Lesona 18
Ua Faamalolo e Iesu Keriso se Tagata Na Fanau Mai o Tauaso
Faamoemoega
Ina ia fesoasoani i tamaiti ia malamalama e mafai ona tatou faatoilaloina faafitauli ma luitau pe a tatou o mai ia Iesu Keriso.
Sauniuniga
-
Suesue ma le agaga tatalo le Ioane 9. Ona suesue lea o le lesona ma iloilo pe faapefea ona e manao e aoao atu le tala faatusi paia. (Tagai “Saunia o Au Lesona,” i.0 [vi,] ma le “Aoao Atu Mai Tusitusiga Paia,” i. 0 [vii]).
-
Filifili ia fesili e talanoaina ma gaoioiga e faamauoa mai ai lea o le a aafia ai tamaiti ma o le a sili ona fesoasoani ia i latou ia mauaina le faamoemoega o le lesona.
-
Mea e manaomia:
-
Se Tusi Paia po o se Feagaiga Fou mo tamaiti taitasi.
-
O se fasi ie e pupuni ai mata.
-
Ata 7–14, Ua Faamalolo e Iesu le Tauaso (Taga o Ata o le Talalelei 213; 62145).
-
Faalautelega Fautuaina o le Lesona
Tofi se tamaitiiti e faia le tatalo amata.
Gaoioiga e Faatosina Mai Ai
Ia fusi mata o se tamaitiiti faapei e tauaso, tuu atu ia te ia e tusi se vaega o se ata e pei o se ata o se taavale i luga o le laupapa. Tofi se tasi tamaititi e tulai mai, ia fusi foi ona mata ma tuu atu ia te ia e tusi se isi vaega o le ata lava lea e tasi. Faaauau seia maea ona tusia e ni nai tamaiti ni vaega o le ata lava lea. Talanoaina ma tamaiti pe aisea sa faigata ai lea galuega.
Gaoioiga e Faatosina Mai Ai
-
Aisea na faigata ai ona e tusia se ata ona e le mafai ona e vaai?
-
O le a sau faalogona pe a le mafai ona e toe vaai?
Faamatala atu i tamaiti o le a e talanoa atu i ni ituaiga tauaso se lua. Fai atu ia i latou e faalogo lelei i le eseesega o ituaiga tauaso ao e aoao atu le tala faatusi paia.
Tala Faatusi Paia
Faaali atu le ata o le Faamaloloina e Iesu o le Tauaso. Aoao atu le tala o lo o i le Ioane 9 e uiga i le faamaloloina e Iesu o se tagata na fanau mai o tauaso. (Mo ala fautuaina e aoao atu ai le tala faatusi paia, tagai “Aoao Atu Mai Tusitusiga Paia,” i. vii.) Ao e aoaoina atu le tala, fesoasoani i tamaiti ina ia malamalama o le Au Faresaio (o taitai o tagata lotu i Iutaia) sa matuai popole ina nei faaitiitia le faitau aofai pe a talitonu tagata ia Iesu Keriso. O le mea lea latou te taumafai ai e taofia talitonuga o tagata ia Iesu ma mea na ia aoao atu. Sa latou le iloa le aoaoga o le talalelei sa aoao atu e Iesu ma ua faatauasoina ai i latou faaleagaga. Faamatala atu afai e avea o tatou manaoga faaletagata e taofia ai lo tatou mulimuli atu i le Faaola, o le a faatauasoina i tatou faaleagaga.
Talanoaga ma Fesili e Faatatau I Ai
Suesue fesili ma mau o lo o taua i lalo ao e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.
Talanoaga ma Fesili e Faatatau I Ai
-
O le a le mea na fesiligia ai Iesu e lona au soo e uiga i le tagata na fanau mai o tauaso? (Ioane 9:2.) Aisea e faapea ai tagata i isi taimi ua oo mai ma’i ma puapuaga ia i tatou ona ua tatou agasala? O le a le fetalaiga a Iesu i le mafuaaga o le tauaso o lenei tagata? (Ioane 9:3.)
-
O le a le itu na tauaso faaleagaga ai le Au Farasaio? (Ioane 9:16.) O le a le mea na latou faasagatau ai ia Iesu? O le a sou manatu, aisea na latou leiloaina ai o Iesu o le Alo o le Atua?
-
Ina ua fesili atu le Au Faresaio i le tagata na fanau mai o tauaso pe o le a le mea na tupu, sa faapefea ona ia faamatalaina Iesu? (Ioane 9:11.) O le taimi lona lua na latou fesiligia ai lenei alii, sa ia faamatala mai o ai Iesu? (Ioane 9:17.)
-
O le a le mea sa tupu i le vaaiga faalelalolagi ma le faaleagaga a lenei alii? O le a lana tala ina ua fesiligia faatolu o ia e uiga ia Iesu? (Ioane 9:30–33.)
-
O le a le mea na tupu i lea alii ona ua ia molimau e uiga ia Iesu? (Ioane 9:22, 34.) Ina ua faalogo Iesu ua tulia o ia i fafo ma le sunako (o se faletapuai o tagata Iutaia), o le a le mea na ia fai? (Ioane 9:35.) O le a sou manatu o a ni lagona o lenei alii ina ua saili Iesu ia te ia? O le a le molimau faaiu a lenei alii ia Iesu? (Ioane 9:35–38.) O le a le mea na tupu i lana vaaiga faaleagaga?
-
O le a sou manatu, aisea ua tuuina mai ai e le Tama Falelagi ma Iesu puapuaga ma faigata i o tatou olaga? E faapefea ona fesoasoani nei puapuaga ma faigata e tafiesea ai lo tatou tauaso faaleagaga? E faapefea ona fesoasoani mai le Tama Faalelagi ma Iesu i o tatou puapuaga ma faigata?
-
E faapefea ona faamanuiaina oe ma lou aiga i mea faigata? Fautua atu i tamaiti e talanoaina le fesili lenei ma ia faaeteete ia aua nei talanoaina mataupu faalilolilo e le tatau ona faalauaiteleina.
Gaoioiga e Faamauoa Ai
E mafai ona e faaaogaina se tasi pe sili atu foi o nei gaoioiga i soo se taimi o le lesona pe faaaoga foi o se toe iloiloga, otootoga, po o se lu’i.
-
Ia vaevae le vasega i ni vaega. Tuu atu i vaega taitasi se mau o mau nei e faitau. Tuu atu e talanoaina i a latou vaega ma lipoti mai i le vasega pe faapefea e nei tagata o lo o taua i mau ona feagai ma o latou luitau.
-
Fesoasoani i tamaiti ina ia malamalama i le taua o i latou e le atoatoa le malosi. E mafai ona e fesili atu i se tagata matua e i ai se tasi e le atoatoa le malosi (po o se matua o se tamaititi e le atoatoa le malosi) e sau i le vasega ma talanoaina ni auala e fesoasoani atu ai i e le atoatoa le malosi. Faamamafa atu e le tatau ona tatou faia ni uiga le talafeagai ia i latou e le atoatoa le malosi; e le tatau ona tatou faaliliina i latou. E mafai ona tatou fesoasoani ia i latou pe a latou manaomia; e mafai foi ona tatou valaauliaina i latou e taaalo faatasi ma i tatou; e mafai ona tatou faauo atu ia i latou. E tatau ona tatou valaauliaina i latou e faatasi ma i tatou i a tatou gaoioiga.
-
Usu pe faitau upu o le “Ou te Savali ma Oe” (Tusipese a Tamaiti, i. 140).
-
Faitau ma talanoaina lenei faamatalaga mai ia Peresitene Spencer W. Kimball:
“Afai e mafai ona talia uma talosaga … e le tatau ona i ai se mafatiaga, faanoanoaga, lē fiafia po o le oti, ae afai e le mafai, o le a le i ai foi se fiafia, alualu i luma, toetu, po o le ola e faavavau ma le faaleatua” (Faith Precedes the Miracle, p. 97).
Faaiuga
Molimau
Tuuina atu lau molimau o le a faamanuiaina i tatou e le Alii i o tatou mafatiaga ma luitau pe afai tatou te tausia tulafono, faatuatua ia Iesu Keriso ma taumafai e avea faapei o ia.
Tusi Fautuaina e Faitau i le Fale
Ia fautuaina e suesue e tamaiti le Ioane 9:1–38 i le fale e fai ma toe faamanatu o lenei lesona.
Tofi se tamaitiiti e faia le tatalo faaiu.