Lesona 32
Ou Te Faafetai mo Meaai ma Lavalava
Faamoemoega
Ia fesoasoani i tamaiti taitoatasi ia lagona ma faaali atu le agaga faafetai mo meaai ma lavalava.
Sauniuniga
-
Ia aoao ma le agaga tatalo le Kenese 1:11-12 ma le 1 Tupu 17:8-16.
-
O Mea e faaaogaina:
-
O se Tusi Paia.
-
O se fualaau aina mata po o se fualaau fai sua e i ai ni fatu.
-
O se taga o lo o i ai ni fatu pi po o nisi mea galemulemu.
-
Ata tipi 1-5, o le i’a; ata tipi 1-7, o le pua’a; ata tipi 1-8, o le mamoe; ata tipi 1-9, o le povi; ata tipi 1-22, o tamai moa (e maua foi ata tipi e tai tutusa i le Seti 4 o Ata Tipi O Fesoasoani Vaaia a le Peraimeri); pe sue ni ata o manu o lo o maua mai ai meaai ma lavalava i lo outou atunuu.
-
Ata 1-15, O le Faamanuiaina o Meaai; ata 1-50, E Mafai Ona Ou Faia O’u Lavalava.
-
-
Ia faia sauniuniga e talafeagai ai mo so o se Gaioioiga E faamauoa Ai e te manao e faaaoga.
Gaoioiga E Aoao Ai
Tofi se tamaitiiti e faia le tatalo amata.
Gaoioiga e Faatosina Mai Ai:
Fai faatonuga nei, faatutumu avanoa i meaai e masani ona ‘ai i le taeao:
Afai e te fia ai i le taeao, sii lou lima.
Afai e te fia ai i le taeao, sii le isi lima.
Afai e te fia ai i le taeao, tu i luga.
Faaauau isi taga seia oo ina tofu tamaiti ma se meaai ua e tauina e fiafia i ai.
A maea ona e fai atu loa lea, “Afai ua e maua le agaga faafetai i le Tama Faalelagi mo le meaai ua e ai ai, nofo loa i lalo ma piilima.”
Tatou te faaaogaina laau ma manu mo meaai
-
O a nisi meaai tou te fia aai ai?
-
O fea e maua mai ai a tatou meaai?
-
O ai na faia laau ma manu o lo o tatou maua mai ai mea e ai?
Talanoaina nisi o meaai tou te aai ai ma mea e maua mai ai. Faamalamalama e tele meaai tatou te maua mai i laau.
Vavae pe tipi lua le fualaau aina mata po o le fualaau fai sua sa e aumaia ma faasino atu fatulaau i tamaiti.
-
O a nei mea?
-
Aisea e i ai ai fatu o laau?
Faamalamalama atu na fuafua e le Tama Faalelagi laau ina ia i ai fatu ina ia mafai e na fatu ona ola mai ai nisi laau e maua mai ai meaai tatou te faaaogaina (tagai i le Kenese 1:11-12). A tupu ae se laau e maua mai ai se fualaau aina mata po o se fualaau fai sua, e tele foi nisi fatu o le a maua mai ai.
Gaoioiga
Fai faatasi ma tamaiti le gaoioiga lea:
O Fatu e Tanu Maualalo
O fatu e toto maualalo i le eleele (Punou i lalo ma faapa’i ou lima i le fola).
I le eleele latou te momoe (tuul e tasi lima i luga o le isi, faapipii faatasi alofilima).
E susulu mai i ai o le la, (tuu ou lima e ai se li’o i luga a’e le ulu).
Ma toulu ifo i ai matāua (faatetetete tamatamai lima a o tuu mai i lalo).
Ona agi mai lea o le matagi (luelue i le isi itu ma le isi itu lima i luga a’e o le ulu).
Ua taufai tutupu ae fatu laiti (faatetetete tamatamai lima agai mai i luga o le fola).
Gaoioiga
-
Ua e fesoasoani ea e totoina ni fatu laau?
-
O a mea na e totoina?
-
O a meaai tatou te maua mai laau toto?
Fesoasoani i tamaiti e mafaufau i ni fualaau aina mata, fualaau fai sua, ma fatu aina. Faamatala atu o falaoa ma sirio (cereal) e fai mai i fatu aina (grains). Faamatala i tamaiti le tumu o lou agaga i le faafetai i le Tama Faalelagi mo fatu laau o lo o tutupu mai ai ni fualaau aina mata, fualaau fai sua, ma fatu aina (grains).
Toe faaali atu fatu laau.
Gaoioiga
-
O le a se mea e moomia e nei fatu laau ina ia ola ai?
Tala
Faamatala le tala ia Elia ma le fafine ua oti lana tane, o lo o maua i le 1 Tupu 17:8-16. Fesoasoani i tamaiti ia malamalama e lei lava meaai ona ua leai se timu. A aunoa ma le timu e maua mai ai le vai, o le a le ola se meaai.
Tala
-
O le a so outou lagona pe a leai ni meaai?
-
Na faapefea ona faamanuiaina le fafine ina ua ia vaeluaina ma Elia sina meaai itiiti sa ia te ia? (Tagai i le 1Tupu 17:15-16.)
Faamalamalama atu e le o maua mai i laau toto ia meaai uma.
Tala
-
O fea tatou te maua mai ai le susu?
-
O fea tatou te maua mai ai fuamoa?
-
O fea tatou te maua mai ai aano o manu fasi?
Talanoa e uiga i le auala e maua mai ai nisi o meaai mai manu. Ia faaaogaina ata tipitipi talafeagai po o ata, ma fetufaai faamatalaga e uiga i manu e faaaoga mo meaai i lo outou nuu.
Tatou te faaaogaina laau totō ma manu mo lavalava
Faamanino atu e le na o meaai tatou te maua mai laau ma manu. Faaali atu le ata 1-50, E Mafai Ona Ou Faia O’u Lavalava.
-
O le a le mea a lenei tama o lo o fai?
-
O a mea e te faaaogaina pe a faia ou lavalava?
Gaoioiga
Ia fai e tamaiti na o taga o le faamauluina o lavalava e pei o se ofutino, ofu, seevae, peleue, ma se pulou.
Gaoioiga
-
Aisea tatou te faaaogaina ai lavalava? (E ufiufi ai o tatou tino; e puipuia ai o tatou tino; e faamafanafana ai i tatou pe a malulu.)
-
O a mea e fai mai ai lavalava?
Afai e mafai e tamaiti ona tau mai igoa o mea e fai mai ai lavalava, fesili pe latou te iloa mea e maua mai ai na mea. Faamalamalama atu tatou te maua mea e fai ai lavalava ma seevae mai laau ma manu. Tau i tamaiti laau ma manu e maua mai ai mea e masani ona faaaoga i lo outou atunuu mo lavalava. Mo se faataitaiga, o filo ma ie e maua mai i laau, a o le silika e maua mai i le anufe silika. O fulufulu ma vulu e maua mai i mamoe, a o le tele o pau e maua mai i povi.
E mafai ona tumu i tatou i le agaga faafetai mo meaai ma lavalava
Gaoioiga
Faatonu tamaiti e mafaufau i meaai latou te fia faafetai ai. Togi auauai pe tuu atu foi se taga o fatu pi po o se mea galemulemu i tamaiti taitoatasi. Ia tau mai e le tamaitiiti se igoa o se meaai e fia faafetai ai ona toe togi atu lea pe tuu atu foi le taga o fatu pi ia te oe. Talanoaina po o fea e sau ai le meaai sa ta’uina atu a o le’i toe togiina atu le taga i le isi tamaitiiti. Faamanatu i tamaiti o laau uma ma manu sa faia e Iesu, i lalo o le taitaiga a le Tama Faalelagi.
Toe fai le gaoioiga, ae fai i tamaiti e tau mai se igoa o se mea tau lavalava.
Faaali le ata 1-15, O Le Faamanuiaina o Meaai.
Gaoioiga
-
O ai tatou te faafetai i ai mo meaai?
-
O ai tatou te faafetai i ai mo lavalava?
-
E faapefea ona tatou faafetai atu i le Tama Faalelagi mo nei mea? (O se isi auala o lo tatou ta’uaina lea i a tatou tatalo i aso taitasi.)
Molimau
Faaali atu lou agaga faafetai ina ua faia e le Tama Faalelagi ma Iesu lavalava tatou te oofu ai ma meaai tatou te aai ai.
O Gaoioiga E Faamauoa Ai
Filifili nisi o nei gaoioiga e fai i le taimi o le lesona.
-
Tufa ia tofu tamaiti ma le fasipepa ua vaseina ai se laina mai luga i lalo i le ogatotonu ma upu ia o lo o tusia ai i le pito i luga: E tumu a’u i le agaga faafetai mo: Fai i tamaiti e tusi se ata o se meaai i le tasi itu o le laina ae tusi se ata o mea tau lavalava i le isi itu.
-
Fesoasoani i tamaiti e usu pe tauloto upu o fuaiupu muamua e lua o le pese: “Faafetai Lo Tatou Tama” (Tusi Pese a Tamaiti).
-
Fai i tamaiti e mafaufau faapei i latou o ni fatu laau. Fai i ai e faapupuu i lalo e pei o la ua toto i le eleele, ona tutu malie ae lea i luga pe a susulu mai le la ma toulu malie mai le timu i o latou luga. Atonu e te manao e auauai tamaiti e avea ma la faapea ma le timu.
-
Aumai se fualaau aina mata po o se fualaau fai sua ma tufatufa atu ni nai fasi mea e tofo ai tamaiti. Faamalamalama le ituaiga fatu ma le laau e maua mai ai le fualaau aina mata po o le fualaau fai sua. (Siaki muamua i matua o tamaiti ina ia mautinoa e le afaina se tamaititi i meaai e te aumaia.)
-
Faamatala i tamaiti se meaai e foliga tutusa ona fai lea i ai e mate mai po o le a le meaai lena e te faamatalaina. Mo se faataitaiga, e mafai ona e fai atu, “O lenei meaai e paepae pe enaena lona tino mai. E i ai lona atigi. E tuu i se faamoega. O le a lea meaai? (O se fuamoa.) Pule oe pe fai faafia. Atonu e te manao e aumai se mea se tasi o meaai lena o le a e faamatalaina.
-
Aumai mea tau lavalava e pei o se ofu mafanafana, peleue, ma se pulou ma faataga tamaiti e faataitai a o e talanoa e uiga i lavalava e maua ai e tamaiti le agaga faafetai.
O Gaoioiga Faaopoopo Mo Tamaiti Laiti
-
Fesoasoani i tamaiti e usu pe tauloto upu o le pese: “Mo le Ola ma le Malosi” (Tusi Pese a Tamaiti)
-
Ia fai e tamaiti gaoioiga o le faia o lavalava a o faia upu o fuaiupu e fai ai taga o lo o i lalo:
Fai o outou ofuvae, ofuvae, ofuvae.
Fai o outou ofuvae, tasi, lua, tolu.
Fai o outou sakete, sakete, sakete,
Fai o outou sakete, tasi, lua, tolu.
Fai o outou ofutino, ofutino, ofutino,
Fai o outou ofutino, tasi, lua, tolu.
Fai o outou totigi, totigi, totigi,
Fai o outou totigi, tasi, lua, tolu.
Fai o outou seevae, seevae, seevae,
Fai o outou seevae, tasi, lua, tolu.
Ua uma ona fai, ona fai, ona fai,
Patipati lima
Ua uma ona fai tatou ofu.
Tatou o e taaalo.