Lesona 10
O Le Lauga i Luga o le Mauga
Faamoemoega
Ina ia fesoasoani i tamaiti e taumafai ina ia avea atili e faapei o Iesu e ala lea i lo latou mulimuli i ana aoaoga o loo ta’ua i le Lauga i luga o le Mauga
Sauniuniga
-
Suesue ma le agaga tatalo le Mataio 5:1–6: 4 ma le 7:12. Ona suesue lea o le lesona ma iloilo pe faapefea ona e manao e aoao atu le tala faatusi paia (tagai “Saunia o Au Lesona,” i. 0 [vi], ma le ”Aoao Atu Mai Tusitusiga Paia,” i. 0 [vii] ).
-
Tusi faitau faaopoopo: Luka 6:17–36 ma le 3 Nifae 12.
-
Filifili ia fesili e talanoaina ma gaoioiga e faamauoa mai ai lea o le a aafia ai tamaiti ma o le a sili ona fesoasoani ia i latou ia mauaina le faamoemoega o le lesona.
-
Mea e manaomia:
-
Se Tusi Paia po o se Feagaiga Fou mo tamaiti taitasi.
-
Ni fasipepa o loo i ai tulaga e faaono feagai ma tamaiti (tagai i le gaoioiga e faatosina mai ai).
-
Ata 7-12, Lauga i luga o le Mauga (Taga Ata o le Talalelei 212; 62166).
-
Faalautelega Fautuaina o le Lesona
Tofi se tamaitiiti e faia le tatalo amata.
Gaoioiga e Faatosina Mai Ai
Sau se tamaitiiti i luma o le vasega, ia auauai taitoatasi, ma ave se fasipepa ua e tusia ai se tulaga faigata la te faaono fetaiai. Faaaoga tulaga faataitai o loo ta’ua i lalo:
Gaoioiga e Faatosina Mai Ai
-
Ua faitio lou uso po o lou tuagane ia te oe.
-
E i ai se tagata e soona fai lava oe i le aoga.
-
Ua taufaifai ma aamu isi tamaiti ia te oe ona o lou le ulaina o se sikareti.
-
Ua taufaifai ma aamu isi tamaiti ia te oe ona o lou le palauvale ma fai upu masoa.
Fai i le tamaitiiti e faamatala mai pe faapefea ona tali atu i na mea. Fai i isi tamaiti o le vasega e faaopoopo ane a latou foi ‘aitia. Faamatala o le a latou talanoaina nisi o aoaoga a Iesu i le Lauga i luga o le Mauga o le a fesoasoani latou te iloa ai le mea e fai i nei tulaga. E fesoasoani nei aoaoga ia i tatou e avea atili ai e faapei o Iesu aua o loo ta’u mai ai ia i tatou le ituaiga olaga e finagalo o ia tatou te ola ai.
Tala Faatusi Paia
Faaali le ata o le Lauga i luga o le Mauga. Faaaoga mau o loo i le vaega o “Sauniuniga”, aoao atu tamaiti e uiga ia Iesu i lona tuuina atu o le Lauga i luga o le Mauga. (Mo auala fautuaina e aoao atu ai tala faatusi paia, tagai i le “Aoao Atu Mai Tusitusiga Paia,” i. vii.) Faamamafa itu nei:
Tala Faatusi Paia
-
O Faaamuia
-
Alofa i ou fili
-
Faaatoatoaina
-
O le Tulafono Faaauro (Ia faia i isi e pei ona e manao e faia ia te oe.)
Talanoaga ma Fesili e Faatatau I Ai
Suesue fesili ma mau o loo taua i lalo a o e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.
Talanoaga ma Fesili e Faatatau I Ai
-
Faamatala o aoaoga a Mataio 5:3–11 e tele lava ina faaigoaina o Faaamuia po o faamanuiaga. (Faamanino ina ua tuuina atu e Iesu Faaamuia i tagata Sa Nifae, sa ia faaaofia ai ma le fasi fuaitau lea, “o ē o mai ia te au.” (Faatusatusa le Mataio 5:3 ma le 3 Nifae 12:3.) E mafai faapefea e Faaamuia ona fesoasoani ia i tatou e avea atili ai e faapei o Iesu?
-
O le a le uiga o le fia aai ma le fia inu i le amiotonu? (Mataio 5:6.) E mafai faapefea ona tatou faia lenei mea? O a faamanuiaga tatou te maua pe a tatou faia?
-
O le a le loto mama? (Mataio 5:8.) O a mea ua folafola atu i e loto mama? E mafai faapefea ona tatou faatupuina le loto mama?
-
Aisea e taua ai le avea ma sē e faatupuina le filemu? (Mataio 5:9.) E mafai faapefea ona avea i tatou ma e faatupuina le filemu?
-
O le a le uiga o le “masima o le lalolagi” outou? (Mataio 5:13.) E mafai faapefea ona avea i tatou ma masima? (Tagai i le gaoioiga e faamauoa mai ai 2.) O le a le uiga o le avea ma se “malamalama o le lalolagi”? (Mataio 5:14–16.) E mafai faapefea ona avea i tatou ma malamalama i isi?
-
O le a le mea e tatau ona tatou fai pe afai e i ai se faafitauli i lo tatou va ma se tasi tagata? (Mataio 5:23–24.) E faapefea ona tatou faia o tatou fili po o i latou e le fiafia ia te i tatou? (Mataio 5:43–47.)
-
E mafai faapefea ona faaatoatoaina i tatou? (Mataio 5:48.)
Talanoaina lenei faamatalaga mai le saunoaga a Elder Joseph Fielding Smith e uiga i le faaatoatoaina: O le “faaatoatoaina” e le oo mai i le taimi e tasi, ae o le upu ma le upu, o le fuaiupu ma le fuaiupu, o lea faataitaiga ma lea faataitaiga, ae le faapea foi e na o le tatou ola ai i lenei olaga faaletino…. Ae o iinei tatou te faataatia ai le faavae…. e saunia ai i tatou mo lena faaatoatoaina. O lo tatou tiute, o le avea ma tagata e sili atu ona lelei i le asō nai lo ananafi, ma sili atu foi ona lelei a taeao nai lo le asō (Mataupu o le Faaolataga, 2:18).
Talanoaga ma Fesili e Faatatau I Ai
-
E faapefea ona tatou faia galuega o le auauna atu? (Mataio 6:1–4.) O a galuega faalilolilo o le auauna atu e mafai ona tatou faia mo isi?
-
Mataio 7:12 e masani ona ta’ua o le Tulafono Faaauro. O le a le mea o loo ta’u mai e Iesu tatou te faia? E mafai faapefea ona tatou faia lenei mea?
Fesoasoani i tamaiti ia malamalama afai latou te taumafai e ola i aoaoga na aoao mai e Iesu i le Lauga i luga o le Mauga, o le a latou i ai i luga o le ala agai i le faaatoatoaina. Faamamafa atu o le faatoatoaina o se mea e faifai malie ma o le a le mauaina i lenei olaga. O le mea e ao ona tatou faia i le taimi nei, o le taumafai lea ia avea atili e faapei o Iesu i aso taitasi.
Ia toe faamanatu e tamaiti tulaga o loo i le Gaoioiga e Faatosina Mai Ai. Ia latou faamatala mai mea ua latou aoaoina e uiga i ala o loo finagalo Iesu tatou te faia i tulaga taitasi. Fai i tamaiti e mafaufau pe o le a le mea e faamata e tupu pe a tatou ola uma i aoaoga a Iesu o loo aumaia i le Lauga i luga o le Mauga.
Gaoioiga e Faamauoa Ai
E mafai ona e faaaogaina se tasi pe sili atu foi o nei gaoioiga i soo se taimi o le lesona pe faaaoga foi o se toe iloiloga, otootoga, po o se lu’i.
-
Ia tusi lolomi i luga o ni fasipepa malo le vaega muamua o faaamuia taitasi, e pei o le, “Amuia e lotomaualalo o ē o mai ia te au,” ma tusi lolomi i se isi fasipepa malo le vaega lona lua o le Faaamuia, e pei o le “aua e o latou le malo o le lagi.” Faafefiloi fasipepa malo ma faafao i lalo i ni laina i luga o se laulau po o le fola. Ia auauai mai tamaiti o le vasega ma taumafai e faataliaga i luga ni pepa se lua e fetaui. (E mafai ona faaaoga e tamaiti a latou tusitusiga paia e fesoasoani ia i latou.) Afai e fetaui pepa e lua, ona faaū pea lea i luga. Afai e le fetaui pepa, ona toe faafaō lea. Afai e le tofu maua uma ni avanoa o tamaiti i le faasologa muamua, ona toe faafaō uma lea o pepa ae toe o ane e toe faafetaui.
-
Afai e le o le Aso Sa anapogi lea e fai ai le lesona lenei, ona saunia lea o se meaai e masani ona faaaoga ai le masima, e pei o se popikoni, tipigāfa’i falai, tipigā‘ulu falai, ma isi mea faapena. Aua nei faamasimaina ona fai lea i tamaiti taitasi e tofo le meaai. (Siaki matua pe i ai se afaina o nei mea pe a aai ai tamaiti.) A uma ona lulu lea i ai o se masima ae toe tofo e tamaiti. Ia faamanino, e na o sina masima laitiiti lava ae e mafai ona i ai se suiga tele. O ni nai tagata amiotonu toaitiiti foi e mafai ai ona i ai se eseesega tele. Ia talanoaina e tamaiti pe mafai faapefea ona latou faia se eseesega pe a ola amiotonu. Faitau le Mataio 5:13.
-
Tuuina atu i ai ni tulaga o ni feeseeseaiga, e pei o ni tamaiti se toalua ae mananao i le nofoa e tasi, o nisi o tamaiti o loo tauupu, ma nisi mea faapena. Faatino i ni taga nei tulaga ae vaai se isi tamaitiiti e fai ma tagata e faatupuina le filemu. Ia mafaufau tamaiti i ni tulaga atonu na feitai ai, e pei o le fai atu e se tasi o se tala leaga ia latou, ua ave e se tasi sa latou meatotino, o se uo ua ita ia i latou, ua faitioina e se tasi i latou i le avea ai ma tagata o le Ekalesia, ma nisi mea faapena. Fesili i ai pe faapefea ona latou tali atu i nei tulaga e tusa ai ma le Mataio e 5:44.
-
Ia faia ni taga faagugu e se tasi, o se galuega auauna atu sa ia faia po o se galuega foi e mafai ona ia faia. Ia mate mai e isi tamaiti pe o le a le mea a lea tamaitiiti o fai. Talanoaina le taua o le auauna atu i isi. Fai i tamaiti e talanoa i o latou lagona pe a fesoasoani atu i se isi, ma fai i ai e mafaufau i mea lelei uma lava e faaono tulai mai ona o lo latou fesoasoani atu i tagata.
-
Fesoasoani ia tauloto e tamaiti le Mataio 5:16 po o le vaega muamua o le Mataio 7:12.
-
Saunia se kopi o Faaamuia mo tamaiti taitoatasi e ave i le fale, pe fetagofi foi tamaiti e maka i a latou tusitusiga paia.
-
Saunia ni fasipepa pe tusi foi mau nei i luga o le laupapa:
-
Mataio 5:3 ma le 3 Nifae 12:3
-
Mataio 5:6 ma le 3 Nifae 12:6
-
Mataio 5:10 ma le 3 Nifae 12:10
-
Mataio 5:48 ma le 3 Nifae 12:48
Ia faitau e tamaiti mau uma tailua ma talanoaina le eseesega. Fesoasoani ia malamalama tamaiti na aoao atu e Iesu mea lava nei e tasi i tagata Iutaia ma Sa Nifae ma e sili atu ona manino i le Tusi a Mamona.
-
-
Use pe faitau upu o le “O Loo Ou Taumafai e Avea e Pei o Iesu” (Tusipese a Tamaiti, i. 78).
Faaiuga
Molimau
Tuuina atu lau molimau afai tatou te ola i aoaoga a Iesu o loo aumai i le Lauga i luga o le Mauga, o le a tatou i ai i luga o le ala e agai atu i le faaatoatoaina.
Tusi Fautuaina e Faitau i le Fale
Ia fautuaina e suesue e tamaiti le Mataio 5:3–11 i le fale e fai ma toe faamanatu o lenei lesona.
Tofi se tamaitiiti e faia le tatalo faaiu.