Lesona 23
E I Ai Lo’u Aiga
Faamoemoega
Ia fesoasoani ina ia malamalama tamaiti taitoatasi sa fuafuaina e le Tama Faalelagi ia tofu i tatou uma ma se aiga o lo o moomoo ma alolofa ia te i tatou.
Sauniuniga
-
Ia suesue ma le agaga tatalo le Luka 1:26–35.
-
Ia faamasani atu i aiga o tamaiti o lau vasega ma ia saunia e ta’ua se mea lelei o lo o alia’e mai i aiga taitasi e pei o se pepe fou, se tuagane po o se tuafafine o ave se misiona, po o se tafaoga faaleaiga.
-
O Mea e faaaogaina:
-
O se Tusi Paia.
-
O se penisina ma se solo laupapa.
-
Ata 1-5, Aiga O Lo o I Ai Se Pepe (62307); ata 1-7, Se Aiga Agaalofa; ata 1-16, Le Soifua Mai O Le Faaola (Taga o Ata o le Talalelei 201;62495); ata 1-23, O se Faamoega Manu O Lo o I Ai ni Manulele Laiti; ata 1-51, O se Aiga O Lo o Galulue Faatasi (62313); ata 1-53, Fiafiaga Faaleaiga (62384).
-
-
Ia faia sauniuniga e talafeagai ai mo soo se Gaoioiga E Faamauoa Ai e te manao e faaaoga.
Faaaliga mo le faiaoga: Ia faaeteete i tulaga o aiga o tamaiti o lau vasega. Fesoasoani ia malamalama tamaiti e le o le aofa’i o le aiga e taua, ae o le alofa o le tasi i le isi, ma le fetausia’i.
Gaoioiga E Aoao Ai
Tofi se tamaitiiti e faia le tatalo amata.
Gaoioiga e Faatosina Mai Ai:
Faaali atu le ata 1-23, O se Faamoega Manu O Lo o I Ai Manulele Laiti. Tuu tamaiti e talatalanoa e uiga i le ata ma faasino mai manu ma le faamoega.
Gaoioiga e Faatosina Mai Ai:
-
O ai na faia le faamoega mo manulele laiti?
-
Aisea e moomia ai e manulele laiti se tina ma se tama e tausia i latou? (E fafagaina, faamafanafanaina ma puipuia i latou mai faigata.)
-
Pe a oo ina tau matutua ma malolosi ia manulele laiti, o ai e aoaoina i latou e felelei?
Faamatala atu e i ai se aiga o manulele laiti e fesoasoani ma vaaia mea latou te moomia.
E i ai so’u aiga
-
E i ai lo’u aiga?
-
Aisea e te manaomia ai se aiga?
Faaali atu le ata 1-5, Aiga O Lo o I Ai Se Pepe. Faamanatu le fuafuaga a le Tama Faalelagi mo i tatou uma lava taitoatasi ina ia tatou o mai i le lalolagi ma avea o se vaega o se aiga. Faamatala a faapea e fanau se pepe, e le mafai e le pepe ona tausia o ia e ia lava. E le mafai e se pepe ona fafaga ia lava pe fai ona lavalava. E moomia se aiga e vaaia o ia.
-
O ai na tausia oe ina ua e fanau mai?
-
O a nisi o mea na faia e lou aiga mo oe a o e pepe?
-
O a nisi o mea o lo o faia e lou aiga mo oe i le taimi nei?
-
O ai na fuafuaina ia i ai sou aiga?
Fesoasoani ia malamalama tamaiti i le fiafia sa oo i ai o latou aiga ina ua latou fananau mai. Faamamafa atu le alolofa o o latou matua ma isi tagata o o latou aiga ia i latou, ma lo latou naunau ina ia maua e tamaiti le fiafia.
Pese:
Fesoasoani i tamaiti e usu pe fai upu o le pese: “O A’u O Se Atalii O Le Atua” (Tusi Pese a Tamaiti).
O au o se atalii o le Atua,
Ua na auina mai au nei,
Ia ou nofo ai i lenei lalolagi,
Ma matua agalelei.
Tago mai, savali mai, i ou tafatafa,
Ina nei ou sese,
Aoao mai mea e ao ona fai,
Ia ou toe foi atu ai.
Faaali atu le ata 1-16, O Le Soifua Mai O Le Faaola, ma faamatala atu sa soifua mai Iesu i se aiga ina ua afio mai i le lalolagi (tagai i le Luka 1:26–35).
Pese:
-
O ai tagata ia e i le ata?
-
O ai le tina o Iesu?
-
O ai le tama o Iesu? (Faamanatu i tamaiti o le Tama Faalelagi le tama o Iesu; o Iosefa o se tamaloa lelei sa filifilia e le Tama Faalelagi e tausia Maria ma Iesu.)
-
O a ni lagona o Maria ma Iosefa ia Iesu?
-
O ai sa fuafuaina ia i ai se aiga o Iesu e alolofa ma tausia o ia?
E alolofa le Tama Faalelagi ma Iesu i aiga uma lava
Faaali atu le ata 1-7, O Se Aiga Agaalofa. Faamatala o nisi aiga e i ai se tina ma se tama, a o nisi aiga e na o le tama pe na o le tina foi. O nisi aiga e i ai se matua tausi, o nisi foi e i ai tagata e fesoasoani e tausia tamaiti. O nisi aiga e toatele tamaiti, a o nisi aiga pe na o se toatasi se tamaitiiti po o le leai foi. Fesoasoani i tamaiti ia malamalama e eseese uma lava aiga ma e alolofa le Tama Faalelagi ma Iesu i aiga taitasi.
Gaoioiga:
Ia faamatala e tamaiti taitasi o latou aiga. Ia auauai tamaiti e tusi ni ata pepe laau (stick figures) i le laupapa e faapei o tagata o o latou aiga. Ia ta’u leotele e le tamaitiiti igoa o tagata o lona aiga ona faitau lea o le aofai o lona aiga. A uma lea tamaitiiti, ta’u i le vasega se mea ua e aoaoina e uiga i le aiga o le tamaitiiti.
E finagalo le Tama Faalelagi ma Iesu ia faaalia le alofa ma le fetausia’i o tagata o le aiga.
Pese:
Fesoasoani i tamaiti e usu le pese po o le faitau o upu “O Se Aiga Fiafia” (Tusi Pese a Tamaiti).
Ou te alofa ia tina,
Faapea foi ma tama;
Fealofani matou uma,
Matou o se aiga fiafia.
(From Merrily We Sing, copyright © 1948, 1975 Pioneer Music Press, c. [a division of Jackman Music]. Used with permission.)
Pese:
-
E faapefea ona e iloa e alolofa lou aiga ia te oe?
-
O le a se mea e te faia e faaali atu ai i tagata o lou aiga e te alofa ia te i latou?
Faaali atu le ata 1-53, Fiafiaga Faaleaiga.
Pese:
-
O se aiga fiafia lea? E faapefea ona e iloa?
-
O le a se mea e te manao e te faia ma lou aiga?
-
Pe afai e agalelei le tasi i le isi, o le a sou lagona?
Faaali atu le ata 1-51, O se Aiga O Lo o Galulue Faatasi.
Pese:
-
O le a le mea a lenei aiga o lo o faia?
-
O le a se mea e te faia e fesoasoani ai i lou aiga?
-
O le a sou lagona pe a e fesoasoani i tagata o lou aiga?
Gaoioiga:
Fai i tamaiti e mafaufau i ni auala eseese e mafai ai ona fesoasoani i o latou fale, e pei o le faaputuputuina ma teuina o meataalo, taaalo ma le pepe, po o le fesoasoani i le fufuluina o ipu. Fai i tamaiti e fai taga o mea o lo o latou ta’u maia. Faamalosiau atu i tamaiti ina ia fesoasoani i o latou aiga i le vaiaso.
Molimau:
Ta’u atu i tamaiti ou lagona faafetai i le Tama Faalelagi mo lou faamanuiaga o le avea lea ma se vaega o se aiga.
O Isi Gaoioiga E Faamauoa Ai
Filifili nisi o nei gaoioiga e faaaoga i le taimi o le lesona.
-
Toe usu le pese: “O Se Aiga Fiafia.” Filifili ni tamaiti e faatinoina se aiga e pei ona taua i le pese. Ia tofu latou ma le faailoga e ta’u mai ai po o ai le tagata o le aiga o lo o latou faatinoina. Tu i tua o tamaiti na e toafa ma pa’i i le ulu o le tamaitiiti tonu a o outou usuina upu po o le taulotoina foi ma tamaiti. Toe usu le pese, ina ia maua ai e isi tamaiti le avanoa e faatinoina ai tagata o le aiga.
Fai pea seia tofu uma tamaiti ma le avanoa.
-
Faamatala i tamaiti faatonuga a le Tupu o Peniamina i aiga, o lo o maua i le Mosaea 4:14–15. Faitau leotele le afa mulimuli o le fuaiupu e 15. Fai i tamaiti e ta’u mai ni auala e mafai ai e tagata o se aiga ona alolofa ma auauna le tasi i le isi.
-
Fesoasoani i tamaiti e fai le gaoioiga lea e faaaoga ai tamatamailima:
O Lo’u Aiga
O lo’u tina aulelei lenei (tusi i le limatusi);
O lo’u tama umi lenei (tusi i le loaloavale).
O lo’u uso/tuafafine matua lenei (tusi i le lima tuumama)
E le umi tele na’uā.
O lo’u uso/tuagane laitiiti leā (tusi i le lima tamatama)
E matua’i la’itītī na’uā
O ai le tagata lenei? (tusi i le lima matua)
Se ua uma ona e iloa o a’u nei,
Tasi, lua, tolu, fa, lima, ua e iloa la (pa’i i tamatamai lima taitasi a o e faitauina)
Ua maua ai lo’u aiga manaiā!
Fesoasoani i tamaiti e tuu i luga le aofai o tamatamailima e ta’u mai ai le aofai o tagata o lona aiga (afai e sili atu i le sefulu tagata i se aiga o se tamaitiiti, ia vaai se isi tamaitiiti e fesoasoani e faaatoa ai). Fesoasoani i tamaiti e toe faitau laina mulimuli o le fuaiupu, faitau le aofai o tagata o le aiga o le tamaititi a o le i faia le fuaitau lea: “ua maua ai lo’u aiga manaiā!”
Gaoioiga Faaopoopo Mo Tamaiti Laiti
-
Faaali atu le ata 1-23, O se Faamoega Manulele O Lo o I Ai Ni Manulele Laiti. Fesoasoani i tamaiti e fai taga o le pese: “O Manulele i le Laau” (Children’s Songbook, p.241) a o usuina pe faatauloto foi upu:
Matou te o e su’e se ofaga laiitiiti o manulele (faaofuofu tamai lima)
I lala o la’au tetele (Tuu i luga a’e o le ulu lima ma faalapotopoto)
O mai tatou faitauina fua o lo o i ai;
E tasi, lua, tolu ua maua ai (faitau taitasi i luga tamatamailima e tolu).
O le tina o manu o lo o nofo i le ofaga, (faaofuofu le lima agavale ae faatietie ai i luga le lima taumatau)
E fofoa fua uma lava. (tuu i luga tamatamailima e tolu)
O le tamā o manu e lelelele faataamilo i le ‘ea, (fai taga lele)
E puipui lona aiga mai so o se mea.
-
Usu le “Ua Matou Faatasi” (Children’s Songbook, p.261), faaaoga ia tama, tina, uso ma tuagane i le mea lena e ta’u ai igoa i le pese. Fai i tamaiti e pati pe sisiva a o lo o usuina le pese.
Ua matou faatasi, faatasi, faatasi;
Ua faatasia lo matou aigā.
O uso ma tuagane, o tama ma tina;
Ua matou faatasi i lenei aso la.
-
Fesoasoani i tamaiti e fai taga o le fuaiupu lea a o lo o e faia upu:
O Lo’u Aiga.
E pei lava o manulele i luga o laau, (tatala lima pei ni apaau)
E i ai foi le aiga o a’u. (tusi ia te oe lava)
E maua mai ai a’u meaai, (faafoliga o la e ‘ai)
Ma a’oa’o ou te taalo ma le faiga e fai ai, (oso)
Ina ia ou saogalemu i le aso atoa ma fiafia ai. (fai se ataata lapoa).
-
Fai upu ia pe usu faapese foi i so o se fati lava e fetaui ai.
E alofa mama ia te oe, e alofa ia te oe.
O Papa foi, o papa foi e alofa ia te oe.
O tagata uma, tagata uma o lou aiga
E alolofa moni ia te oe.