O le Malaga Faatupu a Iesu ma le Talisuaga Mulimuli

Faamoemoega

Ina ia fesoasoani i tamaiti uma ia malamalama i le taua o le aai i le faamanatuga i vaiaso taitasi e avea lea o se faamanatu ina ia manatua pea Iesu Keriso.

Sauniuniga

Suesue ma le agaga tatalo le Mataio 21:1–11; Mareko 14:12–26; Luka 19:29–38; 22:15–20; ma le Mataupu Faavae ma Feagaiga 20:77, 79. Ona suesue lea o le lesona ma iloilo pe faapefea ona e manao e aoao atu i tamaiti le tala faatusi paia (Tagai i le “Saunia o Au Lesona,” itulau 0 [vi,] ma le “Aoao Atu Mai Tusitusiga Paia,”itulau 0 [vii].)
Tusi faitau faaopoopo: o le ulutala o le Mataupu Faavae ma Feagaiga 27, Mataupu Faavae ma Feagaiga 27:2, ma le Mataupu o le Talalelei, mataupu 23.
Filifili fesili e talanoaina ma gaoioiga e faamauoa mai ai na o le a sili ona aafia ai tamaiti ma sili ona fesoasoani ia i latou e maua ai le faamoemoega o le lesona.
Mea e manaomia:
1. Se Tusi Paia poo se Feagaiga Fou mo tamaiti taitasi.
2. Ni kopi o le Mataupu Faavae ma Feagaiga.
3. Peni ma ni pepa mo tamaiti uma (pule oe pe fai)
4. Ata 7-28, O le Malaga Faatupu (Taga Ata o le Talalelei 223; 62173), ma le 7-29, O le Talisuaga Mulimuli (Taga Ata o le Talalelei 225; 62174).

Faalautelega Fautuaina o le Lesona

Tofi se tamaititi e faia le tatalo amata.

Gaoioiga e Faatosina Mai Ai

Vaevae le vasega i ni vaega, ma fai atu i tamaiti e mafaufau i mea e mafai ona latou faia i o latou fale pe afai o le a iai ni a latou malo faapitoa e asiasi atu i o latou aiga, e pei o le fufuluina o le fale, sauniaina o meaai faapitoa, ma isi. Tuu atu i vaega taitasi e faatino mai mea o le a latou faia, ma tuu atu i le vasega atoa latou te mateina maia le mea o loo latou faia.

Gaoioiga e Faatosina Mai Ai

Afai o le a alu atu le Faaola i lou fale, o le a se mea e te faia ina ia e saunia ai? Tau atu i tamaiti o lenei lesona o le a aoaoina ai i latou e uiga i se taimi o le a faia ai e tagata se sauniuniga faapitoa e faafeiloaia ai le Faaola e faaali atu ai lo latou matuai faamamaluina ma le faaaloalogiaina o ia.

Tala Faatusi Paia ma Talanoaga ma Fesili e Faatatau I Ai

Faaali atu le ata o le Malaga Faatupu. Aoao atu i tamaiti le tala e uiga i le malaga faatupu a Iesu i Ierusalema (Mataio 21:1–11; Luka 19:29:38). (Mo ala fautuaina e aoao atu ai le tala faatusi paia, tagai i le “Aoao Atu Mai Tusitusiga Paia, i. 0 (vii.)

Tala Faatusi Paia ma Talanoaga ma Fesili e Faatatau I Ai

O le a le mea na faia e tagata ina ua latou faalogo ua malaga atu Iesu Keriso i lo latou aai? (Mataio 21:8–9.) O le a sou manatu o le a so latou lagona e uiga ia Iesu? O le a sou manatu o le a se lagona e oo ia te oe pe ana fai e te iai iina?
Aisea na alalaga ai tagata “Osana” ao latou savavali atu agai i totonu o Ierusalema ma Iesu? (Fesoasoani atu i tamaiti o le auala lea sa tapuai ai nei tagata ia Iesu ma vivii atu ai ia te ia ma faaali atu ai latou te talitonu o ia o le Alo o le Atua.) O faapefea ona tatou tapuai atu i le Tama Faalelagi ma Iesu Keriso i nei aso? (Pe a tatou auai atu i sauniga faamanatuga, faitau tusitusiga paia, usuina o viiga, tatalo ma taumamafa i le faamanatuga.)

Aoao atu i tamaiti le tala i le Talisuaga Mulimuli mai le Mareko 14:12–26 ma le Luka 22:15–20. Faaali atu le ata o le Talisuaga Mulimuli. Ia faamatala atu o le Paseka o se meaai taua lea e ai e tagata i tausaga taitasi e faamanatu ai ia te i latou le taimi na laasia ai e le agelu o le faafanoga ia fale o o latou augatuaa i Aikupito ma lē fasiotia ai se tasi o a latou ulumatua (tagai i le Esoto 12:21–30).

Tala Faatusi Paia ma Talanoaga ma Fesili e Faatatau I Ai

Aisea tatou te ta’ua ai lenei tausamiga o le Paseka o le Talisuaga Mulimuli? (Mareko 22:15–18.) O le a le mea na faia e Iesu i lea tausamiga? (Mareko 14:22–24.) Aisea na ia faia ai lea mea? (Ina ia aoao atu ai le taua o lana togiola. Na ia faatulagaina le faamanatuga ina ia fesoasoani ia i tatou e manatua pea o ia ma lana togiola.)
O le a le faamatalaga a Iesu i le mea o loo faatusa iai le areto? (Mareko 14:22.) O le a le faamatalaga a Iesu i le mea o loo faatusa iai le uaina? (Mareko 14:23–24. Ia faamatala atu o loo tatou faaaogaina i aso nei le vai nai lo le uaina.) Fesoasoani i tamaiti ina ia latou malamalama o le areto ma le vai o faatusa, poo faamanatu, i le tino ma le toto o Iesu.
E faapefea ona tutusa le Talisuaga Mulimuli ma le tatou sauniga faamanatuga i aso nei? Ia faamanatu atu i tamaiti, e pei lava ona tofitofiina e Iesu o le areto ma faamanuia ma tufaina atu le areto ma le uaina, o loo faataunuuina foi e le au perisitua na lava tiute i aso nei. Atonu e te manao e faaaoga lenei avanoa e fesoasoani ai i tama o lau vasega ina ia malamalama, afai latou te mauaina le Perisitua Arona, o le a latou mauaina le pule e avea ai ma sui o Keriso i le sauniga faamanatuga.

Afai e iai se tamaititi e fesili mai pe aisea ua tatou faaaogaina ai le vai nai lo le uaina mo le faamanatuga, ia faatepa i latou i le Mataupu Faavae ma Feagaiga 27:1–2.

Tala Faatusi Paia ma Talanoaga ma Fesili e Faatatau I Ai

Fai atu i tamaiti e faitau le Mataupu Faavae ma Feagaiga 20:77, 79. O a nei mau e lua? Ia faamatala atu na toe faailoa mai e Iesu upu mo tatalo o le faamanatuga ma ua faatonuina ia ositaulaga ina ia latou faia na upu e pei ona tusia ai i le Mataupu Faavae ma Feagaiga.
A tatou faapea atu “amene” i tatalo o le faamanatuga ma aai i le faamanatuga, o le a le mea ua tatou folafola atu e fai? O le a le mea ua folafola mai e le Alii mo i tatou? Aisea e taua tele ai ia i tatou ona manatua pea Iesu? O le a se mea e mafai ona e faia ina ia manatua ai pea le Faaola? (Tagai i le gaoioiga e faamauoa mai ai lona 3.)

Gaoioiga e Faamauoa Ai

E mafai ona e faaaogaina se tasi poo le sili atu foi o nei gaoioiga i soo se taimi o le lesona poo le avea o se toe iloiloga, aotelega, poo se lu’i.

Iloilo ia feagaiga o le papatisoga mai le lesona 6. Ia faamatala atu o folafolaga o loo i tatalo o le faamanatuga e tutusa foi ma folafolaga o feagaiga o le papatisoga. A tatou aai i le faamanatuga, ua tatou faafouina a tatou feagaiga o le papatisoga. E mafai ona e faaali atu upu nei o loo tusia i fasipepa:

Ou te folafola atu

e tauave i o’u luga le suafa o Keriso.

e manatua pea o ia.

e tausi ana poloaiga.

Ua folafola mai e le Alii ia te au

O le a ou maua pea lona Agaga e faatasi ma au.
Fesili atu i tamaiti pe iai nisi na tuuina atu o latou igoa ona o se mafuaaga faapitoa. Fai atu i tamaiti na sa faaigoaina i igoa o isi e talanoa mai e tusa ai ma le faaigoaina o ia i le igoa o lena tagata. Fesili atu i tamaiti na o iai ni faaiu faapitoa o o latou aiga e talanoa iai poo le a lona uiga ia i latou. Ona talanoa lea ma tamaiti e uiga i le tauaveina i o tatou luga o le suafa o Keriso pe a avea i tatou ma tagata o le Ekalesia a Iesu Keriso o le Au Paia o Aso e Gata Ai. Fesoasoani i tamaiti ina ia malamalama, o o tatou uiga i le avea ai ma tagata o le Ekalesia e tatau ona talafeagai ma se tasi ua avea ma soo o Iesu Keriso.
Tuu atu i le vasega latou te lisiina mai ni auala e mafai ai ona tatou manatuaina ai Iesu e le gata i le faamanatuga ae o o tatou olaga i aso taitasi. O manatu e mafai ona aofia ai:

I le taimi o le faamanatuga:

Mafaufau i ona puapuaga ma lona maliu mo i tatou.

Mafaufau i upu o se viiga faamanatuga.

Mafaufau i tala mai le soifuaga o Iesu (tuu atu i tamaiti e ta’u mai ni tala).

Mafaufau i se aoaoga se tasi a Iesu lea ua e manao e amata ona e ola ai.

Mafaufau i au feagaiga o le papatisoga.

I o tatou olaga i aso taitasi:

Tatalo atu i le Tama Faalelagi i aso taitasi i le suafa o Iesu Keriso.

Usitai i o tatou matua.

Ia agalelei i tagata o le aiga.

Faitau tusitusiga paia.

Usiusitai i poloaiga.

Ia faaaloalo i nofoaga paia.

Fesoasoani i nisi o loo moomia le fesoasoani.

Auai i sauniga a le Ekalesia.

E mafai ona e fai atu i tamaiti e tusi i lalo se fautuaga se tasi o nei fautuaga i luga o se fasi pepa ma teu e avea ma faamanatu i le gasologa o le vaiaso.
Ia talanoaina faatasi ma tamaiti le faamoemoega o viiga o le faamanatuga e ala lea i lou tuuina atu o fesili nei:
- Aisea tatou te usuina ai se viiga a’o le’i faamanuiaina le faamanatuga?
- O ai o loo tauina mai e le viiga o le faamanatuga ia i tatou?
Ia uunaiina tamaiti ina ia faalogo atu i upu o le viiga faamanatuga i vaiaso taitasi. E mafai ona outou usuina faatasi ma le vasega se viiga faamanatuga poo le taina foi o se musika ao faalogologo tagata uma taitoatasi ma mafaufau e uiga ia Iesu. Atonu e mafai ona faaaoga le “Iesu a Mafaufau ia Oe” (Viiga, nu. 76). E mafai foi ona e fesili atu i le taitai pese a le uarota ina ia faaaoga lenei pese e avea o se viiga faamanatuga i le isi sauniga faamanatuga o le a sosoo ai.
Usu pe faitau upu o le “Mo Ia o Le na Faalavaau” (Viiga, nu. 105).

Faaiuga

Molimau

Ia tuuina atu lau molimau ia Iesu Keriso ma lona alofa mo i tatou uma. Ia faamamafa atu, o le manatuaina o ia o le a fesoasoani lea ia i tatou e faia filifiliga sao ina ia mafai ai ona tatou toe faatasi ma ia. Ia uunaiina tamaiti e mafaufau i le Faaola pe a latou aai i le faamanatuga i vaiaso taitasi ma folafola atu ia latou ola ai e pei ona tatau ai.

Tusi Fautuaina e Faitau i le Fale

Ia fautuaina e suesue e tamaiti le Mareko 14:12–26 i le fale e fai ma toe faamanatu o lenei lesona.

Tofi se tamaititi e faia le tatalo faaiu.