O Le Soifuaga Faatamaitiiti o Iesu Keriso

Faamoemoega

Ina ia fesoasoani i tamaiti e aoao e uiga i le soifuaga faatamaitiiti o Iesu ma ia malamalama na saunia e le Atua molimau e faamaonia ai o Iesu Keriso o lona Alo.

Sauniuniga

Suesue ma le agaga tatalo le Luka 2:21–52, Mataio 2, le faaliliuga a Iosefa Samita o le Mataio 3:24–26, ma le Mataupu Faavae ma Feagaiga 93:11–14. Ona suesue lea o le lesona ma iloilo pe faapefea ona e manao e aoao atu le tala faatusi paia (tagai “Saunia o Au Lesona,” i. 0 [vi], ma le ”Aoao Atu Mai Tusitusiga Paia,” i.0 [vii].)
Filifili ia fesili e talanoaina ma gaoioiga e faamauoa mai ai lea o le a aafia ai tamaiti ma o le a sili ona fesoasoani ia i latou ia mauaina le faamoemoega o le lesona.
Mea e manaomia:
1. Se Tusi Paia po o se Feagaiga Fou mo tamaiti taitasi.
2. Se mea manaia, e pei o se suvania, ma ia laitiiti ina ia faigofie ona nana i le potuaoga.
3. Ata 7–6, O le tamaitiiti o Iesu i le Malumalu (Taga Ata o le Talalelei 205; 62500).

Faalautelega Fautuaina o le Lesona

Tofi se tamaitiiti e faia le tatalo amata.

Gaoioiga e Faatosina Mai Ai

A o gasolo mai tamaiti i le vasega, ia e tago e faaali i ni tamaiti se toalua pe toatolu le mea na e aumaia; ona nana lea aua nei iloa e le isi vaega uma. Fai i se tasi o tamaiti ia na vaai i ai, e faamatala mai lena mea e aunoa ma le ta’uina o le igoa o le mea na vaai iai. Fesili i le vasega pe ua latou iloa le igoa o le mea lena. Fai i isi tamaiti na vaai i ai e faamatala. Fesoasoani ia malamalama tamaiti e mafai ona talitonu a’ia’i i se mea, pe afai latou te faalogo ai i ni tagata e toatele. Ia faaali le mea lena i tamaiti.

Faamatala o tamaiti na muamua vaai i ai, sa avea i latou ma molimau aua ua latou iloaina ma sa latou faamatalaina. O se molimau o se tasi ua i ai sona lava malamalama i se mea ma ia fetufaai atu lena malamalama ma isi. E mafai foi ona avea se mea e faamaonia ai se mea ma molimau; mo se faataitaiga, o le Tusi a Mamona o loo molimau o Iesu o le Keriso. Faamatala a o tamaitiiti Iesu, sa faia e le Tama Faalelagi le tele o molimau ina ia molimau atu ai o Iesu o lona Alo.

Tala Faatusi Paia

Aoao atu le tala ia Iesu a o tamaitiiti o loo maua i mau e pei ona lisiina i le vaega o “Sauniuniga.” (Mo auala fautuaina e aoao atu ai le tala faatusi paia, tagai i le “Aoao Atu Mai Tusitusiga Paia,” i. vii.)

Talanoaga ma Fesili e Faatatau I Ai

Suesue fesili ma mau o loo taua i lalo a o e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia. E mafai ona e faaaogaina le gaoioiga 1 e fai ma faamanatu o le lesona talu ai, ae e te lei aoaoina atu lenei lesona.

Talanoaga ma Fesili e Faatatau I Ai

Aisea na aumai ai e Maria ma Iosefa le pepe o Iesu i le malumalu? (Luka 2:21–24.)
Na silafia faapefea e Simeona o Iesu o le Alo o le Atua? (Luka 2:25–30.)
Na faapefea ona molimauina e Ana o Iesu o le Alo o le Atua? O le a sou manatu na faapefea ona ia iloaina lena mea? (Luka 2:36–38.)
Na iloa faapefea e le au makoi o Iesu o le Alo o le Atua? Aisea na latou aveina ai meaalofa ia te ia? (Mataio 2:2, 11.)
E mafai faapefea ona avea oe ma molimau ia Iesu Keriso?
Aisea na ta’u atu ai e le Tama Faalelagi ia Iosefa e ave lona aiga i Aikupito? (Mataio 2:13–14.) O le a le mea na faia e Herota ina ia taofia ai le avea o Iesu ma tupu? (Mataio 2:16.) Na iloa faapefea e Iosefa ua saogalemu le toe foi mai mai Aikupito? (Mataio 2:19–20.) O fea na o le aiga e nonofo ai? (Mataio 2:21–23.)
O le a sou manatu o a mea na fai e Iesu a o tamaitiiti ina ia maua ai lona tomai ma le malamalama? (JST Mataio 3:24–26; Luka 2:40, 52; MFF 93:11–14.) O a mea e taua ia te oe e ao ona e aoao i ai a o e tuputupu ae? O a sini ua e faatutuina?
Faaali le ata o le Tamaitiiti o Iesu i le Malumalu. Aisea na faagaeetia ai tagata i le malumalu ia Iesu? (Luka 2:46–47. Ia maitau le faaliliuga a Iosefa Samita o lenei mau o loo faapea mai, “Ma sa latou faalogologo atu ia te ia, ma latou fesili atu ia te ia.” O le a se mea e ta’u mai ai i lenei mea, le tele o mea na iloa e Iesu a o tamaitiiti? O a ni mea e mafai ona e faia e aoao atili ai i le talalelei? Na faapefea ona ava Iesu ma usiusitai i lona Tama i le malumalu?
O le a se mea na faia e Iesu e faaalia ai lona ava ma lona usiusitai ia Iosefa ma Maria? (Luka 2:51–52.) Faamatala na aoao atu e Iosefa ma Maria Iesu i le taimi o lona laitiiti, e pei lava ona aoaoina i tatou e o tatou matua a o tatou laiti. E mafai faapefea ona outou ava i o outou matua?

Gaoioiga e Faamauoa Ai

E mafai ona e faaaogaina se tasi pe sili atu foi o nei gaoioiga i soo se taimi o le lesona pe faaaoga foi o se toe iloiloga, otootoga, po o se lu’i.

Fai i tamaiti e ta’u mai uma ni tagata latou te iloa mai lesona ua mavae o ē na molimau o Iesu Keriso o le Alo o le Atua. Ina ia fesoasoani i tamaiti ia latou manatua nei molimau, e mafai ona e fai i ai e sue mau nei: Luka 1:30–32 (Kaperielu), Luka 1:41–43 (Elisapeta), Ioane 1:29–34 (Ioane le Papatiso), ma le Luka 2:8–17 (o agelu ma leoleo mamoe).
Talanoaina sini e mafai e tamaiti ona faatutu ina ia fesoasoani ai ia te i latou e saga aoao atili i le talalelei, e pei o le faitauina o tusitusiga paia i aso uma, tatalo, auai i afiafi faaleaiga, ma isi mea. Fai i tamaiti e tusi i luga o se fasipepa ni sini se lua o le a fesoasoani ia i latou e aoao atili ai i le talalelei i lenei tausaga. Ia uunai i latou e tuu le pepa i se mea e mafai ona latou vaai i ai.
Fai se kopi o le faafanua o loo i le faaiuga o le lesona mo tamaiti taitasi o le vasega. Ia sue e tamaiti ma faaigoa nofoaga sa soifua ai Iesu: Ierusalema, Peteleema, Aikupito, ma Nasareta. (Faafanua #2 ma le #4 i le Taiala i Mau.)
Fesoasoani i tamaiti e tauloto le mataupu muamua o le faatuatua.
Tusi i luga o le laupapa mau o taimi na molimau ai le Tama Faalelagi o Iesu o lona Alo (Mataio 3:16–17; 17:5; 3 Nifae 11:6–8; Iosefa Samita—Talafaasolopito 1:17). Ia sue e tamaiti mea na tutupu i mau taitasi.
Fesoasoani i tamaiti e tauloto le Luka 2:52.
Usu pe faitau upu o le ”Sa Tamaitiiti o Iesu” (Tusipese a Tamaiti i–56) po o le “Pese o le Kerisimasi” (Tusipese a Tamaiti, i–52).

Faaiuga

Molimau

Faamatala atu i tamaiti ou lagona e uiga ia Iesu Keriso, ma ta’u i ai le mafuaaga e taua ai ia te oe lona avea ma Alo o le Atua. Fesoasoani ina ia latou malamalama afai latou te mulimuli i faataitaiga a Iesu, o le a mafai lava ona latou faapei o ia.

O le gaoioiga e 2 e faamauoa ai, e mafai ona fai o se mea e faaaoga i le olaga atoa.

Tusi Fautuaina e Faitau i le Fale

Ia fautuaina e suesue e tamaiti le Luka 2:40–52 i le fale e fai ma toe faamanatu o lenei lesona.

Tofi se tamaitiiti e faia le tatalo faaiu.