Mataupu 20

Ua Agai i Luma le Malo o le Atua

“O le tiute o i latou ua fai mai o loo punouai i le galuega a le [Atua] le savavali pea, ma agai i luma. … E na o le pau le mea, ia i ai lava sitepu e la’a i ai, ma e tatau lava ona laasia lena sitepu.”

Mai le Soifuaga o Lorenzo Snow

I le 1844, a o faataunuuina se tofiga i le Iunaite Setete i sasae, sa aoaoina ai e Lorenzo Snow faapea o le Perofeta o Iosefa Samita ma lona uso o Ailama ua maliliu faamaturo. Sa ia saunoa: “O le tala na maua o lenei tulaga faanoanoa na tupu, e moni lava, sa o’o atoa mai ma le le i mafaufauina, ma sa taia ai a’u ma le ofo tele ma le faanoanoa, ma e leai ni upu e mafai ona faamatala ai.” I le usitaia ai o faatonuga mai le Korama a Aposetolo e Toasefululua, sa ia faia loa sauniuniga mo le toe foi atu i lona aiga i Navu, Ilinoi.¹

Sa ia toe manatua ai mulimuli ane: “Sa i ai le manatu o nisi i aso o Iosefa faapea o lenei Ekalesia o le a le mafai ona faamanuiaina vagana ua taitaia e Iosefa lona taunuuga, ma ina ua o’o mai le taimi na alu ese atu ai o ia mai lenei lalolagi, o se maturo, i le lalolagi o agaga, sa matua popole le Au Paia i le malo atoa o le Atua. O se mea sa le i mafaufauina. Sa faigata ia i latou ona iloa pe faapefea ona faaauau le galuega. O le tiutetauave [e taitai le Ekalesia] lea ua pau i luga o le Korama a Aposetolo e Toasefululua; ma e ala i faamanuiaga a le Atua i o latou luga ma le agaga o musumusuga sa i ai i o latou loto, ma, i lalo o le taitaiga a le Silisili Ese, sa agai pea i luma le malo.”²

O le Peresitene lona lua o le Ekalesia, o Polika Iaga, na maliu i le 1877, ina ua mavae le taitaiga o le Ekalesia mo le 33 tausaga. O Elder Lorenzo Snow, o le sa avea ma sui o le Korama a le Toasefululua i lena taimi, sa ia toe molimauina foi se suiga i le taitaiga o le Ekalesia i le lalolagi. Sa ia saunoa mulimuli ane faapea o Peresitene Iaga “na toetoe lava foi maliu faafuasei. Sa le i saunia atoatoa le Au Paia mo lena tulaga. Ae peitai, sa agai pea i luma le malo o le Atua.”³

Ina ua maliu Ioane Teila, le Peresitene lona tolu o le Ekalesia, i le 1887, sa toe faamalosiau atu Elder Snow i le Au Paia, “Ua silafia e le Alii ua tatau ai i le taimi nei ona valaau i lo tatou uso pele, o Peresitene Teila, e alu ese atu mai lenei lalolagi ua i ai le tele o mafatiaga, o nei vaaiga o le maliu faamaturo; ma o le a agai pea i luma le Ekalesia.”⁴

I le 1898, pe tusa o le 11 tausaga talu ona faamalosiau atu i le Au Paia, i le falelauasiga o Peresitene Teila, sa lagona ai e Lorenzo Snow le manaomia o lea lava foi faamalosiauga. Sa avea o ia ma Peresitene o le Korama a le Toasefululua i lena taimi. O Peresitene Wilford Woodruff sa avea ma Peresitene o le Ekalesia, ma sa faaletonu lona soifua maloloina. Sa silafia e Peresitene Snow faapea, e tusa ma le faasologa faatulagaina mo le isi taitai e sosoo ai, o ia lea o le a pulefaamalumalu i le Ekalesia, pe afai e umi atu lona soifua nai lo Peresitene Woodruff. I se tasi afiafi, sa patino ai ona ia lagonaina le faapopoleina ona o lenei tulaga o le a oo mai. I le mafaufau ai i lona tulaga le atoatoa e tauave le taitaiga o le Ekalesia, sa alu atu ai na o ia i se potu o le malumalu o Sate Leki e tatalo ai. Sa ia ole atu i le Atua e faasaoina le soifua o Peresitene Woodruff, ae sa ia folafola atu foi o le a ia faatinoina soo se tiute ua finagalo ai le Atua mai ia te ia.

Sa maliu Peresitene Woodruff i le aso 2 Setema, 1898, ae le i leva lava le mavae ai o le tatalo faatauanau a Peresitene Snow i le malumalu. Sa i ai Peresitene Snow i Brigham City, e tusa ma le 60 maila (100 kilomita) i le itu i matu o le Aai o Sate Leki, ina ua ia maua le tala i le mea ua tupu. Sa ia faia fuafuaga e malaga atu i le Aai o Sate Leki i se nofoaafi i lena lava afiafi. I lona taunuu ai, sa ia toe alu atu foi i se potu o le malumalu e tatalo ai na o ia. Sa ia faamaonia ona lagona o le le atoatoa, ae sa faaalia foi lona naunauga e fai le finagalo o le Alii. Sa ia ole atu mo le taitaiga ma faatali ai mo se tali, ae sa leai se tali na maua. Ona ia tuua lea o le potu.

I le ulufale atu ai i se poletito tele, sa ia maua ai le tali—ma le faamalosiauga—sa ia sailia. I ona luma sa tu mai ai le Faaola toetu, o le sa tauina atu ia te ia le mea sa tatau ona ia faia. Sa ta’u atu mulimuli ane e Peresitene Snow i le afafine o lona atalii, o Alice Pond, lenei mea na tupu. Sa faamaumauina e Alice le talanoaga sa laua faia ma lona tama matua i le Malumalu o Sate Leki:

“I totonu o le poletito tele e oo atu ai i le potu selesitila, sa ou muamua atu i nai laa i luma o tamāmatua, ina ua ia taofi a’u ma faapea mai: ‘Faatali mo sina taimi, Allie, e i ai se mea ou te fia ta’uina atu ia te oe. O i tonu lava na faaali mai ai le Alii o Iesu Keriso ia te au i le taimi o le maliu o Peresitene Woodruff. Sa Ia faatonuina au ou te alu atu faavave ma toe faatulaga le Au Peresitene Sili o le Ekalesia, ma aua le toe faatali e pei ona sa faia ina ua mae’a le maliliu o peresitene na muamua atu, ma ia ou suitulaga ia Peresitene Woodruff.’

“Ona faalatalata mai lea o tamāmatua i sina laa, ma tuu mai lona lima agavale ma faapea mai: ‘Sa Ia tu tonu lava ii, pe tusa ma le tolu futu i luga a’e o le fola. Sa foliga mai pei sa Ia tu i luga o se ipu auro mafolafola malo.’

“Sa ta’u mai e tamāmatua ia te au, sa maeu le mamalu o le tino mai o le Faaola, ma faamatalaina Ona lima, vae, foliga vaaia ma ofu talaloa papae matagofie, o ia mea uma sa foliga o se mamalu e paepae ma susulu, ma sa faigata ai ona ia pulato’a atu ia te Ia.

“Ona toe faalatalata mai lea o [tamāmatua] i se isi laa ma tuu lona lima taumatau i luga o lo’u ulu ma fai mai: ‘O lenei, afafine o lo’u atalii, ou te manao ia te oe ia manatua o le molimau lenei a lou tamāmatua, lea sa ia tauina atu ia te oe, i ona lava laugutu faapea sa ia vaai moni lava i le Faaola, iinei i le malumalu, ma sa talanoa faafesagai ma Ia.’”⁵

O le asiasi mai o le Faaola ia Peresitene Snow, sa avea o se faamaoniga paia o se upu moni sa ia silafiaina mo le tele o tausaga—faapea o Iesu Keriso o le ao o le Ekalesia. I le musuia ai e lenei upu moni, sa molimau soo ai Peresitene Snow o le a faaauau pea ona alualu i luma le Ekalesia tusa po o a tetee e oo mai. Sa faaalia lona loto faafetai mo le avanoa e auai ai i le agai i luma o le galuega o aso e gata ai a le Alii. I le konafesi aoao ia Oketopa 1898, lea sa lagolagoina ai o ia o le Peresitene o le Ekalesia, sa ia saunoa: “Se i tatou tautino atu i totonu o o tatou loto, se i tatou molimau ifo i totonu o i tatou i le Alii, o le a avea tatou ma tagata sili atu, o se nuu sili atu ona lotogatasi i le konafesi e sosoo ai, nai lo le tulaga ua tatou i ai i le aso nei. O le lagona ma le naunautaiga lea e tatau ona i ai i alii ma tamaitai taitasi ua auai i lenei faapotopotoga mamalu. Ua ou lagonaina i lo’u loto, faapea o le a ou taumafai e faasili atu lo’u tuuto atu nai lo le tulaga sa ou i ai i le taimi ua tuanai, i le manuia o le malo o le Atua ma le faataunuuina o Ona faamoemoega.”⁶ [Tagai fautuaga 1 i le itulau 266.]

Aoaoga a Lorenzo Snow

I le faataunuuina o le valoaga, ua toefuataiina mai e le Alii Lana Ekalesia i luga o le fogaeleele.

I le avea ai ma auauna a le Atua, ou te tuuina atu le molimau i le faaaliga mai o Lona finagalo i le seneturi sefuluiva. Sa o’o mai e ala i Lona lava siufofoga mai le lagi, e ala i le asiasiga a Lona Alo ma e ala mai i asiasiga a agelu paia. Ua ia poloaiina tagata uma i soo se mea e salamo, ina ia liliu mai o latou ala leaga ma manaoga lē amiotonu, ina ia papatisoina mo le faamagaloga o a latou agasala, ina ia mafai ona latou maua le Agaga Paia ma ia o mai e mafuta ma Ia. Ua uma ona Ia amataina le galuega o le faaolataga, sa saunoa ai perofeta paia uma, o failauga ma tagatavaai i augatupulaga uma, ma ituaiga uma o tagata soifua.⁷

O le Faa-Mamona, o se igoa tauvalaau ua faaaoga mo le tapuaiga moni o le Au Paia o Aso e Gata Ai, e le o folafola atu faapea o se mea fou, vagana ai lenei augatupulaga. O loo tautino atu ai ia lava, o le fuafuaga o le faaolataga mai le amataga, sa faatulagaina i le lagi a o le i faia le lalolagi, ma sa faaalia mai le Atua i le tagata i augatupulaga eseese. O lena Atamu, Enoka, Noa, Aperaamo, Mose, ma isi tagata agavaa anamua, sa mauaina lenei tapuaiga faasolosolo, i se faagasologa o tisipenisione, o i tatou, i le avea ai ma nuu, ua faapea ona talitonu moni i ai. … O le Faa-Mamona, i lona faapuupuuga, o le faatuatuaga faa-Kerisiano anamua ua toefuataiina mai, le talalelei anamua lea ua toe aumaia—i lenei taimi e amata i le tisipenisione mulimuli, e faatomua i le Meleniuma, ma faaiuina le galuega o le faaolataga e pei ona tatau ai ma lenei paneta.⁸

E mafai ona tatou vaaia le aao o le Silisili Ese, i le faatuina o se malo lea na saunoa i ai i augatupulaga uma ua leva ona mavae atu, e ala i le Perofeta o Tanielu,—o se malo lea o le a tupu ma salalau atu seia faatumulia ai le lalolagi uma [tagai Tanielu 2:44], pe a oo ina matua salalau atoa atu le malamalama ma le poto, o le a le toe manaomia e se tasi ona faapea atu i ona uso, “Ia outou iloa Ieova; aua e iloa a’u e i latou uma lava, o tagatanuu atoa ma alii;” [tagai Ieremia 31:34] ma, pe a liligi ifo le Agaga o le Alii i luga o tagata uma i se tulaga lea o le a perofeta ane ai o latou atalii ma o latou afafine, e fai miti o latou toeaina, e iloa faaaliga e o latou taulelea [tagai Ioelu 2:28], ma latou te le faaumatia foi se mea i le mauga paia uma o le Alii [tagai Isaia 11:9].⁹ [Tagai fautuaga 2 i le itulau 266.]

O Le Ekalesia a Iesu Keriso o le Au Paia o Aso e Gata Ai ua fausiaina i luga o se faavae mautinoa, ma o le a faaauau ona agai i luma e tusa po o a tetee.

Uso e ma tuafafine, ua faatuina e le Atua Lana Ekalesia ma le Malo i luga o le fogaeleele ia aoga ma faamanuiaina ai le aiga o tagata, ina ia taitaiina i latou i le ala o le upu moni, e saunia i latou mo le faaolataga i Lona afioaga, ma, mo Lona afio mai faamamaluina ma le malo i luga o le fogaeleele. O Ona faamoemoega o le a faataunuuina lava e tusa po o a tetee uma, lea atonu e oo mai ia i latou ona o tagata amioleaga ma mana o le pouliuli. O mea uma e tulai mai i le ala o lenei galuega, o le a aveesea. E leai se mea o le a mafai ona tatalia Lona mana, ae o mea uma ua Ia tautino mai, o le a faataunuuina uma ma le atoatoa. O le alofa o le Atua mo Ona tagata o le a faaauau, ma tumau ma i latou, ma o le a latou manumalo i Lona malosi.¹⁰

O lea, pe tatou te talanoa ea e uiga i le faatamaiaina o lenei malo! … Aisea, atonu e sili ai lou taumafai e tatoso mai fetu mai le vanimonimo, po o le masina, po o le la mai lona faataamilosaga! E le mafai lava ona faataunuuina, aua o le galuega a le Silisili Ese.¹¹

O le malo o le Atua o le a agai pea i luma ma le malosi ma le mana, ma faatasi ai ma le manuia silisili ma mamalu.¹²

O lenei galuega ua fausiaina i luga o se faavae mautinoa, ona ua faavaeina i luga o le papa o augatupulaga. … E tusa pe o ai o le a leiloa i le ala ma ua mavae lona faatuatua, o le a alu pea i luma le Ekalesia.¹³

O le a tu pea le Ekalesia, aua o loo i luga o se faavae mausali. E le mai le tagata; e le mai le suesueina o le Feagaiga Fou, po o le Feagaiga Tuai; e le o le taunuuga o le aoaoina lea tatou te maua i kolisi ma aoga faafaifeau, ae ua sau sa’o mai le Alii. Ua faaalia mai e le Alii ia i tatou e ala i le aoaoga faavae faaalia a le Agaga Paia o le malamalama, ma e mafai e tagata taitasi ona maua lenei lava agaga e tasi.

… Na te tuuina mai ia i tatou se malamalama o mea e ao ona tatou faia, e tusa ma lo tatou naunau e ositaulaga o tatou ola, nai lo le faatautee i lena malamalama. Na te tatalaina mai ia i tatou mea lilo o le malo selesitila, ma o loo faifai pea ona ia tauina mai ia i tatou mea na tatou te le’i iloaina lava muamua. O lenei malamalama ma le poto o loo faaauau pea ona tupu i totonu o i tatou.

… Ua tele naua le malamalama ua tatou maua, ina ia taofia ai o tatou faamoemoega. O i latou o e mananao e faasaua ma faatoilalo i le Faa-Mamona, ia tuu pea i latou e o atu ma fai la latou galuega. … O la tatou galuega o le tuputupu a’e i le malamalama o le Atua, ina ia tausi poloaiga a le Atua, ina ia faatuatua ma ia faaauau e faateleina, ma ia faateleina pea lava pea le atoatoa, a o tatou agaigai i luma i tausaga.¹⁴ [Tagai fautuaga 3 i le itulau 266.]

O i tatou o tagata o le Atua, ma o le a Ia puipuia i tatou a o tatou o atu i luma ma faia mea uma ua Ia finagalo ai.

I le tele o tulaga … lea ua foliga mai ai o le a taunuu lava le faatafunaga o tagata o le Atua, ma ua foliga mai ua leai se auala e sola ese mai ai, … sa faafuasei ona tulai mai se mea, po o se isi auala sa saunia lava mo lo latou faaolataga e taofia ai le faatafunaga o loo fou mai. Tatou te mauaina lenei mea i le tulaga o le aiga o Isaraelu, ina ua taitaiina e Mose. Ina ua latou taunuu i le Sami Ulaula, ma ua i ai le autau a Aikupito i o latou tua, e taufaamatau mai lo latou faatafunaga, sa foliga mai ua leai se auala e sosola ese ai, ae i le taimi lava sa manaomia ai le laveaiga, faauta, sa oo mai ma sa laveaiina i latou [tagai Esoto 14:10–25].

O le a faapea ona tatou i ai e oo i le faavavau. E ui atonu e foliga mai ua matua tele naua o tatou faigata, peitai, o le a i ai auala o le a saunia mo lo tatou saogalemu, pe afai tatou te faatinoina tiute ua manaomia mai ia i tatou, i le avea ai ma fanau a le Atua. Ae, atonu o le a manaomia i le lumanai—ma o le manatu lea ou te fia manao e tauina atu—mo nisi o le Au Paia e faatino le vaega a Eseta, le tupu tamaitai, ma ia naunau e ositaulaga soo se mea ma mea uma o le a manaomia mai i o latou aao mo le faamoemoega o le galueaiina o le laveaiga o le Au Paia o Aso e Gata Ai.

Muamua, e tatau ona tatou iloaina o i tatou o le nuu o le Atua. … Ua avea ma o tatou tiute ia laa atu i luma e pei ona sa faia e Eseta, ma ia naunau e lafoaia mea uma mo le faaolataga o tagata. I le faatinoina ai o lana galuega, sa faapea mai Eseta, “Afai ou te oti ai, oti ai pea ia.” [Tagai Eseta 4:3–16.] … Ae, o tagata o le Atua o le a le faaumatiaina lava. O le a i ai lava i taimi uma se mamoe poa e lavelavea i le vao filifili mo lo latou laveaiga [tagai Kenese 22:13]. …

… Sa fetalai mai le Alii, “Aua ua ou folafola i lo’u loto, o le a Ou tofotofoina outou i mea uma, pe tou te mau i la’u feagaiga, e o’o lava i le oti, ina ia mafai ona maua outou o agavaa; aua afai tou te le mau i la’u feagaiga, ua outou le agavaa mo a’u.” [tagai MF&F 98:14–15.] Ua ia i tatou mafuaaga ua lava e tatau ona ola e faia; ae e i ai le mafuaaga sili atu e tatau ai ona tuuina atu o tatou ola mo le Alii. Ae, e leai se oti i nei mea. E i ai le faaolataga ma e i ai le olataga, pe afai o tagata o le Atua—i latou o e valaauina i latou lava i le suafa o le Alii o Iesu Keriso—o le a tausia Ana poloaiga ma faia mea na, e talafeagai ma Lana silafaga. E le o le fuafuaga a le Silisili Ese le faatagaina o Ona tagata ina ia faaumatiaina. Afai o le a tatou faia le mea sao ma tausi Ana poloaiga, o le a mautinoa lava Lona laveaiina o i tatou mai faigata taitasi.¹⁵ [Tagai fautuaga 4 i le itulau 266.]

Ua o’o i le taimi mo i tatou e faamaualalo ai i tatou lava i luma o le Atua, ma faataunuuina le galuega ua Ia tuuina mai ia i tatou.

O le tiute o i latou ua fai mai o loo punouai i Lana galuega le savavali pea, ma agai i luma. … e aunoa ma le muimui pe tau uuna’ia; na o le pau le mea, ia i ai lava sitepu e la’a i ai, ma e tatau lava ona laasia lena sitepu.¹⁶

O le taimi lenei mo le Au Paia o Aso e Gata Ai e faamaulalo ai i latou lava i luma o le Silisili Ese. … O le taimi lenei mo le Au Paia o Aso e Gata Ai e saili ai po o fea ua latou tautino atu ai i latou lava; o le taimi lenei mo le Au Paia o Aso e Gata Ai e salamo ai mai a latou agasala ma mea faavalevalea ma valaau atu i le Silisili Ese, ina ia tuuina mai Lana fesoasoani; … ina ia mafai ona tatou o atu i luma ma faataunuu le galuega tele ua tuuina mai ia i tatou.¹⁷

O loo tatou punouai i le galuega a le Atua. O avanoa faamoemoeina ua i o tatou luma e mamalu, ae se i tatou manatua i taimi uma, i mea uma tatou te faia ma fausia, o i tatou o auauna a le Atua, ma o loo faia Lona finagalo. Aua lava ne’i faavaivaia la tatou amiosa’o, ae ia faateleina lo tatou faatuatua, a o tatou faagasolo ai i le olaga. O le a faamalieina a’u e galue ai i le mea ua tuuina i ai a’u e le Atua mamana, ma tatalo atu i le Alii mo le mea e mafai ona ou faia e fesoasoani ai i le fausiaina o le malo o le Atua i lena nofoaga, ma fesoasoani mai ia te a’u ia maua mea o loo manaomia e lo’u aiga.¹⁸

Atonu o le a tatou maua le malamalama sili atu ma le mana, ma faateleina lo tatou agavaa e fausia le malo o le Atua i luga o le fogaeleele, ma lena foi, e ala i lo tatou filigā, lo tatou lotomaulalo ma le faatuatua i feagaiga ua uma ona tatou osia.¹⁹

Atonu e foliga mai ona o lo tatou valea i le le malamalama atoatoa ai i ala o le Alii ma Ona faamoemoega, faapea a o tatou galulue e faataunuu le fuafuaga a le Alii, o nisi taimi tatou te taunuu ai i se nofoaga lea e mafai ona malolo ai mo sina taimi, ae o le mea moni, e leai se mea faapena i le polokalama, ma e le mafai lava ona i ai, pau le mea ia faaauau ona faia e tagata a latou galuega ma tuu lo latou faatuatuaga i folafolaga a le Atua. …

… Ia taitasi le tagata ma ia faatuatua ma matua filiga i le tausiga o poloaiga a le Atua, ma atiina ae le manaoga e faia le lelei ia i latou ua siomia ai o ia; ma afai, i le toe mafaufau ai i le tuanai, tatou te iloaina ai tatou te le i galulue aiai e tusa ma mea ua tauina mai e o tatou loto fuatiaifo ma le tiute, tau ina ia avea tatou ia tonu i luma o le Atua ma tagata, ina ia mafai ai ona tatou saunia mo soo se mea lava e ono tupu. Ia faaauau pea le galuega o le fausiaina o malumalu ma fale tapuai; ia [tatou] faaauau pea e aoao a [tatou] fanau ma aumaia i latou i le matatau i le Alii, ma ia faaauau ona aveina atu le talalelei i malo e mamao. …

O le galuega lenei a le Atua, ma o loo Ia faatonutonuina lona ala ma le alualu i luma i luga o le fogaeleele, ma o lenei galuega e ao ona faatumutumuina i o tatou mafaufau i taimi uma; ma, na pau le mea afai e maua i tatou o faaauauina lo tatou agai i luma, e mafai ona faatumauina ma le mautinoa ma le le maluelue ma naunau i lo tatou faamoemoega, ma mafai ai ona faaali atu i le lalolagi lo tatou faatuatua ma le tuuto atu i aoaoga faavae o le upu moni, lea ua faaalia mai e le Atua. …

Atonu e mafai e le Alii ona faatupuina se lagona mamafa e oo mai i o tatou luga, faapei ona o le a manaomia ai se osigataulaga tele mai lima o ona tagata. O le fesili mo i tatou, pe o le a tatou faia lena osigataulaga? O lenei galuega, o le galuega a le Silisili Ese, ma o faamanuiaga ua tatou tulimataia lea na folafolaina, o le a oo mai pe a uma ona faamaonia atu lo tatou faatuatua. Ou te le o taumafai e ta’u atu i nei tagata faapea o loo i ai, pe faapea e le o i ai, se tofotofoga faigata o le a latou mauaina; o le fesili mo a’u o le, pe ua ou saunia ea e talia ma faaaogaina sa’o ma talia soo se faamanuiaga atonu o le a tuuina mai e le Alii mo a’u, po o Lona nuu, ma faaaogaina tatau; po o le, i se isi itu, pe ua ou saunia ea e faia soo se osigataulaga atonu o le a Ia manaomia mai ia te a’u? E oo lava i se mea le aoga e pei o le lefulefu o se vaovao mago, o le a ou le tuuina atu mo se isi lava tapuaiga, lea e le maimauina ai le ola e faia ai, ma lē maimaua ai le foaiina atu o le ola, ma o le a ou le tuuina lava se mea mo se tagata, sa le mafai ona naunau e ositaulagaina mea uma na ia te ia mo lana tapuaiga.

O le mea lea, ou te [fai atu] i le toatasi ma outou uma, O atu i luma! O atu i luma, ma vaai i le faaolataga a le Alii, ma aua le tutū faamalō.²⁰ [Tagai fautuaga 5 i le itulau 266.]

Fautuaga mo Suesuega ma le Aoaoina Atu

Mafaufau i nei manatu, a o e suesueina le mataupu, pe, a o e sauni e aoao atu. Mo nisi fesoasoaniga, tagai i itulau v–vii.

Toe iloilo tala o i itulau 255–9. O le a sou manatu o le uiga o le faapea atu, ua agai i luma le malo o le Atua? O a ni mea na tutupu ua fesoasoani ia te oe e vaaia ai le malo o le Atua o le a agai pea i luma?
I le palakalafa faaiu i le itulau 261, o loo taua ai e Peresitene Snow valoaga e fa mai le Feagaiga Tuai. O a auala ua faataunuuina ai nei valoaga i aso nei?
Suesue aoaoga a Peresitene Snow e uiga i le agai pea i luma o le Ekalesia, e ui i tetee (itulau 261–2). Faamata e faapefea ona fesoasoani nei aoaoga ia i tatou, pe a faasaua mai tagata ia i tatou ona o la tatou faatuatuaga? O faapefea ona e taulimaina tetee i lau molimau?
Iloilo palakalafa e tolu ma le fa i le itulau 262. Pe a manaomia tatou e faia osigataulaga, o le a se mea e mafai ona tatou aoaoina mai le faataitaiga a Eseta? I ia ituaiga tulaga, e faapefea ona e manatu o le a fesoasoani ia i tatou le “iloaina o i tatou o le nuu o le Atua”?
I le vaega faaiu o le mataupu, ua fautuaina ai e Peresitene Snow tagata o le ekalesia e fausia le malo o le Atua, i soo se mea ua tuuina i ai e le Alii i latou. O a auala e mafai ai e taumafaiga a matua i le aiga ona fesoasoani e fausia ai le malo o le Atua i le lalolagi atoa? E mafai faapefea e faiaoga o aiga ma faiaoga asiasi ona fausiaina le malo o le Atua?

Mau Talafeagai: Mataio 24:14; Eteru 12:27; Moronae 7:33; MF&F 12:7–9; 65:1–6; 128:19–23

Fesoasoaniga mo le Aoao Atu: “E masani ona fesoasoani le amata ona manatunatu e uiga i le lesona e sosoo ai i le faatoa maea ai o le lesona ua tuanai. Atonu o le a sili ona e silafia lelei ai i latou o e e te aoaoina ma o latou manaoga ma mea e fiafia i ai i le taimi lava lena, i le mavae ai ona e faatasi ma i latou” (O Le Aoao Atu, E Leai Se Isi Valaauga E Sili Ai, 97).

Sa molimau atu Peresitene Lorenzo Snow e uiga i le Toefuataiga o le talalelei e ala mai i le Perofeta o Iosefa Samita.

“Uso e ma tuafafine, ua faatuina e le Atua Lana Ekalesia ma le Malo i luga o le fogaeleele ia aoga ma faamanuiaina ai le aiga o tagata.”