Lesona 5 Anomea a le Faiaoga

O Lo Tatou Aafiaga i le Olaga Faitino ma le Meaalofa o se Tino Faaletino

I le muai olaga sa, tatou “talia le fuafuaga a le [Tama Faalelagi] e mafai ai e Lana fanau ona maua se tino faaletino ma maua le tomai faalelalolagi latou te agaigai ai le atoatoaga” (“O Le Aiga: O se Folafolaga i le Lalolagi,” ChurchofJesusChrist.org). I le lesona lenei o le a valaaulia ai tamaiti aoga e faamalamalama le faamoemoega o lo tatou olaga faitino ma pe faapefea e o tatou tino faaletino ona fesoasoani mai ia i tatou e agaigai i luma ia avea e faapei o le Atua. O le a mafaufau ai foi tamaiti aoga i mea e mafai ona latou faia e faaleleia ai a latou lava sootaga faaleaiga e ala i le faatoilaloina o le tagata natura ma avea atili ai e faapei o Iesu Keriso.

Faaleleia o Lo Tatou Aoao Atu ma le Aoaoina

Ia fautuaina taumafaiga a tamaiti aoga e faaaoga upumoni o le talalelei e ala i le toetulitatao. O sini taualuga o le aoaoina o le talalelei o le liuaga i le Tama Faalelagi ma Iesu Keriso ma avea ai e faapei o i La’ua. O le ausiaina o nei sini e manaomia ai lo tatou faaaogaina o mea ua tatou aoaoina. E mafai ona fesoasoani faiaoga i o latou tamaiti aoga ia latou taumafaiga e faaaoga a latou aoaoga e ala i le tulitataoina talafeagai i valaaulia e tuuina atu i lesona. E le tatau ona faatonuina tamaiti aoga e faasoa mai se mea e patino naua. Afai e le ofoina atu e tamaiti aoga ni tali, e mafai e faiaoga ona valaaulia tamaiti aoga e tomanatu ai i mea latou te lagonaina pe sa tusia i lesona ua mavae ma faamalosiauina i latou e faatino. E na o ni nai minute o le taimi o le vasega e tatau ona faaalu e tulitatao ai tamaiti aoga.

Manatua: I lesona taitasi ua maea, sa valaaulia ai tamaiti aoga e valaaulia e faaaoga mea latou te aoaoina i ala eseese. Mo se faataitaiga, i le lesona 4 sa mafaufauina e tamaiti aoga le ala e mafai ai ona latou faia o latou aiga ia avea atili ma totonugalemu i o latou olaga. E mafai ona e faatonuina tamaiti aoga e toe iloilo ia uunaiga sa latou tusifaamaumauina ma tomanatu ia latou taumafaiga e galulue i mea sa latou lagonaina. Ona mafaufau lea e valaaulia se tasi pe lua ni tamaiti aoga e lagonaina le fiafia e faasoa mai mea na latou oo i ai a o latou taumafai e ola sili atu i lenei aoaoga. E mafai ona e faia o se faiga masani le tulitataoina i lesona e sosoo ai pe a uunaia ai oe.

Fautuaga mo le Aoao Atu

O o tatou tino faaletino ma poto masani i le olaga nei e tatau ona i ai mo i tatou e maua ai le ola e faavavau.

Faaali le ata faataitai lea (mafaufau e fetuunai e pei ona manaomia ai ina ia talafeauga atili mo au tamaiti aoga).

O lau soagalue, o Dmitry, e agalelei ma malie e mafuta i ai. E talitonu o ia i le i ai o se “taimi fiafia.” E ola o ia i mea e sagisagi ma fiafia ai. E pati o ia i faaiuga o vaiaso, ia e masani ona aofia ai le faaaogaina o ni meainu malolosi po o fualaau oona. E lei faaipoipo o ia, ae fiafia i tulaga faalefeusuaiga. E tele ina tautala o ia faapea, “afai e lelei lagona, fai” po o le “E na o le faa-tasi lava ona e ola.” E manatu o ia ua e ola i se olaga saisaitia ma lē malie ona e te tausia tulaga faatonuina o le amiolelei a le Ekalesia. Na ia fesili atu talu ai nei ia te oe, “Aisea e te le faatele ai ona e auai i mea faafiafia ma olioli i le olaga?”

Valaaulia tamaiti aoga e faasoa ma se paga po o se vaega toalaiti pe faapefea ona latou tali atu i le fesili a Dmitry. Fautuaina tamaiti aoga e mafaufau pe mafai faapefea ona lagolago a latou tali e upumoni e uiga i tino faaletino ma le faamoemoega o o tatou olaga faitino o loo aoao mai i le vaega 1 o le anomea o sauniuniga . A ua lava le taimi, valaaulia ni nai tagata o le vasega e faasoa mai a latou tali. Ona tusi lea o le upumoni lenei i luga o le laupapa: O o tatou tino faaletino ma tulaga o le olaga faitino e saunia ai i tatou ia avea e faapei o le Atua.

• E faapefea ona fesoasoani le mauaina o se tino faaletino ma le mauaina o le potomasani o le olaga faitino e saunia ai i tatou e avea e faapei o le Atua? (Mafaufau e valaaulia tamaiti aoga e toeiloilo ia saunoaga a Elders D. Todd Christofferson ma David A. Bednar i le vaega 1 o le anomea mo sauniuniga. A o faasoa mai e tamaiti aoga ni malamalamaaga, fai fesili toetulitatao e fesoasoani ai ia te i latou ia faaloloto lo latou malamalama.

E ala ia Iesu Keriso e mafai ai ona tatou faatoilalo le tagata natura.

Tusi ia fasifuaitau lenei i luga o le laupapa: O Le Tagata Natura. Valaaulia ni tamaiti aoga se toalua e faitau leotele le Alema 41:11 ma le 1 Korinito 2:14 . Fai atu i le vasega e mulimuli i le faitauga, ma vaavaai mo upu po o fasi fuaitau o loo faamatalaina ai le tagata natura. Lisi tali a tamaiti aoga i le laupapa. Valaaulia tamaiti aoga e toeiloilo le saunoaga a Elder Bednar i le vaega 2 o le anomea mo sauniuniga e sue ai ni uiga faaopoopo e tuu i le lisi i luga o le laupapa.

• Filifili se tasi o uiga o le tagata natura o loo lisi i luga o le laupapa. E mafai faapefea e lena uiga ona aafia ai se sootaga o le faamasaniga po o le aiga?

Tusi le fasifuaitau lenei i luga o le laupapa O Le Alii ma le Tamaitai Na Suia e Iesu Keriso. Valaaulia tamaiti e faitau le Mosaea 3:19 ma vaavaai pe mafai faapefea ona tatou faatoilaloina le tagata natura.

• E mafai faapefea e le Agaga Paia ma le Faaola ona fesoasoani ia i tatou e faatoilalo le tagata natura? (Atonu e faasoa mai e tamaiti aoga ni tali e talitutusa ma lenei mataupu faavae: A o tatou gauai atu i tosinaga a le Agaga Paia, o le a fesoasoani Iesu Keriso ia i tatou e tuu ese le alii po o le tamaitai natura ma avea ma tagata paia e ala i Lana Togiola. E mafai foi ona e faaaogaina le saunoaga a Elder Bednar ma Bishop Gérald Caussé o loo i le vaega 3 o anomea mo sauniuniga e fesoasoani ai i tamaiti aoga ia malamalama i lenei mataupu faavae.)

Mafaufau e fai atu se tasi pe sili atu o fesili nei e fesoasoani ai i tamaiti aoga e faalolotoina lo latou malamalama:

• E mafai faapefea e lenei mataupu faavae ona fesoasoani i se tasi atonu e lagona e na te le mafai ona suia pe le mafai foi ona pulea ia manoga ma lagona faaosofia o le tagata natura?

• O a nisi o mea ua malamalama ai le Faaola e uiga i luitau o se tino faaletino?

• O le a se mea ua e aoaoina e uiga i le Faaola mai le ala na Ia fesoasoani ai ia te oe e “tuu ese” pe faatoilalo le tagata natura ma avea atili ai e faapei o Ia? Na faapefea ona fesoasoani le Agaga Paia ia te oe i nei taumafaiga?

Ina ia fesoasoani i tamaiti aoga e faaaoga mea moni ua latou aoaoina i lenei lesona, faaali ia fesili e pei o nei ma valaaulia tamaiti aoga e tusifaamaumau o latou manatu ma uunaiga. (Atonu e mananao nisi tamaiti aoga e faaopoopo ia latou tali mai le gaoioiga o le “Tusifaamaumau Ou Manatu” o loo i le faaiuga o le vaega 3 o anomea mo sauniuniga.)

• O fea o uiga faaKeriso o lo o faamatala mai i le Mosaea 3:19 e tatau ona ou atinaeina atili?

• O le a se mea o le a ou faia ina ia faalagolago atoatoa ai i le Faaola ma le tosinaga a le Agaga Paia e fesoasoani ai ia te au e tuu ese le tagata natura ma atia’e lenei uiga faaKeriso?

• O le a se aafiaga e ono aumaia e lenei suiga i a’u sootaga faaleaiga?

Fautuaina tamaiti aoga ia latou taumafaiga e faatoilalo o latou vaivaiga ma ia avea atili e faapei o le Faaola. Mafaufau e molimau atu o le a faamanuiaina e le Alii i latou i le mana e atia’e ai Ona uiga faaleatua ma faaleleia ai a latou sootaga faaleaiga.

Mo Le Isi Taimi

Valaaulia tamaiti aoga e toemanatunatu i mea ua latou iloa e uiga i le taua faaleaoaoga faavae o le faaipoipoga i le va o se alii ma se tamaitai i le fuafuaga a le Atua. Fautuaina tamaiti aoga a o latou suesueina le lesona 6 e taumafai malosi e faaloloto lo latou malamalama i lenei aoaoga faavae autu ma le uiga mo i latou o ni soo o Iesu Keriso.