Lesona 30
Iesu Keriso i Ketesemane
Faamoemoega
Ina ia fesoasoani i tamaiti ia latou lagonaina le alofa mo lo latou Togiola, o Iesu Keriso, talu ai lona puapuaga ma lana togiola mo a latou agasala.
Sauniuniga
-
Suesue ma le agaga tatalo le Mataio 26:36–46, Luka 22:40–46, Ioane 3:16, 15:12–13, Mosaea 3:7, ma le Mataupu Faavae ma Feagaiga 19:15–18. Ona suesue lea o le lesona ma iloilo pe faapefea ona e manao e aoao atu i tamaiti le tala faatusi paia (Tagai i le “Saunia o Au Lesona,” itulau 0 [vi,] ma le “Aoao Atu Mai Tusitusiga Paia,”itulau 0 [vii].)
-
Tusi faitau faaopoopo: 2 Nifae 9:21–22, Alema 34:9, Mataupu Faavae ma Feagaiga 76:41–42, ma le Mataupu o le Talalelei, mataupu 12.
-
Filifili fesili e talanoaina ma gaoioiga e faamauoa mai ai na o le a sili ona aafia ai tamaiti ma sili ona fesoasoani ia i latou e maua ai le faamoemoega o le lesona.
-
Mea e manaomia:
-
Se Tusi Paia poo se Feagaiga Fou mo tamaiti taitasi.
-
O upu nei e tusia i fasi pepa:
-
O le a le Togiola?
-
Aisea tatou te manaomia ai le Togiola?
-
O le a tatou oti uma lava.
-
Tatou te agasala uma.
-
O Iesu Keriso o lo tatou Faaola ma lo tatou Togiola.
-
E mama o ia.
-
E iai lona mana i le oti.
-
-
Ata 7-1, Iesu le Keriso (Taga Ata o le Talalelei 240; 62572), ma le 7-30, Iesu o Loo Tatalo i Ketesemane (Taga Ata o le Talalelei 227; 62175).
-
Faalautelega Fautuaina o le Lesona
Tofi se tamaititi e faia le tatalo amata.
Fesili atu i tamaiti pe iai se tasi o i latou e manao e fetufaai mai i le vasega se mea na fesoasoani ai le lesona o le vaiaso talu ai ina ia faaleleia atili lo latou tapuai i le taimi o le faamanatuga.
Gaoioiga e Faatosina Mai Ai
Fai atu i tamaiti e mafaufau i se tulaga e tai pei o lenei (ia faia ni taga, ia faafoliga e pei lava e moni):
Ia faafoliga o loo asiasi atu lo outou aiga i se tasi tou te masani. Ua e le usitai i ou matua ma e alu atu i totonu o se potu na ta’u atu e aua ne’i e alu iai i totonu. Na faafuasei lava ona ta’e se tasi o mea taua ia te oe.
Gaoioiga e Faatosina Mai Ai
-
O le a se lagona o le a oo ia te oe?
-
O le a sau tala e fai atu i le pule o le fale?
-
O le a se mea e mafai ona e faia e sui ai le mea ua ta’e?
-
O le a se mea o le a e faia pe afai e le lava sau tupe e faatau ai se mea e pei o le mea ua ta’e? E faapefea ona e totogiina?
Ia faamatala atu, o le a fesoasoani lou tama ia te oe aua e alofa ia oe. E ta’u atu e ia i a te oe afai e te lagona moni lou sese, ma e usitai, ma totogi se mea e te mafaia, o le a ia fesoasoani atu e ala lea i le totogiina o le vaega o totoe.
Gaoioiga e Faatosina Mai Ai
-
O le a sou lagona o le a iai? Pe mafai ona e totogiina na o oe le tau? O le a sou lagona e tusa ai ma le fesoasoaniga a lou tama ia te oe?
Ia faamatala atu, o le filifili ina ia fanau mai i lenei lalolagi, tatou te moomia uma lava le fesoasoani ina ia mafai ai ona toe foi atu i le Tama Faalelagi.
Fesoasoani i tamaiti ina ia latou malamalama talu ai ona o le alofa o le Tama Faalelagi ma Iesu Keriso ia i tatou, ua faia ai se laua fuafuaga ina ia fesoasoani ai ia i tatou e faia se mea e le mafai ona tatou faia mo i tatou. O lenei lesona e faatatau lea i se vaega o lena fuafuaga; e faatatau lea i le osigataulaga sili a Iesu Keriso na faia ina ia totogi ai a tatou agasala ma manumalo ai i le oti. O lenei osigataulaga e taua o le Togiola. Faaali atu le ata o Iesu Keriso.
Iloiloga Puupuu
Fai atu i tamaiti e tauloto mai le Mataupu Faavae e tolu o le Faatuatua. Ona fai atu lea iai e iloilo le faamoemoega o lo tatou olaga i le lalolagi ae pe aisea e moomia ai le Togiola mo lo tatou faaolataga. Ina ia fesoasoani ia i tatou e faia lenei iloiloga, ia faaaoga upu o loo tusia i fasi pepa i le vaega o “Sauniuniga.”
“O le a le Togiola?” (O le Togiola o se galuega ofo fua lea a Iesu Keriso i ona puapuaga mo a tatou agasala ma le tuuina atu o lona soifua i luga o le satauro ina ia manumalo ai i le oti.)
“Aisea tatou te moomia ai le Togiola?” (Faamanatu atu i tamaiti le fuafuaga a le Tama Faalelagi. Na tatou filifili tatou te o mai i lenei lalolagi ma maua ni tino faaletino. O o tatou tino faaletino o le a iai se aso e oti ai.)
“O le a tatou oti uma.” (Tatou te moomia se Faaola e laveaiina i tatou mai le oti faaletino ma faataunuuina le toetutu.)
“Tatou te agasala uma.” (O le agasala e le agavaa ai i tatou e toe foi atu i le afioaga o le Tama Faalelagi. Tatou te moomia se Togiola e totogiina a tatou agasala pe afai tatou te salamo.)
“O Iesu Keriso o lo tatou Faaola ma le Togiola.” (Ia faamamafa atu na ofo Iesu Keriso ina ia avea ma o tatou Faaola ma Togiola; na ia naunau e tuuina atu lona ola mo i tatou.)
“E leai sana agasala.” (Talu ai ona o Iesu Keriso e atoatoa, ua na o ia lava le tagata e mafai ona avea ma o tatou Faaola ma Togiola.)
“E pule o ia i le oti.” (Talu ai ona o Iesu Keriso e leai sana agasala ma o ia o le Alo Pele e Toatasi o le Atua, o lea ua pule ai o ia i le oti.)
Faitau faatasi ma le vasega le Ioane 3:16. Valaaulia tamaiti e faamatala mai pe o a o latou faalogona e uiga i le Tama Faalelagi ma Iesu Keriso, i lo la aumaia o lenei fuafuaga matagofie mo i tatou. Faamatala atu ou lagona o lou alofa mo le Tama Faalelagi ma Iesu ma faamatala atu lou matua manao e toe foi atu e nonofo faatasi ma i laua i se aso.
Tala Faatusi Paia
Faaali atu le ata o Iesu o Loo Tatalo i Ketesemane. Aoao atu le tala ia Iesu i Ketesemane e pei ona maua i le Mataio 26:36–46, Luka 22:40–46, ma le Mataupu Faavae ma Feagaiga 19:16–18. (Mo ala fautuaina e aoao atu ai le tala faatusi paia, tagai i le “Aoao Atu Mai Tusitusiga Paia, i. vii.) Ia faamatala atu na malamalama lelei lava Iesu i lana misiona ma na ia silafia ua oo mai le taimi e tatau ona matuai puapuagatia ai o ia ma tiga ina ia togiola mo agasala a le lalolagi.
Talanoaga ma Fesili e Faatatau I Ai
Suesue fesili ma mau o loo taua i lalo a o e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.
Talanoaga ma Fesili e Faatatau I Ai
-
O le a le tala a Iesu na fai ao ia tatalo atu i le Tama Faalelagi i le Togalaau i Ketesemane? (Mataio 26:39, 42, 44.) Aisea na naunau ai Iesu e usiusitai i le fuafuaga a le Tama Faalelagi e ui lava o le a feagai o ia ma ni mafatiaga uiga ese? (E alofa o ia ma talitonu i lona Tama, ma e alofa foi ia i tatou.)
-
O le a le mea na tupu ia Iesu ao ia tatalo ai i le Togalaau o Ketesemane? (Luka 2:44; Mosaea 3:7.) O ai na faaali atu ia Iesu ina ia faamalosi ia te ia? (Luka 22:43.)
-
O ai na mafua ai ona mafatia Iesu i le Togalaau i Ketesemane? (MFF 19:16.)
Fesoasoani i tamaiti ina ia latou malamalama, na puapuagatia foi Iesu i luga o le satauro, ae o lona puapuagatia uiga ese sa iai lea i le Togalaau i Ketesemane, ina ua afu toto o ia i pu ninii uma o lona tino.
Faitau le upusii lenei mai ia Elder Marion G. Romney: “O le Faaola … na totogiina le aitalafu o a’u agasala. Na ia totogiina le aitalafu o au agasala ma agasala uma a soo se agaga e ola i lenei lalolagi ma soo se agaga sa soifua ai i le lalolagi” (Improvement Era, Dec. 1953, pp. 942–43).
Talanoaga ma Fesili e Faatatau I Ai
-
E matautia faapefea puapuaga o Iesu? (MFF 19:18.)
-
Aisea na naunau ai Iesu e puapuagatia i nei mea? (Ioane 15:12–13.) O le a sou lagona e tupu a’e ina ua e iloa na puapuagatia ma togiola Iesu mo au agasala? E mafai faapefea ona tatou faaali atu ia Iesu lo tatou agaga faafetai mo le Togiola?
-
O a mea e tatau ona tatou faia ina ia totogiina ai e puapuaga o Keriso a tatou agasala? (Salamo, ia papatisoina, ma tausia a tatou feagaiga o le papatisoga.) E faapefea ona faatagaina i tatou ona toe foi atu i le afioaga o le Tama Faalelagi e le togiola a Keriso? O le a se mea o le a tupu pe afai tatou te le salamo? (MFF 19:15–17.)
Fesoasoani i tamaiti ina ia malamalama, tatou te taliaina le togiola a Keriso pe afai tatou te salamo mai a tatou agasala, ia papatisoina ma mauaina le Agaga Paia, ma usiusitai i poloaiga a Iesu. Afai tatou te faia ia mea, o le a mafai ona faamagaloina i tatou ma faamamaina i tatou mai agasala ina ia mafai ona tatou ola ai e faavavau ma lo tatou Tama Faalelagi.
Mataupu Faavae o le Faatuatua
Ia iloilo, talanoaina, ma fesoasoani i tamaiti e tauloto le mataupu faavae e tolu o le faatuatua.
Gaoioiga e Faamauoa Mai Ai
E mafai ona e faaaogaina se tasi poo le sili atu foi o nei gaoioiga i soo se taimi o le lesona poo le avea o se toe iloiloga, aotelega, poo se lu’i.
-
Ia saunia se lisi o mau e pei o lenei (poo lou tusia foi i luga o le laupapa) ma se lisi, i se isi koluma, o savali o mau taitasi. Ia faafenumiai ia faamatalaga ina ia le faafeagai i faamatalaga e fetaui iai. Fai atu i se tamaititi e sue se mau, mafaufau poo le a le savali o loo aofia ai, ma tusi se laina mai le mau e agai atu i le savali e talafeagai iai. Ia tuu atu i tamaiti uma se avanoa e faia ai lea gaoioiga.
Mataio 16:21 (O le taulaga a Keriso sa talafeagai.)
Ioane 3:16 (Na afio mai Iesu i le lalolagi aua e alolofa i laua ma le Tama Faalelagi ia i tatou.)
Ioane 10:17–18 (E iai le mana o Iesu e aveese ai lona soifua ma toe faaolaina.)
1 Peteru 1:19–20 (Na filifili Iesu i le lagi e avea ma o tatou Faaola.)
1 Ioane 1:7 (O le togiola a Iesu Keriso e faamama ai i tatou mai a tatou agasala pe afai tatou te salamo.)
Mataupu Faavae ma Feagaiga 20:29 (E mafai ona faasaoina i tatou i le malo o le Atua pe afai tatou te salamo mai a tatou agasala, talitonu ia Iesu Keriso, ma papatisoina.)
-
Faamatala atu le tala lenei i tamaiti, i le faaaogaina lea o le ata e pei ona fuafuaina:
Ataman in a holeSa savali se tasi tagata i se auala ma faafuasei ai ona pau i lalo i se lua e matuai loloto lava ma sa le mafai ai e ia ona toe alu ae i luga. E tusa lava poo a ana taumafaiga uma sa fai, ae sa le mafai lava ona ia alu a’e i luga na o ia. Sa tauvalaau lenei tagata mo se fesoasoani ma sa fiafia ina ua lagona mai o ia e se tagata faimalaga ma tuutuu ane i lalo se apefai i totonu o le lua lenei. O lea na mafai ai loa e lenei tagata ona alu ese mai lenei lua ma toe maua lona saolotoga.
E pei lava i tatou o le tagata lenei sa i totonu o le lua. O le agasala e pei lava o le pa’u i totonu o le lua, ma e le mafai ona tatou o ese mai i fafo na o i tatou. E pei lava ona faalogoina e le tagata faimalaga agalelei le tauvalaau a lenei alii mo se fesoasoani, na auina mai ai e le Tama Faalelagi lona Alo Pele e Toatasi ina ia saunia se auala e mafai ona sosola ese ai. O le togiola a Iesu Keriso e mafai ona faatusatusa i le tuutuuina ifo i lalo o se apefai i le lua; e maua ai e i tatou le auala e o ese ai i fafo. E pei lava ona a’e ese o le tagata lenei mai le lua i luga o le apefai e tatau foi ona tatou salamo ma usiusitai i mataupu o le talalelei ma sauniga ina ia mafai ai ona tatou o ese mai o tatou lua ma faaaogaina le Togiola i o tatou olaga. A mavae mea uma e mafai ona tatou faia, o le a avea le Togiola ma auala e mafai ai ona tatou agavaa uma e toe foi atu i le afioaga o le Tama Faalelagi.
-
Faitau le Mosaea 14:3–5 ma le Alema 7:11–12. Ia talanoaina pe faapefea e Iesu Keriso, e ala i le Togiola, ona puapuagatia e le gata mo a tatou agasala, ae na ia puapuagatia foi mo o tatou tiga, o mai, ma faanoanoaga. Na te malamalama atoatoa lelei i mea uma tatou te oo iai ma tatou mafatia ai i lenei lalolagi. Ona o lona alofa ma lona maelega, o le a ia fesoasoani ai i o tatou faafitauli ma luitau.
-
Fesoasoani i tamaiti e tauloto le Ioane 3:16.
-
Usu pe faitau upu o le “Ua Ou Tu ma Ofo” (Viiga, nu. 107).
Faaiuga
Molimau
Ia tuuina atu lau molimau o Iesu Keriso o lo tatou Faaola ma lo tatou Togiola. Ia faailoa atu lou alofa mo Iesu ma le Tama Faalelagi ma lou agaga faafetai i lo laua sauniaina o se auala mo i tatou e manumalo ai i agasala ma le oti ma toe ola faatasi ma i laua.
Tusi Fautuaina e Faitau i le Fale
Ia fautuaina e suesue e tamaiti le Mataio 26:36–46 ma le Mataupu Faavae ma Feagaiga 19:16–18 i le fale e fai ma toe faamanatu o lenei lesona.
Tofi se tamaititi e faia le tatalo faaiu.