Lesona 14

O Iesu Keriso ma le Aso Sapati

Faamoemoega

Ina ia fesoasoani i tamaiti e faia mea i le Aso Sapati e faamamalu ma manatua ai Iesu Keriso ma le Tama Faalelalgi.

Sauniuniga

1. Ia suesue ma le agaga tatalo le Ioane 5:2–16, Mataio 12:1–13; Luka 13:11–17, 14:1–6, Faaliliuga a Iosefa Samita i le Mareko 2:26–27, Kenese 2:1–3, Esoto 20:8–11, ma le Mataupu Faavae ma Feagaiga 59:9–14. Ona suesue lea o le lesona ma iloilo pe faapefea ona e manao e aoao atu le tala faatusi paia (tagai “Saunia o Au Lesona,” i.0 [ vi], ma le “Aoao Atu Mai Tusitusiga Paia,” i. 0 [vii]).

2. Tusi faitau faaopoopo: Mareko 2:23–28, 3:1–6, ma le Luka 6:1–11.

3. Filifili ia fesili e talanoaina ma gaoioiga e faamauoa mai ai lea o le a aafia ai tamaiti ma o le a sili ona fesoasoani ia i latou ia mauaina le faamoemoega o le lesona.

4. Mea e manaomia: Se Tusi Paia po o se Feagaiga Fou mo tamaiti taitasi.

Faalautelega Fautuaina o le Lesona

Tofi se tamaititi e faia le tatalo amata.

Ia tofi ni tamaiti e faamatala mai i le vasega pe faapefea ona faaali atu lo latou alofa ma le auauna atu i isi i le faagasologa o le vaiaso. Fai i ai e faamatala mai ni mea na latou oo i ai.

Gaoioiga e Faatosina Mai Ai

Fai i tamaiti e sii i luga o latou lima pe afai latou te iloa le tali i tala taumate o loo i lalo:

Gaoioiga e Faatosina Mai Ai

• Ua taua soo mai i tusitusiga paia.

• Ua faapea mai le Tama Faalelagi ma Iesu e taua tele.

• E paia.

• O tagata latou te tausisia lona paia, e faaali mai ai e alolofa i le Tama Faalelagi ma Iesu.

• O le tasi o le fitu.

• E ese mai le isi ono.

• O ia tatou te tapuai atu ai i le Tama Faalelagi ma malolo ai mai a tatou galuega.

• O le aso o le vaiaso.

Tali: O le Sapati

Tala Faatusi Paia

Aoao atu le tala ia Iesu ma ana faamalologa i le Aso Sapati mai mau o lo o lisiina i le vaega o “Sauniuniga”. (Mo ala fautuaina e aoao atu ai le tala faatusi paia, tagai i le “Aoao Atu Mai Tusitusiga Paia,” i. vii.)

Ao e aoaoina atu nei tala, fesoasoani i tamaiti ina ia malamalama o tagata Iutaia i le taimi o Iesu e le i ola i le Sapati e pei ona faatonuina ai i latou. Sa latou faia ni tulafono matuiā e le i fesoasoani ia i latou e tapuai atu ai i le Tama Faalelagi. Faataitaiga, o se nonoa e tatala i se lima se tasi sa lē afaina pe a nonoa i le aso Sapati, ae a manaomia lima e lua e tatala ai, e faasāina.

“O le faamumuina po o le tapēina o se afi i le Sapati sa [faatulafonoina]. Sa faasa ona faatulaga se ponaivi gau, pe toe faasa’o se sooga o ivi…. A i ai se tasi e tanumia i se mea ua solo po o se mea ua pa’ū i le Sapati, e mafai ona sua i luga ma toe aumai, pe afai o ola, ae afai ua oti, e tatau ona taatia ai pea i le mea o i ai, seia maea le Sapati” (James E. Talmage, O Iesu o le Keriso, i. 215–16.)

Sa aoao atu e Iesu i tagata Iutaia o nei tulafono e sese. Sa ia faaalia i ana faataitaiga o le Sapati o le aso lea e faamamalu ai ia ma lona Tama i le faia o mea lelei ma mea taua, e pei o le fesoasoani atu i tagata.

Talanoaga ma Fesili e Faatatau I Ai

Suesue fesili ma mau o lo o taua i lalo a o e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.

Talanoaga ma Fesili e Faatatau I Ai

• O a mea ua faatonuina i tatou e faia i le Aso Sapati? (Esoto 20:8–11.) Aisea ua faatonuina ai i tatou e faia ia mea? (Kenese 2:1–3.)

• O le a le mea na faia e Iesu i le Sapati e faamalolo ai le tagata mai? (Ioane 5:6, 8);o le tagata ma lona lima gase? (Mataio 12:13); fafine faanounou? (Luka 13:13); le tagata mai fulafula? (Luka 14:4. Faamatala atu o le mai fulafula o se faamai e mafua mai le afu o le tino.) Pe mafai ea ona faataga ia gaoioiga i le Sapati i nei vaitaimi? Aisea?

• Aisea na ao saito ai le au soo i le Sapati? (Mataio 12:1.) O a mea e tatau ona faia i aso uma po o le Sapati?

• Sa faapefea ona tausia e Iesu le Sapati? Sa faapefea ona tausia e tagata Iutaia le Sapati? (Fesoasoani i tamaiti ina ia malamalama sa faaaoga e Iesu le Sapati e fesoasoani atu ai i tagata ma faaali atu ai lona faamamaluina o le Tama Faalelagi.)

• O a mafuaaga e lua na le fiafia ai taitai o tagata Iutaia ia Iesu? (Ioane 5:18.)

• O ai na faia tulafono e uiga i le aso Sapati mai le amataga o le lalolagi? (Mataio 12:8; Kenese 2:1–3. Faamanatu atu i tamaiti na faia e Iesu Keriso le lalolagi i lalo o faatonuga a le Tama Faalelagi.) O le a sou manatu e uiga i lagona na oo ia Iesu ina ua ia vaaia ua suia e tagata Iutaia tulafono sa ia faatuina?

• O le a sou manatu i lagona o le tagata ma’i i le taelega o Petesa, le fafine faanounou, le tagata ma lona lima gase, ma le tagata ma’i fulafula ina ua faamaloloina i latou? (Luka 13:13.) Sa faapefea ona faaali atu le faamamaluina e Iesu o lona Tama i lona faia o ia mea i le aso Sapati?

• O le a sou manatu i le faauigaina e Iesu o lona faapea mai o se tulafono le agalelei i le Sapati? (Mataio 12:12.) E faapefea ona e iloa mea lelei e fai i le aso Sapati? (Esoto 20:8–11; MFF 59:9–14.)

• O a mea e le tatau ona tatou faia i le Sapati? Ia talanoaina le faamatalaga lenei mai le Au Peresitene Sili: “E tatau ona tatou aloese mai le faatau i le Sapati ma le auai atu i nisi gaoioiga lautele ma taaloga” (Ensign, Jan. 1993, p.80).

Ia talanoaina upusii nei mai ia Peresitene Spencer W. Kimball: “O mea tatou te faia i le Sapati o se fua lea o lo tatou alofa mo lo tatou Tama Faalelagi” (The Teachings of Spencer W. Kimball, p. 218). Tuu atu i tamaiti e faaali mai ni auala tatau e mafai ona latou faailoa atu ai lo latou alolofa i le Tama Faalelagi i le Sapati, e pei o le auai atu i sauniga, faitauina o tusitusiga paia, tusia o talaaga o o latou olaga, asiasi atu i aiga ma e mamai, fiafia e faalogologo i musika lelei, tapuaiga, auauna atu i isi, ma le auai atu i gaoioiga tuufaatasi a aiga. Afai o se gaoioiga tau fesili, fesili atu i tamaiti e filifili pe o se auala lelei lena gaoioiga e faaali atu ai lo latou alofa ma le faamamaluina o le Tama Faalelagi ma Iesu Keriso pe sili ona fai i se isi aso.

Gaoioiga e Faamauoa Ai

E mafai ona e faaaogaina se tasi pe sili atu foi o nei gaoioiga i soo se taimi o le lesona pe faaaoga foi o se toe iloiloga, otootoga, po o se lu’i.

1. Tuu atu i tamaiti e aoao le Mataupu Faavae ma Feagaiga 59:9–23 ma lisi nisi o gaoioiga ua faatonuina i tatou e le Alii e faia i le Sapati ma faamanuiaga ua ia folafola mai mo i tatou pe a tatou tausia ia tulafono.

2. Tuu atu i tamaiti e faaigoa mai ni gaoioiga sa latou vaaia o faia e tagata i le Sapati. Filifili pe talafeagai nei gaoioiga mo le Sapati i le tuuina atu o fesili nei:

   Pe fesoasoani ea ia te au mo le faamamaluina o le Tama Faalelagi ma Iesu Keriso?

   Pe ou te tausia ai ea tulafono ua tuuina mai e le Tama Faalelagi mo le Sapati?

   Pe ou te malolo ai?

   Pe e auauna atu ai ea i se tasi?

   Tuuina atu se lui i tamaiti ina ia faia fuafuaga mo le faamamaluina o le Sapati.

3. Talanoaina le faamatalaga lenei mai le Au Peresitene Sili: “Matou te uunaia tagata uma o le Au Paia o Aso e Gata Ai ina ia tuu ese lenei aso paia mai gaoioiga o le lalolagi ma ia latou ua’i atu e ala i le agaga o le tapuai, faafetai, auauna, ma gaoioiga tuufaatasi a aiga e talafeagai mo le Sapati. E pei ona naunau tagata o le au paia e avea a latou gaoioiga o le Sapati ma vaega e i ai le Agaga o le Alii, o le a faatumulia o latou olaga i le fiafia ma le filemu” (Ensign, Jan. 1993, p. 80).

4. Tuu atu i tamaiti e tusia i lalo upu nei O le a ou tausia le aso Sapati ina ia paia i luga o se fasipepa ma ia teuteuina i ni vali ma ni peni maka.

Faaiuga

Molimau

Ia tuuina atu lau molimau i le taua o le tausia o le aso Sapati ina ia paia i le faia o mea lelei faatasi ai ma faamanuiaga ua e maua mai ai. Fautuaina tamaiti ina ia faia mea e faamamaluina ai le Tama Faalelagi ma Iesu Keriso i le Sapati.

Tusi Fautauina e Faitau i le Fale

Ia fautuaina e suesue e tamaiti le Ioane 5:2–16 i le fale e fai ma toe faamanatu o lenei lesona.

Tofi se tamaititi e faia le tatalo faaiu.