Lesona 42

O Le Liua O Saulo

Faamoemoega

Ia uunaiina tamaiti taitoatasi ina ia liua atili ia Iesu Keriso.

Sauniuniga

1. Ia suesue ma le agaga tatalo le Galuega 7:57–60, 8:1–3, 9:1–30, 26:9–23, ma le Mosaea 5:2. Ona suesue lea o le lesona ma iloilo pe faapefea ona e manao e aoao atu tala faatusi paia. (Tagai “Saunia o Au Lesona,” itulau 0 [vi,] ma le “Aoao Atu Mai Tusitusiga Paia,” itulau, 0 [vii].)

2. Tusi Faitau Faaopoopo: Galuega 22:3–21.

3. Filifili ia fesili e talanoaina ma gaoioiga e faamauoa mai ai lea o le a aafia ai tamaiti ma o le a sili ona fesoasoani ia i latou ia mauaina le faamoemoega o le lesona.

4. Mea e manaomia:

   1. Se Tusi Paia po o le Feagaiga Fou mo tamaiti taitasi.

   2. Se ipu malamalama o lo o tumu i vai.

   3. Ata 7-42, O Paulo i le Ala i Tamaseko.

Faalautelega Fautuaina o le Lesona

Tofi se tamaitiiti e faia le tatalo amata.

Gaoioiga e Faatosina Mai Ai

Faaali atu le ipu malamalama o vai i tamaiti.

Gaoioiga e Faatosina Mai Ai

• O le a le mea e tupu pe a puna le vai? (E suia ma avea ma ausa.)

• O le a le mea e tupu pe a liu aisa le vai? (E suia ma avea ma aisa.)

Ia faamatala atu pe a suia le vai ma avea ma aisa po o le ausa, tatou te faapea ua “liua” le vai. E ese lea mai le vai sa i ai muamua.

Gaoioiga e Faatosina Mai Ai

• Pe faapefea ona liua tagata i le talalelei a Iesu Keriso? Pe faapefea ona suia o latou olaga pe afai latou te liua?

Tusi le upu liua i luga o le laupapa. Ia faamatala atu o lenei lesona e faatatau lea i le liua ofoofogia o se tasi o alii i le talalelei a Iesu Keriso.

Tala Faatusi Paia

Ia aoao atu i tamaiti le tala i le liua o Saulo i le ekalesia a Iesu Keriso e pei ona maua i le Galuega 9:1–20. (Mo ala fautuaina e aoao atu ai tala faatusi paia, tagai “Aoao Atu Mai Tusitusiga Paia,” i. vii.) Ia fesoasoani atu i tamaiti ina ia malamalama o lenei Saulo e le o le tagata lea na avea ma uluai tupu o Isaraelu ae o le tagata na avea ma faifeautalai tautaua o Paulo.

Talanoaga ma Fesili e Faatatau I Ai

Suesue i fesili ma mau o loo taua i lalo a o e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.

Talanoaga ma Fesili e Faatatau I Ai

• Pe sa faapefea ona sauaina e Saulo tagata o le Ekalesia? (Galuega 7:57–60; 8:1–3; 9:1–2.) O le a se lagona atonu sa i ai i tagata o le ekalesia e uiga ia te ia? O le a se lagona semanu e maua e oe pe afai e sauaina oe mo ou talitonuga? O le a se tali e tatau ona tatou tali atu ai pe a faia e se tasi lenei mea? Ia uunaiina tamaiti e faamatala mai se mea na oo ia i latou ina ua ula mai se tasi ia i latou pe le agalelei ia i latou ona o o latou talitonuga.

• O le a le mea na tupu i luga o le ala i Tamaseko na fesoasoani ia Saulo e iloa ai e tatau ona ia salamo i ana agasala? (Galuega 9:3–6.) O ai na talanoa ma Saulo i lenei faaaliga? (Galuega 9:5.) Pe ua faapefea ona fesoasoani mai le Tama Faalelagi ma Iesu Keriso ia i tatou ina ia iloa le taimi e tatau ai ona tatou salamo? (Lagona mai le Agaga Paia ma le taiala mai o tatou matua, perofeta, ma tusitusiga paia.)

• O le a le uiga o le “aa i tui”? (Galuega 9:5.) (O se tui o se tao maai lea sa faaaoga e tagata i manu e faaoso ai i latou ina ia agai i luma. E masani lava ona toe aa mai vae o ia manu pe a tui, ma o le a avea lea ma mea e tiga ai i latou i le tui i se tulaga e sili atu. Sa tau atu e Iesu Keriso ia Saulo e faapea ua avea mea na ia faia ma mea e tiga ai o ia lava i se tulaga e sili atu nai lo se isi lava. Pe a tatou faasagatau atu i le mea e sao, e sili ona tiga ai i tatou lava.) Pe faapefea ona tiga se tasi pe a tau faasaga i le mea moni? Ia tuuina atu se faataitaiga e talafeagai lelei mai le mea ua e iloa, pe afai e mafai.

• O le a le mea na fai e Saulo ina ia salamo ma toe foi atu ia Iesu Keriso? O le a se mea e tatau ona tatou fai ina ia salamo ia tatou agasala? Ia talanoaina mea taua o lo o i lalo (e mafai ona e tusia ia mea i luga o le laupapa.)

  • Sa iloa e ia ana agasala. (Galuega 9:6.)

  • Sa anapogi o ia ma tatalo mo le faamagaloga. (Galuega 9:9, 11.)

  • Sa papatiso o ia. (Galuega 9:18.)

  • Sa taumafai o ia e faasao mea na ia sese ai. (Galuega 9:20.)

  • Sa suia o ia ma le toe saua o ia i tagata.

  Ia faamatala atu e le amio leaga Saulo i lona loto; sa faaseseina o ia. Sa tatau ona salamo o ia ma papatisoina.

• Aisea e taua ai le salamo pe a tatou faia se mea sese? O le a se lagona tatou te maua pe a tatou salamo?

• O le a se mea na fai atu le Alii ia Anania e fai? Aisea? (Galuega 9:10–12.) (Ia faamatala atu e ese lenei Anania mai le na fasiotia ona o le lē faamaoni.) Aisea na fefe ai Anania e fai le mea na fetalai mai ai le Alii? (Galuega 9:13–14.)

• Aisea na taua ai e le Alii Saulo o se “ipu filifilia”? (Galuega 9:15–16.) O a ni mea taua na finagalo le Tama Faalelagi e fai e Saulo? (Galuega 26:16, 18.) O a ni mea taua atonu e finagalo le Tama Faalelagi e te faia? Pe mafai faapefea ona e iloa ia mea?

• Pe sa faapefea ona le maua e Saulo le pupula o ona mata? (Galuega 9:8; 22:11.) O le a le mea na tupu ina ua faamanuia e Anania Saulo? (Galuega 9:17–18.)

• Ina ua uma le liua o Saulo, aisea na le talitonu ai tagata po o soo ia te ia ina ua talai atu? Galuega 9:21, 26.) Aisea na tatau ai ia Saulo ona tuua le atunuu? (Galuega 9:23, 29–30.)

• O le a le mea e fai e le Tama Faalelagi pe a tatou salamo ia tatou agasala? (MFF 58:42.) Pe mafai faapefea ona tatou fesoasoani atu i isi o lo o taumafai e salamo ma mulimuli ia Iesu?

• O le a le molimau a Saulo e uiga ia Iesu Keriso? (Galuega 9:20; 26:22–23.) Pe faapefea ona tatou iloa le taimi tatou te liua moni ai i le talalelei a Iesu Keriso? (Mosaea 5:2.)

Ia talanoaina le upusii o lo o i lalo mai ia Peresitene Ezra Taft Benson, le peresitene lona sefulu ma le tolu o le ekalesia: “Pe afai e maua e i tatou lenei suiga uiga ese, lea e faatoa maua pe afai tatou te faatuatua ia Iesu Keriso ma auala mai i le [galue] o le agaga ia i tatou, e foliga mai e pei ua avea i tatou ma se tagata fou … ua e lafoaia mai olaga o tagata le agasala … ma ua e mama. Ua le toe ia te oe se [naunauga] e te toe foi atu i ou auala tuai. O le mea moni lava ua avea oe o se tagata fou” (The Teachings of Ezra Taft Benson, p. 470.) (Atonu e te faaaogaina le gaoioiga e faamauoa mai ai 1 e tuuina atu ai se lu’i i tamaiti ina ia latou iloa le mea sa faamatala e Peresitene Benson.)

Gaoioiga e Faamauoa Ai

E mafai ona e faaaogaina se tasi pe sili atu foi o nei gaoioiga i soo se taimi o le lesona pe faaaoga foi o se toe iloiloga, otootoga, po o se lu’i.

1. Ia fai atu i tamaiti e ta’u mai ni mea atonu e tatau ona salamo ai tamaiti o la latou tupulaga e pei o le pepelo, lē faamaoni, ita, faaaogaina o upu leaga, ma le le usiusitai i o latou matua. Ia tusi nei upu i luga o le laupapa a o tau atu. Ia tau atu i tamaiti o le a e tuuina atu sina suega laititi. A o tusi lou lima i mea taitasi o lo o i luga o le lisi, ia fesili ifo tamaiti ia te i latou lava, “pe tatau ea ona ou salamo mai lenei mea?” Ia tali le leoa tamaiti “ioe” po o le “leai” i fesili taitasi. Ia toe faamanatu laasaga na uia e Saulo e salamo ai.

2. Tusi mataitusi taitasi o le fuaitau “salamo toe foi atu i le Atua” (Galuega 26:20.) I luga o ni fasipepa eseese po o faatafafa i le laupapa. Faau i lalo pepa i lo latou faasologa tonu i luga o se laulau. Ia fai atu i tamaiti e auauai mai i le mateina o se mataitusi o le alafapeta. Pe a mateia se mataitusi e tatau ona i ai i le fuaitau, ia faau agai i lalo. Ia faamatala atu afai tatou te salamo ma toe foi atu i le Atua, o lona uiga ua tatou liua.

3. Talanoaina ma taulotoina le mataupu faavae lona fa o le faatuatua.

4. Afai e malilie i ai le au peresitene o le Peraimeri, ia valaaulia se tagata na liliu talu ai nei po o se faifeautalai ua uma mai lana misiona e sau i le vasega ma faamatala mai se tala e uiga i le suia o le olaga o se tagata ina ua talitonu o ia ia Keriso, salamo, ma papatisoina. Ia faaali mai e lea tagata ona lagona e uiga i le olioli ma le fiafia e maua i le ola i aoaoga o le talalelei.

5. Fai atu i se tamaitiiti e sau e tusi se ata o se auala magalua i luga o le laupapa. Ia tusi e se isi tamaitiiti le igoa o se aai e fia asiasi atu i ai i le pito i luga o le tasi auala.

   • O le a se mea e te faia pe afai e te ui i se auala sese ma e iloaina ua e i ai i lea auala sese?

   • Pe mafai ona e oo atu i le aai mai le mea ua e oo i ai?

   • O le a se mea e tatau ona e fai i le taimi nei ina ia e oo atu i le aai sa e manao e te alu i ai?

   • E faapefea ona faapei le salamo o le toe foi atu i le ala sao?

6. Usu pe faitau upu o le pese “Fai Le Mea Tonu” (Mataupu o le Talalelei i. 370) po o le “Pe A Ou Papatiso” (Tusipese a Tamaiti, i. 103.)

Faaiuga

Molimau

Ia tuuina atu lau molimau e uiga i le taua o le salamo i o tatou olaga atoa ma le taua o lea mea ina ia liua moni i le talalelei a Iesu Keriso. Ia faamatala atu lou alofa i le talalelei.

Tusi Fautuaina e Faitau i le Fale

Ia fautuaina e suesue e tamaiti le Galuega 9:1–20 i le fale e fai ma toe faamanatu o lenei lesona.

Tofi se tamaitiiti e faia le tatalo faaiu.