Lesona 30
E Mafai Ona Ou Faamagalo Atu I Isi
Faamoemoega
Ia fesoasoani i tamaiti taitoatasi ia latou maua le loto faamagalo.
Sauniuniga
-
Ia aoao ma le agaga tatalo le Kenese 37:12–28; 41:38–43; 42:1–8; 45:1–15; Mataio 18:21–22; ma le Luka 23:33–34.
-
Ia saunia ni fasipepa e tusi ai se faamatalaga e pei o faaupuga o lo o i lalo:
-
Ua po ma tulei oe i lalo e se tasi.
-
E le faatagaina e se tasi oe ona e taalo i se taaloga.
-
Ua faaleaga e se tasi sau mea totino.
-
Ua faaigoa oe i se igoa le lelei.
-
Ua fao e se isi se mea na e taalo ai ma ua musu e te toe faaaogaina.
Saunia ia tofu tamaiti o le vasega ma se fasipepa (fai ma nisi faaupuga pe a talafeagai ai). Tuu pepa i se pusa laitiiti ma tusia ai upu ia i le pusa, “Pusa o le Faamagaloga.”
-
-
O Mea e faaaogaina:
-
O se Tusi Paia.
-
Ata 1-47, O Tamaiti O Lo o Tauaimisa; ata 1-57, O Iosefa Ua Faatauina Atu E Ona Uso (Taga o Ata o le Talalelei 109;62525); ata 1-58, O Iosefa O Lo o Faailoa Atu I Ona Uso; ata 1-59, O le Faasatauroga (Taga Ata o le Talalelei 230; 62505).
-
-
Ia faia sauniuniga e talafeagai ai mo so o se Gaoioiga E Faamauoa Ai e te manao e faaaoga.
Gaoioiga E Aoao Ai
Tofi se tamaitiiti e faia le tatalo amata.
Gaoioiga e Faatosina Mai Ai:
Faaali le ata 1-47, O Tamaiti O Lo o Tauaimisa.
Gaoioiga e Faatosina Mai Ai:
-
O a mea a nei tamaiti o lo o fai?
-
O le a se mea ua mafua ai ona tauaimisa?
-
Faamata o le a so latou lagona?
-
O le a se mea e mafai ona fai atu ai le tasi i le isi ina ia faamuta ai le tauaimisa ma latou maua ai ni lagona lelei?
Toe faamanatu le lesona na se’i uma atu nei i le taua o le fai atu, “Ua ou sese.” Faamalamalama atu a uma ona fai atu tamaiti ua sese, ua tatau loa ona faamagalo e le tasi le isi. O lona uiga, ua le tatau ona toe ita le tasi i le isi ae ua tatau ona avea ma uo. Faamanatu i tamaiti le tala ia Mati ma Talavisi mai le lesona talu ai. Sa faamagalo e Mati ia Talavisi i le aveina o ana mea taalo. Ma sa faaauau pea la laua faigauo.
Sa faamagalo e Iosefa ona uso
Tala
Faaali atu le ata 1-57, O Iosefa O lo o Faatauina Atu e Ona Uso. Faamatala atu le tala i le faatauina atu o Iosefa i Aikupito, e pei ona ta’ua i le Kenese 37:12–28.
Tala
-
O le a se lagona na oo ia Iosefa ina ua faatauina atu o ia e ona uso e fai ma pologa i Aikupito?
Faamatala atu na avea Iosefa ma tagata taua i Aikupito (tagai i le Kenese 41:38- 43). Ina ua mavae tausaga e tele, sa o mai uso o Iosefa i Aikupito e aveatu ni meaai aua ua leai ni meaai i lo latou nuu. Sa latou iloa ai o lo o soifua lava Iosefa ma o ia o se tagata taua tele i Aikupito (tagai i le Kenese 42:1–8; 45:1–15).
Faaali le ata 1-58, Ua Faailoa Atu Iosefa I Ona Uso.
Tala
-
O le a se lagona na oo ia Iosefa ina ua toe faatasia ma ona uso? (tagai i le Kenese 45:14–15.)
-
Pe sa ita Iosefa i ona uso? (tagai i le Kenese 45:5.)
-
E te manatu o a ni lagona o uso o Iosefa ia te ia?
-
Na faapefea ona faaali atu e Iosefa ua ia faamagalo i ona uso? (tagai i le Kenese 45:5–15.)
Gaoioiga
Vaai se tamaitititi e fai ma Iosefa ae o isi tamaiti uma e fai ma ona uso. Fesoasoani i tamaiti e faatino le tala ia Iosefa ina ua toe faatasia ma ona uso ma faamagalo ia te i latou.
Sa fetalai mai Iesu ia tatou maua le loto faamagalo
Tuu i luga se kopi o le Tusi Paia. Faamatala atu o totonu o le Tusi Paia, o lo o fetalai mai ai Iesu ia te i tatou ia tatou maua le loto faamagalo. Sa fesili se tasi o aposetolo a Iesu e uiga i le faamagalo atu o isi (tagai i le Mataio 18:21–22). Sa fetalai atu Iesu ia te ia e tatau lava ona tatou maua le loto faamagalo i taimi uma. Faamatala atu o lo o taua mai foi i le Tusi Paia, o Iesu e loto faamagalo.
Faaali le ata 1-59, O Le Faasatauroga. Faamatala atu le agaleaga tele o fitafita ia Iesu.
Sa latou sasa ma feanu ia te ia. Sa tutui e fitafita lima ma vae o Iesu i fao ma faatautau o ia i luga o le satauro ina ia maliu ai. Faamatala atu na faamagalo e Iesu ia fitafita. E le i toatamai o Ia i fitafita ma le mea sa latou faia. (Ia e faaeteete pe a e faamatalaina lenei tala. Atonu o nisi tamaiti e vaivai gofie i le tulaga na faatigaina ai e tagata Iesu.)
Su’e le Luka 23:34 ma faamatala i tamaiti le saunoaga a Iesu ina ua tatalo i le Tama Faalelagi ina ua toetoe lava a maliu: “ Lo’u Tama e, ia e faamagalo atu ia te i latou.” Ia fai faatasi leotele e tamaiti lenei fasi fuaitau.
-
E ui lava ina faatigaina e fitafita Iesu, o le a sana mea na fai?
-
O le a se mea e finagalo Iesu tatou te faia pe a fai e faaita i tatou e se isi pe fai mai foi e se tasi se mea tatou te le fiafia ai?
Gaoioiga
Faatonu tamaiti e fai uma lava gaoioiga e te faia. Fai i ai e faataitai atu ia te oe pe a e tu, falōlō, ataata, nofo i lalo, ma piilima. Faamatala atu talu ai sa latou faia mea uma lava sa e faia, o lona uiga o la sa mulimuli ia te oe. Afai e te mulimuli i se tagata, e te faia mea uma lava e faia e lena tagata. A tatou faamagalo atu i isi tagata, o lo o tatou mulimuli ia Iesu. O lo o tatou faia mea sa ia faia. E finagalo Iesu tatou te faamagalo i latou o lo o faia mea tatou te faanoanoa ai pe faaita ai foi i tatou.
E mafai ona tatou faamagalo atu i isi
Gaoioiga
Faaali atu le “Pusa o le Faamagaloga” ma valaau taitoatasi mai tamaiti e piki se fasipepa se tasi mai le pusa.
Faitau faamatalaga taitasi ma fai atu ni fesili e pei o le:
Gaoioiga
-
Sa tupu lenei mea ia te oe?
-
Mata o le a sou lagona?
-
O le a se mea e tatau ona fai atu ai le tagata na faaitaina oe?
-
O le a se mea e tatau ona e faia pe tau atu i se tagata sa agaleaga ia te oe pe sa faaita po o le faia foi o se mea e te le fiafia ai?
Faamatala se taimi na e faamagalo atu ai i se tasi ma pe o a foi ni ou lagona. Fesoasoani ia malamalama tamaiti e finagalo le Tama Faalelagi ma Iesu ina ia tatou maua le loto faamagalo.
Pese
Fesoasoani i tamaiti e usu pe tauloto upu o le pese “Fesoasoani Mai, Lo’u Tama Pele” (Tusi Pese a Tamaiti)
Fesoasoani mai le Tama pele,
Ia ou faamagalo e ita mai.
Fesoasoani mai Tama e,
Ia ou latalata ia oe.
Molimau
Tuuina atu lau molimau e finagalo le Tama Faalelagi ma Iesu ina ia tatou maua le loto faamagalo. Uunai tamaiti e tatalo atu i le Tama Faalelagi e fesoasoani mai ia te i latou ina ia latou maua le loto faamagalo.
O Isi Gaoioiga E Faamauoa Ai
Filifili nisi o nei gaoioiga e faia i le taimi o le lesona.
-
Toe faamanatu le tala i le atalii faamaumau oa, o lo o maua i le Luka 15:11–32. Faaaoga le ata 1-49, O Le Atalii Faamaumau Oa. Fesoasoani ia malamalama tamaiti e alofa le tama i lona atalii ma sa ia faamagalo ia te ia.
-
Fai le tala lea e i lalo e faatino i tamatamai lima. Valaaulia tamaiti e faia taga o lo o e faia.
E lua uo laiti, o le tasi i le agavale ma le isi i le taumatau (uu moto i lima ma tuu uma i luga)
Sa tauaimisa ma ua amata ona fusu (foli le tasi i le isi).
Sa le fiafia lenei uo i lena aso,
Aua sa aoaoina i laua i le ala sao e taaalo ai.
Ona punou lea o le tasi uo laititi ma lafi ua ma (tuutuu i lalo le moto taumatau ma liliu ese);
Na faapena foi le isi, aua ua lagona le maasiasi (tuu i lalo le moto agavale ma liliu ese foi).
Na faapea mai le uo laititi muamua, “Ua ou iloa lau mea e fai (patipati lima).
E faaali atu ai ia te oe ua ou sese, O le a ou fesili atu mo lau faamagaloga.”
“O au foi ua ou sese,” sa fai mai ai le isi,
“Ta taaalo ma fiafia i taimi o totoe o le aso” (piilima ma nofo i lalo).
-
Fai ni pine faapipii faigofie mo tamaiti taitasi e fai pe a o i le fale. Ia tusia i pine taitasi upu nei: E mafai ona ou faamagalo atu.
Gaoioiga Faaopoopo Mo Tamaiti Laiti
-
Toe faamanatu le tala mai le lesona 29 e uiga i tamaiti e toalua o lo o taaalo (tagai i le Gaoioiga Faaopoopo mo Tamaiti Laiti, gaoioiga 4). Faamatala le faamagaloina e le tamaitiiti na lavea o le isi.
-
Usu pe tauloto upu o le pese “Fetalai Mai Iesu E Alofa Atu I Tagata Uma” (Tusi Pese a Tamaiti) po o le “E Manao Iesu Ia Ou Fai Ma Sulu” (Tusi Pese a Tamaiti).
-
Usu pe tauloto upu o le pese “Afai E Te Fiafia” ( Tusi Pese a Tamaiti). Faamatala i tamaiti afai tatou te faamagalo atu ia te i latou o lo o agaleaga mai ia te i tatou, o le a tatou maua le lagona fiafia.