Mataupu 6

Avea ma tagata Atoatoa i luma o le Alii: “O Sina Lelei Sili Atu mai lea Aso i lea Aso”

“Aua ne’i faamoemoe e avea ma tagata atoatoa i le taimi e tasi. Afai e faapena, o le a e faanoanoa. Ia avea oe ma tagata sili atu i le asō, nai lo ananafi, ma ia sili atu lou lelei taeao, nai lo le tulaga ua e i ai i le asō.”

Mai le Soifuaga o Lorenzo Snow

Na auai Peresitene Lorenzo Snow i se tasi o sauniga perisitua, na taitasi ai sui o korama a toeaina ona tutula’i ma lipoti atu i le galuega a lana korama sa faia. A o faafofoga atu Peresitene Snow i nei alii talavou, na ia manatuaina le tulaga na i ai o ia, i le tele o tausaga ua mavae. Ina ua ia tula’i e saunoa atu, sa ia faapea:

“Ou te fia fai atu e uiga i se mea, pe a mafai ai, o le a outou le faagaloina lava, ma ou te manatu atonu e mafai ona ou faia.

“Ua ou vaaia, e pei ona toeitiiti o taimi uma ou te vaai ai i ai, pe a faatasitasi le au Toeaina talavou, ma, o le mea moni, pe a faatasitasi Toeaina faaleogolua, e i ai se tulaga e tau musu e talanoa atu i luma o se faapotopotoga. Ua ou vaaia lena mea iinei, i le taeao lenei, i alii talavou na tutula’i e talanoa mai ma tuuina mai faamatalaga e faatatau i le galuega patino na latou faataunuuina.

“Atonu e le o se mea sesē, atonu, afai ou te ta’uina atu ia te outou sina vaega itiiti o mea na tutupu i lo’u olaga, pe a amata ona ou talanoa atu i luma o ni tagata se toatele, e o’o lava foi i le taimi a o le’i avea a’u ma se toeaina. Ou te manatuaina le taimi muamua na valaauina ai a’u e tuuina atu la’u molimau. … O se mea na ou matuā palaai e fai, ae, i le taimi lava e tasi, na ou lagonaina o lo’u tiute le tula’i atu, peitai, sa ou faatali ma faatali. Sa tuuina atu le molimau a se tasi, na tuuina atu foi le molimau a le isi, ona soso’o ai lea ma le isi, ma na toetoe a mae’a tagata uma, ae sa ou palaai lava e tu i luga. Ou te le i talanoa lava muamua i luma o se faapotopotoga. … Ona [i’u ai lea] ua tonu ia te a’u, o le taimi lea mo a’u e tula’i atu ai. Ona ou faia lea. Ia, faamata tou te silafia o le a le umi na ou talanoa ai? Ou te talitonu pe tusa o se afa minute—e le faapea na sili atu i se minute. O la’u taumafaiga muamua lena; ma o le lona lua, ou te manatu, na toeitiiti foi faapena. Sa ou matamuli, … ae sa tonu i lo’u mafaufau, malosi ma mausalī, e faapea o so’o se taimi e valaaulia ai a’u e faatino se tiute o lenei ituaiga, po o so’o se isi lava, o le a ou faia e tusa pe o le a lona taunuuga. O se vaega lena o le faavae o lo’u faamanuiaina, i le avea ai ma se Toeaina o Isaraelu.”

Sa ta’uina e Peresitene Snow i alii talavou e faapea, e le i leva lava ona tupu lenei mea, ae faia loa se ulua’i fonotaga, a o avea ma faifeautalai faamisiona. “Sa leai se isi taimi i lo’u olaga na sili ona ou palaai ai, e pei ona sa ou i ai i lena fonotaga,” na ia manatua ai. “Sa ou tatalo i le aso atoa, ma ou alu ese na o a’u ma valaau atu i le Alii. Sa leai se isi taimi muamua na ou talanoa atu ai [i luma o ni tagata] vagana ai na sauniga molimau. Na ou palaai. Ou te manatu e leai se tagata e sili ona palaai i se tulaga faapea, e sili atu nai lo a’u i lena taimi. Na amata le fonotaga, ma na toetoe a faatumulia atoa le potu. … Na amata ona ou talanoa atu, ma ou te manatu na ou faaaogaina le toeitiiti 45 minute.”¹ I se isi faamaumauga o le fonotaga lava lea, na ia tusia ai: “Ina ua ou tula’i i luma o lena faapotopotoga, e ui sa ou le iloaina se upu se tasi e fai atu ai, ae o le taimi lava na matala ai lo’u gutu e talanoa atu, na matuā malosi le o’o mai o le Agaga Paia i o’u luga, ma faatumulia lo’u mafaufau i le malamalama ma manatu e fesootai atu ai, ma le gagana tonu e tuuina atu ai na upu. Sa maofa tagata, ma sa talosagaina se isi fonotaga.”²

Sa faasoaina atu e Peresitene Snow le lesona na ia mana’o i alii talavou e a’oa’oina mai lana faataitaiga: “A’u uo talavou e, o loo i ai se avanoa mo outou e avea ai ma tagata sili—e pei lava o le tulaga sili e te mo’omo’o i ai. I le amata ai i le olaga, atonu e taula’i atu ai o outou loto i mea e matuā faigata ona mauaina, ae atonu e mafai ona e aapa atu i ai. I au ulua’i taumafaiga e faamalie ou mana’o, atonu o le a lē faamanuiaina, ma o au taumafaiga faifai pea atonu o le a lē faamaoniaina le avea ma mea ua taua o se manuia. Peitai, afai o au taumafaiga o taumafaiga faamaoni, ma afai o ou manaoga ua faavaeina i le amiotonu, o le a’oa’oga o le a e mauaina, a o tulituliloaina manaoga o lou loto, e tatau ona aogā ia te oe, ma e o’o lava i au mea sesē, pe afai e liuaina sesē o le a e faia, e avea ma ou lelei.”³

O se autu sili lenei na fiafia i ai Peresitene Snow. Sa masani ona ia faamanatuina i le Au Paia le poloaiga a le Alii ina ia atoatoa, ma sa ia faamautinoa atu ia i latou e faapea, e ala i lo latou lava filigā faatasi ma le fesoasoani a le Alii, e mafai ai ona latou usitaia lena poloaiga. Sa ia a’oa’o atu, “E ao ona tatou lagonaina i o tatou loto, o le Atua o lo tatou Tamā, ma e ui ina tatou faia mea sesē ma vaivai, peitai, afai tatou te ola i se tulaga toeitiiti atoatoa lelei tatou te mafai ai, o le a lelei mea uma mo i tatou.⁴

Aoaoga a Lorenzo Snow

Faatasi ma le filigā, onosai, ma le fesoasoaniga paia, e mafai ona tatou usitaia le poloaiga a le Alii ina ia atoatoa.

“O le iva sefulu ma le iva o tausaga o Aperamo, na faaali mai ai Ieova ia Aperamo, ua faapea mai foi ia te ia, O a’u o le Atua e ou le malosi uma lava, ia e savali i o’u luma, ma ia sao lau amio.” [Kenese 17:1.]

I le sootaga ma lenei, o le a ou sii maia ai se vaega o upu a le Faaola i lana lauga i luga o le Mauga, e pei ona i ai i le fuaiupu mulimuli o le mataupu e 5 o le Mataio.

“O lenei, ia atoatoa ona lelei o la outou amio, e pei o lo outou Tamā o i le lagi e atoatoa ona lelei o ia.” [Mataio 5:48.] …

Ua tatou a’oa’oina na asiasi atu le Alii ia Aperamo ma tuuina atu ia te ia folafolaga silisili, ma, a o le i sauni o ia e taliaina, sa i ai se tulaga manaomia patino sa tuuina atu ia te ia, e faapea o ia [Aperamo] e tatau ona atoatoa i luma o le Alii. Ma, o le tulaga manaomia lava foi lea sa tuuina atu e le Faaola i ona soo, ina ia avea latou ma tagata atoatoa, e pei o Ia ma Lona Tama i le Lagi ona atoatoa. O le mea lenei ua ou talitonuina e avea ma mataupu e faatatau i le Au Paia o Aso e Gata Ai; ma ou te manao e ofoina atu nai faamatalaga faafautuaga, mo le toe mafaufau i ai o i latou e tatau i ai.

Ua folafola mai e le Alii o le a faae’eina atu faamanuiaga i luga o le Au Paia o Aso e Gata Ai; peitai, e pei o Aperaamo, e ao ona saunia i tatou mo na faamanuiaga, ma ina ia faia lenei mea, o le tulafono lava lea e tasi na tuuina atu ia te ia e le Alii, ua tuuina mai ia i tatou ina ia usitaia. Ua manaomia mai foi ia i tatou ona taunuu i se tulaga o le atoatoa i luma o le Alii; ma o le Alii i lenei tulaga, e tutusa lava ma isi tulaga taitasi, na te le i tuuina mai se tulaga manaomia e lē mafai ona mulimulitaia, ae, i se isi tulaga, ua Ia tuuina mai mo le faaaogaina e le Au Paia o Aso e Gata Ai mea e mafai ai e i latou ona usitaia Lana faatulagaga paia. Ina ua tuuina atu e le Alii lenei faatulagaga ia Aperaamo, sa Ia tuuina atu ia te ia mea e mafai ai ona agavaa o ia e usitaia lena tulafono, ma atoatoa ai le faataunuuina o lena tulaga manaomia. Sa ia te ia le avanoa e maua ai le Agaga Paia, e pei ona ta’uina mai ia i tatou na talaiina atu le talalelei ia Aperaamo, ma e ala i lena talalelei, na mafai ai e ia ona maua lena fesoasoaniga paia, lea na mafai ai e ia ona malamalama i mea a le Atua, ma a aunoa ma lena mea, e leai se tagata e mafai ona faia; a aunoa ma lena, e leai se tagata e mafai ona taunuu i se tulaga o le atoatoa i luma o le Alii.

E faapena foi ona moni i le Au Paia o Aso e Gata Ai; atonu o le a lē mafai ona ausia se alafua o le mama ma le faaleagaga, se i vagana ua auala mai i fesoasoaniga mamana [faalelagi]. Po o le faamoemoe faapea o le Au Paia o Aso e Gata Ai, i le taimi e tasi, o le a, pe, mafai ona usitai i lenei tulafono i tulaga uma. E manaomia ai le taimi; e manaomia ai le lava o le onosai ma le pulea o le mafaufau ma le loto ina ia mafai ona usitaia lenei tulafono. Ma, e ui atonu tatou te pa’ū i le taimi muamua o a tatou taumafaiga, peitai, e lē tatau ona faavaivaia ai le Au Paia o Aso e Gata Ai mai le galulue malosi e faatinoina se naunautaiga e feagai ai ma le tulaga manaomia sili. O Aperaamo, e ui atonu sa i ai lona faatuatua e savali ai i luma o le Alii e tusa ma lenei tulafono paia, ae, sa i ai taimi na matuā tofotofoina ai lona faatuatua, peitai, sa le i faavavaia ai o ia aua sa ia faatinoina se naunautaiga e feagai ai ma le finagalo o le Atua.

Atonu tatou te manatu e lē mafai ona faataunuuina le tulafono o le atoatoa, faapea o le galuega ia faaatoatoaina i tatou e faigata tele. Atonu e moni mo na o se vaega, peitai, e tumau lava le moni, e faapea o se poloaiga a le Silisili Ese ia i tatou, ma e lē mafai ona tatou lē amanaiaina. Pe a tatou feagai ma taimi o faigata, ona tatau lea ona tatou faaaogaina lena avanoa sili o le valaau atu i le Alii mo le malosi ma le malamalama, poto ma le alofa tunoa, lea e mafai ai ona tatou manumalo i le vaivaiga o le tino, lea e tatau ona tatou faia ai se auala faifai pea e tete’e atu ai.⁵ [Tagai fautuaga 1 ma le 2 i le itulau 112.]

Pe a tatou feagai ma se tulaga manaomia mai le Alii, ua tatou atoatoa i lena vaega.

Na poloaiina Aperaamo e tuua ona tagata ma lona atunuu [tagai Aperaamo 2:1–6]. Ana le usitaia e ia lenei tulaga manaomia, atonu o le a lē faamaoniaina o ia e le Alii. Peitai, sa ia usitaia; ma, a o ia tuua lona aiga, sa lē taumateina lona ola i le usiusitai i lena tulafono paia o le atoatoa. Ana faapea e pa’ela o ia i lenei tulaga, o le a mautinoa lona lē mafai ona usitaia o tulaga manaomia mai le Silisili Ese. Ma, a o ia tuua le fale o lona tama, a o ia tuuina atu o ia lava i lenei tofotofoga, sa ia faia le mea lena na faamaoniaina atu ia te ia e lona loto fuatiaifo ma le Agaga o le Atua e ao ona faia, ma e leai se isi tagata e mafaia ona sili atu lona faataunuuina, pe a faapea na te lē faia se sesē, a o ia faatinoina lenei galuega.

Pe a taliaina e le Au Paia o Aso e Gata Ai le talalelei i malo i le salafa o le lalolagi, ma, pe a o’o mai le siufofoga o le Silisili Ese ia i latou e faapea, ia tuua laueleele o o latou tama, ia tuua o latou tagata e pei ona sa faia e Aperaamo, soo se taimi lava latou te ola ai i lenei tulaga manaomia, ona latou savavali ai lea i le usiusitai i lenei tulafono, ma atoatoa i latou e pei o tagata ona mafai ai i tulaga ma le vaega o le aafiaga lea ua latou faatinoina, e lē faapea ua atoatoa i latou i le malamalama ma le mana, ma isi mea faapena; ae i o latou lagona, i lo latou faamaoni, faamoemoega ma le naunautaiga. Ma, a o latou sopoia le vasa tele, pe afai sa latou lē muimui pe tomumumu, ae usitaia fautuaga na tuuina atu ia i latou, ma i tulaga taitasi sa latou amio ai i se amioga talafeagai, sa tusa lo latou atoatoa e pei ona finagalo ai le Atua ia latou amio ai.

Ua fuafuaina e le Alii e aumaia i tatou i luga i le malo selesitila. Ua ia faailoaina mai, e ala i faaaliga tuusa’o faapea o i tatou o Ana fanau, faapelepele i lalolagi e faavavau, faapea ua tatou o mai i lenei lalolagi mo se faamoemoega faapitoa, o le sauniaina o i tatou lava e maua se atoatoaga o le mamalu o le Tamā, pe a tatou toe fo’i atu i Lona afioaga. O le mea lea, e ao ona tatou sailia le agavaa e tausia ai lenei tulafono ia faapaiaina o tatou faamoemoega, manaoga, lagona, ma lagona alofa, ina ia mamā ma paia, ma o tatou loto i mea uma ina ia matuā usitai atu i le finagalo o le Atua, ma ia lē i ai so tatou lava loto, vagana o le faia o le finagalo o lo tatou Tamā. O lena ituaiga tagata, i ana gaoioiga ua atoatoa, ma o le a taliaina le faamanuiaga a le Atua i mea uma na te faia, ma mea uma e alu i ai.

Peitai e mafai ona tatou faia o mea sesē, i le vaivaiga o le tino, ma tele ina tatou lē malamalama, o le mea lea tatou faia ai mea sesē. Ioe, ae lē avea ai lena ma se mafuaaga tatou te lē lagonaina ai le mana’o ina ia usitaia lenei poloaiga a le Atua, aemaise lava o le vaaia lea ua ia tuuina mai i o tatou lima mea e mafai ai ona faataunuuina lenei galuega. O lenei lo’u malamalama i le uiga o le upu, atoatoa, e pei ona faamatalaina e lo tatou Faaola ma le Alii ia Aperaamo.

Atonu e mafai ona atoatoa se tasi e tusa ma nisi o mea, ae le atoatoa i nisi mea. O se tagata e usitai faamaoni i le tulafono o le Upu o le Poto, ua atoatoa e tusa ma lena tulafono. Pe a tatou salamo i a tatou agasala ma ua papatisoina mo le faamagaloga, sa atoatoa i tatou e tusa ma lena tulaga.⁶ [tagai fautuaga 3 i le itulau 112.]

Nai lo le lagona o le lotovaivai pe a tatou pa’ū, e mafai ona tatou salamō ma tatalo atu i le Atua mo le malosi e faia ai ia sili atu.

O lea ua ta’uina mai e le Aposetolo o Ioane ia i tatou, e faapea “o le fanau i tatou a le Atua i nei ona po, ae le i faaalia mai nei le uiga o i tatou a amulī: a ua tatou iloa, pe a faaali mai o ia, ona foliga ai lea o i tatou ia te ia. O i latou uma foi o i ai lenei faamoemoe ia te i latou, ua taitasi ma faamamāina o ia e ia, faapei ona mamā o ia.” [Tagai i le 1 Ioane 3:2–3.] O le Au Paia o Aso e Gata Ai, ua faamoemoeina e taunuu i lenei tulaga o le atoatoa; tatou te faamoemoe ina ia avea faapei o lo tatou Tamā ma le Atua, o fanau malolosi lelei ma agavaa e mau i lona afioaga; tatou te faamoemoe faapea a afio mai le Alo o le Atua, o le a faafouina ma faamamaluina o tatou tino, ma o le a “liua o tatou nei tino ua leaga, ina ia faia ia faatatau i lona tino matagofie.” [Tagai Filipi 3:21.]

O o tatou faamoemoega ia. O lenei, se i mafaufau lava le tagata ia ua faatasi mai, e uiga i lenei fesili: O lelei ea le faavaeina o o tatou faamoemoega? I se isi faaupuga, o tatou saili atu ea e faamamāina i tatou lava? E mafai faapefea e se tagata o le Au Paia o Aso e Gata Ai ona lagonaina ua faamaoniaina o ia, se i vagana o loo ia saili e faamamāina o ia lava faapei o le Atua e mamā, se i vagana ua ia saili ia maua le loto fuatiaifo i luma o le Atua ma tagata i aso taitasi o lona olaga? O i tatou e masalosalo, o le toatele o i tatou, e savavali mai lea aso i lea aso, ma, mai lea vaiaso i lea vaiaso, ma, mai lea masina i lea masina, i luma o le Atua, ma le lē lagonaina o le tausalaina, faia amioga tatau ma saili malosi i le agamalū atoatoa mo le Agaga o le Atua e faatonuina o tatou ala i aso taitasi; ae paga lea, atonu e i ai se taimi patino po o ni taimi i o tatou olaga, pe a tofotofoina malosi i tatou ma atonu e faatoilaloina ai; e tusa lava pe afai e tupu lenei mea, e lē tatau ona avea lena ma mafuaaga e lē tatau ai ona tatou toe taumafai, ma lena lava foi le tulaga faatasi ma le toe faaluaina o lo tatou malosi ma le naunautaiga e ausia lo tatou faamoemoega.⁷

E finagalo le Alii e faaali mai le alofa fetuutuunai i Ana fanau i le lalolagi, ae na te manaomia mai ia i latou le salamō faamaoni pe a latou solitulafono pe pa’ū i soo se tiute. E na te faamoemoeina lo latou usiusitai, ma faapea o le a latou faasaga atu e tuu ese agasala uma, ia faamamāina i latou lava ma avea moni ma ona tagata, o Lana Au Paia, ina ia mafai ona saunia i latou e o atu i Lona afioaga, ma avea faapei o Ia i mea uma, ma pule faatasi ma Ia i Lona mamalu. Ina ia ausia lenei tulaga, e ao ona latou savavali i le ala lauitiiti ma le vaapiapi, ma tausia o latou olaga ia sili atu ona susulu ma lelei, ua faatumulia i le faatuatua ma le alofa mamā, le alofa lē ponā lea o Keriso, ma faamaoni a’ia’i i tiute uma i le Talalelei.⁸

Afai tatou te faitau auiliili i le soifuaga o Aperaamo, po o soifuaga o isi tagata maoae ma paia, o le a lē taumatea lo tatou iloa ai o a latou taumafaiga ina ia amiotonu, sa le i faatumuina i le manuia i taimi uma. O le mea lea, e lē tatau ai foi ona tatou faavaivai pe afai tatou te toilalo i sina taimi o le vaivai; ae, nai lo lena, faavave ona salamō mo le sesē, po o le leaga ua tatou faia, ma, faaleleia i le mea e gata ai lo tatou mafai, ona saili atu lea i le Atua mo le malosi faafouina e agai ai i luma ma faia ina ia sili atu.

Sa savali ma le atoatoa Aperaamo i luma o le Atua i lea aso ma lea aso, ina ua ia tuua le fale o lona tamā, ma sa ia faaalia faamaoniga o se mafaufau sili ma pulea lelei i le ala na ia fautuaina mai, ina ua femisaa’i ana tausi manu ma tausi manu a lona tausoga o Lota [tagai Kenese 13:1–9]. Peitai, sa i ai se taimi o le soifuaga o Aperaamo, atonu sa matua’i tofotofoina ai lava o ia; o le mea moni e leai se isi mea sili ona tugā e mafai ona mafaufau i ai; o le taimi lena ina ua valaau mai ai le Alii ia te ia e ofoina atu o se taulaga, lona atalii pele e toatasi, lona atalii lava lea na faamoemoe o se faataunuuga o le folafolaga sili na tuuina atu ia te ia e le Alii; peitai, na ala i le faailoaga o se uiga tatau na mafai ai e ia ona tatalia le tofotofoga, ma faamaonia lona faatuatua ma le faamaoni i le Atua [tagai Kenese 22:1–14]. E faigata ona tatou faapea na mauaina mai e Aperaamo sea tulaga o le mafaufau mai ona matua ifo i tupua; ae e talafegai le talitonu faapea o le faamanuiaga a le Atua, na ia mafai ai ona mauaina, ina ua mae’a ona o’o i se taua e talitutusa ma le tino e pei ona tatou i ai nei, ma lē taumateina ai le faatoilaloina i ia taimi ma toe faatoilaloina seia mafai ona ia tatalia sea suesuega e sili ona mamafa.

“Ia ia te outou foi lea lava manatu” na faapea mai ai le Aposetolo o Paulo, “sa ia Keriso Iesu: o ia sa uiga faatasi ma le Atua, e le i manatu ia o se mea faoa ina ia tusa lava o ia ma le Atua.” [Tagai Filipi 2:5–6.] O lenei, o tagata taitasi ua i ai lenei faamoemoega, o le a faamamāina ia lava faapei o le Atua e mamā, ma taumafai e savali ma le atoatoa i ona luma. E i ai nai a tatou gaoioiga faavalevalea ma o tatou vaivaiga; e tatau ona tatou taumafai e faatoilaloina i le vave e mafai ai, ma e tatau ona tatou atiina ae lenei lagona i loto o a tatou fanau, e faapea o le mata’u i le Atua atonu e tupu a’e ma i latou mai lava i lo latou talavou, ma, atonu latou te a’oa’o e amio ai i ona luma i tulaga uma lava.

Afai e mafai e le tane ona nonofo faatasi ma lana avā i se aso, e aunoa ma le taua’imisa po o le aunoa ma le agaleaga atu i se tasi, pe, aunoa ma le faatigā i le Agaga o le Atua i soo se auala lava, ua lelei tele lena, ua matuā atoatoa lava. Ona taumafai lea e faia faapena i le aso e soso’o ai. Peitai, a faapea e toilalo o ia i lana taumafaiga i le aso e soso’o ai, e le tatau ona avea lena ma mafuaaga o le a lē taumafai ai ia faamanuiaina i le faia o lena mea i le aso lona tolu. …

E tatau i le Au Paia o Aso e Gata Ai ona galueaiina pea lava pea lenei mana’oga, lea na matuā manino ona faatuina mai e aposetolo i aso ua mavae. E tatau ona tatou taumafai e savavali i aso taitasi, ina ia maua le loto fuatiaifo e lelei i le Atua atoa ma tagata uma. Ma ua tuuina e le Atua i le Ekalesia auala patino e mafai ai ona lagolagoina i tatou, o ia auala, o Aposetolo ma Perofeta ma e Folafola le talalelei, ma isi “ina ia faaatoatoaina ai le Au Paia.” (Tagai Efeso 4:11–12.] Ma sa Ia faae’eina foi i o tatou luga lona Agaga Paia, lea e avea o se taiala e lē sesē, tumau, faapei o se agelu a le Atua, i lo tatou itu, e ta’uina mai ia i tatou le mea e fai ma maua ai e i tatou le malosi ma le fesoasoaniga i taimi o faigata, pe a tula’i mai tulaga faigata i o tatou ala. E lē tatau ona tatou faatagaina i tatou lava e faalotovaivaia i soo se taimi lava tatou te iloaina ai o tatou vaivaiga. E seāseā lava tatou mauaina se taimi i faataitaiga mamalu uma ua tuuina mai ia i tatou e le au perofeta, o aso anamua po o aso nei, ua latou faatagaina ai le Tiapolo e faavaivaia i latou; peitai, i le isi itu, sa faifai so’o ona latou saili e faatoilaloina, ina ia manumalo i le taui, ma, faapena ona saunia ai i latou lava mo se atoatoaga o le mamalu.⁹ [Tagai fautuaga 4 i le itulau 112.]

Faatasi ma le fesoasoaniga paia, tatou te mafai ai ona ola i luga atu o faiga sese ma faavalevalea a le lalolagi.

Tatou te tuuina loa i o tatou mafaufau e faapea ua ia i tatou moni lava le mana i totonu ia i tatou, e ala i le talalelei ua tatou mauaina, e faatoilalo ai o tatou faanaunauga, o o tatou tuinanauga ma i mea uma lava, faagauai atu o tatou loto i le finagalo o lo tatou Tama Faalelagi, ma, nai lo le avea ma auala e faatupuina ai lagona lē lelei i o tatou auaiga, ma i latou tatou te faifai mea faatasi, ae fesoasoani malosi e fausia se lagi itiiti i luga o le fogaeleele, ona faapea lea atonu ua ’afa le tulaga o le manumalo i le taua. O se tasi o faigata sili e mafatia ai le toatele, faapea ua matele tatou e faagaloina le faamoemoega sili o le olaga, le faamoemoega o lo tatou Tama Faalelagi i le auina mai ai o i tatou iinei ina ia faaofuina i le tino faitino, faatasi ai ma le valaauga paia ua valaauina i ai i tatou, ma, o le mea lea, nai lo le siitia maualuga atu i mea laiti fesuisuia’i o taimi, o i tatou foi, e masani ona faatagaina i tatou lava e ō i tulaga o le lalolagi e aunoa ma le tuuina atu o i tatou i le fesoasoaniga paia ua faatuina e le Atua, lea e mafai ai ona tatou manumalo. O le a lē sili atu tatou nai le lalolagi, pe afai tatou te lē galueaiina le lagona ina ia atoatoa, e pei o lo tatou Tamā o i le Lagi ua atoatoa.

O lenei le apoapoaiga a le Faaola i le Au Paia o aso anamua, o i latou o tagata e tutusa manaoga, ma, o e na tuuina atu i faaosoosoga tutusa e pei o i tatou, ma na Ia silafia pe o le a mulimuli ai tagata pe leai; e le i tuuina mai lava e le Alii, pe, o le a Ia faamoemoeina mai i Ana fanau mea e lē mafai e i latou ona faataunuuina. O toeaina o Isaraelu, o e faamoemoe e o atu i luma i le lalolagi e tala’i le talalelei o le faaolataga i le lotolotoi o se tupulaga piopio ma le faalogogatā, i se tupulaga o e ua tumu i le amioleaga ma le faapiopio, ona matuā galueaiina lenei agaga. E le gata ia i latou, ae o tagata uma, soo se alii ma se tamaitai talavou e auai i lenei Ekalesia o lē ua agavaa e valaauina o se tagata paia, e tatau ona galueaiina lenei manaoga e ola i lenei tulaga manaomia ina ia manino o latou loto fuatiaifo i luma o le Atua. O se mea matagofie mo soo se tasi, talavou po o le matua, ina ia i ai lenei faamoemoega i lona mafaufau, e matuā sili ona matagofie le vaai atu i o tatou tagata talavou ua uia se ala e mafai e le malamalama ma le poto o le Atua ona susulu mai i o latou foliga, ina ia mafai ai ona latou mauaina se malamalama tonu o le olaga ma mafai ai ona ola i luga a’e o faiga sese ma le faavalevalea a le lalolagi, ma mea sesē ma le amioleaga o tagata.¹⁰

E lē tatau i le Au Paia o Aso e Gata Ai ona popole i mea o lenei lalolagi. O le a mavae uma atu lava. E tatau ona tuuina atu o tatou loto i mea o i lugā; ina ia tauivi atu mo lena atoatoa lea sa ia Keriso Iesu, o lē sa usitai atoatoa i mea uma lava e tatau ma le Tamā, ma o lea sa Ia mauaina ai le faaeaga silisili, ma avea ai ma faataitaiga mo Ona uso. O le a le mea o le a tatou fiafia ai ma popole i nei mea faaletino, ae o lo tatou taunuuga e matuā maoa’e ma mamalu? Afai tatou te pipii atu i le Alii, tausia Ana poloaiga, faataitai i Ona tulaga atoatoa, ma aapa atu i na mea moni e faavavau o Lona malo faalelagi, o le a lelei mea uma ia i tatou, ma o le a tatou malō ma maua le manumalō i le iuga.¹¹

I a outou gaoioiga ma taitaiga uma, ia i ai le manatunatuga faapea o loo outou sauniaina ma faia i le taimi nei mo outou se olaga e mafai ona faaauauina i le faavavau; faatinoina i luga o mataupu faavae lea e lē tatau ona outou maasiasi pe lē manana’o e faatino i le lagi, aua le faaaogaina ni auala e faataunuu ai se sini autū o le a lē faamaoniaina e se loto fuatiaifo ua faamalamalamaina faaselesitila. E ui o lagona ma faanaunauga e faaosofiaina outou e faia se faatinoga, ia avea mataupu faavae mamā, mamalu, paia, ma faamaoni, e pulea ma faatautaia ai i taimi uma.¹²

E lē mafai ona avea i tatou ma tagata atoatoa i se taimi se tasi, ae mafai ona faaopoopo atili le lelei mai lea aso i lea aso.

O le tamaitiiti e tupu a’e mai le tulaga o le tama meamea i le tulaga faa-tamaitiiti, ma mai le tulaga faa-tamaitiiti i le tulaga faatagata matua, i se tuputupu a’e tumau ma faasolosolo lelei, ae e lē mafai ona ia iloaina pe faapefea, ma pe o le a le taimi e faataunuu ai le tuputupu a’e. E na te lē iloaina o loo ia tupu, peitai, e ala i le usitaia o tulafono o le soifua maloloina ma le faaeteete i lona ala, o le a le pine ona avea o ia ma tagata matua. O le mea lea, i le avea ai o i tatou ma Au Paia o Aso e Gata Ai. Tatou te tuputupu a’e ma faateleina. Tatou te lē mafai ona iloaina i lena taimi; ae, i le mavae ai o se tausaga pe sili atu, tatou te iloaina ai ua faapena tatou, pe a manatu atu i ai, agaigai atu i luga o se mapu’epu’e, latalata atu i le tumutumu. Tatou te lagona ua ia i tatou le faatuatua i le Alii; faapea o mea ua Ia tuuina mai e aogā i taimi uma; faapea ua fesootai atu i tatou ia te Ia; faapea o Ia lava o lo tatou Tamā, ma na te taitaia i tatou i le olaga.¹³

Aua ne’i faamoemoe ia atoatoa i le taimi e tasi. Afai e te manatu faapena, o le a e lē fiafia. Ia sili atu i le asō nai lō le tulaga na e i ai ananafi, ma ia sili atu taeao nai lo le tulaga na e i ai i le asō. O faaosoosoga nā, atonu e tau faavaivaia tatou i le asō, aua ne’i faatagaina e faavaivaia tatou i le o’o atu ai taeao. O le mea lena, ia faaauau le taumafai ia sili atu mai lea aso i lea aso; ma aua le faatagaina o outou olaga e mavae atu, e aunoa ma le ausiaina o le faia o le lelei i isi, faapea ia i tatou lava.¹⁴

O aso mulimuli taitasi, po o vaiaso faaiu, e tatau ona avea ma taimi sili e mafai ona tatou mauaina, o lona uiga, e tatau ona tatou agai teisi atu i luma i aso uma, i le malamalama ma le poto, ma, i le agavaa e ausia ai le lelei. A o tatou faasolo ina matutua, e tatau ona tatou ola latalata atu i le Alii i aso taitasi mulimuli ane.¹⁵ [Tagai fautuaga 5 i le itulau 112.]

Fautuaga mo Suesuega ma le Aoaoina Atu

Mafaufau i nei manatu a o e su’esu’eina le mataupu, pe, a o e sauni e a’oa’o atu. Mo nisi fesoasoaniga, tagai i itulau v–vii.

Sa faailoa mai e Peresitene Snow, o le poloaiga ia atoatoa, ua mafua ai se atugaluga mo nisi o le Au Paia o Aso e Gata Ai (itulau 102–4). A o e su’esu’eina lenei mataupu, vaai mo fautuaga, ia, atonu e mafai ona faamafanafanaina ai se tasi o loo atuatuvale ona o le poloaiga ia atoatoa.
I le vaega lea e amata i le itulau 102, o le faaupuga “fesoasoaniga mamana” e faatatau i le fesoasoaniga mai le Alii. O a auala e fesoasoani mai ai le Alii ia i tatou ina ia atoatoa?
I le itulau 104, iloilo le faamatalaga a Peresitene Snow e uiga ia Aperaamo ma ulua’i paionia o le Au Paia o Aso e Gata Ai. O le a sou manatu i le uiga o le avea ma tagata atoatoa “i le vaega o le aafiaga lea [ua tatou] faatinoina”? Mafaufau loloto i mea e mafai ona e faia ina ia avea ai ma tagata atoatoa i ou “lagona, … amiosa’o, faamoemoega ma naunautaiga.”
Na saunoa mai Peresitene Snow, “E lē tatau ona tatou faatagaina i tatou lava e lotovaivai, pe a tatou iloaina so tatou vaivaiga” (itulau 109). E faapefea ona tatou siitiaina i tatou i luga atu o lagona o le lotovaivai? (Mo ni faataitaiga, tagai i itulau .)
E faapefea ona fesoasoani ia te oe, e te iloaina e lē tatau ona “faamoemoe ia atoatoa i le taimi e tasi”? (Tagai i le itulau e 111.) Manatunatu i auala patino e mafai ai e oe ona mulimuli i le fautuaga a Peresitene Snow ina “ia sili atu le lelei mai lea aso i lea aso.”
Vaai mo se faamatalaga se tasi pe lua i totonu o lenei mataupu, e matuā musuia ai lava oe. O le a le mea e te fiafia ai i nei faamatalaga?

Mau Talafeagai: 1 Nifae 3:7; 3 Nifae 12:48; Eteru 12:27; Moronae 10:32–33; MF&F 64:32–34; 67:13; 76:69–70

Fesoasoaniga mo le Aoao Atu: “E lagonaina e tagata taitoatasi le aafia, pe a faailoa a latou saofaga. Atonu e te faia se taumafaiga faapitoa e faailoa faamatalaga a tagata taitasi ma, afai e mafai ai, ia avea faamatalaga na tuuina mai ma vaega o le talanoaga a le vasega” O Le A’oa’o Atu, E Leai Se Isi Valaauga E Sili Ai, 35–36).

I le Lauga i luga o le Mauga, na fetalai ai le Faaola, “O lenei, ia atoatoa ona lelei o la outou amio, e pei o lo outou Tamā o i le lagi e atoatoa ona lelei o ia” (Matthew 5:48).

Na poloaiina e le Alii ia Aperaamo, “Ia e savali i o’u luma, ma ia sa’o lau amio” (Kenese 17:1).

E tatau ona tatou tauivi i lea aso ma lea aso, ina ia faaleleia atili a tatou sootaga ma auaiga.