O Au o se Atalii o le Atua

Faamoemoega

Ia fesoasoani i tamaiti taitoatasi ia malamalama, o i tatou o fanau faaleagaga a le Tama Faalelagi, o Le o lo o silafia ma alofa mai ia te i tatou.

Sauniuniga

Ia suesue ma le agaga tatalo le Esoto 2:1–10; Salamo 82:6; Mataupu Faavae ma Feagaiga 138:55–56; ma le Mose 1:1–6. Ia tagai foi i le Mataupu Faavae o le Talalelei (31110), mataupu e 2.
Faafesootai matua o tamaiti taitoatasi e saili mai ai ni uiga tausaafia se lua po o se tolu o le tamaitiiti lava ia.
O mea e faaaogaina:
1. O se Tusi Paia ma se Penina Tautele.
2. O se taga laitiiti ua su’i ma tuu i ai i totonu ni fatu pi po o ni mea ninii galemulemu ona nonoa lea o le gutu o le taga.
3. Ata 1-1, O Le Lalolagi (62196); ata 1-2, Mose i le Ato Kome (Taga o Ata o le Talalelei 106; 62063).
Ia faia sauniuniga e talafeagai ai mo so o se Gaoioiga E Faamauoa Ai e te manao e faaaoga.

Gaoioiga E Aoao Ai

Tofi se tamaitiiti e faia le tatalo amata.

Gaoioiga e Faatosina Mai Ai

Usu faatasi ma tamaiti le pese “O Au o se Atalii o le Atua” (Tusi Pese a Tamaiti)

O au o se atalii o le Atua,
Ua Na auina mai au nei
Ia ou nofo ai i lenei lalolagi
Ma matua agalelei.

Tago mai, savali mai i ou tafatafa
Ina nei ou sese
Aoao mai i mea e ao ona fai
Ia ou toe foi atu ai.

Togi le taga fatu pi po o se mea galemulemu i se tamaitiiti a o e faia upu nei, “Ou te iloa se atalii o le Atua e igoa ia .” Fai i le tamaitiiti e tau lava e ia lona igoa ma toe faafoi atu ia te oe le taga fatu pi. Ia fai pea lea gaoioiga seia tofu oo uma i ai tamaiti.

O i tatou o fanau faaleagaga a le Tama Faalelagi.

O ai le Tama Faalelagi? (Faaaoga tali a tamaiti e taitaia ai oe i le faamalamalamaina o le vaega lenei o le lesona i le tulaga talafeagai.)

Faaali atu le ata 1-1, O Le Lalolagi. Faamatala atu a o le i fananau mai i tatou i lenei lalolagi, sa tatou nonofo i le lagi ma le Tama Faalelagi. Sa avea i tatou o ni agaga iina. O le agaga, o le mea lea o lo o i totonu ia i tatou o lo o mafua ai ona tatou ola. A o avea i tatou ma agaga, sa le i ai ni o tatou aano ma ni ponaivi e pei o o tatou tino o lo o i ai nei, ae peitai o o tatou foliga lava nei.

Ia faamatala atu o le Tama Faalelagi o le tama o o tatou agaga, ma o i tatou o ana fanau faaleagaga. Tatou te le o manatua sa tatou nonofo ma le Tama Faalelagi muamua ae tatou te le i o mai i lenei lalolagi, ae peitai ua tatou iloa o tatou o ana fanau faaleagaga aua sa tatou faitau i ai i tusitusiga paia.

Faaali atu le Tusi Paia ma faitau le Salamo 82:6, faamalamalama atu “o le Silisili Ese” o lona uiga o le Tama Faalelagi. Ia faamatala atu o tagata taitoatasi o lo o i le lalolagi o ni atalii o le Tama Faalelagi.

Pese

Toe usu le pese “O Au o se Atalii o le Atua.” Ia faamalamalama atu o le Atua o se tasi lea suafa o le Tama Faalelagi.

E Silafia Ma Alofa Le Tama Faalelagi Ia Te I Tatou

Faamatala atu e alofa tele le Tama Faalelagi ia te i tatou uma taitoatasi aua o tatou o ana fanau. Na te silafia o tatou igoa ma mea uma e uiga ia i tatou. Na te silafia mea tatou te fiafia ai ma mea tatou te faanoanoa ai. Na te silafia le mea silisili mo i tatou uma taitoatasi.

Gaoioiga

Fai faatele ma tamaiti le fuaitau lea, ma faaaoga ai taga o lo o faamatalaina:

Ua Silafia Au E le Tama Faalelagi

Ua silafia au e le Tama Faalelagi (tusi i le tagata lava ia)
Ma mea ou te manao e fai.
Na te silafia lo’u igoa ma le mea ou te nofo ai (fai se taualuga o se fale i le faafepa’ia’i lea o tumutumu o tamatamai lima o lima uma e lua)
Ou te iloa o au o lo o alofa mai i ai (kolosi lima ma tuu i luga o tauau ma fusimau).

Na te silafia le mea ou te fiafia ai (tuu tamatamai lima i le gutu ma eu i luga ia foliga fiafia)
Na te silafia le mea ou te faanoanoa ai (tuu tamatamai lima i le gutu ma toso i lalo ia foliga faanoanoa)
Ou te iloa o au e fia fesoasoani mai i ai (tusi i le tagata lava ia)
Ma o le mea lena ou te fiafia ai!

Fai i se tamaitiiti e sau i luma o le vasega. Faaaoga mea na e aoao mai i matua o le tamaitiiti. Faamatala atu e silafia e le Tama Faalelagi uiga tausaafia o se tamaitiiti. Mo se faataitaiga, e mafai ona e fai atu, “E silafia e le Tama Faalelagi, o Emele o se afafine lelei tele, e fesoasoani i lona tina i le tausia lea o si ona uso laitiiti, ma e masani lava ona mata fiafia ma mata ataata.” Ia fai pea seia soo uma tamaiti.

Faamatala atu afai tatou te faia mea lelei ma uiga agalelei, ua tatou faapei o le Tama Faalelagi.

E Mafai Ona Tatou Faapei o Le Tama Faalelagi

O le a le ta’u o se maile faatoa fanau mai?
A tupu lena tamai maile, o le a lona ta’uga?
O le a le ta’u o se moa faatoa fanau mai?
O le a le ta’uga o lena tamai moa pe a oo ina tele?

Ia faamalamalama atu e faapei lava ona tuputupu ae o meaola e faapei o o latou matua, o le a tatou tuputupu ae foi e faapei lava o o tatou matua. O le Tama Faalelagi o le tama o o tatou agaga, o le mea lea e mafai ai ona tatou tuputupu ae e faapei lava o Ia. E lelei, agaalofa ma agalelei le Tama Faalelagi, ma e finagalo e fesoasoani mai ia i tatou. A tatou lelei, agaalofa ma agalelei, ua faapei i tatou o le Tama Faalelagi. Faamatala atu e tatau ona tatou taumafai ia faapei o le Tama Faalelagi i aso uma.

O Lo o I Ai Ni Galuega Taua A Le Tama Faalelagi Tatou Te Faia

Tala

Faaali atu le ata 1-2, Mose i le Ato Kome, ma faamatala atu le tala pe na faapefea e le afafine o Farao ona faasaoina Mose mai tulaga faigata a o pepe, o lo o maua i le Esoto 2:1–10.

Ia faamatala atu na tupu ae Mose ma avea o se tasi o fesoasoani taua a le Tama Faalelagi, o se perofeta. Sa ta’u atu e le Tama Faalelagi ia Mose o ia o lona atalii (tagai i le Mose 1:4,6) ma o lo o i ai sana galuega taua e fai e Mose. Faitau le vaega muamua o le Mose 1:6 i tamaiti. Sa faia e Mose lea galuega i se isi nuu, lea na ia aoao atu ai tulafono a le Tama Faalelagi, ina ua ia aumaia le fanauga a Isaraelu mai le nuu o Aikupito, le mea sa nofo pologa ai.

Ia auauai mai tamaiti i luma o le vasega, ma fesoasoani atu ia faia le vaega muamua o le Mose 1:6, ae sui i lona lava igoa: “Ma o lo o ia te au se galuega mo oe, (igoa o le tamaitiiti), lo’u atalii e (afafine).”

Faamatala atu e i ai mea taua a le Tama Faalelagi mo i tatou e faia a o tatou nonofo ai i lenei lalolagi, e pei o le avea ma se tina po o se tama, se faifeautalai, se faiaoga, se fesoasoani i le ekalesia, po o se fesoasoani i le nuu.

Tala

O le a se galuega taua faamata o lo o finagalo le Tama Faalelagi ia te oe e te faia?

Gaoioiga:

Ia faatinoina e tamaiti i taga mea latou te mananao e fai pe a matutua. Mo se faataitaiga: O se tina, po o se tina o lo o sapasapai se pepe, se faifeautalai o lo o aoao atu le talalelei, po o se faiaoga o lo o aoao atu se vasega.

Molimau:

Ta’u i tamaiti e tatau ona latou manatua pea o latou o fanau faaleagaga a le Tama Faalelagi ma na te silafia ma alofa mo i latou. Fesoasoani ia te i latou ina ia malamalama e mafai ona avea i latou faapei o le Tama Faalelagi ma o lo o i ai a latou galuega taua e faia i le lalolagi. Atonu e te manao e tau atu ia i latou se mea na e oo i ai na fesoasoani ia te oe e te iloa ai e silafia e le Tama Faalelagi oe ma alofa ia te oe.

O Isi Gaoioiga E Faamauoa Ai

Filifili nisi o nei gaoioiga e faaaoga i le taimi o le lesona.

Faaali atu ata o tagata eseese, po o le talanoa foi i tagata e iloa e tamaiti, ma fesili i ai, “Po o se atalii/afafine o le Atua lenei tagata?” Mo se faataitaiga, “Po o se atalii o le Atua le epikopo?” Po o se atalii o le Atua le alii leoleo? Po o se atalii o le Atua lou tuaoi?” ma isi foi. Fesoasoani ia malamalama tamaiti, o tagata taitoatasi uma lava o atalii o le Atua.
Ina ia faamalamalama atu o le Tama Faalelagi na te silafia ma alofa i tamaiti taitoatasi. Ia faauma e tamaiti au fuaiupu, mo se faataitaiga: “E silafia e le Tama Faalelagi ua ou faanoanoa pe a .” “E silafia e le Tama Faalelagi ua ou fiafia pe a .” “E silafia e le Tama Faalelagi le mea ou te fiafia lava e fai o le .” “E silafia e le Tama Faalelagi ou te fia sau i le Peraimeri aua.” ma isi foi.
Ia faamatala atu o le Tama Faalelagi o le tupu o le lagi ma le lalolagi. Talu ai o tatou o ana fanau, o tatou o perenise ma purinisese. Fai se palealii faigofie mo tamaiti taitoatasi ma tusia ai upu O au o se atalii/afafine o le Atua i palealii taitasi. Tuu i tamaiti e valivali ia palealii.
Ia usu pe fai faatasi ma tamaiti upu o fuaiupu uma e lua o le “Ou Te Iloa O Lo o Soifua Lou Tama” (Tusi Pese a Tamaiti)

Gaoioiga Faaopoopo Mo Tamaiti Laiti

Fai i tamaiti e mafaufau i se mea e fiafia i ai (e mafai foi ona e maua mai lenei faamatalaga mai o latou matua a o le i faia lenei lesona). Fesili i tamaiti taitoatasi po o le a le mea e manao ai, ma fai atu i ai ua silafia e le Tama Faalelagi lena mea. Mo se faataitaiga: “Ua silafia e le Tama Faalelagi e fiafia Lea i maile.”
Fesoasoani i tamaiti e fai le gaoioiga faatino lea:

Afai e te umī tele, (Tutetee ma aapa i luga lima),

O lo o i ai se nofoaga i le lotu mo oe.

Afai e te laititī tele (faanounou i lalo),

O lo o i ai se nofoaga i le lotu mo oe.

Umī (Tutetee)

Laitiitī (faanounou)

Umī (Tutetee)

Laitiitī (faanounou)

O le Tama Faalelagi ma Iesu e alofa māī.
Fesoasoani i tamaiti e fai taga i le gaoioiga lea a o e faia upu:

O Le Pepe Laitiiti O Mose

O le pepe laitiiti o Mose, o lona vaa sa fai ma ona moega (faaofuofu le alofilima ae tuu i ai le isi lima tusi i totonu).

Sa vaaia o ia e lona tuafafine alofa mai le va o vao i le mea sa lafi ai (autilo mai i le va o lima o lo o tuu i luma o mata).

I se tasi aso, sa maua o ia e se purinisese (punou i luma, ma autilo i lalo) ma sii ae o ia i ona lima (ia faafoliga o lo o e sii ae se pepe);

Sa ia faapea atu, “O le a ou ave lenei pepe ma faasaoina mai mea faigata” (faafoliga o lo o luelue se pepe i lima).

(Mai le Fascinating Finger Fun by Eleanor Doan. Copyright © 1951, Faaaoga ina ua faatagaina.)