“Faatomuaga i Anomea a le Faiaoga O Le Aiga e Faavavau (Mataupu Faalelotu 200),” Anomea a le Faiaoga O Le Aiga e Faavavau (2022)
“Faatomuaga,” Anomea a le Faiaoga O Le Aiga e Faavavau
Faatomuaga i Anomea a le Faiaoga O Le Aiga e Faavavau (Mataupu Faalelotu 200)
Maliu mai ia i le kosi O Le Aiga e Faavavau! Faafetai atu mo le taliaina o le avanoa e fesoasoani ai i talavou matutua e o mai ia Iesu Keriso e ala i se suesuega o le aoaoga faavae o le aiga i le fuafuaga a le Tama Faalelagi. O lenei mataupu aoaoina ua mamanuina e fesoasoani ia te oe e uunaia ai aafiaga e faatotonugalemu ia Keriso ma taulai atu i aafiaga o tagata aoao mo au tagata aoga lea e taitai atu ai i latou i le liua loloto atu i le Faaola.
O a ni taunuuga faamoemoeina o lenei kosi?
O loo faapea mai le Sini Faamoemoeina o Seminare ma Inisitituti o Mataupu Faalelotu:
O lo tatou faamoemoega o le fesoasoani lea i le autalavou ma talavou matutua ia malamalama ma faalagolago i aoaoga ma le Togiola a Iesu Keriso, ia agavaa mo faamanuiaga o le malumalu, ma ia saunia i latou lava, o latou aiga, ma isi mo le ola e faavavau faatasi ma lo latou Tama o i le Lagi. (Aoao Atu ma le Aoao Mai o le Talalelei: O Se Tusitaulima mo Faiaoga ma Taitai i le Seminare ma Inisitituti o Mataupu Faalelotu [2012], 1)
I le faataunuuina o le Faamoemoega o Seminare ma Inisitituti o Mataupu Faalelotu, ua mamanuina lenei kosi e fesoasoani ai i tagata aoga
-
e faamalamalama atu le matafaioi tutotonu o le aiga i le fuafuaga o le faaolataga a le Tama Faalelagi,
-
iloilo fesili ma mataupu e faatatau i le aiga ma se vaaiga e faavavau,
-
faatino le faatuatua ia Iesu Keriso pe a taulimaina luitau faaletagata lava ia ma faaleaiga ma uunaiga faalelalolagi,
-
faaaoga aoaoga a Iesu Keriso i a latou taumafaiga e osia ma tausia feagaiga paia ma ia faamalolosia sootaga faaleaiga, ma
-
faateleina lo latou gafatia e faataunuu ai tiutetauave paia i le olaga faaleaiga ma avea atili ai e faapei o le Tama Faalelagi ma Iesu Keriso.
O faapefea ona faatulaga le tusi lesona lenei?
O anomea o le tusi lesona lenei ua mamanuina ia fesoasoani ai i tagata aoga ia maua ni aafiaga anoa ma malamalama i fafo ma totonu o le potuaoga. O lesona taitasi ua i ai anomea mo le sauniuniga mo le vasega ma anomea mo le faiaoga. O nei anomea ua mamanuina e fesoasoani ai i tagata aoga ia saunia ma le manatunatu loloto i ai, auai i le aoaoina loloto atu, ma faatino i auala e fesoasoani ai ia i latou ia avea atili e faapei o le Tama Faalelagi ma Iesu Keriso.
Na aoao mai Elder Kim B. Clark, sa avea ma Fitugafulu i mea e tatau i se tagata aoga (ma se faiaoga) ona fai ina ia aoao loloto ai:
Afai e te manao moni lava e aoao loloto i ai, afai o lou loto ma lou mafaufau ua matala i le aoaoina, ma afai e te galue ai i lena manao, o le a faamanuiaina oe e le Alii. Pe a e faia lau vaega—tatalo ma le faatuatua, saunia, suesue, auai ma le naunautai, ma faia le mea sili—o le a aoaoina oe e le Agaga Paia, faalauteleina lou malosi e faatino ai mea ua e aoaoina, ma fesoasoani ia te oe e avea ma tagata e finagalo le Alii ia avea ai oe. (“Learning for the Whole Soul,” Ensign, Aug. 2017, 27)
Anomea mo Sauniuniga a le Vasega
O anomea mo sauniuniga a le vasega ua faamoemoe ia suesue e oe ma au tagata aoga i sauniuniga mo le vasega. O loo aofia ai aoaoga mai tusitusiga paia ma taitai o le Ekalesia faapea foi se vaega o le “Manao Atili?” o loo maua ai punaoa faaopoopo e faatatau i le autu o le lesona.
O anomea mo sauniuniga a le vasega o loo i ai foi fesili ma gaoioiga e fesoasoani ai i tagata aoao e faaloloto lo latou aoaoina ma ia sauniuni e fetufaai i le vasega. Mo se faataitaiga, i le anomea mo sauniuniga a le vasega mo le lesona 10, “O Le Feagaiga Fou ma Faavavau o le Faaipoipoga,” ua tuuina atu i tagata aoga le avanoa e suesue ai aoaoga mai tusitusiga paia ma taitai o le Ekalesia e uiga i le feagaiga o le faaipoipoga e faavavau ma le sauniga o le faamauga. Ona valaaulia ai loa lea o tagata aoga e fai le gaoioiga lenei:
Anomea a le Faiaoga
Ua fuafuaina lesona taitasi mo le periota e 50 minute o le vasega. Mo vasega e feiloai faa-tasi i le vaiaso mo le 90 po o le sili atu o minute, ua uunaia oe e tuufaatasi ni lesona se lua.
I le faatomuaga o anomea a le faiaoga mo lesona taitasi, o le a e maua ai se faamatalaga o taunuuga faamoemoeina o le tagata aoao. O lenei faatomuaga e mulimuli mai ai ma ni manatu fautuaina faafaiaoga e maua ai faatulagaga o lesona, anotusi, fesoasoani mo talanoaga, ma manatu mo le faaaogaina.
A o e suesue i anomea a le faiaoga, ia ua’i atu i auala e mafai ona utuvai mai ai i sauniuniga a tagata aoga. O faatonuga nei mai le lesona 10 o se faataitaiga:
O le faaaogaina pea lava pea o sauniuniga mo tagata aoga, o le a e fesoasoani ai ia i latou ia lagonaina le taua o le saunia mo vasega uma ma fesoasoani ia i latou ia loloto le aoaoina.
Mafaufau Loloto a o Sauniuni e Aoao Atu le Kosi Lenei
E talitutusa ma mea tou te faia ma au tagata aoga a o lei amataina le vasega, faaaoga se minute e mafaufau loloto ai a o e sauniuni e aoao atu lenei mataupu. Vaai muamua i se lesona se tasi pe lua ina ia faamasani ai i sauniuniga a le vasega ma anomea a le faiaoga. Matau le auala ua mamanuina ai nei anomea ina ia faaaoga faatasi a o e sauni e aoao atu. Ona mafaufau loloto lea i fesili nei: O a nisi o auala e mafai ona ou uunaia ai tagata aoga e suesue i anomea mo sauniuniga mo lesona taitasi? O a ni mea e mafai ona ou faia e faaaofia ai tagata aoga o e atonu e le’i suesue i anomea mo sauniuniga?
Manatua: A saunia tagata aoga mo talanoaga i le vasega, o le a e matauina le vave oo atu o le vasega i ni talanoaga loloto ma anoa o aoaoga faavae ma mataupu faavae e faatatau i aiga e faavavau. O lenei mea e tatau ona lava ai le tele o le taimi i le vasega e suesue ai pe mafai faapefea e oe ma au tagata aoao ona faaaoga upumoni ua latou faailoaina mai i lesona.
E mafai faapefea ona ou saunia lelei e aoao atu?
O le a fesoasoani le Alii ia te oe ao e saunia ma e aoao i Ana fanau. O au taumafaiga e suesue ma le filiga i tusitusiga paia ma ola ai i le talalelei o le a fesoasoani e te agavaa ai mo le taitaiga a le Agaga i au sauniuniga e aoao atu.
A o e suesue i sauniuniga a le vasega ma anomea a le faiaoga mo lesona taitasi, tatalo mo le fesoasoani a le Alii ia malamalama i manaoga o au tagata aoao. Na aoao mai Elder Jeffrey R. Holland o le Korama a Aposetolo e Toasefululua:
Ia gauai atu—ia gauai atu lou loto aemaise lava i le Agaga. Tuu sina avanoa i le fuafuaga o lau lesona. Afai e te manao e faapuupuu se lesona ina ia mafai ona tuuina atu lau molimau ma faamalosia ai se talanoaga i se mataupu faaonapo nei, faamolemole ia faia pe a musuia e le Agaga ma pe a faatonuina e talafeagai. …
… Manatua o se tagata aoao e le o se koneteina e faatumuina; o se tagata aoao o se afi e faamumuina. (“Angels and Astonishment” [lauga na tuuina atu i le faasalalauga faaleaoaoga a le Ofisa o Aoga a le Ekalesia, Iuni 12, 2019], broadcasts.ChurchofJesusChrist.org)
Aemaise lava pe afai o e tuufaatasia ni lesona se lua mo se periota o le vasega, mafaufau i manaoga o au tagata aoao, ma saili le taitaiga mai le Agaga. O le faia o nei mea e mafai ona fesoasoani ia te oe e iloa ai vaega o anomea a le faiaoga e faaaoga e pei ona tusia ma po o a vaega e fetuunai e tuuina atu ai ni aafiaga e aoao ai e sili atu ona anoa mo au tagata aoao. E mafai ona aofia ai le fuafuaina po o a vaega o anomea a le faiaoga e faamamafa ma pe o fea foi e aotele.
Atonu e aoga lou fesili ifo ia te oe lava i nisi o fesili nei o se vaega o au sauniuniga e aoao atu lesona taitasi:
-
Pe na ou tatalo ina ia ou mauaina le taitaiga a le Agaga Paia, ma ia malamalama i manaoga o a’u tagata aoga? E mafai faapefea ona ou iloa po o le a le vaega o le lesona e sili ona talafeagai ia i latou? E faapefea ona faaali atu lo’u alofa mo i latou?
-
Pe ua ou lagona ea le mautu lelei i anomea mo sauniuniga a le vasega, e aofia ai tusitusiga paia, ma i anomea a le faiaoga? O i ai se isi mea e tatau ona ou fetuunaia e taulima ai manaoga o a’u tagata aoga?
-
E mafai faapefea ona ou fesoasoani i tagata aoga ia taulai atu i le Faaola ma aoao mai i le Agaga Paia i lenei lesona?
-
E mafai faapefea ona ou valaaulia le aoao ma le filiga ma fesoasoani i tagata aoga ia auai atoatoa i le lesona? E mafai faapefea ona ou faamautinoa o loo i ai lo latou avanoa latou te manaomia e faia ai fuafuaga a le tagata lava ia e faaaoga ai mea latou te aoaoina?
-
E mafai faapefea ona ou fatuina se siosiomaga e aoao ai lea e lagona ai e tagata aoga se lagona o le auai? E mafai faapefea ona ou fesoasoani ia latou lagona le faatauaina, taliaina, ma le saogalemu e faasoa atu ma aoao mai le tasi i le isi? (Tagai Mataupu Faavae ma Feagaiga 88:78, 122.)
E mafai faapefea ona ou fetuunaia lesona mo i latou e i ai manaoga faapitoa?
A o e sauni e aoao atu, ia manatua tagata aoga e i ai manaoga faapitoa. Fetuunai gaoioiga ma faamoemoega e faaaofia ai ma fesoasoani ia latou manuia. Mo nisi faamatalaga, tagai i punaoa i luga o le itulau mo Manaoga Faapitoa i le disabilities.ChurchofJesusChrist.org.
E faapefea ona maua e tagata aoga togi mo lenei kosi?
Ina ia maua ni togi mo le faauuga o le inisitituti, o tagata aoga e manaomia ona
-
suesue i anomea mo sauniuniga ia le itiiti ifo ma le 75 pasene o lesona,
-
auai i le 75 pasene o vasega e faia, ma
-
faamaea se tasi o aafiaga e aoao ai e fa:
-
Ia tausia se api faamaumau suesuega.
-
Tusi tali i fesili uma ma gaoioiga i anomea mo sauniuniga (ia matau e le manaomia e tagata aoga ona auina atu a latou api faamaumau suesuega po o tali ia te oe, i le faaiuga o le semesa, e manaomia lava ona latou faaali atu ia te oe mea na latou faamaeaina).
-
Tusi tali i fesili e tolu o tala.
-
Mamanu ma faamaea sa latou lava galuega faatino e aoao ai (faatasi ai ma le faamaoniga a le faiaoga) e fesootai i le anotusi o le kosi. (Sue nisi faamatalaga i luga o le itulau Institute Elevate Learning Experiences o loo maua i le ChurchofJesusChrist.org.)
-
Faamaumau Ou Manatu
Mafaufau i le ituaiga o aafiaga e te faamoemoe o le a maua e au tagata aoga i le kosi lenei. Lisi ni nai ou manatu po o uunaiga e uiga i le ala ua e fuafua ai e fesoasoani ia i latou ia maua se aafiaga anoa o le aoaoina.