Tusi Lesona ma le Taimi o Fetufaaiga a le Peraimeri
Lesona 40: O Peteru ma Konelio

Lesona 40

O Peteru ma Konelio

Faamoemoega

Ia fesoasoani i tamaiti taitoatasi ina ia malamalama e alofa le Tama Faalelagi i lana fanau uma lava ma e finagalo ia maua e i latou uma le avanoa e aoao ai i le talalelei a Iesu Keriso.

Sauniuniga

  1. Suesue ma le agaga tatalo le Galuega 10:1–11, 18. Ona suesue lea o le lesona ma iloilo pe faapefea ona e manao e aoao atu i tamaiti le tala faatusi paia. (Tagai “Saunia o Au Lesona,” itulau 0 [ vi, ] ma le “Aoao Atu Mai Tusitusiga Paia,” itulau 0 [vii].)

  2. Filifili ia fesili e talanoaina ma gaoioiga e faamauoa mai ai lea o le a aafia ai tamaiti ma o le a sili ona fesoasoani ia i latou ia mauaina le faamoemoega o le lesona.

  3. Mea e manaomia:

    1. Se Tusi Paia po o se Feagaiga Fou mo tamaiti taitasi.

    2. Ata 7-41, Inā o Atu Ia Outou (Taga Ata o le Talalelei 235; 62494).

Faalautelega Fautuaina o le Lesona

Tofi se tamaitiiti e faia le tatalo amata.

Gaoioiga e Faatosina Mai Ai

Ia tusi igoa nei i luga o le laupapa; Konelio, Agelu, Peteru.

Ia o ane ni tamaiti se toatolu e faitau e i latou taitoatasi faamatalaga o lo o i lalo e uiga i nei tagata e toatolu. Ia fai atu i isi tamaiti e sii mai o latou lima pe afai ua latou manatu ua latou iloa le tagata o lo o faamatalaina.

O au o se avefeau. E le gata ina ou tuuina atu feau mai le Atua, ou te aoao atu foi, faamanuia atu, ma faia soo se mea e poloaiina ai au e fai mo le atiinaeina o le malo o le Atua. O le aso nei o le a ou aoao e uiga i se savali faapitoa na ou sau ma au. O au o se (agelu).

Sa avea au ma se tagata faifaiva i le Sami o Kalilaia i le taimi na valaauina ai au e Iesu e mulimuli atu ia te Ia. Sa ou maua se faaaliga vaaia, lea o le a outou aoao i ai i le aso nei, na tatalaina ai le auala mo tagata uma e aoao i le talalelei. O au o (Peteru).

O au o se taitai o le toaselau i le au a Roma ma ou te faatonuina ni alii mai le limasefulu i le selau. O au le tagata o nuu ese muamua (o se tasi e le o se Iutaia) ua sau i le ekalesia. O le a e aoao e uiga i lou papatisoga i le lesona o le aso nei. O au o (Konelio).

Tala Faatusi Paia

Ia aoao atu le tala e uiga ia Peteru ma Konelio mai le Galuega 10:1–11: 18. (Mo ala fautuaina e aoao atu ai tala faatusi paia, vaai “Aoao atu Mai Tusitusiga Paia,” itulau vii.) Faaali atu le ata i se taimi e tatau ai.

Talanoaga ma Fesili e Faatatau I Ai

Suesue fesili ma mau o loo i lalo a o e saunia lau lesona. Faaaoga fesili e te lagona o le a sili ona fesoasoani i tamaiti e malamalama ai i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.

Talanoaga ma Fesili e Faatatau I Ai

  • Aisea na agavaa ai Konelio mo le mauaina o se faaaliga vaaia mai le Alii ma papatisoina? (Galuega 10:2.) Pe faapefea ona avea oe ma se tagata faamaoni o le Ekalesia?

  • O le a le savali na tuuina atu e le agelu ia Konelio? (Galuega 10:3–6.)

  • O le a le mea na vaaia e Peteru i se faaaliga vaaia? (Galuega 10:11–16.) Aisea na faamatala mai ai ia te ia lenei faaaliga vaaia? (Sa poloaiina e le alii Isaraelu ia aua le aai i nisi o aano o manu, lea sa taua e faapea e le mama [tagai Levitiko 11].) Pe sa faapefea ona talia e Peteru lenei faaaliga vaaia i le taimi muamua? (Galuega 10:14.) O le a le mea na suia ai lona mafaufau? (Galuega 10:15.)

  • Aisea na tulaga ese ai le aoao atu e Peteru o le talalelei ia Konelio? (Galuega 10:28.) Ia faamatala atu e oo mai i lea taimi o aoao atu e Aposetolo le talalelei i tagata Iutaia, ma sa manatu le toatele o tagata o le ekalesia e na o tagata Iutaia e tatau ona aoao atu iai le talalelei. Peitai o Konelio e le o se Iutaia. O le a le mea na oo ina iloa e Peteru e faapea o le uiga lea o le faaaliga na ia maua (Galuega 10:34–35.) O ai e tatau ona aoao i ai le talalelei i aso nei? (Tagata uma.)

  • O le a le pogai ua e manatu na faapotopoto ai e Konelio ana uo uma ma tagata o lona aiga e faalogo ia Peteru? (Galuega 10:24–27.) O a nisi o mataupu faavae o le talalelei o lo o e manao e tufatufa atu i ou aiga ma uo?

  • O le a le mea na fai e Konelio e maua ai se tali i ona faafitauli? (Galuega 10:30.) O a ni tulaga na oo i ai oe po o lou aiga e uiga i le anapogi ma le tatalo? Sa faapefea ona fesoasoani le Alii ia te oe i le maua o se tali i se faafitauli?

  • Pe sa faapefea ona iloa e tagata o lo o tautala Peteru i le mea moni? (Galuega 10:44–45.) O le a le mea e tatau ona tatou fai ina ia molimau mai le Agaga Paia ia i tatou e uiga i le mea moni? (Moronae 10:4–5.)

  • O le a se mea sa mafaufau i ai soo ma isi Aposetolo ina ua latou faalogo ua aoao e Peteru tagata o nuu ese? (Galuega 11:2–3.) Pe sa faapefea ona faamatala e Peteru mea na ia faia? (Galuega 11:4, 17.) Pe sa faapefea ona talia e le au soo ma Aposetolo le faaaliga na oo ia Peteru? (Galuega 11:18.) O le a le mea e aoao mai ia i tatou i lenei faaaliga e uiga i le alofa o le Tama Faalelagi mo ana fanau? (Tagai i Gaoioiga e Faamauoa Ai 5.)

  • Pe mafai faapefea ona e aoao atu le talalelei i nisi o fanau a le Tama Faalelagi? Ia fesoasoani atu i tamaiti e mafaufau i ni auala e mafai ai ona avea i latou ma ni faifeautalai i le taimi nei ma le auala e mafai ai ona saunia i latou e auauna atu i ni misiona.

Gaoioiga e Faamauoa Ai

E mafai ona e faaaogaina se tasi pe sili atu foi o nei gaoioiga i soo se taimi o le lesona pe faaaoga foi o se toe iloiloga, otootoga, po o se lu’i.

  1. Ia faitau e tamaiti le Galuega 10:36–43 i ni vaega toaitiiti ma ia faia e i latou se lisi o mea na aoao atu e Peteru ia Konelio ma tagata o lona aiga faapea ma uo. Ia faitau mai e vaega taitasi la latou lisi a o e tusia i luga o le laupapa po o se pepa lautele. Ia faatumu soo se mea o mea o lo o i lalo atonu o lo o misi i faamatalaga a tamaiti.

    • O Iesu Keriso o le Alii o tagata uma (fuaiupu 36).

    • Sa papatisoina Iesu Keriso (fuaiupu 37).

    • Sa faauuina Iesu Keriso i le Agaga Paia faapea ma le mana (fuaiupu 38).

    • Sa faia e Iesu Keriso mea lelei (fuaiupu 38).

    • Sa faamalolo e Iesu tagata (fuaiupu 38).

    • Sa fasiotia Iesu Keriso (fuaiupu 39).

    • Sa toetu mai Iesu Keirso i le aso lona tolu (fuaiupu 40).

    • Sa poloaiina e Iesu Keriso Peteru ina ia molimau atu na faauuina Iesu e le Atua (fuaiupu 42). Sa molimau perofeta uma e uiga ia Iesu Keriso (fuaiupu 43).

    • O i latou o e na talitonu ia Iesu Keriso ma papatisoina o le a maua se faamagaloga o a latou agasala (fuaiupu 43).

  2. Afai e malie i ai lou peresitene o le Peraimeri, ia valaaulia se tagata ua uma mai lana misiona e sau i le vasega ma faamatala mai tulaga na ia oo i ai o lo o faamalamalama ai le taua o le aoao atu, o fanau a le Tama Faalelagi tagata uma lava.

  3. Ia talanoaina le faamatalaga o loo i lalo ua suia faatatau mai se saunoaga a Elder Howard W. Hunter:

    E taua tamaiti laiti i lo tatou Tama Faalelagi. E alofa ia i latou ma tausia lelei i latou i le ala lava lea e tasi e tusa lava poo fea latou te nonofo ai po o le auala e fai ai o latou laei po o foliga. E alofa o ia i e uli o latou pa’u, tagata Fiti e migimigi o latou ulu, faapea ma tamaiti agalelei ma faia lelei o latou laei o lo o i ai i Samoa. E alofa o ia i tamaiti laiti o tama ma teine o Egelani o e o lo o faia foi faapea o latou laei i le aoga. E alofa o ia i tamaiti Iapani. E alofa o ia i tamaiti i Amerika i Saute ma Sa Lamanā. E alofa lo tatou Tama i ana fanau i soo se mea. A oo i le taimi e momoe ai, e tootuli matua alolofa i atunuu uma ma a latou fanau i le faia o tatalo. Atonu e faia i tafatafa o meaafale taugata po o le faia i luga o se papa laufala i se faleoo. Peitai e faafofoga ma malamalama lo tatou Tama Faalelagi ia te i latou uma. (tagai Friend, Oct. 1971, p. 10.)

  4. Ia fesoasoani atu i tamaiti ina ia malamalama e ui lava ina eseese tu ma faiga a tagata i atunuu eseese, ae tutusa i tatou uma ona e alofa le Tama Faalelagi ia te i tatou uma ma e finagalo ia toe foi atu i tatou uma ia te ia.

    Ia faia se taaloga faafetaui i ituaiga o mea o lo o i lalo poo ni mea foi faapena e faamasani ai tamaiti i nisi o mea ua faia pe vaaia i isi atunuu.

    Ia faafetaui nofoaga e te manatu o le a fai ai lau misiona pe afai e te:

    Vaaia tagata o lo o faaaogaina

    Ula

    Sikotilani

    Seevae laupapa

    Hawaii

    Taulavalava felea

    Iapani

    Kimona

    Holani

    Taumafa

    Enisilata (Enchiladas)

    Iunaite Setete

    Saoapeleti (Sauerpraten) (paluga falaoamata e olo faamafolafola ona tuu lea iai o fasi aano o manu fasi ona taai lea ma faavela)

    Nouei

    Pai apu

    Falani

    Crepes (Panikeke manifinifi ae taai ai i totonu fualaauaina suamalie)

    Siamani

    Eleni faapiko

    Mekisikō

    Vaai i Mauga

    Mounties

    Italia

    Big pen

    Ausetalia

    Olo faalagolago o Pisa

    Kanata

    Kagalu

    Egelani

  5. Faamatala e i ai se mea e tali tutusa ma le faaaliga a Peteru, na tupu i le 1978 ina ua mauaina e Peresitene Spencer W. Kimball se faaaliga mai le Alii e mafai e alii agavaa uma lava ona mauaina le perisitua ma e mafai foi e o latou aiga ona maua faamanuiaga o le malumalu (tagai i le Tautinoga Tonu–2 i le Mataupu Faavae ma Feagaiga).

  6. Ia usu pe faitau upu o le pese “Tamaiti Uma o le Lalolagi” (Tusipese a Tamaiti, i. 0 (16), po o le “Matou te Aumaia le Mea Moni i le Lalolagi” (Tusipese a Tamaiti, i. 0, (172).

Faaiuga

Molimau

Ia tuuina atu lau molimau e faapea e alofa le Atua i lana fanau uma ma e finagalo o ia e aoaoina i tatou uma i le talalelei, ia papatisoina, ma tausi a tatou feagaiga ina ia mafai ona tatou toe mau faatasi ma ia. Ia faaalia le agaga faafetai ona o lou malamalama i le talalelei ma lou papatisoga.

Tusi Fautuaina e Faitau i le Fale

Ia fautuaina e suesue e tamaiti le Galuega 10:36–43 ma le Galuega 11:15–18 i le fale e fai ma toe faamanatu o lenei lesona.

Tofi se tamaitiiti e faia le tatalo faaiu.