Lesona 38

O Panapa, Anania ma Safaira

Faamoemoega

Ia uunaiina tamaiti taitoatasi ina ia filifili e faamaoni i mafaufauga, upu, ma mea e fai.

Sauniuniga

Suesue ma le agaga tatalo le Galuega 4:32–5:10. Ona suesue lea i le lesona ma filifili pe faapefea ona e aoaoina tamaiti i tala faatusi paia. (Tagai “Saunia o Au Lesona,” itulau 0 [vi,] ma le “Aoao Atu Mai Tusitusiga Paia,” itulau 0 [vii].)
Tusi faitau faaopoopo: Mataupu o le Talalelei, mataupu 31.
Filifili fesili e talanoaina ma gaoioiga e faamauoa ai lea o le a aafia ai tamaiti ma o le a sili ona fesoasoani ia i latou ia mauaina le faamoemoega o le lesona.
Mea e manaomia: Se Tusi Paia po o se Feagaiga Fou mo tamaiti taitasi.

Faalautelega Fautuaina o le Lesona

Tofi se tamaitiiti e faia le tatalo amata.

Gaoioiga e Faatosina Mai Ai

Ia faamatala atu i tamaiti le tala o lo o i lalo ma fai atu ia te i latou e filifili po o le a se mea atonu latou te faia pe ana faapea o i latou o Sale:

“Sa taalo pesipolo se tama talavou faatasi ma ana uo ae valaau manino mai loa le leo leotele o lona tina, “Sale, Sale!’ sa togi loa lava i lalo lana pate, tago i lona ofu ma lona pulou, ma amata ona alu atu i le fale.

“E le i oo i le taimi e te alu ai; faauma le taaloga!” o le valaau atu lea a isi tama taalo.

“Ua tatau ona ou alu atu i le taimi nei lava. Sa ou ta’u atu i lo’u tina o le a ou alu atu pe a valaau mai,’ o le tali lea a Sale.

“Se faatagā faapea e te le i lagona,’ o le tala lea a tama.

“Peitai o lea sa ou lagona,’ o le tala lea a Sale.

“O le a le iloa e lou tina sa e lagonaina.’

“Peitai ua ou iloa, ma e tatau ona ou alu atu.’

“Sa oo lava ina faapea atu se tasi o tama, ‘Se, tuu ai pea ia o ia e alu. E le mafai ona outou suia lona mafaufau. Ua nonoa o ia i le manoa o le ofu tali pefu o lona tina. O ia o se pepe e tatau ona tamoe i le taimi lava e valaau mai ai’” (N. Eldon Tanner, in Conference Report, Oct. 1977, p. 65; or Liahona Ianuari 1978, i.–44).

Gaoioiga e Faatosina Mai Ai

O le a se mea semanu e te fai?

Ia faamatala atu e feagai i tatou uma ma tulaga i aso taitasi e manaomia ai i tatou e filifili i le va o le usiusitai ma le lē faamaoni. Ia fai atu i tamaiti e mafaufau e uiga i taunuuga o filifiliga na fai e Panapa, Anania, ma Safaira.

Tala Faatusi Paia

Ia a’oa’o atu i tamaiti tala e uiga ia Panapa ma Anania ma Safaira mai le Galuega 4:32–5:10. (Mo ala fautuaina e aoao atu ai tala faatusi paia, tagai “Aoao Atu Mai Tusitusiga Paia,” itulau vii.) Ia faamalamalama atu o se tasi o auala e avea ai i tatou faapei o Iesu o le aoao lea e tautala i le mea moni ma ia faamaoni i mea uma tatou te fai.

Talanoaga ma Fesili e Faatatau i Ai

Suesue fesili ma mau o loo taua i lalo ao e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.

Talanoaga ma Fesili e Faatatau i Ai

O le a le mea na fai atu ai taitai o le ekalesia ia faia e tagata uma ina ia maua e tagata mea latou te manaomia? (Galuega 4:34–35.) O le a se lagona e te maua e uiga i le tufatufa atu o mea uma ua ia te oe?
Pe sa faapefea ona faamaoni Panapa i le mea na ia fai? (Galuega 4:36–37.) O le a sou manatu i le uiga o le faamaoni? (o le tautala sa’o, ia le gaoi pe pepelo pe kopi, ia aua nei tau faasese i soo se mea, ma isi mea.) O le a se lagona e te maua pe afai e te faamaoni a’ia’i?
Pe sa faapefea ona le faamaoni Anania ma Safaira? (Galuega 5:1–2.) Aisea na lagolago ai e Safaira le pepelo a lana tane? (Galuega 5:1–2, 7–8.) O le a se mea semanu e tupu pe ana fai e faamaoni lea tamaitai?
O ai e tiga lona loto pe afai e le faamaoni se tagata? Ia faamatala atu e faapea e tusa lava pe tatou te le vaaia ni taunuuga i le taimi lava tatou te le faamaoni ai, e pei ona faia e Anania ma Safaira, ae ua tatou faatiga lava ia i tatou. Atonu foi e tiga ai isi tagata i lo tatou le faamaoni.
O a taunuuga pe afai e te le faamaoni? O a taunuuga pe afai e te faamaoni? Ia faamatala atu se faataitaiga na oo ia te oe lava e uiga i taunuuga o le faamaoni po o le le faamaoni foi. Ia fesoasoani atu i tamaiti ina ia malamalama e le faigofie i taimi uma le faamaoni, ae tatau ona tatou faamaoni e tusa lava po o a taunuuga e oo i ai. Ia fai atu i tamaiti e faamatala mai mea na latou oo i ai na faaalia ai le faamaoni.
O ai na te silafia i taimi uma le taimi e te tautala ai i le mea moni? Pe faapefea ona latalata atu atili i tatou i le Tama Faalelagi ona o le faamaoni?
O le a se mea e mafai ona e fai e fesoasoani ai i isi ina ia faamaoni?
Aisea e taua ai le faamaoni i ou matua? (Ina ia talitonuina oe e i laua.) Aisea e te manao ai ina ia talitonuina oe e ou matua? Pe faapefea ona e maua le talitonuina mai i ou matua? Aisea e manaomia ai le lototele i nisi taimi ina ia tau le mea moni? (tagai Gaoioiga e Faamauoa Ai 6.)
E ese faapefea le lalolagi pe afai e faamaoni tagata uma?

Ia faitau i upusii nei mai ia Peresitene Ezra Taft Benson, le Peresitene lona sefulutolu o le ekalesia:

“Ia faamaoni. Aua le pepelo pe gaoi. Aua le kopi….

“Le fanau pele, ua auina mai outou e lo tatou Tama Faalelagi i le lalolagi i lenei taimi ona o outou o nisi o ana fanau e sili ona faamaoni. Sa silafia e ia o le a i ai le tele o le amioletonu i le lalolagi i aso nei, ma sa silafia e ia e mafai ona outou faatuatua ma usiusitai.” (In Conference Report, Apr. 1989, p. 103: po o le Liahona, Iulai 1989, i. 82–83).

Gaoioiga e Faamauoa Ai

E mafai ona e faaaogaina se tasi pe sili atu foi o nei gaoioiga i soo se taimi o le lesona pe faaaoga foi o se toe iloiloga, otootoga, po o se lu’i.

Toe faamanatu le mataupu faavae lona sefulutolu o le faatuatua ma fesoasoani atu i tamaiti ina ia malamalama ma taulotoina.
Tusi upu aiga, aoga, ma le alaalafaga i luga o le laupapa. Ia mafaufau tamaiti e uiga i ni auala e mafai ai ona latou faamaoni i mea taitasi ia. Ia talanoaina manatu e mafaufau i ai tamaiti.
Tusi le upu Faamaoni ma le Lē Faamaoni i luga o le laupapa. Ia tau atu le fuaitau lenei na tuuina mai e Elder Marvin J. Ashton. “O se pepelo o soo se fesootaiga lea e faia ma le isi ma le faamoemoe e tau faasese ai.’ … E mafai ona fesootai lelei atu se pepelo e aunoa ma ni upu e tautala ai. O nisi taimi e avea le lue atu o le ulu po o le le tautala i se upu ma mea e tau faasese ai” (In Conference Report, Apr. 1982, p. 10; po o le Liahona, Iulai 1982, i, 9.) Ia talanoaina tulaga taitasi o lo o i lalo ma ia filifili tamaiti po o le fea ulutala e sili ona talafeagai i ai ma ia tusia mafuaaga:
- Tautala i le upumoni
- Faia o lau lava galuega
- Tau faasese i isi e ala i le le tautala i le mea moni atoatoa
- Faaalia o le mea moni pe afai na e faia se mea sese
- Faia o se mea tau faasese pe kopi
- Pepelo
- Gaoi
- Tautala i mea e le atoatoa le sa’o
- Faafoi atu o mea na nono mai po o mea na leiloa
- Tausi i folafolaga
Ia faia e tamaiti taitoatasi se faailoga, atonu e foliga o se talita, o lo o tusia ai upu “Ou te tu mo le mea moni ma le faamaoni.” Ia valaauina tamaiti e faatu se sini o le a tautala i le mea moni ma ia faamaoni i mea uma latou te faia. Ia saini e i latou o latou igoa i le itu i lalo o a latou faailoga.
Ia tusi se apefai i luga o le laupapa po o se fasipepa ma ia tusia ai upu Apefai o le Faamaoni. Ia faia se ata faigofie o se tagata mai se pepa pe tusi se ata o se tagata i le itu i lalo o le apefai. I le faaaogaina o tulaga e pei o ia o lo o taua i lalo, ia ta’u mai e tamaiti mea uma e mafai ona latou filifili ai i tulaga taitasi. Ona filifili lea e i latou po o le a le filifiliga e sili ona lelei. Ia alu ane se tamaitiiti e fetuunai le ata o le tagata (pe tusi se laina mai le ata o le tagata) i tulaga taitasi o le apefai pe afai o le filifiliga sili ona lelei o le faamaoni. Ia faamatala atu o le filifiliga sili ona lelei o le filifiliga lea e faamaoni. Ia faaaoga ia lava ni tulaga ina ia mafai ona oo atu le laina i le pito i luga o le apefai.
1. Ua e maua se mea taalo na leiloa a sau uo.
2. Ua e maua se atotupe o lo o i ai i totonu ni tupe.
3. O loo i ai se taga lole a se isi tagata i luga o le laulau, ma e leai se isi tagata o lo o i totonu o le potu.
4. O lo o e alu atu i se gaoioiga e alu ai tupe mo le auai. O lo o faapea mai le faailoga i le faitotoa “o tamaiti e i lalo ifo o le valu tausaga e ulufua.”
5. Ua tele naua se sui ua tuu atu ia te oe e se faatauoloa.
6. Ua fai mai lau uo se i kopi e ia au tali i se suega.
7. Ua ta’u atu e se tasi ia te oe se tala le lelei e uiga i se tasi tagata.
8. Sa e folafola atu i ou matua o le a e oo atu i le fale i se taimi faapitoa, a ua manao lau uo ia e nofo mo se taimi e sili atu ona umi.
Ia saunia ni tulaga, e pei o ia o lo o i lalo e faataitai e tamaiti taga. O tulaga e te saunia e tatau ona avea ma ni tulaga e mafai ona filifili mai ai tamaiti ina ia faamaoni po o le le faamaoni i o latou matua.
1. Ua manao lou tina e te vaaia lelei lou uso laititi. Ua e manao e faitau lau tusi i lo le faia o lea mea. Ua e iloa afai e te tau atu ia te ia e i ai ni au meaaoga e fai, o le a le faamoemoe o ia e te vaaia lelei lou uso.
2. Ua ta’e faafuasei ia te oe le ipu e asu ai supo e sili ona fiafia i ai lou tina a o alu o ia i se mea.
3. Sa e folafola atu i lou tama e te fesoasoani atu ia te ia i se galuega i le Aso Toonai, a ua fuafua e au uo se gaoioiga e te manao ina ia e alu atu ai.
Ia toe faamanatu le mataupu faavae lona fa o le faatuatua..
Ia usu faatasi pe faitau upu o le pese “Fai le mea tonu, Fai le mea sa’o” (Tusipese a Tamaiti, i. 0 (158),) “Tausi Poloaiga” (Tusipese a Tamaiti, i. 0 (146),), O le a Ou Lototoa” (Tusipese a Tamaiti, i. 0 (62), ), “Ou Te Talitonu i le Faamaoni” (Tusipese a Tamaiti, i. 0 (149), po o le “Tu mo le Mea Moni” (Tusipese a Tamaiti, i. 0 (159).

Faaiuga

Molimau

Ia tuuina atu lau molimau e uiga i le taua o le faamaoni. Ia faamatala atu e faapea afai tatou te faamaoni i mea uma tatou te fai, o le a tuuina mai ia i tatou e le Agaga Paia se lagona o le filemu.

Tusi Fautuaina e Faitau i le Fale

Ia fautuaina e suesue e tamaiti le Galuega 4:32–5:10 i le fale e fai ma toe faamanatu o lenei lesona.

Tofi se tamaitiiti e faia le tatalo faaiu.