Lesona 12

Ou Te Faafetai Mo Manu

Faamoemoega

Ia fesoasoani ina ia maua e tamaiti taitoatasi le lagona faafetai i le Tama Faalelagi ma Iesu Keriso mo manu.

Sauniuniga

1. Ia suesue ma le agaga tatalo le Kenese 1:24–25 ma le Kenese 6:5–8:19.

2. O Mea e faaaogaina:

   1. O se Tusi Paia

   2. Ata 1-6 e oo i le 1-19 o manu (o lo o mafai foi ona maua ata fapea o manu i Seti 4 ma le 5 o Ata O Fesoasoani Vaaia a le Peraimeri).

   3. Ata 1-28, Foafoaga-Meaola (Taga o Ata o le Talalelei 100; 62483); Ata 1-29, Fausiaina o le Vaa (Taga o Ata o Ata o le Talalelei 102; 62053); ata 1-30, Noa ma le Vaa ma Manu Fetolofi (Taga o Ata o le Talalelei 103; 62305).

3. Ia faia sauniuniga e tatau ai mo so o se Gaoioiga E Faamauoa Ai e te manao e faaaoga.

Gaoioiga E Aoao Ai

Tofi se tamaitiiti e faia le tatalo amata.

Gaoioiga E Faatosina Mai Ai:

Ia tuu ata tipi o manu i luga o le fola o le fale po o luga foi o se laulau i luma o tamaiti. Fesoasoani i le tamaitiiti i le filifilia o se ata tipi, ia faailoa atu le igoa o lena manu, ma ia faaali atu i le vasega. Ia faaauau ona faia lena gaoioiga seia tofu maua uma e tamaiti le avanoa.

Na Poloaiina E Le Tama Faalelagi Iesu Keriso Ina Ia Foafoaina Manu

Ia toe faamanatu faatasi ma tamaiti, le poloaiina e le Tama Faalelagi o Iesu Keriso ina ia ona foafoaina lo tatou lalolagi matagofie, e aofia ai le ao ma le po, le sami ma le laueleele, ma laau iti ma laau tetele. Ia faaali atu le Tusi Paia ma faamanatu i tamaiti tatou te faitau i tala e uiga i le foafoaga i totonu o lenei tusi. Faamatala atu o lo o tau mai e le Tusi Paia i ai tatou, o le Tama Faalelagi na poloaiina Iesu Keriso ia foafoaina manu fetolofi uma ma tuuina i luga o le fogaeleele.

Faaali le ata 1-28, Foafoaga - Meaola.

• O ai na foafoaina mea uma o lo o faaalia i lenei ata?

• O a igoa o nei manu vaefa o lo o faaalia i lenei ata?

Faamatala atu o Iesu na foafoaina ituaiga uma o manu vaefa ina ia i ai i luga o le fogaeleele. O nisi manu vaefa o lo o mau i faatoaga e tausi ai manu, o nisi foi o lo o mau i tafatafa ane o o tatou lava fale. O nisi manu vaefa o lo o mau i le vaomatua, o nisi e mau i luga o mauga, ma o nisi foi e mau i le toafa. O nisi manu vaefa e mau i vaega malulu o le lalolagi ma o nisi foi manu vaefa e mau i atunuu taumafanafana.

• O a manu vaefa e mau i faatoaga e tausi ai lafu manu?

• O a manu vaefa e nonofo i le vaomatua, manu e nonofo i luga o mauga, atoa ma manu vaefa e nonofo i le toafa?

Gaoioiga

Faatutu i luga tamaiti ma fai i ai e faafoliga i manu e sili ona latou fiafia i ai.

E Fesoasoani Manu I Ai Tatou

Faamatala na poloaiina e le Tama Faalelagi Iesu Keriso na te foafoaina manu ma tuu mai i luga o le fogaeleele e fesoasoani i ai tatou. Tatou te faaaogaina nisi manu mo meaai, o nisi manu e faia galuega mo i tatou, ma o nisi e matagofie i le matamata i ai po o le taaalo ai foi.

• E faapefea ona fesoasoani manu ia i tatou?

• O a manu tatou te maua mai ai meaai, e pei o le suasusu, fuamoa, po o aano foi o manufasi?

• O a manu tatou te maua mai ai mea e fai ai o tatou lavalava?

• O a manu e lelei mo le tausi e fai ma fagafao?

• O a manu vaefa e mafai ona tatou tietie ai?

Tuu atu i tamaiti e faamatalaina ni mea na oo ia i latou i le faafeagai ai ma ituaiga eseese o manu vaefa.

Sa Faasaoina Manu Mai Le Lolo

Ia faamatala atu le tala ia Noa ma le Vaa e pei ona i ai i le Kenese 6:5-8:19. Faaali le ata 1-29, Fausiaina o le Vaa, ma le ata 1-30, Noa ma le Vaa ma Manu. E mafai foi ona e faaaogaina ata tipi e faamalamalama atili ai le tala.

• Sa faapefea ona faamanuiaina Noa ma lona aiga i lo latou usiusitai ia Iesu?

• Sa faapefea ona faasaoina manu?

• O le a le mea e faamanatu mai ai ia i tatou, i le taimi tatou te vaaia ai se nuanua?

Gaoioiga

Faatutu i luga tamaiti ma outou faia faatasi taga a o faitau faatauloto le fuaiupu o lo o i lalo:

O Noa

Na fau e Noa se vaa tele (faaloloa i luma lima);

Na ia iloa lelei le mea e ao ona fai (tuu le limatusi i le itu o le ulu).

Na ia tu’itu’i, ‘ili, ma tau fuafua (fai taga o mea e pei ona ta’ua)

E pei ona faatonuina ai (lue i luga ma lalo le ulu).

O lona aiga ua valaau i ai (talo lima)

E o i le vaa e faatalitali ai. (Savavali filemu i le mea o i ai)

O manu ua taitoalua ma o mai, (tuu i luga tamatamai lima e lua)

I le vaa e faatafetafea ai (fai taga faatafetafea i lima.)

O ao lapopoa o le lagi ua faapotopoto ai, (Tuu lima i luga o le ulu)

O le timu ua mamafa mai. (Faatetetete mai i lalo tamatamai lima)

Le lalolagi ua ufitia, (Taga o le saluina o le otaota)

O le eleele ua natia (Faliu i le isi itu ma le isi itu)

Sa opeopea le vaa, (Taga o le opeopea)

I le tele o ao ma po (Faasavavali tamatamai lima e lua i luga o alofilima)

Seia oo ina toe susulu mai le la, (Faalapotopoto lima i luga o le ulu)

Ua mafanafana ma malamalama na’ua.

Ua matutu uma le vai (kolosi lima i luga o le fatafata);

O le eleele ua aliali mai, (Matala lima ma faaloloa)

O Noa ma lona aiga ua faafetai. (Piilima ma punou le ulu)

Aua o le Atua sa faatasi ai.

(Adapted from a verse by Beverly Spencer).

Molimau

Ia faailoa atu ou lagona o le agaga faafetai e tusa ma se lalolagi matagofie na foafoaina e Iesu Keriso e tusa ai ma le fuafuaga paia a le Tama Faalelagi. Ia faailoa atu le tele o lou agaga faafetai mo manu ua tuuina mai i luga o lenei fogaeleele mo lo tatou faaaogaina ma fiafia ai.

O Isi Gaoioiga E Faamauoa Ai

Filifili nisi o nei gaoioiga e faaaoga i le taimi o le lesona.

1. Ia fai le taaloga “Manu, Manu O Ai Oe?” Ia faatutu i luga tamaiti i se lio. Ia tu se tamaititi e toatasi i le ogatotonu o le lio, ma manatu faapea o ia o se manu. Tuu atu i isi tamaiti e sii mai o latou lima e mate mai le manu o lo o faataitai mai e le tamaitiiti o lo o i le ogatotonu o le lio. A sao le mate a se tamaitiiti, ona tuu atu lea ia te ia e alu ane i totonu o le lio ma faataitai ane taga o se isi manu. E mafai ona e fai atu i le tamaitiiti e musumusu ane ma tau ane muamua ia te oe le igoa o le manu o le a na faataitaiina, ina ia manino lelei i lona mafaufau le manu.

2. Ia fai le taaloga “O le a Lenei Manu?” Ia faailoa atu i tamaiti ni faamatalaga fa’aataata e iloa gofie ai e i latou ia manu faapitoa. Atonu o le a mafai ona faailoa ane e ia faamatalaga faaataata o mea e nonofo ai ia manu, o o latou lanu, lapopoa, o o latou leo, atoa ma le ala e mafai ona latou fesoasoani ai i tagata. Fai atu i tamaiti e sii mai o latou lima pe a fai latou te manatu ua latou iloa manu o lo o e tautala faatatau i ai. Ia faia faatele taga o isi manu eseese e te manao i ai.

3. Ia usu pe fai faatasi ma tamaiti upu o le pese lenei “Matua Tele Naua Le Lalolagi” (Children’s Songbook p.235). Ia fai taga e pei ona faatonuina i lalo:

   O le lalolagi e matua telē, ma e lapotopoto foi. (Ia fai se lio tele i lima)

   Ma o lo o maua ai i totonu mea na faia e le Atua ua moni;

   O Mauga, (Tuu lima i luga ae o le ulu faafoliga e pei o ni mauga.)

   Ma vanu, (Tuu ogalima faatautau i luma o le tino)

   Ma laau e uumi tele. (Sii lima agai i luga ma tu tetee)

   O manu lapopoa, (Sii lima ma aapa i luga.)

   Ma manu laiti. (Punou ifo i lalo)

   O le lalolagi e matua telē, oi e lapotopoto foi. (Ia faia se lio tele i lima)

   E alofa le Atua ia i tatou uma, ua tele naua o tatou faamanuiaga. (Ia fusi le tino i lima)

4. Tuu atu i tamaiti e talanoa e uiga i so o se ituaiga o fagafao o lo o i ai ia i latou po o fagafao foi e mananao latou te maua.

5. Tuu atu pepa ma penivali i tamaiti. Tuu atu i tamaiti taitoatasi latou te tusia le ata o le manu e sili ona latou fiafia i ai. Ia tusi i ata taitasi le tala: “Ou te faafetai mo manu”.

Gaoioiga Faaopoopo Mo Tamaiti Laiti

1. Faaali le ata 1-28, Foafoaga-Meaola. Ia faamatala i au lava upu le tala e uiga i le foafoaina o manu vaefa (tagai i le Kenese 1:24–25). Ia faailoa atu lou agaga faafetai mo manu vaefa.

2. Ia filifili ni nai manu e masani ai tamaiti. Fai i tamaiti e manatu faapei o i latou o manu. Ia talanoaina foliga o manu ma o latou leo atoa foi ma o latou aoga.