Sa Tofotofoina Iesu Keriso e Satani

Faamoemoega

Ina ia fesoasoani i tamaiti e aoao le ala e tetee atu ai i tofotofoga a Satani.

Sauniuniga

Suesue ma le agaga tatalo le Mataio 4:1–11, Mareko 1:12-113, ma le Luka 4:1–13. (Faatusatusa nei fuaiupu ma le faaliliuga a Iosefa Samita o le Tusi Paia.) Ona suesue lea o le lesona ma iloilo pe faapefea ona e manao e aoao atu le tala faatusi paia (tagai “Saunia o Au Lesona,” i. 0 [vi], ma le ”Aoao Atu Mai Tusitusiga Paia,” i. 0 [vii] ).
Tusi faitau faaopoopo: 1 Korinito 10:13, 2 Nifae 2:18; 2 Nifae 28:19–22; 3 Nifae 18:18; ma le Mataupu Faavae ma Feagaiga 10:5, 27; 11:12.
Filifili ia fesili e talanoaina ma gaoioiga e faamauoa mai ai lea o le a aafia ai tamaiti ma o le a sili ona fesoasoani ia i latou ia mauaina le faamoemoega o le lesona.
Mea e manaomia:
1. Se Tusi Paia po o se Feagaiga Fou mo tamaiti taitasi.
2. Se pepa ma se penitala mo tamaiti taitasi.
3. Fasipepa se tolu e tusi ai upu nei:
  - Filifili
  - Tatalo
  - Faalogo i le Agaga Paia
4. Ata 7–8, O Le Tumutumu o le Malumalu

Faalautelega Fautuaina o le Lesona

Tofi se tamaitiiti e faia le tatalo amata.

Gaoioiga e Faatosina Mai Ai

Tufatufa ia tofu le tamaitiiti ma se fasipepa. Fai i tamaiti e tusi i lalo i a latou fasipepa ni mea se tolu e manatu o le a tofotofoina tamaiti o la latou tupulaga e fai ae o ni mea e sese. Fai i tamaiti e ta’u atu ia te oe pe o a mea na latou tusia. Atonu e te manao e tusi a latou tali i luga o le laupapa ma talanoaina faafitauli na latou feagai i le asō. Ta’u i ai o le a fesoasoani lenei lesona latou te iloa ai le ala e tetee atu ai i ia tofotofoga.

Tala Faatusi Paia

Aoao atu le tala ia Iesu ina ua tofotofoina e pei ona taua i mau o loo lisiina i le vaega o “Sauniuniga.” (Mo auala fautuaina e aoao atu ai tala faatusi paia, (tagai i le “Aoao Atu Mai Tusitusiga Paia,” i. vii.) Manatua: O le Faaliliuga a Iosefa Samita o loo faamanino mai ai le tala o loo maua i le Tusi Paia (King James Version). Fesoasoani i tamaiti ia malamalama o le faaliliuga a Iosefa Samita o loo faamalamalama mai ai o Iesu “sa taitaiina e le Agaga i le vao ina ia faatasi ma le Atua” ae lē faapea ina ia tofotofoina e le tiapolo. Ia faamatala e le’i naunau Iesu e alu i se tulaga o le a tofotofoina ai o ia, ma e le manao foi tatou te o i ai. Ia faamatala foi ua ta’ua mai i le faaliliuga a Iosefa Samita o Iesu na aveina i le tumutumu o le mauga maualuga e le Agaga, ae le o le tiapolo e pei ona ta’ua i le Tusi Paia.

Talanoaga ma Fesili e Faatatau I Ai

Suesue fesili ma mau o loo taua i lalo a o e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.

Talanoaga ma Fesili e Faatatau I Ai

Aisea na alu ai Iesu i le vao? (Mataio 4:1)
I le Faaliliuga a Iosefa Samita o le Mataio 4:2 o loo faapea mai, a o i ai Iesu i le vao, “sa la talanoa ma le Atua.” O le a le uiga o le talanoa ma le Atua? E mafai faapefea ona e talanoa ma le Atua?
Pe faapefea ona fesoasoani le fasefulu o aso o anapogi ma talanoa Iesu ma le Atua na te tetee atu ai i tofotofoga?
Na faapefea ona tofotofoina muamua Iesu e Satani? (Mataio 4:3.) Aisea atonu na faigata ai ona teena e Iesu lenei tofotofoga? (Mataio 4:2.) Na faapefea ona tali atu Iesu ia Satani? O le a le uiga o le tala a Iesu? (Mataio 4:4.)
O a isi auala na tofotofoina ai Iesu e Satani? (Mataio 4:5–6, 8–9.) Na faapefea ona tali atu Iesu i nei tofotofoga? (Mataio 4:7, 10.) Mata e na o le pau nei o taimi na tofotofoina ai Keriso? (Luka 4:13. ”Seia i se aso” e ta’u mai ai e le na o le pau ia o taimi.)
Na fesoasoani faapefea le suesue o Iesu i tusitusiga paia e tetee atu ai i tofotofoga? (Mataio 4:4, 6–7, 10.)
O le a le mea o loo taumafai Satani e fai ia i tatou uma lava? (2 Nifae 2:18; 2 Nifae 28:20–22; MFF 10:27.)
E mafai faapefea ona fesoasoani le Tama Faalelagi ia te oe e tetee atu tofotofoga? O le a se mea e mafai ona e faia nei loa lava e mafai ai ona e aloese mai ni tofotofoga i le lumanai?
O le a le folafolaga sili ua aumaia e le Alii ia i tatou e faatatau i o tatou tofotofoga? (1 Korinito 10:13.) Faitau faatasi lenei mau.

Talanoaina ni mea se tolu e mafai ona tatou faia e mafai ona fesoasoani tatou te teena ai tofotofoga. Faapipii i luga fasipepa o upu a o outou talanoaina.

Talanoaga ma Fesili e Faatatau I Ai

Filifili e tetee tofotofoga ae lei oo mai.

Faitau ma talanoaina le upusii lenei mai se saunoaga a Peresitene Spencer W. Kimball:

“E aupito sili ona faigofie le faia o filifiliga sa’o pe a tatou vave faia.

“A o ou laitiiti, sa tonu ia te au…….. ou te le tofo lava i se lauti, kofe, tapaa, po o se ’ava malosi….
“O le taimi tonu e filifili ai……. ia faamaoni, o le taimi a o lei tuuina atu e le faatauoloa ia te oe se sui e sili atu nai le sui e tatau ona avatu. O le taimi tonu e filifili ai e teena le faaaogaina o ava malolosi po o vailaau oona, o le taimi a o lei ula ma taufaifai lau uo pele ia te oe i lou palaai po o lou [amiotonu]. O le taimi tonu lenei e te filifili ai e mafuta e faavavau ma lo tatou Tama Faalelagi” (“Filifiliga: Aisea Ua Taua ai ona Faia Nisi i le Taimi Nei,” O Le Liahona, Setema 1971, itulau 15).

Tatalo ina ia mafai ona e aloese mai i tofotofoga (Mareko 14:38) ma afai o le a tofotofoina oe, o le a ia te oe le mana ma le faatuatua e teena ai.

Faamatala o tatalo i aso taitasi, o le taumafai e aloese mai i soo se ituaiga o tofotofoga, ma le tulimatai atu i galuega ma gaoioiga taua, o le a fesoasoani ia i tatou.
Faalogo i le Agaga Paia. Faamatala afai e maea ona tatou papatiso, ona tuuina mai lea o le Agaga Paia, lea e mafai ona fesoasoani ia i tatou e faatoilalo ai tofotofoga (tagai MFF11:12).

Fai i tamaiti e talanoa e uiga i ni mea na latou oo i ai ina ua tofotofoina i latou. Fai i ai e faamatala mai pe o a mea na latou faia e tetee atu ai i tofotofoga.

Vaai i tofotofoga na tusi i luga o le laupapa i le amataga o le lesona. Talanoaina nisi o nei mea, ma fai i tamaiti e mafaufau pe mafai faapefea e se tamaitiiti ona aloese ma teena tofotofoga taitasi. Fai i tamaiti e filifili lava le tagata ia (aua le faailoa maia) i se tofotofoga se tasi e manao e sauniuni i ai na te teena ma fuafua pe mafai faapefea ona teena lenei tofotofoga.

Gaoioiga e Faamauoa Ai

E mafai ona e faaaogaina se tasi pe sili atu foi o nei gaoioiga i soo se taimi o le lesona pe faaaoga foi o se toe iloiloga, otootoga, po o se lu’i.

Fai se taaloga o le, “E faapefea pe afai”. Tusi i se fasipepa fesili“E faapefea pe afai”, e faamatala ai tofotofoga e ono feagai ma le vasega, e pei o fesili faataitai o loo i lalo. Sau le tamaitiiti e aumai se fesili se tasi mai le atigipusa po o se fagu, faitau le fesili, ma tali i ai. Ona tofi lea e le tamaitiiti lena se isi e sau e se’i sana fesili mai le pusa. Ia faamamafa atu o le vave faia o le filifiliga o se fesoasoani taua tele lea i le teteeina atu o tofotofoga.
- E faapefea pe afai e te mauaina se mea a se isi tagata?
- E faapefea pe afai e te folafola atu i lou tama o le a e fesoasoani ia te ia, ae tei ua sau lau uo fai mai lua te taaalo?
- E faapefea pe afai e ula ma taufaifai au uo ia te oe ona o lou le ulaina o ni sikareti na latou mauaina (pe inupia pe faaaoga fualaau faasaina)?
- E faapefea pe afai ua e iloa o le a afaina oe pe a e ta’uina le mea moni?
Ia fai e tamaiti taga faagugu pe fai se faatinoga o le teena o tofotofoga.
Ia saunia ni nai fasipepa malo e ta’u o “Pepa o Tofotofoga.” I ni fasipepa malo e 3”x5”, tusi ai ni tofotofoga atonu o le a feagai ma tamaiti, e pei o le pepelo, kopi, gaoi, palauvale, ma isi mea. O isi fasipepa malo e ta’ua o “Pepa Fesoasoani,” ia tusi ai Faatuatua ia Iesu Keriso, Matua, Faiaoga, Uo lelei, Tatalo, Anapogi, Taitai Faaletalalelei, Tusitusiga Paia, o le Agaga Paia, Aloese i Tofotofoga, ma isi mea e fesoasoani i tagata e teena ai tofotofoga.

Faaputu faatasi Pepa o Tofotofoga ona faafao lea i luga o le laulau. Fai i se tamaitiiti e tago e filifili se Pepa o Tofotofoga ma se Pepa o Fesoasoani ma ta’u i le vasega pe o a mea o loo tusi ai. Ia talanoaina e le vasega pe faapefea ona fesoasoani le mea ua ta’ua i le Pepa Fesoasoani e teena le mea o loo tusia i le Pepa o Tofotofoga. Ia feauaua’i tamaiti e filifili ni pepa.
Faamatala atu i tamaiti le saunoaga lea mai ia Peresitene Joseph Fielding Smith: “O mausa po o mea e fai ma amio masani, e faigofie lava ona faatupuina. E pei lava ona faigofie ona faatupuina o se amio masani lelei, e faapena foi ona faigofie ona faatupu se amio masani leaga” (New Era, Iulai 1972, p. 23). Atonu e te fia fesoasoani i tamaiti e tauloto lenei upusii.
Fai i tamaiti e ta’u mai nisi o filifiliga sa latou faia e fesoasoani ai latou te teena tofotofoga i le lumanai.
Fesoasoani i tamaiti e tauloto le Mataio 4:4.
Ia usu pe faitau e tamaiti upu o se pese se tasi, po o pese uma foi nei: “O le Leo Filemu Itiiti” (Pese Faatasi Ma Au, B-92), “Faalogo, Faalogo” (Tusipese a Tamaiti, i.—).

Faaiuga

Molimau

Ia molimau atu ua ia te i tatou le mana e tetee atu ai i tofotofoga e oo mai ia i tatou. Faamatala atu lou alofa mo Iesu ma lana faataitaiga o le teena o tofotofoga a Satani.

Tusi Fautuaina e Faitau i le Fale

Ia fautuaina e suesue e tamaiti le Mataio 4:1–11 i le fale e fai ma toe faamanatu o lenei lesona.

Tofi se tamaitiiti e faia le tatalo faaiu.