Taiala Faapitoa mo le Aofia Ai O Tamaiti e i Ai Mea Faaletonu i o Latou Tino po o Mafaufau

Ua uma ona faailoa mai e le Faaola i ai tatou le faataitaiga, i le lagonaina o le alofa mo tagata e i ai mea o faaletonu. Ina ua mavae lona toe tu mai, sa asiasi atu o Ia i Sa Nifae, ma faapea atu:

“Po ua ia te outou nisi ua mamai? Aumai ia i latou iinei. Po ua ia te outou ea nisi ua pipili, pe tauaso, pe setu, pe manua, pe lepela, pe mamae, pe tutuli, pe puapuagatia i se tasi mea? Ina aumai ia i latou iinei, ou te faamaloloina i latou, aua ua mutimutivale lo’u alofa ia te outou; ua tumu lo’u loto i le alofa ia te outou” (3 Nifae 17:7).

O lo o faapea ona i ai oe le faiaoga o le Peraimeri i se tulaga e sili ona lelei, e faaalia ai le alofa. Atonu lava e le i aoaoina oe i tomai ma le malamalama mo le tuuina atu o le fesoasoani faapitoa, ae i le avea o oe ma faiaoga, o le a mafai ona e malamalama ai ma tausia tamaiti e i ai mea o faaletonu. O le popole, loto malamalama, ma le naunau ina ia aofia ai tamaiti taitoatasi o le vasega i gaoioiga e aoaoina ai, e matua manaomia lava.

E mafai e tamaiti e i ai mea o faaletonu i o latou tino po o mafaufau ona pai i ai le Agaga e tusa lava pe o le a le tulaga o le malamalama o lo o i ai ia i latou. E ui lava ina e i ai nisi tamaiti atonu o le a le mafai ona auai i le taimi atoa o le Peraimeri, ae tatau lava ona maua e i latou le avanoa e auai e tusa lava pe na o sina taimi puupuu, ina ia latou lagonaina le Agaga. Atonu e moomia le i ai o se soa e faigofie ona iloa ma lagona e ia mea e manaomia e lea tamaitiiti, ina ia la faatasi i le taimi o le Peraimeri, ina nei manaomia e le tamaitiiti se taimi e alu ese ai o ia mai le vaega atoa. Atonu o nisi o tamaiti o le vasega o lo o faafeagai ma tulaga faaletonu i o latou tino po o mafaufau e faafaigata ai ona aoao i latou, e pei o le tauaso po o le logonoa, vaivai le mafaufau, faafitauli i le gagana po o le gugu, faafitauli tau le amio po o le vafealoai, mai le mafaufau, feminoiai po o le tafitifiti solo, po o faafitauli tumau tau le soifua maloloina. O nisi tamaiti atonu e faafaigata ia i latou le gagana po o tulaga o le aganuu ona e le masani ai. E tusa lava la pe o le a le tulaga e i ai tamaiti taitoatasi, ae o lo o i ai i tamaiti taitoatasi le manao ia alofagia, ma ia taliaina, ia aoao i le talalelei, lagona le Agaga, auai atoatoa, atoa ma le auauna atu i isi.

O taiala nei e mafai ona fesoasoani ia te oe i le aoaoina o se tamaitiiti e i ai mea o faaletonu i o latou tino po o mafaufau.

Aua le manatu mamafa fua i mea o faaletonu, ae ia matua malamalama lelei i le tamaitiiti. Ia onosai, faaalia le agaga faauo, ma le alofa.
Ia aoao ia iloa mea faapitoa e malosi ai le tamaitiiti atoa foi ma mea e faafaigata ia te ia.
Ia faia taumafaiga uma e aoao ma faamanatu atu i tagata o le vasega lo latou tiutetauave, ina ia faaaloalo i tagata uma o le vasega. O le fesoasoani i se tamaitiiti e i ai se mea o faaletonu i lona tino po o le mafaufau, e mafai ona avea o se tulaga faaleaoaoga faa-Keriso mo le vasega atoa.
Ia saili le auala sili e aoaoina ai le tamaitiiti e ala lea i le talatalanoa muamua ma matua, isi tagata o le aiga, atoa foi ma le tamaitiiti pe a talafeagai ai.
A o le i valaauina se tamaitiiti e i ai mea o faaletonu i lona tino po o le mafaufau e alu ane e tatalo, po o le auai i gaoioiga fai o le vasega, ia fesiligia muamua po o le a sona lagona e tusa ai ma lona auai i mea fai a le vasega. Ia faamamafaina atu le tomai ma taleni a tamaiti taitoatasi, ma ia silasila totoa i auala e mafai ai e tamaiti taitoatasi ona auai atoatoa ma le fiafia i gaoioiga fai a le vasega.
Ia fetuutuunai ma suia tulaga o lesona ma mea o lo o siosiomia ai, ina ia faamalieina tulaga manaomia mo tamaiti e i ai mea o faaletonu.