Lesona 34

Fafaga I A’u Mamoe

Faamoemoega

Ina ia fesoasoani i tamaiti ia faaali atu lo latou alofa mo Iesu Keriso e ala lea i lo latou fesoasoani i isi ma ola i le talalelei.

Sauniuniga

Suesue ma le agaga tatalo le Ioane 21:1–17 ma le Mareko 16:15. Ona suesue lea o le lesona ma iloilo pe faapefea ona e manao e aoao atu i tamaiti le tala faatusi paia (Tagai i le “Saunia o Au Lesona,” itulau 0 [vi,] ma le “Aoao Atu Mai Tusitusiga Paia,”itulau 0 [vii].)
Filifili fesili e talanoaina ma gaoioiga e faamauoa mai ai na o le a sili ona aafia ai tamaiti ma sili ona fesoasoani ia i latou e maua ai le faamoemoega o le lesona.
Ia faia se ata ‘oti o se mamoe mo tamaiti uma o loo tusia igoa i lau vasega (tagai i le faataitaiga o loo i le faaiuga o le lesona), ma tusi ai le igoa o le tamaititi i le pito i tua o le ata ‘oti. (Poo le tusi o igoa o tamaiti taitoatasi i luga o ni fasi pepa eseese.) Ao lei faia le vasega, ia tuu ata ‘oti nei faataamilomilo i totonu o le potu ina ia mafai ona iloa e tamaiti.
Mea e manaomia:
1. Se Tusi Paia poo se Feagaiga Fou mo tamaiti taitasi.
2. Ata 7-38, Iesu ma le Au Faifaiva (Taga Ata o le Talalelei 210; 62138).

Faalautelega Fautuaina o le Lesona

Tofi se tamaititi e faia le tatalo amata.

Gaoioiga e Faatosina Mai Ai

Fai atu i tamaiti e vaavaai solo i totonu o le potu ma tau mai se mea o loo ese ai lava. Tau atu iai o mamoe o loo latou vaai atu iai o loo taapeape solo ma e mafai e tamaiti uma taitoatasi ona fesoasoani e faapotopoto mai mamoe e ala lea i le sueina o le mamoe o loo iai le igoa o lea tamaititi ma lea teineititi ma avatu ia te oe. Afai e iai ni ata ‘oti o mamoe e totoe ai, ia faamatala atu iai o le a e taua nei mamoe i se taimi o mulimuli mai o le lesona.

Ia valaaulia tamaiti ina ia outou auai faatasi i le faatinoina o se tala. I le valaau atu i le tamaititi i lona igoa atoa, ia faapea atu, “(Ta’u le igoa), e te alofa i le Faaola o Iesu Keriso?” A maea ona tuu mai le tali, “Fafaga i ana tamai mamoe.” Toe tau atu le igoa o le tamaititi ma toe tuu faalua atu iai le fesili lava lena e tasi, ma a maea tali uma taitasi, ia e fai atu iai, “Fafaga i ana mamoe.” Fai atu i le tamaititi poo le a sona lagona i lou tuuina atu pea o le fesili lava e tasi. Ia faamatala atu na oo foi Peteru i le tulaga lava lea e tasi faatasi ma Iesu ina ua mavae le toetu o Iesu.

Tala Faatusi Paia

Aoao atu i tamaiti le tala i le faaali atu o Iesu i ona soo i le Vai o Tiperia (poo Kalilaia) mai le Ioane 21:1–17. (Mo ala fautuaina e aoao atu ai le tala faatusi paia, tagai i le “Aoao Atu Mai Tusitusiga Paia, i. vii.) Faaaoga ata i taimi e talafeagai ai.

Talanoaga ma Fesili e Faatatau I Ai

Suesue fesili ma mau o loo taua i lalo a o e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.

Talanoaga ma Fesili e Faatatau I Ai

O a mea a Peteru ma isi soo sa fai i le Vai o Tiperia? (Ioane 21:3.) O le a le mea na ta’u atu e Iesu i le Au Aposetolo e fai ina ua latou le maua ni i’a? (Ioane 21:5–6.) O le a sou manatu aisea na iloa ai e Ioane o Iesu lea ina ua matuai tumu le upega i i’a? (Ioane 21:6–7.) O le a le mea na faia e Peteru? (Ioane 21:7.) O le a sou manatu aisea na fai ai e Peteru lea mea? (Ina ua ia iloaina o Iesu lea, sa le mafai loa ona ia toe faatali i le fia faalatalata atu ia te ia.)
O le a le fesili na tuuina atu e Iesu ia Peteru? (Ioane 21:15.) O le a sou manatu aisea na tuuina faatolu atu ai e Iesu le fesili lea e tasi ia Peteru? O le a se lagona na oo ia Peteru ina ua tuuina atu faatolu e Iesu le fesili lava e tasi ia te ia? (Ioane 21:17.) O a tiutetauave o Peteru i le taimi nei ina ua maliu ma toetu ia Iesu?
O le a le uiga o le fetalaiga a Iesu ina ua ia faapea mai, “Fafaga i a’u mamoe”? O ai ana mamoe? (O fanau uma a le Tama Faalelagi.) O le a le mea na finagalo Iesu e fafaga ai ana mamoe? (O upu moni o le talalelei.) O le a le mea na valaauina ai e Iesu ana Aposetolo e fai? (Mareko 16:15.)

Fesoasoani i tamaiti ina ia malamalama mai le talanoaga, na poloaiina e Iesu lana Au Aposetolo ina ia talai atu le talalelei, ma e finagalo o ia latou te faaauauina lenei galuega, ae le o le toe foi atu e fagogota. O Peteru ua avea nei ma Peresitene o le Ekalesia, ma o lona tiutetauave o le taitaia lea o le Ekalesia ma faatonutonuina taumafaiga uma ina ia talai ai le talalelei a Iesu.

Talanoaga ma Fesili e Faatatau I Ai

Poo iai ea ni a tatou leoleo mamoe i aso nei o loo fafagaina mamoe a Iesu? O ai i latou na? (Tagai i le gaoioiga e faamauoa mai ai lona 2.)

Afai o loo iai lava ni ata ‘oti o mamoe o loo iai i totonu o le potu, ia fai atu i tamaiti e faapotopoto mai ma aumai i luma. Ia faamatala atu o nisi o nei tamaiti o loo iai o latou igoa i luga o nei mamoe e moomia se leoleo mamoe e fesoasoani e fafaga i latou i le talalelei.

Talanoaga ma Fesili e Faatatau I Ai

E mafai faapefea e leoleo mamoe ona fafaga mamoe a Iesu? (I le faia lea o faataitaiga lelei, o le asiasi atu ia i latou e le masani ona omai i le vasega ma faauo atu ia i latou i le aoga, o le tu atu mo le talalelei ma le Ekalesia, o le auauna atu ia i latou o loo moomia le fesoasoani, ma isi.) E mafai faapefea ona tatou fesoasoani i tagata o aiga ma uo ina ia malamalama lelei i mataupu faavae o le talalelei? Aisea tatou te faaali atu ai lo tatou alofa mo Iesu pe a tatou fesoasoani i isi?

Gaoioiga e Faamauoa Ai

E mafai ona e faaaogaina se tasi poo le sili atu foi o nei gaoioiga i soo se taimi o le lesona poo le avea o se toe iloiloga, aotelega, poo se lu’i.

Tusi le Fafaga i A’u Mamoe i le pito i luga o se siata (poo le faaaoga foi o le laupapa). Ia talanoaina ma tamaiti auala e mafai ai ona latou faaali lo latou alofa mo Iesu e ala lea i le fafagaina o ana mamoe. Tusi a latou faamatalaga i luga o se siata poo luga o le laupapa. Faaaoga manatu nei pe afai e manaomia:

Ia avea ma faataitaiga lelei e ala lea i le auai i le lotu, faaaoga gagana mama, usiusitai i poloaiga, ia faamaoni, tatalo, suesue tusitusiga paia, ola i mea na e aoaoina, ma usiusitai i matua ma tulafono o le laueleele.

Ia tuuina atu lau molimau i tagata o le Ekalesia ma tagata e le auai i le Ekalesia.

Fesoasoani i isi e filifili le mea tonu pe a faaosoosoina.

Talanoa atu e uiga i le talalelei i tagata latou te le malamalama iai.

Tatalo ma suesue i tusitusiga paia ma ola faalatalata atu i le Alii.

Tuu atu i tamaiti se fasi pepa ma se penitala ma fai atu iai e tusi le, “O le a avea au ma leoleo mamoe lelei e ala i le .” Fai atu i tamaiti e faauma le fuaiupu lena e ala lea i lo latou tusia i lalo o se mea ua latou fuafuaina ina ia avea ai ma leoleo mamoe lelei.
Ia lisi i luga o le laupapa nisi o valaauga i le Ekalesia, e pei o se epikopo, faiaoga, peresitene o le siteki, faiaoga o aiga, faiaoga asiasi, faifeautalai, perofeta, aposetolo, peresitene o le Peraimeri, ma isi. Fai atu i tamaiti e filifili se valaauga se tasi o na valaauga ma tau mai pe o faapefea ona fesoasoani lena tagata i le fafagaina o mamoe a le Faaola. Fai atu i tamaiti e fetufaai mai ni o latou malamalamaaga ina ua fesoasoani atu faiaoga, uo, poo tagata foi o le aiga ia i latou ina ia latou aoao atili e uiga i le talalelei. E mafai ona e faamatala atu foi se mea na oo foi ia te oe.
I luga o fasi pepa ia tusi ai vaega nei poo nisi foi mea e mafai ai e tamaiti ona fesoasoani i isi ina ia avea ma ni tagata malolosi o le Ekalesia. Fai atu i tamaiti e filifili se fasi pepa se tasi, faitau lemu, ma faatino lea tulaga. Fai atu i isi tamaiti e mate poo le a le tulaga lea ma talanoaina pe faapefea ona latou fafagaina mamoe a Iesu i lea ituaiga tulaga. Tuu atu le avanoa i tamaiti uma.
- O nisi tamaiti i lau vasega o loo faalavelvae i isi i le taimi o le lesona.
- O nisi o au uo o loo mananao e matamata i se ata tifaga leaga.
- Ua uunaiina oe e sau uo e te aveina se lole mai le faleoloa e aunoa ma le totogiina.
- O se tasi o le tou vaega ua manao ia te outou uma ina ia outou inu pia poo le aua le tausia le Upu o le Poto i se isi tulaga.
Ia faamatala atu o se avanoa lelei lava e te fesoasoani ai i se tasi e te lua masani poo le tuputupu ae foi i le talalelei o le taimi lea e avea ai oe ma ana uo. Ia talanoaina poo a mea e mananao ai tamaiti i se uo ae pe faapefea foi ona atinaeina nei uiga.

A maea ni sauniuniga loloto ma le faaeteete, tau atu i tamaiti taitoatasi e ala lea i sina faamatalaga puupuu o ni uiga o ia te i latou e te matuai talisapaiaina lava. Faailoa atu mafuaaga e te manao ai ina ia avea oe ma a latou uo.
Fai atu i tamaiti e faamatala mai pe faapefea ona faatatau nei mau ia i tatou i aso nei:
Usu pe faitau upu o le “Fai le Mea Tonu” (Tusipese a Tamaiti, i. 0) poo le “Ou te Taumafai e Avea Faapei o Iesu” (Tusipese a Tamaiti , i. 0).

Faaiuga

Molimau

Ia tuuina atu lau molimau, i le avea ai ma tagata o le Ekalesia, ua ia te i tatou uma le tiutetauave o le fesoasoani lea i isi ina ia aoao i le talalelei ma ola faalatalata atu ia Iesu Keriso. Ia faamatala atu i tamaiti ou lagona e tusa ai ma le mafai ona e fetufaai atu le talalelei ma i latou.

Tusi Fautuaina e Faitau i le Fale

Ia fautuaina e suesue e tamaiti le Luka 24 i le fale e fai ma toe faamanatu o lenei lesona.

Tofi se tamaititi e faia le tatalo faaiu.