Fesoasoaniga mo le Faiaoga

Ua aoao mai le Faaola i le taua o le usiusitai ma le aoaoina o tulafono ina ua ia fetalai mai, “O se anaana ma aoao ai, e taua ia e sili i le malo o le lagi” (Mataio 5:19). Ua ia te oe se faatuatuaga paia o le fesoasoani i tamaiti e aoao pe faapefea ona latou tausia a latou feagaiga o le papatisoga ma tuuina atu galuega fesoasoani. Ao sauni atu tamaitai taitoatasi mo le avea ma tamaitai talavou faapea foi ma alii taitoatasi mo le avea ma alii talavou ma mauaina le perisitua, o le a avea oe ma faatosinaga taua i o latou olaga.

I le 1831, i se taimi puupuu talu ona faatuina le Ekalesia, sa aoao ai e le Faaola faiaoga “o le a aoao atu mataupu faavae o la’u talalelei, o lo o i ai i le Tusi Paia ma le Tusi a Mamona” (MFF 42:12), na o le pau ia o tusitusiga paia sa i ai i lena taimi. I le taimi nei ua i ai i faiaoga le matafaioi o le aoao atu o talitonuga paia mai tusi faavae uma e aofia ai le Mataupu Faavae ma Feagaiga ma le Penina Tau Tele, e fesoasoani ai i tamaiti mo le atinaeina o lo latou faatuatua i le Atua ma lona Alo o Iesu Keriso.

Mataupu Aoaoina

O tamaiti uma ua tai valu o latou tausaga e oo atu i le sefulutasi i le aso 1 o Ianuari o le a aoaoina mai tusi lesona a le Peraimeri 4, 5, 6 ma le 7. E na o le tasi le mataupu aoaoina e faaaoga i tausaga taitasi mo tamaiti uma o lo latou matutua ua valu tausaga e oo atu i le sefulutasi. O mataupu aoaoina taitasi e faavae i se tusi patino o tusitusiga paia: Peraimeri 4 o le Tusi a Mamona, Peraimeri 5 o le Mataupu Faavae ma Feagaiga, Peraimeri 6 o le Feagaiga Tuai, ma le Peraimeri 7 o le Feagaiga Fou. Pe a maea tausaga e fa o le periota, ua tatau ona aoaoina e tamaiti uma tusi taitasi o tusi faavae.

E fuafua i manaoga o tamaiti o uarota ma paranesi ma le numera o tamaiti ua tai valu tausaga e oo i le sefulutasi, e mafai ona faatulagaina vasega i tausaga taitasi, vaega e tuufaatasi, po o le tuu eseese foi o vasega mo tama ma teine. Ae tusa lava pe o le a le faavasegaina o lau vasega, e tatau ona e mautinoa e lava lou taimi e tuuina atu i tamaiti taitoatasi.

Pe a sefululua tausaga o tamaiti, ua amata ona latou auai atu i Tamaitai Talavou po o le Perisitua Arona. Peitai, e faaauau pea lava ona latou auai i a latou vasega o le Peraimeri i le taimi o le Aoga Sa seia aulia le vaiaso muamua o Ianuari, pe a amata ona auai i le Aoga Sa.

Lesona Faasauniuni mo le Perisitua

O se lesona faapitoa, “E mafai e le Perisitua Ona Faamanuiaina o Tatou Olaga,” o loo aofia atu ai i lenei tusi lesona. O lenei lesona e faaaogaina e faiaoga o tamaiti o le sefulutasi tausaga a o sauniaina tama laiti e avea ma tiakono ma teine laiti e siitia atu i Tamaitai Talavou. Ia aoaoina atu lenei lesona a o lei aulia e le tamaitiiti muamua o lau vasega lona sefululua tausaga. Tatalo mo le taitaiga a le Alii a o e sauniaina ma tuuina atu le lesona ina ia mafai ai e tamaiti ona malamalama i le uiga o le perisitua, ae pe faapefea foi ona mafai ona faamanuiaina ai o latou olaga, ma le auala e mafai ai ona latou faataunuuina o latou tiutetauave ina ia faamamaluina ai le perisitua. E le tatau ona faatinoina le Faaola sei vagana i se vaega o lona soifua mai. E matua le tatau lava ona faatinoina le Tama Faalelagi ma le Agaga Paia.

Lesona o le Eseta ma le Kerisimasi.

O lenei tusi lesona e le o i ai ni lesona faapitoa o le Eseta po o le Kerisimasi. Ona, o loo taulai atu le tusi lesona i le soifuaga ma le misiona a Iesu Keriso, aua e te manatu faapea e tatau ona i ai ni lesona faaopoopo mo le Eseta ma le Kerisimasi. Afai e te manao e aoao atu se lesona faapitoa, e mafai ona e saunia se lesona e faaaoga ai tusi sii mai le Tusi a Mamona ma le Feagaiga Fou ma isi risosi e pei o le Taga o Ata o le Talalelei, ma isi lomiga talafeagai o mekasini a le Ekalesia. Fuafua lesona o le a fesoasoani i tamaiti latou te maua ai le lagona latalata ia Iesu Keriso ma malamalama ai i lana misiona.

Aoao i Lenei Tusi Lesona

O lenei mataupu e taulai atu i aoaoga mai le Feagaiga Fou, e faamamafaina ai le soifuaga ma le galuega a Iesu Keriso. A o e faamatalaina atu ma talanoaina nei aoaoga, e tatau ona atili malamalama ai tamaiti i le misiona ma le togiola a Iesu Keriso ma saga faatupu atili ai lo latou faatuatua ma molimau atu ia te ia. E tatau ona latou aoaoina auala e faaaoga ai aoaoga a Iesu Keriso i o latou lava olaga ma maua ai se naunautaiga tele e tausia ana poloaiga.

Uunai tamaiti e faitau le Feagaiga Fou i le fale. O le iloa o le alofa o Iesu ma malamalama atili i ana aoaoga, o le a ola ai tamaiti i le alofa mo le Faaola ma mananao ai e faapei o ia. O upumoni taua e aoao mai e tamaiti i le soifuaga ma aoaoga a Iesu o le a fesoasoani lea ia i latou e tausia a latou feagaiga ma auauna atu ai i le Ekalesia i o latou olaga atoa. O nei upumoni o le a latou maua ai foi le malosi e tetee atu ai i faaosoosoga o lenei lalolagi.

O Le Saunia o Oe Lava e Aoao Atu

Ina ia faataunuuina lou valaauga paia e aoao atu tamaiti, e tatau ona e saunia i le mafaufau ma le agaga. O se vaega o lenei sauniuniga o le malamalama lea ma iai se molimau i mataupu faavae o loo e aoaoina atu. O le Faaola, o le faiaoga sili o faiaoga uma, sa na ia aoao mai i tatou i le ala e saunia ai e aoao atu lana talalelei i isi.

Ia sailia ma le lotomaualalo le Agaga e ala i le tatalo. Na fetalai mai le Alii, “Ia e lotomaulalo; ona ta’ita’iina ai lea o oe e le Alii lou Atua, ma tali atu i au talosaga” (MFF 112:10). Afai tatou te lotomaualalo ua ia i tatou le aia tatau e iloa ai le ala e finagalo le Alii tatou te aoaoina ai ana fanau.
Suesue i tusitusiga paia ma afioga a perofeta soifua. O loo iai le mana tele i le aoao ma manatunatu loloto i afioga a le Alii. Na ia poloaiina i tatou, “Ia mua’i saili ia maua la’u upu, ona matala ai lea o lou laulaufaiva; o lea, afai e te manao ai, o le a e maua lo’u Agaga ma la’u upu, ioe, o le mana lea o le Atua i le faatalitonuina o tagata” (MFF 11:21).

O se perofeta o aso e gata ai, le susuga a Peresitene Ezra Taft Benson, na ia toe faamautinoa maia le manaomia o lo tatou aoao i afioga a le Alii: “Ou te uunaiina outou ia outou toe tuuina atu outou lava, ia suesue i tusitusiga paia. Ia outou faatofu outou i ai i aso taitasi, ina ia outou maua le mana o le agaga e faatasi ma outou i o outou valaauga” (Liahona, Iulai 1986, i. 71).

Ia tausia au feagaiga. O lou agavaa e taitaia e le Agaga e faamoemoe i lou faamaoni i le tausia o feagaiga ua e osia ma le Tama Faalelagi. O le a e faia foi se faataitaiga lelei pe a e “tausia feagaiga … e osia” (MFF 42:13). A vaaia e tamaiti lou alofa i le Faaola ma lou naunau e ola i le talalelei, o le a faaosofiaina foi i latou e mulimuli ia te ia.
Saili mo auala e fesoasoani ai i tamaiti ia latou lagonaina le alofa o le Faaola. Ta’u soo atu iai le tele o lou alofa ia te i latou, ma faaali atu i ai lo latou agavaa ma mea latou te mafaia. O lou alofa ma lou agalelei o le a fesoasoani i tamaiti e malamalama ai i le alofa o le Tama Faalelagi ma Iesu Keriso mo i latou. O le a fesoasoani foi latou te iloa ai ona alolofa i isi.

Saunia O Au Lesona

O le a fesoasoani lenei tusi lesona ia te oe e faatulagaina ai au lesona o loo taulai atu i mau. O loo faaaogaina e lesona faamatalaga ma mau mai le Feagaiga Fou e fesoasoani ai i tamaiti ia malamalama i mataupu faavae o le talalelei. E le o faama’oti atua le ala e tatau ona aoao atu ai tala faatusi paia. A o e saunia ma aoao atu i le Agaga, o le a e fesoasoani i tamaiti ia sili atu lo latou malamalama i tala faatusi paia, o mataupu faavae o loo iai, ma le ala e mafai ai ona latou faatinoina nei mataupu faavae i o latou olaga. A lelei ma matagofie le saunia o au lesona, o le a sili atu ona faaosofia tamaiti e faalogologo ma aoao.

O laasaga nei o le a fesoasoani ia te oe e faaleleia atili ai lou saunia e aoao atu tamaiti i lau vasega:

Ia aoao ma le agaga tatalo mo se vaiaso pe lua foi, le faamoemoega o le lesona ma fuaitau mai tusitusiga paia o loo lisiina atu i le vaega o “Sauniuniga” a o le’i aoaoina atu le lesona. Ia saga faitau pea i le faamoemoega o le lesona ma fuaitau mai tusitusiga paia, ma mafaufau pe faapefea ona faafetaui i tamaiti i lau vasega. Ia e fesili ifo ia te oe lava: “O le a se mea e finagalo le Tama Faalelagi ia aoao e tamaiti taitoatasi ma faia ona o lenei lesona? E mafai faapefea e lenei lesona ona fesoasoani i fanau e atinae le faatuatua ia Iesu Keriso, faamalosia a latou molimau, ma mafai ai ona latou tetee atu i faaosoosoga leaga latou te fetaiai?” Ia tusi i lalo manatu e oo atu ia te oe.

O le tusi o le Mataupu o le Talalelei (31110) sa saunia e avea ma taiala mo le tagata lava ia i mataupu faavae ma talitonuga a le talalelei. O loo lisiina i le vaega o le “Sauniuniga” o nisi lesona mataupu mai le Mataupu o le Talalelei. O nei mataupu e mafai ona fesoasoani ia te oe e saunia ai e aoao atu le mataupu autu po o le talitonuga o loo i ai i le lesona. Atonu o loo i ai se kopi i le potutusi o la outou falelotu po o le faatau mai foi i lo outou faletusi tutotonu.
Filifili pe faaaoga le gaoioiga e faatosina mai ai o loo fautuaina atu i le amataga o le lesona pe faia foi sau lava gaoioiga, ae ia mautinoa e ogatasi ma talafeagai ma le aoaoina atu o le tala faatusi paia.
E le o ta’uina atu i lesona le ala e aoao atu ai tala faatusi paia, o lea e ao ai ona e sailia le Agaga e fesoasoani ia te oe e fuafua ai pe o le a, ae pe faapefea foi ona aoao atu. Ia faaaoga ni metotia eseese e aoao atu ai i vaiaso taitasi (tagai ”Aoao Atu Mai Tusitusiga Paia” o loo i lenei itulau). Fuafua e faaaofia ai tamaiti o le vasega i le mea e gata mai ai, i gaoioiga e aoao ai, ma aoao atu lau lesona ina ia mafai e tamaiti ona toe faamatala atu le tala faatusi paia i isi.
Filifili mai le “Talanoaga ma Fesili e Faatatau I Ai” fesili o le a sili ona fesoasoani i tamaiti e malamalama ai i mau ma faaaoga i o latou olaga. E mafai ona e faaaogaina fesili i soo se taimi o le lesona. E te le tau faaaogaina uma.
Faitau le “Gaoioiga e Faamauoa Ai” ma fuafua pe o afea ma pe faapefea foi ona faaaoga gaoioiga e te lagona o le a sili ona fesoasoani i tamaiti i lau vasega ia malamalama ai i mau ma le faamoemoega o le lesona. O le a eseese vasega taitasi, ma o nisi gaoioiga e lelei mo se tasi vaega, ae o le a le lelei i le isi vaega.
Fuafua e fetufaai atu ni mea na e oo i ai, e lagolagoina ai le faamoemoega o le lesona. Ia taitaiina oe e le Agaga a o e faamatala atu nei mea i le vasega ma a o fetufaai mai foi e tamaiti o le vasega ia te oe ma isi mea na oo latou i ai. O nisi aafiaga faaletagata po o aiga foi e matua paia lava pe matua le faalaua’iteleina foi, ma e le tatau ona talanoaina faalauaitele.

Aoao Atu Mai Tusitusiga Paia.

E tatau ona e sailia pea lava pea le Agaga a o e saunia ma aoao atu au lesona (tagai Alema 17:2–4; MFF 42:12–14, 50:17–22). O le a fesoasoani le Agaga ia te oe ina ia e iloa ai pe faapefea ona e faia ia manaia au lesona i le faalogologo ma ‘anoa foi i tamaiti.

O nisi o tamaiti i lau vasega atonu e le masani i tusitusiga paia. A o outou faitau faatasi, ia nofouta mo i latou o le vasega atonu e manaomia le fesoasoani mo le sueina o mau. Atonu e manaomia lou faaaluina o sina taimi i le amataga o le tausaga, aemaise lava pe afai e te aoaoina atu tamaiti laiti tele, e faasino ai i tamaiti le ala e sueina ai mau.

Ia taumafai ni auala eseese e tuuina atu ai mataupu ina ia mautinoa ai o loo fiafia mai tamaiti. O fautuaga o loo ta’uina atu i lalo e mafai ona fesoasoani ia te oe e toe fesuisuiai ai le aoao atu mai tusitusiga paia.

Faamatala atu le tala faatusi paia i au lava upu. Taumafai e fesoasoani atu i tamaiti ina ia latou vaai faalemafaufau i tagata ma mea na tutupu. Ia fesoasoani i tamaiti ia latou malamalama o tagata o loo e faamatalaina, na soifua moni mai ma na tutupu foi ia mea.
Ia faitau sa’o e tamaiti le tala atoa po o fuaitau filifilia mai tusitusiga paia. Ia teu i lou mafaufau e le lelei uma le faitau tusi a tamaiti, ma o le iloa faitau tusi e le fuafuaina i le matutua. Afai e mafai uma e tamaiti ona faitau tusi, atonu e mafai ona e tuuina atu i ai sina taimi latou te faitauina ai e aunoa ma se leo. A maea, e mafai ona outou talanoaina mea sa latou faitauina. Faaaoga le taimi o le talanoaga pe a maea ona faitau e tamaiti, ina ia fesoasoani ai ia latou malamalama i upu ma fuaitau faigata.
Faaaoga ata fautuaina o tala faatusi paia e fesoasoani ai i tamaiti latou te vaai faalemafaufau i le mea na tupu. O le tele lava o lesona o loo aofia ai ata fautuaina i le vaega o “Mea e Manaomia”. O loo faanumeraina ata ma o loo aofia ai ma le tusi lesona. O nisi o ata o loo i ai foi i le Taga Ata o le Talalelei ma e mafai ona maua i le potutusi o le falelotu (o loo lisiina numera o potutusi o falelotu i le vaega o “Mea e Manaomia). O le tele lava o ata o loo i ai aotelega ua lomia i tua. E mafai ona e faaaogaina isi ata e talafeagai.
Fai i tamaiti e faatino tala Faatusi Paia. (Ia mautinoa e le faasala ese le faatinoga mai le paia o mau). E mafai ona e aumaia ni nai mea faigofie e faatino ai, e pei o se ofu talaloa, sikafu, ma isi mea faapena, ma tuu i tamaiti latou te faatinoina uma taga po o ni vaega foi o le tala. Fesili i ai pe mata o a ni o latou lagona pe ana fai o latou moni ia o tagata ia o loo latou faatinoina.
Tusi ni fika po o ni ata faigofie i luga o le laupapa, pe faaaoga foi ata po o ata tipi, a o e faamatalaina pe faitau atu le tala faatusi paia.
Faia se faitauga tusi e faaaoga ai ni tamaiti latou te faitauina vaega a tagata o loo i ai i le tala faatusi paia. Vaai le mea e talafeagai, ona faitau sa’o mai lea e tamaiti talanoaga mai tusitusiga paia.
Valaaulia se matua (tama po o se tina), se tasi o le uarota po o le paranesi, po o se tasi o le vasega na te faamatalaina le tala mai le tusi paia. Tuu atu i lea tagata se vaiaso se tasi pe lua foi e sauniuni ai, ma ia mautinoa foi e tuuina atu ia te ia se taimi faatapulaaina mo le tuuina atu o le faamatalaga.
Tuu atu i tamaiti sina suega faataitai faigofie, e pei o ni tali mai i le sa’o po o le sese po o ni fesili e faaaoga mai ai nai tali pupuu, a o le’i aoaoina atu le tala faatusi paia. Faamalamalama atu i le vasega e te manao e te fia iloa pe o le a le tele o lo latou iloa i le tala. Ona toe ave lea i ai o le suega lava lea pe a maea, ina ia latou iloa ai pe o a mea ua latou aoaoina.
Ia lisi i luga o le laupapa upu taua po o igoa o tagata mai le tala faatusi paia. Ia faalogologo tamaiti mo nei igoa po o upu a o e faamatalaina le tala. Fesoasoani i tamaiti ina ia faateleina upu latou te iloa ina ia latou malamalama atili i mau ma fiafia e faitauina i le fale.
A o le’i tuuina atu le lesona, ia tusia fesili e uiga i le tala i luga o le laupapa. A o faalogoina e tamaiti tali i le taimi o loo faamatalaina ai le tala, ia taofi ae talanoaina.
Faamatala le tala, ona tauofo mai lea o tamaiti latou te toe faamatalaina mai vaega latou te fiafia i ai. E mafai ona e tofia se tasi o le vasega e amata mai le tala ona tofi foi lea o se isi na te faaauauina.
Tātā se kaseti o fuaitau filifilia mai tusitusiga paia.

Faia se taaloga faafetaui. Saunia mai ni seti se fa po o se valu o ni fasipepa malo (cards) e ta’i 3″ x 5″. I le faataitaiga o loo i lalo, e te tuuina le afa muamua o lauga faaamuia i le isi fasipepa ae tuu le isi afa, po o se faamanuiaga i le isi fasipepa o le seti. Ia faafefiloi fasipepa ma faafāō i luga o se laulau po o le fola. Ia feauaua’i mai tamaiti e faaū i luga ni fasipepa tailua. Faitau leotele mea o loo tusia i fasipepa taitasi. Afai e fetaui fasipepa (o lona uiga pe a atoa se lauga faaamuia), ona faaū ai pea lea i luga. Afai e le fetaui fasipepa, ona toe faafāō lea ae sau se isi tamaitiiti. Ia faaauau pea seia oo ina fetaui lelei uma fasipepa.

O seti nei e valu e mafai ona e faaaogaina mo se taaloga faafetaui i lauga Faaamuia:
Seti 1:	Amuia e lotomaualalo—aua e o latou le malo o le lagi.
Seti 2:	Amuia e faanoanoa—aua e faamafanafanaina i latou.
Seti 3:	Amuia e agamalu—aua e fai mo latou tofi le nuu.
Seti 4:	Amuia e fia aai ma fia inu i le amiotonu—aua e maoona i latou.
Seti 5:	Amuia e alolofa atu; aua e alofaina mai i latou.
Seti 6:	Amuia e loto mama—aua latou te iloa atu le Atua.
Seti 7:	Amuia e faatupuina le filemu—aua e ta’ua i latou o atalii o le Atua.
Seti 8:	Amuia e sauaina ona o le amiotonu—aua e o latou le malo o le lagi.

Fai se taaloga o le faia o fesili. Tuu ni fesili i se fagu po o se atigi pusa, ona feauauai mai lea o le vasega e piki se fesili se tasi ma tali i ai.

Faafoeina o Talanoaga a le Vasega

O le auai i talanoaga ma isi gaoioiga e aoao ai, o le a fesoasoani i tamaiti e aoaoina ai mataupu o le talalelei. O taiala o loo ta’ua i lalo o le a fesoasoani ia te oe e faia ai ni fesili ‘anoa ma faaosofia ai le fiafia o le vasega i talanoaga:

Fai fesili ma tuu atu i ai mau mai tusitusiga paia ina ia su’e ai e tamaiti tali i tusitusiga paia.
Fai fesili e le mafai ona tali mai i le “ioe” po o le “leai” ae manaomia ai le mafaufau ma talanoaga. O fesili e amata i le aisea, pe faapefea, o ai, po o le a, o anafea, ma po o fea, e masani lava ona sili atu le lelei.
Ia faaaofia ai tamaiti e le masani ona auai i talanoaga i lou tofiina lea o i latou i o latou igoa ma fai i ai fesili e te lagona e mafai ona latou taliina. Tuu atu ia i latou se taimi e tali mai ai. Fesoasoani atu ia i latou pe a manaomia, pe a faapea na i ai se taimi latou te mafaufau ai ma tali mai.
Ia uunai tamaiti e fetufaai o latou lagona e uiga i mea ua latou aoaoina mai mau. Ia faia ni faamatalaga lelei e uiga i o latou sao i talanoaga.
Ia fai atu ni faamatalaga faaviivii ma le faamaoni i tamaiti pe a latou taliina fesili. Ia fesoasoani atu ia te i latou ina ia latou iloa e taua o latou manatu ma lagona. Ia nofouta i tamaiti atonu e matamumuli e auai.

Fesoasoani i Tamaiti e Faaaoga Tusitusiga Paia

Fesoasoani i tamaiti e faaaoga mea ua latou aoaoina i o latou olaga. Ua lu’iina i tatou e Iakopo ina “ia fai ma e anaana i le upu, ae aua le na ona faalogologo i ai, ma faaseseina ai outou e outou” (Iakopo 1:22). E mafai ona fesoasoani manatu o loo ta’ua i lalo ia te oe ina ia faataunuuina ai lenei galuega:

A uunaia oe e le Agaga, ia tuuina atu lau molimau i le moni o mea o loo e aoaoina atu. O le a sili atu le mamana o au lesona pe a e aoao atu ma le loto atoa ma ou talitonuga maumaututu.
Ia uunai tamaiti e faitau tusitusiga paia i le fale e i latou lava ma faatasi foi ma o latou aiga. Ia uunai tamaiti e aumaia a latou lava tusitusiga paia i le vasega. Afai e leai ni a latou lava tusitusiga paia pe galo foi ona aumai i le vasega, ia aumai ni kopi faaleoleo latou te faaaogaina i le vasega. Afai e i ai se potutusi o la outou uarota po o le paranesi, e mafai ona e maua mai ni kopi o tusitusiga paia mai iina.
Fai i tamaiti e fetufaai mea ua latou aoaoina. Fesili i ai pe faapefea ona latou faaaogaina mataupu o le talalelei na aoaoina i o latou lava olaga.
Ia fai faapea o oe o le tagata fai faasalalauga, ma faatalanoa tamaiti faapei o latou o tagata o loo i tusitusiga paia. Fai i ai e faamatala atu ia te oe faamatalaga auiliili o le tala i le tusi paia ma pe o a o latou lagona e uiga i le mea na tupu.
Vavae le vasega i ni vaega se lua pe sili atu foi. A maea ona faamatalaina le tala faatusi paia, ona tusia lea e vaega taitasi mataupu taua mai le tala. Ona auauai ane lea o vaega e talanoaina pe faapefea ona faaaoga nei mataupu i o latou olaga.
Fai se suega mau: A o faagasolo le tausaga, ia uunai tamaiti o le vasega e maka fuaiupu patino o tusitusiga paia e aoga tele i o latou olaga. Mo se faataitaiga, e mafai ona latou makaina le Mataio 7:12, Luka 11:9, Ioane 3:16, ma le Galuega 2:38. Tuu atu ia i latou ni faailo, e pei o se mea na tupu, tulaga na oo i ai, po o se faafitauli; ona lu’i lea o tagata o le vasega e sue se mau e fetaui. Vaai tamaiti e muamua ona maua, e fesoasoani i isi o le vasega e sue a latou mau. Ona latou ta’u maia lea pe aisea ua fetaui ai lenei mau ma le faailo.
Fetufaai ni mea patino na e iloa ai tamaiti o usiusitai i mataupu e pei ona talanoaina. Mo se faataitaiga, afai o e aoaoina atu se lesona e uiga i le agalelei atu, e mafai ona e faailoa atu ni mea na e vaai ai i tamaiti o agalelei atu i isi.
Tulitatao ni mea na faatonu e fai. Soo se taimi lava e te tuuina atu ai se galuega e fai po o se lu’i, ia mautinoa ua e fesili atu i tamaiti e uiga i mea na latou oo i ai, i le amataga o le vasega i le isi Aso Sa.

Fesoasoani i Tamaiti e Tauloto Mau

O le taulotoina o mau e mafai ona avea ma se auala lelei e aoao atu ai upumoni o le talalelei. O le toatele o tamaiti e fiafia e tauloto pe a e faaaogaina mea malie ma faiga fou. O fautuaga o loo ta’ua i lalo o ni auala malie e fesoasoani ai i tamaiti e tauloto:

Tusi i luga o le laupapa, pe fai se siata, o mataitusi muamua o upu taitasi e taulotoina. Mo se faataitaiga, atonu e te manao e faia le siata lea mo upu i le mataupu muamua o le faatuatua:

M t t i l A l T e F m L A o I K m l A P

Tusi i mataitusi a o e faia upu taitasi. Toe fai mo sina taimi ma faataitai atu e tamaiti pe a mafai. E le umi lava ae latou te le toe manaomia le siata.
Vaevae le mau i ni fasi fuaitau pupuu. Ia faitau leotele fasi fuaitau taitasi e amata mai le faaiuga ma faasolosolo atu ai agai i le amataga ina ia muamua ai ona fai e tamaiti le vaega e le’i masani tele ai. Mo se faataitaiga, i le Mataio 5:16 e mafai e tamaiti ona fai faatele le “latou te vivii atu ai i lo outou Tama o i le Lagi”. Ona mafai ai lea ona latou faaopoopo le isi fasi fuaitau, “ina ia latou iloa la outou amio lelei.” Ona mafai ai foi lea ona latou fai ma saga fai le fuaiupu atoa.
Afai e lelei le faitau tusi a tamaiti, ia lomia se kopi o le mau mo tamaiti taitoatasi. ’Oti’oti kopi taitasi i ni upu po o ni fasi fuaitau. A maea ona fai faatasi le fuaiupu mo sina taimi, ona tufatufa lea i tamaiti se seti o fasipepa o upu ua faafefiloi, ona tago lava lea o le tamaitiiti ia pe fai faatasi foi e le vasega, e faatulaga a latou fasipepa i le faasologa sa’o.
Ia faifai soo le mau, ma taofi ae fai mai e se tamaitiiti le isi upu po o se fasi fuaitau. Ona faaopoopo mai lea e se isi tamaitiiti nai nisi upu. Ia faaauau seia tofu uma tamaiti ma le avanoa.
Ia faaaoga musika e fesoasoani ai i tamaiti e tauloto. Mo se faataitaiga, e mafai ona e aoaoina atu tusi o le Feagaiga Fou mai le ”O Tusi o le Feagaiga Fou” mai le More Songs for Children (page 28).
Vaevae tamaiti i ni vaega se lua. Ia feauauai vaega e fai mai upu po o fasi fuaitau i le faasologa. E mafai ona fai mai e le isi vaega le upu muamua, fai mai e le isi vaega le isi upu, ma faasolo ai lava le fuaiupu atoa.
Filifili se mau e te manao e tauloto e tamaiti. Tusi le mau i luga o le laupapa po o se pepa lautele. Ia faifai soo le mau, ona ufiufi faasolosolo ai lea pe tapē auauai seia oo lava ina taulotoina atoa le mau e tamaiti.

Faaaogaina ma le Atamai o le Taimi E Totoe

Afai e uma lau lesona sa saunia ae lei uma le taimi o le vasega, atonu e te manao e fai se isi gaioiga e faaaoga ai le taimi o loo totoe. E mafai ona fesoasoani fautuaga o loo i lalo e te faaaogaina lelei ai lenei taimi:

Vaai ni tamaiti e faamatala mai a latou tala faatusi paia e sili ona fiafia i ai.
Fai se suega mau i lou tuuina atu lea i tamaiti o faailo i ni mau taua ua uma ona latou makaina. Tuu i ai e galulue i ni paga po o ni vaega toaitiiti e sue le mau sao.
Fesoasoani i tamaiti e tauloto se mau po o se mataupu o le faatuatua mai le lesona.
Ia fetufaai tamaiti i o latou manatu pe faapefea ona latou faaaogaina mataupu faavae mai le lesona i o latou aiga, i le aoga, ma a latou uo.
Vaevae le vasega i ni vaega, ona feauauai lea e fai ni fesili i isi e uiga i le lesona.
Ia tusi e le tamaitiiti lava ia se ata e faatatau i le lesona, pe tusi lolomi se upusii e ave i le fale e faapipii ai e fai ma faamanatu o le faamoemoega o le lesona.
Valaaulia tamaiti e makaina mau mo suesuega i le lumanai. E mafai foi ona e fai i tamaiti e maka fuaiupu e sili ona latou fiafia i iai mai le lesona, pe e mafai foi ona e fautuaina ni fuaiupu e te manatu o le a faamanatu ai i tamaiti le faamoemoega o le lesona.
Fesoasoani i tamaiti e tauloto le faasologa o tusi i tusitusiga paia. E mafai ona e mauaina nei seti o musika i le More Songs for Children (pp. 28, 30, 32).
Toe faamanatu mataupu faavae po o tala faatusi paia mai lesona talu ai.

Musika i le Potuaoga

E mafai ona faamauoaina aoaoga o le talalelei ma faamalosia e ala i musika. E masani ona sili atu ona manatua e tamaiti ma aoao e ala i musika.

E le seiloga o oe o se tagata faimusika ona e faaaogaina lea o musika talafeagai e fesoasoani ai i tamaiti ina ia latou lagonaina le Agaga ma aoao le talalelei. O musika e mafai ona aofia ai kaseti faalogologo po o se vaega faimusika i le taimi o le lesona po o le amataga foi o le lesona. E mafai foi ona usuina pe faitau upu o pese e faaaofia ai tamaiti i lau lesona. Afai e maua kaseti faalogologo o le Tusipese a Tamaiti (na o le musika, 52505; upu ma musika, 52428) e mafai ona e faaaogaina e fesoasoani ai ia te oe e aoao ai pese pe tata foi ae pepese i le potuaoga.

Taimi o Fetufaaiga

E i ai nisi taimi e faatonu ai le vasega e faia ni polokalama faigofie o le talalelei i le Taimi o Fetufaaiga a le Peraimeri. E mafai ona maua mai nei polokalama mai lesona, e manaomia ai ni nai faataitaiga laiti, ma o le a fesoasoani foi e faamalosia ai mataupu faavae sa e aoaoina atu. E mafai ona e faaaogaina nei fautuaga mo le taimi o fetufaaaiga:

Faatino se tala faatusi paia.
Ia fai faatasi ni mau ua taulotoina.
Toe fai pe lagiina se mataupu o le faatuatua ma faamatala lona uiga.
Faatino taga o se faaaogaina i aso nei o se mataupu faavae o le talalelei.

Mataupu o le Faatuatua

E tatau ona e tuuina Mataupu o le Faatuatua i totonu o au lesona ma uunai tamaiti taitoatasi e taulotoina Mataupu o le Faatuatua a o le’i siitia mai le Peraimeri. Ia faaaoga avanoa uma e maua e fesoasoani ai i tamaiti latou te taulotoina ma malamalama ai i Mataupu o le Faatuatua.

Ia Malamalama i Tamaiti ua Atoa le Valu Tausaga e Oo i le Sefulutasi

Ina ia fesoasoani i tamaiti e aoao ma maua lo latou lava lagona mautinoa, e tatau ona e malamalama i o latou manaoga ma uiga ma fuafua gaoioiga talafeagai ma vasega. Mo nisi faamatalaga e uiga i uiga o tamaiti ua faapea le matutua, tagai i le O Le Aoao Atu—E Leai Se Isi Valaauga e Sili Ai (33043), itulau 36–37

O Uiga

Faaletino
- E i ai taimi e vave ai pe telegese ai le tuputupua’e
- Atonu e fai se faaletonu
- E fiafia e taaalo ma isi
Mafaufau
- E naunau e aoao
- E mafaufau i mea na tutupu i le taimi ua mavae
- Ua amata ona faavae faaiuga i mea talafeagai
- E manao e iloa pe aisea
- Ua faamasinosino
- Ua faamemelo i tagata tautaua
- Ua tele atu ana matafaioi
- E fiafia i galuega faatauloto
Vafealoai
- Ua amata ona uma le lē fiafia i le isi ituaiga (alii/tamaitai) ae ua manao e tele ni fegalegaleaiga ma tama ma teine
- E fiafia i taimi e fai ai vaega pe taitoatasi ai foi
- Maua le lagona malosi mo le tutoatasi
- E atinaeina se uiga faateleina o le fai mea malie
- E maua le fiafia i isi
Lagona
- E le fiafia i faitioga
- Atonu o le a faaalia uiga le talafeagai pe a tulai mai ni faafitauli ona o uo
- Ua sili atu le faamoemoeina ma le talitonuina
- E manatu lava i le sa’o ona fai o se mea
- Ua amata ona le mautonu i lona lava taua
- Ua amata ona faaitiitia lona pulepule tutu ma faalē naunau foi e fai lava le mea e manao ia iai
Faaleagaga
- E fiafia e aoao ma faataitai mataupu faavae o le talalelei
- E faaosofia i molimau a isi
- Ua tuputupuae lona saunia e malamalama i mataupu faavae o le talalelei
- Ua i ai se lagona malosi o le sa’o ma le sese

O Taiala Faapitoa mo le Faaaofiaina Ai o i Latou e Le Atoatoa le Malosi

Ua tuuina mai e le Faaola mo i tatou le faataitaiga ina ia lagona ma faaalia le agaalofa mo i latou e le atoatoa le malolosi. Ina ua ia asiasi atu i Sa Nifae ina ua mavae lona toetu, sa ia fetalai atu:

“Po ua ia te outou nisi ua mama’i? Au mai ia i latou iinei. Po ua ia te outou ea nisi ua pipili, pe tauaso, pe setu, pe manu’a, pe lepela, pe mamae, pe tutuli, pe puapuagatia i se tasi mea? Ina aumai ia i latou iinei, ou te faamaloloina i latou, aua ua mutimutivale lo’u alofa ia te outou; ua tumu lo’u loto i le alofa” (3 Nifae 17:7).

O le avea ai o oe ma se faiaoga o le Peraimeri, ua e i ai i se tulaga sili atu e faaalia ai lou alofa. E ui ina faapea e le’i aoaoina oe e tuuina atu se fesoasoani faapolofesa, e mafai ona e malamalama ma faafailele tamaiti e le atoatoa le malosi. O le manatu popole, malamalama, ma se naunau e faaaofia ai tamaiti taitoatasi o le vasega i gaoioiga aoao, e matua manaomia tele.

O tamaiti e le atoatoa le malosi, e mafai ona ootia i le Agaga tusa lava pe o le a le tulaga o lo latou malamalama. E ui o nisi tamaiti atonu e le mafai ona auai i le taimi atoa o le Peraimeri, e tatau ona latou maua le avanoa e auai tusa lava pe utiuti si taimi e lagona ai le Agaga. Atonu e tatau ona i ai se isi na te iloaina manaoga o se tamaitiiti e faatasi ma le tamaitiiti i le taimi o le Peraimeri nei tei ua i ai se taimi e manao ai le tamaitiiti e alu ese mai isi tamaiti.

O nisi tagata o le vasega atonu e lu’iina i ni faaletonu tau i le aoaoina, faaletonu faalemafaufau, faafitauli o le gagana po o le tautala, tauaso pe tutuli, faafitauli tau i le amio po o le vafealoai, ma’i tau i le mafaufau, e fealualuai ma lē nofo filemu, po o faaletonu tau i le soifua maloloina. O nisi atonu e le masani ma faigata le gagana po o tulaga faaleaganuu. Tusa lava pe o a tulaga o tagata taitoatasi, e tofu moomia uma e tamaiti taitoatasi le alofa ma le taliaina, ia aoaoina le talalelei, ia lagona le Agaga, ia auai ma le fiafia, ma auauna atu i isi.

O nei taiala e mafai ona fesoasoani ia te oe e aoao atu ai se tamaitiiti e i ai faaletonu:

Ia vaai i luga atu o le faaletonu ma ia e iloa lelei le tamaitiiti. Ia aua nei suia ni ou uiga, ia e agalelei, ma alofa i ai.
Ia e aoao e uiga i mea tonu e malosi ai ma ona luitau.
Ia faia taumafaiga uma lava e aoao atu ai, ma ia faamanatu i tamaiti o le vasega o latou tiutetauave e ava ma faaaloalo i tamaiti uma lava o le vasega. O le fesoasoani i se tamaitiiti o le vasega e i ai se faaletonu, e mafai ona avea ma aafiaga faa-Keriso mo le vasega atoa.
Saili metotia aupito sili ona lelei mo le aoaoina atu o le tamaitiiti e ala i le faafesootaia o matua, o isi tagata o le aiga, ma, afai e talafeagai, ia faafesootai le tamaitiiti.
A o lei tofia se tamaitiiti e i ai se faaletonu e faitau, tatalo, pe auai i se gaoioiga, fesili muamua i ai pe o le a sona lagona e uiga i le auai i le vasega. Ia faamamafa atu tomai ma taleni a tamaiti taitoatasi ma vaavaai ni auala e mafai ai ona auai lelei.
Ia fetuutuunai mea e faatino ai lesona ma siosiomaga ina ia fetaui ma manaoga o tamaiti e i ai faaletonu.

O loo i ai mea faaopoopo mo le aoaoina atu o tamaiti e i ai faaletonu o loo maua i le faletusi tutotonu o le Ekalesia.

O Le Taulimaina o Faafitauli o le Faasaunoa/ Faatautala

I le avea ai o oe ma se faiaoga, o le a e iloaina tamaiti i lau vasega e mafatia i lagona ona o le faatautala po o le faasaunoa foi. Afai e te popole i se tamaitiiti i lau vasega, faamolemole ia talanoa ma le epikopo. A o e saunia ma tuuina atu lesona, tatalo mo le taitaiga ma faatonuga a le Alii. Fesoasoani i tamaiti taitoatasi i lau vasega ia lagona o ia o se atalii/afafine faapelepele o le Tama Faalelagi ma e alolofa le Tama Faalelagi ma Iesu Keriso ia i tatou uma lava taitoatasi ma e finagalo foi i laua ina ia tatou fiafia ma saogalemu.