Lesona 15

Sa Faaaoga e Iesu Keriso Lona Mana Faaleperisitua e Faamanuia Ai Isi Tagata

Faamoemoega

Ina ia fesoasoani i tamaiti ia malamalama i le mana o le perisitua.

Sauniuniga

1. Suesue ma le agaga tatalo le Mareko 4:35–41, 6:33–44, Luka 9:37–43, Mataio 14:23–33, Galuega 10:38, ma le Mataupu Faavae ma Feagaiga 13, 27:12, 124:123. Ona suesue lea o le lesona ma iloilo pe faapefea ona e manao e aoao atu le tala faatusi paia. (Tagai i le “Saunia o Au Lesona,” i. 0 [vi,] ma le “Aoao Atu Mai Tusitusiga Paia,” i. 0 [vii] ).

2. Tusi faitau faaopoopo: Mataio 8:23–27; Ioane 6:1–14, 16–21; ma le Aoaoga Faavae o le Talalelei, mataupu e 13.

3. Filifili ia fesili e talanoaina ma gaoioiga e faamauoa mai ai lea o le a aafia ai tamaiti ma o le a sili ona fesoasoani ia i latou ia mauaina le faamoemoega o le lesona.

4. Mea e manaomia:

   1. Se Tusi Paia po o se Feagaiga Fou mo tamaiti taitasi.

   2. Ata 7–15, Vavaoina o le Matagi (Taga Ata o le Talalelei 214; 62139); 7–16, Fafagaina o le Lima Afe (62143); ma le 7–17, Ua Savali Iesu i Luga o le Vai.

Faalautelega Fautuaina o le Lesona

Tofi se tamaitiiti e faia le tatalo amata.

Gaoioiga e Faatosina Mai Ai

Tape le moli o le potu, pe ki foi se moliuila. Fesili atu pe o le a le mea e manaomia ina ia ola ai le moli? (Eletise). Tuu atu i tamaiti e tau mai ia te oe nisi o mea o lo o tatou faaaogaina e manaomia ai le mana (malosiaga). O a nisi ituaiga o mana o lo o i ai? Tau atu i tamaiti o nei o le a latou aoao ai e uiga i se mana e sili atu nai lo mana uma, e sili atu foi nai lo malosiaga faaletagata. O le mana o le Atua. Ua tatou ta’ua o le Perisitua.

O Isi Gaoioiga e Faatosina Mai Ai

Faaali atu i tamaiti se maneta ma se fasi uamea. Tuu atu i tamaiti e faaaoga le maneta e fetosoa’i ai le uamea i luga o le laulau. Afai e leai se maneta, ona feula lea o se paluni ona olo lea i se ie ina ia pipii i se puipui po o se tasi foi o tamaiti. E mafai foi ona tuu atu i se tamaititi e selu lona ulu mo sina taimi ona faaaoga lea o le selu e piki ai ni fasipepa ninii o lo o i luga o le fola.

O Isi Gaoioiga e Faatosina Mai Ai

• O le a le mea o lo o mafai ai ona pipii le maneta i le uamea, le paluni e pipii i le puipui po o se ie, po o le selu foi na te pikiina fasipepa? (O lo o i ai i le maneta se malosiaga e mafai ai ona ia mauaina le uamea. O le malosiaga tau eletise na faapipiiina le paluni i le puipui po o le ie, ma ua mafai ai foi e le selu ona pikiina i luga fasipepa.)

• O a nisi malosiaga (mana) e mafai ona e manatua? (Faititili, eletise, ma isi.)

Faamatala i tamaiti o le a latou aoao i se mana e sili i lo mana uma. O le mana o le Atua, o le perisitua.

Tala Faatusi Paia ma Talanoaga ma Fesili e Faatatau i Ai

Faaaoga ata i le taimi tatau, ma aoao atu tala faatusi paia e uiga ia Iesu ma le faaaogaina o lona mana. (Mo ala fautuaina e aoao atu ai le tala faatusi paia, tagai i le “Aoao Mai Tusitusiga Paia,” i. (vii.)

Tala Faatusi Paia ma Talanoaga ma Fesili e Faatatau i Ai

1. Vavaoina o le Matagi (Mareko 4:35–41)

   • O a ni lagona o le au soo o Iesu e uiga i le matagi? (Mareko 4:38.) Aisea na latou manatu ai e le i amanaiaina i latou e Iesu? E faapefea ona e iloa e amanaia oe e le Tama Faalelagi?

   • Sa faapefea ona vavao e Iesu le matagi? (Mareko 4:39.)

   • O le a le mana sa faaaoga e Iesu e vavao ai le matagi? (O lona mana— o le mana o le Atua.) O le a le tatou ta’u i le mana ma le malosiaga o le Atua? (MFF 124:123. O le perisitua.)

   • Ina ua maea ona vavao le matagi, o le a le mea sa fesili ai Iesu i ona soo? (Mareko 4:40.)

   • O a ni lagona o le au soo e uiga ia Iesu ina ua uma ona vavao le matagi? (Mataio 8:27; Mareko 4:41.)

2. Fafagaina o le Lima Afe (Mareko 6:33–44)

   • O le a sou manatu aisea na mulimuli atu ai tagata ia Iesu i le vao? (Mareko 6:33.) O le a le mea na faia muamua e Iesu ao le i faia lana vavega i le fafagaina o tagata e lima afe? (Mataio 14:14.) O le a le mana na faaaoga e Iesu e faamalolo ai mai? (O le mana o le perisitua.) O ai le tupuga o le mana ua manuia ai o tatou olaga? (Galuega 10:38.)

   • O le a le mana sa faaaoga e Iesu na lava ai taumafa na ia saunia mo tagata uma? O le a se mea ofoofogia e uiga i taumafa na totoe? (Mareko 6:42–44; Ioane 6:12–13.)

3. Sa faamalolo e Iesu se alii sa ulufia e Agaga leaga (Luka 9:37–43)

   • O le a le mea na faaletonu i le atalii o le tamaloa? (Luka 9:38–40.) O le a le mea na manao le tamaloa e faia e Iesu?

   • O le a le mea na faia e Iesu i le tama? (Luka 9:42.) O a ni foliga vaaia o tagata sa i ai ma Iesu i nei vavega? (Luka 9:43.)

   • O ai isi na alu i ai le tamaloa mo se fesoasoani? (Luka 9:40.) O le a sou manatu i le mafuaaga ua le mafai ai ona fesoasoani le au soo i lenei tama ma lona atalii? Aisea na taua ai e Iesu ona soo “e le faatuatua”? (Luka 9:41.) Aisea e te manatu ai e taua tele le faatuatua mo le faagaioiina o le mana o le perisitua?

4. Savali I Luga o le Vai (Mataio 14:22–33)

   • O le a le mana na mafai ai ona savali Iesu i luga o le vai e agai atu i le vaa o lo o i ai ona soo? O a ni manatu o le au soo ina ua latou vaai ia te ia? (Mataio 14:26.) O le a le fetalaiga a Iesu ia i latou? (Mataio 14:27.)

Talanoaga Otooto ma Fesili e Faatatau I Ai

Faamatala na faia e Iesu nei vavega e fa mai le mana o loo ia te ia. Sa ia faia foi nisi vavega e ala i le mana o le perisitua. Ua fetufaai mai le mana o Iesu ia i latou o lo o umia le perisitua i lenei vaitaimi.

Sa maua e Peteru, Iakopo ma Ioane ki o le perisitua i le Mauga o Liua (Mataio 17:1–9). O ki nei o le perisitua na tuuina atu ia Peteru, Iakopo ma Ioane ina ia latou maua le mana o le perisitua pe a afio ese Iesu. O Peteru sa avea ma Peresitene o le Ekalesia ina ua mavae le toetu o Iesu, ma sa ia manaomia ki o le perisitua e faaauau ai le galuega a le Ekalesia.

Talanoaga Otooto ma Fesili e Faatatau I Ai

• O a ki o le perisitua na tuuina atu e Mose ma Elia ia Peteru, Iakopo ma Ioane? (Sa tuuina atu e Mose ia i latou ki o le perisitua mo le faapotopotoina o Isaraelu; sa tuuina atu e Elia ia i latou ki o le mana o le faamauga [tagai MFF 110:12–16].)

• E faapefea ona tatou faaaogaina ki o le faapotopotoina i lenei vaitaimi? (Mataupu Faavae o le Faatuatua 1:10. Galuega faafaifeautalai.) E faapefea ona e aafia i galuega faafaifeautalai i le taimi nei, ma e faapefea ona e saunia e auauna atu o se faifeautalai faamisiona?

• O fea tatou te faaaogaina ai ki o le faamauga i lenei vaitaimi? (O totonu o le malumalu.) E faapefea ona e saunia e ulu atu i le malumalu?

Faamatala atu ina ua mavae le maliu o Iesu ma le au Aposetolo, o faamanuiaga o le Ekalesia ma le perisitua sa aveesea mai tagata o le fogaeleele. Sa alagatatau i le perisitua ona toefuatai i le fogaeleele. Sa toefuatai e Iesu lana ekalesia ma le perisitua e ala mai ia Iosefa Samita ina ia maua uma e i tatou faamanuiaga o le perisitua i o tatou olaga i le taimi nei?

Talanoaga Otooto ma Fesili e Faatatau I Ai

• Aisea e taua ai le i ai o le Perisitua i le Ekalesia i le taimi nei? O a perisitua e lua? Sa faapefea ona toefuatai mai le Perisitua Arona? (MFF 13.) Sa faapefea ona toefuatai mai le Perisitua Mekisateko? (MFF 27:12.)

Fesoasoani i tamaiti ina ia malamalama e mafai ona maua e alii agavaa pe a sefululua o latou tausaga, le perisitua lea sa faaee atu e Ioane le Papatiso ia Iosefa Samita ma Oliva Kaotui. Faamatala atu pe a maua e alii le Perisitua Arona, ua tuuina atu ia i latou le mana e galulue ai i le suafa o le Atua i le faamanuiaina o tagata o la latou uarota po o le paranesi. (Tagai i gaoioiga e faamauoa ai 5.)

Talanoaga Otooto ma Fesili e Faatatau I Ai

• O a faamanuiaga tatou te mauaina mai le mana o le perisitua? (Faamanuiaina ma le faaigoaina o pepe, faamauga o papatisoga, faamanatuga, faamauga i le malumalu, ma isi.) O a nisi o faamanuiaga faaletagata tatou te mauaina mai le perisitua? (Faamanuiaga pe a mai, faamanuiaga faaletamā, faiaoga o aiga.)

• E faapefea ona faamanuiaina e le perisitua lou olaga?

Gaoioiga e Faamauoa Ai

E mafai ona e faaaogaina se tasi pe sili atu foi o nei gaoioiga i soo se taimi o le lesona pe faaaoga o se toe iloiloga, otootoga, po o se lu’i.

1. I luga o ni fasipepa ua gaugau, tusia ai upu nei Papatisoga ma Faamauga, Faamanuiaga o Mai, Faamanuiaga Faaletamā, ma le Faamanatuga. Tuu fasipepa i se pusa po o se teutusi ua uma ona faaigoaina o le “Faamanuiaga ma Sauniga o le Perisitua.” Tuu atu i se tamaititi e aumai i fafo se fasipepa ma faitau atu i le vasega. Talanoa i le matafaioi a le perisitua i faamanuiaga ma sauniga. Toe faitau ma isi fasipepa. Tuu atu i tamaiti e faamatala mai mea na latou oo i ai i nei sauniga ma faamanuiaga.

2. Toe faamanatu le sauniga lona lima o mataupu faavae o le faatuatua, ma fesoasoani i tamaiti ina ia taulotoina.

3. Usu pe tauloto upu o le “Matai e, Ua Sou Le Vasa” (Viiga, nu. 58).

4. Faamatala atu pe a atoa le sefululua o se alii o le Ekalesia, e mafai pe a faapea o lo o agavaa ona ia mauaina le Perisitua Arona ma faauuina i le tofiga o se tiakono. Saunia upu nei:

   Tufa le faamanatuga

   Aoina mai o taulaga anapogi

   Avea ma se avefeau a le epikopo

   Vaaia meatotino a le Alii

   Tuu atu i tamaiti e tau mai tiute o le tiakono. Pe a tau mai e tamiti tali sao, ona faaali lea o le faaupuga sao. Fesoasoani ia i latou ina ia latou iloa tiute uma i le tuuina atu i ai o ni nai faamatalaga e taufaamatali ai pe a talafeagai ai.

Faaiuga

Molimau

Tuuina atu lau molimau i le mana o le perisitua o loo ia Iesu. Ia tuuina atu foi lau molimau o loo i alii agavaa uma o le Ekalesia lea lava mana e tasi o le perisitua, ma o loo iai foi faamanuiaga e tatau ai mo i tatou e ala mai i le perisitua.

Tusi Fautuaina e Faitau i le Fale

Ia fautuaina tamaiti e suesue le Mareko 4:35–41 i le fale e fai ma toe faamanatu o lenei lesona.

Tofi se tamaitiiti e faia le tatalo faaiu.