Lesona 31

O le Faalataina, Pueina, ma le Faamasinoina o Iesu Keriso

Faamoemoega

Ina ia faamalosia tautinoga a tamaiti taitoatasi ina ia totoa i a latou molimau ia Iesu Keriso.

Sauniuniga

1. Suesue ma le agaga tatalo le Mataio 26:14–16, 47–27:31 ma le Luka 22:47–23:25. Ona suesue lea o le lesona ma iloilo pe faapefea ona e manao e aoao atu i tamaiti le tala faatusi paia (Tagai i le “Saunia o Au Lesona,” itulau 0 [vi,] ma le “Aoao Atu Mai Tusitusiga Paia,”itulau 0 [vii].)

2. Filifili fesili e talanoaina ma gaoioiga e faamauoa mai ai na o le a sili ona aafia ai tamaiti ma sili ona fesoasoani ia i latou e maua ai le faamoemoega o le lesona.

3. Tusi upu ma faaupuga nei i luga o ni pepa eseese: Alo o le Atua, Faaola, Togiola, paia, atoatoa, mana atoatoa, alofa, Foafoa, faiaoga, fomai, tuufeanu iai, tuuai pepelo, fepō, fetu’i, sasa, saisai, ulagia, faapale i le paletuitui, faamaonia le fasiotia.

4. Mea e manaomia:

   1. Se Tusi Paia poo se Feagaiga Fou mo tamaiti taitasi.

   2. Mea faapipii poo nisi mea e mafai ona faaali atu ai pepa.

   3. Ata 7-31, O le Faalataina o Iesu (Taga Ata o le Talalelei 228; 62468), ma le 7-32, O Le Faafiti a Peteru (Taga Ata o le Talalelei 229;62177).

Faalautelega Fautuaina o le Lesona

Tofi se tamaititi e faia le tatalo amata.

Gaoioiga e Faatosina Mai Ai

Faafefiloi pepa na e sauniaina ma faafao i luga o le laulau poo le fola. Ia faamatala atu i tamaiti o nisi o nei pepa o loo faamatala mai e uiga ia Iesu ae o nisi o loo faamatala mai ai mea na faia ia te ia i le taufaaiuiuga o lona soifua. Tuu atu i tamaiti uma e auauai ane e filifili se pepa se tasi, ona faitau lea, ma tuu i totonu o se faaputuga o faaputuga na e lua. I le faaputuga muamua e tatau ona latou tuu iai pepa o loo faamatala ai Iesu, ae o le isi e tatau ona latou tuu iai ia upu o loo faamatala mai ai mea na faia ia te ia i le taufaaiuiuga o lona soifua.

Iloiloina puupuu ia mea na tutupu i le Togalaau i Ketesemane ma faamatala atu i tamaiti o lenei lesona o le a latou aoao ai e uiga i mea na tutupu ina ua maea ona tatalo Iesu i Ketesemane.

Tala Faatusi Paia

Faamatala atu i tamaiti le tala i le faalataina, pueina, ma le faamasinoina o Iesu (Mataio 26:14–16, 47–27:31 ma le Luka 22:47–23:25). (Mo ala fautuaina e aoao atu ai le tala faatusi paia, tagai i le “Aoao Atu Mai Tusitusiga Paia, i. vii.) Fai atu i tamaiti e faalogo lelei i upu o loo faamatala mai ai mea na faia ia Iesu. Fesoasoani ia i latou ina ia latou malamalama, e mafaia lava e Iesu ona faaaoga lona mana e puipuia ai o ia mai nei sauaga, ae na ia silafia o se vaega lea o sauaga e tatau ona ia tumau ai ina ia faataunuuina ai lana misiona faalelalolagi ma faaatoatoaina ai le Togiola (tagai i le Mosaea 15:5).

Talanoaga ma Fesili e Faatatau I Ai

Suesue fesili ma mau o loo taua i lalo a o e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.

Talanoaga ma Fesili e Faatatau I Ai

• O ai na faalataina Iesu? (Mataio 26:14–16.) Na faapefea ona faalataina ia e Iuta? (Mataio 26:48.) O le a le mea na tupu ia Iuta? (Mataio 27:3–5.)

• Aisea na vavao ai e Iesu lana Au Aposetolo mai le puipuia o ia? (Mataio 26:51–54; Luka 22:49–51.) O le a se lesona e te iloa na aoaoina e ona soo ina ua toe faamalolo e Iesu le taliga o le tagata lea sa manua? O le a sou manatu aisea na sosola ese ai le Au Aposetolo ae tuua na o Iesu? (Mataio 26:56.) O le a sou manatu o le a se mea e te faia pe ana faapea e te iai iina?

• Aisea na le tali atu ai Iesu ia i latou na tuuaiina o ia i le taimi o lona faamasinoga? (Mataio 26:62–63; 27:12–14; Luka 23:9.) (Tagai i le gaoioiga e faamauoa mai ai lona 3.) Ia faamatala atu ina ua fesiligia Iesu poo ia o le Keriso, le Alo o le Atua, poo le Tupu o tagata Iutaia, na ia tali atu (tagai i le Mataio 26:63–64; 27:11). Ia faamanino atu e le’i teenaina e Iesu poo ai o ia poo le taumafai foi e faasaoina o ia. Na iloa lelei e Iesu e tatau ona faasatauroina o ia ina ia faataunuuina ai le atoatoaga o lana misiona i lenei lalolagi.

• Toe foi atu i le lisi o upu o loo i le gaoioiga e faatosina mai ai lea o loo faamatala mai ai mea na faia e tagata ia Iesu. O le a se mea e te mafaufau iai pe a e faitau i nei upu? O le a sou lagona i nei mea matuia na faia e tagata ia Iesu? Pe na iai ea se tasi sa agaleaga atu ia te oe talu ai ona o lou talitonu ia Iesu Keriso pe talu ai ona o lou alu i le lotu? O le a se mea na e faia?

• Na faafia ona faafitia e Peteru lona iloa o Iesu? (Luka 22:54–60.) O le a sou manatu aisea na faia ai e Peteru lenei mea? O le a se lagona na oo ia Peteru ina ua ia iloaina le mea ua ia faia? (Luka 22:61–62.) Fesoasoani i tamaiti ina ia latou malamalama o le taimi lea e le’i mauaina ai e Peteru le Agaga Paia. O Peteru o se alii maoae o le na avea mulimuli ane ma Peresitene o le Ekalesia ma na ia tuuina atu lona ola mo lana molimau. E mafai faapefea ona tatou totoa i a tatou molimau ia Iesu Keriso e tusa lava poo a luitau tatou te faafeagai? (Tagai i le gaoioiga e faamauoa mai ai lona 5.)

Gaoioiga e Faamauoa Ai

E mafai ona e faaaogaina se tasi poo le sili atu foi o nei gaoioiga i soo se taimi o le lesona poo le avea o se toe iloiloga, aotelega, poo se lu’i.

1. Tuu atu i tamaiti latou te tauina maia ni uiga poo ni amioga a Iesu latou te matuai talisapaiaina lava.

2. Iloilo le mataupu faavae muamua ma le tolu o le faatuatua. Fesoasoani i tamaiti ina ia latou malamalama o nei mataupu faavae o le faatuatua e faamanatu mai ai ia i tatou le paia o Iesu Keriso ma le taua o lana misiona.

3. Tuu upu nei i luga o ni faailoga: Kaiafa, Pilato, ma Herota. Tuu atu faailoga nei i ni tamaiti se toatolu ma faamatala atu iai o nei taitai taitoatasi e tofu lava ma lona tiutetauave i totonu o le atunuu. Fai atu i “taitai” e tutu i vaega eseese i totonu o le potu ma fai atu i le vasega atoa e asiasi atu ia i latou uma nei e toatolu ao tuuina atu e tamaiti nei e toatolu faamatalaga nei. Poo le tuu atu foi i tamaiti e tutu i luma o le vasega e faitau atu a latou vaega:

   Kaiafa: O lo’u igoa o Kaiafa. O au o se faitaulaga sili Iutaia, o lona uiga o au o se taitai faaleagaga o tagata Iutaia. Ou te manao e faaoo le oti ia Iesu, ae tatau ona ou maua se faamaoniga mai le taitai Roma, o lea na ou auina atu ai o ia ia Pilato.

   Pilato: O lo’u igoa o Ponotio Pilato. O au o le kovana o Roma, o lona uiga o au o se taitai faalemalo o Iutaia. Na mananao tagata Iutaia ina ia ou faaoo le oti ia Iesu, ae sa le mafai ona ou maua se mea e sese ai o ia. Na ou auina atu o ia i a Herota.

   Herota: O lo’u igoa o Herota. O au o se Iutaia, ma sa tofia au e Roma e avea ma tupu i Kalilaia. Na auina mai Iesu e Pilato ia te au aua o au o le tupu i le vaega sa ola ae ai Iesu. Sa ou naunau lava ou te fia vaai i lenei tagata e igoa ia Iesu. Ua ou faalogo e uiga ia te ia ma ou manao ou te fia vaai ia te ia o faia se vavega, ae sa le tautala mai o ia i a te au pe tali mai foi i au fesili. Na ou toe auina atu o ia i a Pilato.

   Pilato: Ou te lei maua lava se mafuaaga e faaoo ai le oti i lenei tagata, ae sa tauanau mai pea tagata. Sa mulimuli ane ona ou fiu lea ma ou taumafai e tau atu i tagata ou te leiloa se mea e sese ai Iesu ma tuu atu i tagata latou te ave ia te ia ma faasatauro ia te ia.

   A maea ona toe foi atu lea o tamaiti nei e toatolu i o latou nofoaga, ia talatalanoa le tulaga na iai Iesu i le fefoifoiai i luma o nei alii ma fesiligia ai o ia.

4. Tusi i luga o ni fasi pepa ni tulaga, e pei o nei, lea atonu e faigata i tamaiti ona latou faafeagai (faaaoga tulaga e talafeagai mo lau vasega):

   E ata atu se isi ia te oe i lou alu atu i le lotu.

   Ua taumafai se tasi e faatalanoa oe ina ia e faataitai ona faaaoga fualaau oona poo le ulaina o se sikaleti.

   Ua e vaaia sau uo i le aoga o loo inainā i nisi tamaiti.

   Ua fesili atu sau uo e lē lotu e faamatala atu ou talitonuga.

   Ua tau atu e sau uo i le aoga ina ia e faia se tala pepelo ina ia taofia ai o ia mai le oo atu i se faalavelave.

   Fai atu i tamaiti e auauai i le aveeseina mai o se fasi pepa ma faitau. Tuu atu i le vasega latou te talanoaina tulaga taitasi ma fuafua poo le a le mea tonu e fai. Ia faamamafa atu o nisi taimi e faigata ai ona totoa i a tatou molimau ia Iesu Keriso, ae o le a matuai faamanuiaina lava i tatou pe a tatou faia.

5. Tuu atu i tamaiti uma ni fasi pepa se lua o loo faamatala mai ai e uiga ia Iesu (e mafai foi ona e faaaoga isi upu poo faamatalaga lea e faamatala mai ai Iesu.) Fai atu i tamaiti e faamatala atu ia te oe mea na latou mafaufau i ai pe a latou faitau i upu o loo i luga o a latou fasi pepa. Fai atu i ai e filifili i o latou mafaufau pe ua latou iloa moni lava o Iesu o le Alo o le Atua, o le Faaola, o le Togiola, ma isi. Ia valaaulia tamaiti e faamatala atu pe na faapefea ona faamanuiaina i latou e lenei malamalama ma lenei molimau ia Iesu Keriso.

6. Fai atu i le vasega e usu pe valaaulia se tasi e alu atu i le vasega ma usuina le “Ia Tatou Viia Le Suafa o Iesu” (Mataupu o le Talalelei i. 332 (31110).

Faaiuga

Molimau

Ia tuuina atu lau molimau i le paia o Iesu Keriso, ma faamatala atu i tamaiti le taua o lau molimau ia te oe. Ia faailoa atu lou agaga faafetai mo Iesu ma lona naunautai ina ia puapuaga ma maliu ina ia mafai ona tatou toetutu ma maua le ola e faavavau.

Tusi Fautuaina e Faitau i le Fale

Ia fautuaina e suesue e tamaiti le Mataio 26:47–54 i le fale e fai ma toe faamanatu o lenei lesona.

Tofi se tamaititi e faia le tatalo faaiu.