Lesona 27

Faataoto i Mamoe ma ’Oti

Faamoemoega

Ina ia aoaoina tamaiti, o le auauna atu i isi e fesoasoani lea e saunia ai i tatou mo le taimi o le a afio mai ai Iesu Keriso e faamasino i tatou.

Sauniuniga

Faitau ma le agaga tatalo le Mataio 25:31–46. Ona suesue lea o le lesona ma iloilo pe faapefea ona e manao e aoao atu i tamaiti le tala faatusi paia (Tagai i le “Saunia o Au Lesona,” itulau 0 [vi,] ma le “Aoao Atu Mai Tusitusiga Paia,”itulau 0 [vii].)
Tusi faitau faaopoopo: Iakopo 2:17–19; Mosaea 4:16, 26; Mataupu Faavae ma Feagaiga 104:17–18.
Filifili fesili e talanoaina ma gaoioiga e faamauoa mai ai na o le a sili ona aafia ai tamaiti ma sili ona fesoasoani ia i latou e maua ai le faamoemoega o le lesona.
Mea e manaomia:
1. Se Tusi Paia poo se Feagaiga Fou mo tamaiti taitasi
2. Ata 7-26, O le Faamasinoga Mulimuli (ata vali o le Malumalu o Uosigitone), ma le 7-25, O le Afio Faalua Mai (Taga Ata o le Talalelei 238;62562).

Faalautelega Fautuaina o le Lesona

Tofi se tamaititi e faia le tatalo amata

Ia valaaulia tamaiti e faamatala atu i le vasega se mea na latou faia i le vaiaso ua tuanai e fetufaai pe atinae ai se taleni.

Gaoioiga e Faatosina Mai Ai

Faitau atu tulaga nei poo nisi mea e masani ai (faaaoga tulaga e masani ai tamaiti). Fesili atu iai poo le a se mea e tatau ona latou faia pe afai:

Gaoioiga e Faatosina Mai Ai

Latou te vaai i se tamaititi laititi ua fia inu ae le mafai ona au i le paipa.
Latou te iloaina se tamaititi ua fai si leva e le o toe sau i le lotu.
Latou te iloa se tasi e le o lava sana meaai.
Latou te vaai i se tasi e le o iai sona ofu mafanafana, ae ua malulu lava.
Latou te iloaina se tasi ua leva ona taoto i le fale ona o se mai poo se faaletonu i le tino.

Gaoioiga e Faatosina Mai Ai

O le a se mea e manao Iesu ia te oe e te faia?

Faamanatu atu i tamaiti, o lesona e lua ia faatoa mavae atu, sa latou aoao ai e uiga i ni faataoto se lua a Iesu na faaaogaina e aoao ai tagata e uiga i lona afio faalua mai. O le lesona lenei o loo aoao mai ai le faataoto lona tolu o loo i le Mataio e 25, ma o faataoto uma e tolu o loo aoao mai ai i tatou i le auala tatou te saunia ai mo le afio mai o Iesu ma le taimi o le a ia faamasinoina ai i tatou. O se tasi o auala sili ona lelei e saunia ai o le auauna atu lea i isi.

Tala Faatusi Paia

Faaali atu ata o le O le Famasinoga Mulimuli ma le Afio Faalua Mai i taimi e talafeagai ai ao e aoaoina atu i tamaiti le faataoto o mamoe ma ‘oti mai le Mataio 25:31–46. (Mo ala fautuaina e aoao atu ai le tala faatusi paia, tagai i le “Aoao Atu Mai Tusitusiga Paia, i. vii.)

Talanoaga ma Fesili e Faatatau I Ai

Suesue fesili ma mau o loo taua i lalo a o e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.

Talanoaga ma Fesili e Faatatau I Ai

O le a sou manatu o le a faapeī le toe afio mai o Iesu?
Na aoao mai Iesu, i lona afio mai, o le a ia tuueseese ai malo e pei ona tuueseeseina e se leoleo mamoe o mamoe mai ‘oti. (Mataio 25:32.) O ai e faatusa iai mamoe i le faataoto lenei? (Mataio 25:33–36.) O ai e faatusa iai ‘oti? (Mataio 25:33, 41–43.) Aisea o le a tuueseese ai e Iesu mamoe mai ‘oti? O le a le eseesega tele i le va o mamoe ma ‘oti?
O le a le uiga o le fetalaiga a Iesu faapea o i latou i le itu taumatau sa fafagaina o ia, faalavalava ia te ia, ma isi? (Mataio 25:37–40.) O ai “se aupito i itiiti o i latou nei”?
O le a le ituaiga auaunaga na tuuina atu e le tagata amiotonu? (Mataio 25:35–37.) O a mea e moomia ona tatou faia ina ia faitaulia faatasi ai i tatou i le lafu mamoe a le Alii? Fesoasoani i tamaiti e mafaufau i auala e mafai ai ona latou faia na ituaiga auaunaga. Faamatala atu ni faataitaiga o ni auaunaga ua e vaai iai, ma valaaulia tamaiti e faamatala mai ni faataitaiga ua latou vaai iai.
O le a lo tatou taui pe afai tatou te auauna atu i isi? (Mataio 25:34, 46.) O le a se mea o le a tupu ia i latou e le auauna atu i isi? (Mataio 25:41,46.)
O ai e tatau ona tatou auauna iai? O ai tatou te iloa e mafai ona fesoasoani iai la tatou auaunaga? (Mataio 25:40; tagai foi i le Mosaea 4:16) (Tagai i le gaoioiga e faamauoa mai ai 1.)
Na faapefea ona auauna atu Iesu i isi? (Toe iloilo nisi o tala faatusi paia i le faamaloloina e Iesu o mai, faamanuiaina o tamaiti, fafagaina o le 5,000, ma isi. Ia faamamafa atu le alofa na faaali e Iesu i tagata a’o ia faia nei mea.) E mafai faapefea e lana faataitaiga o le auauna i isi ona fesoasoani ia te oe?
E mafai faapefea ona tatou faamanuiaina isi e ala i la tatou auaunaga? E faapefea ona faamanuiaina oe i lou auauna atu i le isi tagata? O a ni ou lagona e maua e ala i lou auauna atu i isi? O le a sou lagona mo i latou e te auauna iai?

E mafai ona e faaaogaina le gaoioiga e faamauoa mai ai lona 4 e uunaiina ai tamaiti ina ia faatatau lenei lesona i o latou olaga.

Gaoioiga e Faamauoa Mai Ai

E mafai ona e faaaogaina se tasi poo le sili atu foi o nei gaoioiga i soo se taimi o le lesona poo le avea o se toe iloiloga, aotelega, poo se lu’i.

Ia fetufaai ma talanoaina ma tamaiti le tala lenei:

“E tele ni mea ou te manatua a’o o’u laititi. O se tasi o mea ou te manatua o le faatalitali lea i le taumafataga o le Aso Sa. E pei lava ona masani ai i matou le fanau ona lolofi atu faatasi ona o le a momole o matou manava ma nonofo ma le naunautai i le laulau, faatasi ai ma le sasala mai o le manogi o le fasipovi tao ua faatumuina ai le potu, ona faapea mai lea o tina ia te a’u, ‘Tommy, ae tatou te le’i aai, ia e alu muamua lava e ave le ipu meaai lea ua ou saunia i le fale o si toeaina matua o Popa ma e toe vave mai ai.’ Ou te tamoe atu i le fale o Popa ona ou faatalitali ai lea ma le pulunaunau ao tau laalaa mai ona vae ua matuai vaivai lava i le faitotoa. Ona ou tuuina atu lea ia te ia le ipu meaai. Ona ia tuu mai ai lea ia te au se ipu mama mai le Aso Sa ua tuanai ma tuu mai ia te au se sefulu sene e totogi ai la’u galuega. O la’u tali lava e tasi e fai iai: ‘E le mafai ona ou taliaina le tupe. E sasa ai a’u e lo’u tina. ‘Ona ia faapea mai lea, Lo’u atalii e, ua e maua se tina lelei tele. Tau atu iai, e faafetai tele lava.’… Ou te manatuaina foi, e foliga mai sa sili atu le lelei o la’u tofo i le meaai o lena Aso Sa ina ua ou foi mai le galuega sa ou faia.” (Thomas S. Monson, O le Laina Umi o le Faaesea,” Liahona, Setema 92, i. 4).
Ia faatulaga ina ia alu atu se tasi o le au peresitene o le Aualofa poo se tasi o le au epikopo i le vasega e faamatala atu pe faapefea ona tuuina atu e le Aualofa a latou galuega fesoasoani. Fai atu i le tagata asiasi e faamatala atu pe faapefea ona fesoasoani atu le Ekalesia i tagata o loo moomia le fesoasoani e aofia ai le tuuina atu o taulaga anapogi.
Tufa atu i tamaiti uma se fasipepa ma se penitala, ma fai atu iai e lisi i lalo ia auala e mafai ona latou auauna atu ai i isi i le fale poo le nuu foi. Ia e luiina tamaiti ina ia faia ia le itiiti ifo ma le tasi se galuega fesoasoani i lenei vaiaso.
Ia talanoaina le upusii lenei:

“O le a iai se Atua poto ma le amiotonu o le a nofo o ia i le nofoa faamasino mo tagata uma lava… O le a itiiti lava sina taimi e maumea ai tagata amioleaga, o le a foliga mai foi e faateleina mea e maua e i latou o e fouvale e ala mai i a latou solitulafono, ae peitai o le a oo mai lava le taimi e tutu ai i luma o le nofoa faamasino o le a faapea ona faamasinoina ai o tagata uma lava, ‘e tusa ma a latou amio’ (Faaaliga 20:13). O le a leai lava se tasi e mafai ona sao mai soo se mea lava. I lena lava aso, o le a leai se tasi e mafai ona ia sao mai i le faasalaga e tusa ai ma ana galuega na fai, o le a leai foi se tasi na te le mafai ona ia mauaina o faamanuiaga e faatatau i ana lava galuega na fai. Ua faapea foi, ona tatou iloa ai i le faataoto e uiga i mamoe ma ‘oti le tulaga mautinoa o le a faapea lava ona iai le faamasinoga o le amiotonu atoatoa” (Spencer W . Kimball, O le Vavega o le Faamagalo Atu, i. 309).
Ia saunia ni atigi pusa se lua. Ia faaigoa le isi atigi pusa o “Mamoe” ma le isi pusa o “Oti.” Tuu le atigi pusa o “Mamoe” i lou itu taumatau ma le atigi pusa o “Oti” i lou itu tauagavale. Ia tusi i luga o ni fasipepa eseese ni gaoioiga leaga ma lelei (ia aofia ai ni gaoioiga e le iloa gofie). Fai atu i tamaiti uma e faitau se gaoioiga ma fuafua pe o se gaoioiga “mamoe” poo se gaoioiga “oti” ma tuu fasipepa i atigi pusa e talafeagai ai.

Faaaoga gaoioiga ia o loo lisiina atu i lalo poo le fai foi lava o ni au gaoioiga:

Tau le mea sa’o i ou matua

Aua e te taua na e faia se mea sese

Fufusu ma sou uso poo sou tuafafine

Fai atu “Malie lou loto ua ou sese” pe afai ua e faatiga i lagona o se isi

Tau atu na o se vaega o le mea moni
Fesoasoani i tamaiti e tauloto le Mataio 25:40.
Usu pe faitau upu o le “Ou te Taumafai ia Faapei o Iesu” (Tusipese a Tamaiti, i. 0)

Faaiuga

Molimau

Ia tuu atu lau molimau faapea e finagalo Iesu ina ia tatou auauna atu i isi ma o le a faamanuiaina i tatou pe a tatou faia faapea. Ia fetufaai atu i tamaiti ou lagona e tusa ai ma avanoa ua e auauna atu ai.

Tusi Fautuaina e Faitau i le Fale

Ia fautuaina e suesue e tamaiti le Mataio 25:35–40 i le fale e fai ma toe faamanatu o lenei lesona.

Tofi se tamaititi e faia le tatalo faaiu