Lesona 7 Anomea a le Faiaoga

O Le Natura e Faavavau ma le Faamoemoega o le Itupa

Sa faavaeina lo tatou itupa i lo tatou muai olaga ma e taua i le faataunuuina o le fuafuaga a lo tatou Tama Faalelagi mo lo tatou faaolataga ma le faaeaga i aiga. I lenei lesona, o le a maua ai e tagata aoga se avanoa e faamatala ai le auala e fesoasoani ai le fuafuaga a le Atua ia i tatou ia malamalama i le taua e faavavau o lo tatou itupa. O lenei lesona o le a tuuina atu ai foi le taitaiga mo tagata aoga o e atonu e i ai ni fesili e faatatau i le itupa.

Fautuaga mo le Aoao Atu

O le itupa [tulaga tane po o le fafine o le tagata] o se vaega taua lea o le faasinomaga ma le faamoemoega o tagata taitoatasi.

Manatua: Atonu e te manao e faailoa atu i tagata aoga le natura maaleale o lenei mataupu ma isi autu i lenei kosi ma faamanatu i tagata aoga e auai i talanoaga a le vasega ma le alofa faaKeriso, nofouta, ma le malamalama. Ia faaeteete e aua nei faaaogaina aoaoga faavae i se auala e valaaulia ai se agaga o le tuuaiga ma le tausalaga. Nai lo lena, ia mulimuli i le faataitaiga a le Faaola a o e aoao atu i se auala e aumaia ai le malamalama, faamoemoe, ma le faamalologa.

Valaaulia tamaiti aoga e mafaufau faapea o i latou o se faiaoga o le Aoga Sa mo se vasega e 14 tausaga le matutua o e o i ai ni fesili e uiga i le itupa. Ua fesili se tasi tagata aoga, “Aisea e taua ai le itupa?”

Valaaulia tagata aoga e toe faamanatu le vaega 1 o anomea mo sauniuniga i paga po o vaega toalaiti ma mafaufau pe faapefea ona latou taliina lenei fesili e faavae i aoaoga a le Ekalesia. A uma ona tuuina atu se taimi mo le talanoaga, valaaulia ni nai tagata aoga e faasoa mai pe faapefea ona latou tali mai.

A o faasoa mai e tagata aoga a latou tali, atonu e te manao e toe faamanatu faatasi le Kenese 1:26–27, le parakalafa mai le “O Le Aiga: O Se Folafolaga i le Lalolagi” (ChurchofJesusChrist.org), ma le saunoaga lona lua a Elder David A. Bednar o loo maua i le vaega 1 o anomea mo sauniuniga. Ona mafai lea ona e fesoasoani i tagata aoga e faailoa mai upumoni e pei o nei: O le itupa o se uiga taua lea o le muai olaga, olaga faitino, ma le faasinomaga e faavavau ma le faamoemoega o tagata taitoatasi. E ala i le mamanu faalelagi, ua faamoemoe ai alii ma tamaitai e felagolagomai, faaatoatoa, ma faaatoatoaina e le tasi le isi. (Faamanatu i tagata aoga “o le uiga faamoemoeina o le itupa i le folafolaga i le aiga o le itupa na fanau mai ai” [Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 38.6.23]. O le uiga lava lea e tasi o le itupa ua faamoemoeina i lenei anomea atoa a le faiaoga sei vagana nisi faamatalaga faapitoa e ta‘ua ai.)

Faaleleia o Lo Tatou Aoao Atu ma le Aoaoina Mai

Fesoasoani i tagata aoga ia malamalama i aoaoga faavae ma mataupu faavae. A o malamalama loloto tagata aoga i aoaoga faavae ma mataupu faavae, e mafai ona latou faaaogaina ma le anoa atili. A uma ona faailoa mai mataupu faavae ma aoaoga faavae, fesoasoani i tagata aoga e vaai i ai mai se vaaiga e faavavau. Fai fesili e taitai atu ai tagata aoga i se malamalamaaga manino atu i faamoemoega o le Tama Faalelagi o loo siomia ai le aoaoga faavae. Fai i tagata aoga e mafaufau ma faamatala mai pe faapefea ona faaaoga nei upumoni i o latou olaga i aso nei.

Atonu e te faaaogaina nisi o fesili nei po o gaoioiga e fesoasoani ai i tagata aoga e faalautele lo latou malamalama e uiga i upumoni sa latou faailoa mai:

• E mafai faapefea e le ata o le faaolataga ona fesoasoani ia te oe ia malamalama ai o le “itupa o se uiga taua lea o le muai olaga, olaga faitino, ma le faasinomaga ma le faamoemoega e faavavau o tagata taitoatasi”? (“O Le Aiga: O Se Folafolaga i le Lalolagi”).

• O a ni auala e faaatoatoaina ai e agaga o alii ma tamaitai le tasi ma le isi? (Tagai i saunoaga a Elder David A. Bednar ma Elder Dale G. ma Sister Ruth L. Renlund i le vaega 1 o anomea mo sauniuniga.) O a ni faataitaiga ua e vaai i ai o gafatia felagolagoma’i o alii ma tamaitai i le faataunuuina o le fuafuaga a lo tatou Tama Faalelagi?

• Valaaulia tagata aoga e lisi mai nisi o manatu masani pe faaleaganuu e faatatau i alii po o tamaitai. O fea o nei mea atonu e le fesootai i lo tatou faasinomaga e faavavau ma le faamoemoega i le fuafuaga a le Atua? O a elemene o lo tatou itupa o se alii po o se tamaitai e taua i lo tatou faasinomaga ma le faamoemoega e faavavau?

Mafaufau e faasoa atu auala na faamanuiaina ai lou olaga e ala i le i ai o se vaaiga e faavavau i le itupa ma pe na faapefea ona aafia lou faasinomaga ma le faamoemoega i lena vaaiga.

E mafai e le Alii ona taiala ma lagolagoina i latou e i ai lagona o le le talafeagai o le itupa pe i ai foi isi fesili e faatatau i itupa.

Faamanatu i tagata aoga o le vaega 2 ma le 3 o anomea mo sauniuniga o loo talanoaina ai tulaga lea e ono maua ai e tagata taitoatasi lagona o le le talafeagai o lo latou itupa na fanau mai ai ma lo latou itupa faalefaasinomaga, e mafai ona faailoa mai o se tagata e faafoliga i le itupa faafeagai, pe ono i ai foi nisi fesili e faatatau i itupa.

• O a ni aoaoga patino mai vaega 2 ma le 3 o anomea mo sauniuniga sa sili ona anoa ia te oe? (Pe a talafeagai, tuu atu i tagata aoga se taimi e toe faamanatu ai ia vaega 2 ma le 3 o anomea mo sauniuniga.)

• E mafai faapefea ona tatou magafagafa ma nofouta atili pe a talanoaina le itupa ma isi ma pe a mafaufau i mea moni lavelave a isi atonu tatou te iloa pe fesootai i ai?

Faamanatu i tagata aoga e faapea ua saunia e le Ekalesia ni punaoa e lagolago ai tagata taitoatasi o e lagonaina lagona o le le talafeagai o le itupa i le vaega o le “Transgender” o le ChurchofJesusChrist.org.

O se tasi o auala e fesoasoani ai i tagata aoga e faaaoga mataupu faavae na aoaoina i lenei lesona, e mafai ona e faitau ma talanoaina le tulaga faataitai lenei o se vasega (fetuunai le tulaga pe a talafeagai ai ina ia sili ona fetaui ma manaoga o au tagata aoga):

E masani ona lagona e Alexandra le le lagolelei i le taimi o talanoaga e uiga i mea e manatu tagata o ni uiga masani o alii ma tamaitai. Na te le lagonaina o le tele o ona uiga e faaletamaitai. E tele foi mea e fiafia i ai o ia e ogatusa atili ma mea e fiafia i ai nisi o alii na te iloaina. Pe a tulai mai ni talanoaga e uiga i itupa i le lotu, e mafaufau o ia pe o le a mafai moni lava ona ofi atu o ia faatasi ma isi tamaitai. E talitonu o ia ia Iesu Keriso ma faatuatuaina le mana o Lana Togiola, ae na te le o mautinoa pe faapefea ona Ia fesoasoani ia te ia. I le iuga, e manao moni lava Alexandra ia iloa pe o ona uiga o le a faatagaina ai o ia e faataunuu lona faamoemoega paia o se afafine o le Atua.

Atonu e te faia ni fesili e pei o nei e fesoasoani ai i tagata aoga e talanoaina ai le vaaiga faataitai:

• Afai e fesili atu Alexandra mo lau fesoasoani, o le a se mea e te fautuaina o ia e fai ina ia maua ai se malamalama manino atu i lona faasinomaga ma le faamoemoega e faavavau?

• O le a se mea e mafai ona e faasoa atu ia Alexandra e uiga i le ala na fesoasoani ai le fuafuaga a le Atua ia te oe ia malamalama i lou faasinomaga ma le faamoemoega e faavavau o se alii po o se tamaitai?

• E mafai faapefea ona avea Alexandra ma malosiaga i le Ekalesia a le Alii?

Atonu e fesoasoani le faamutaina o lau talanoaga e uiga ia Alexandra e ala i le faamamafa atu faapea o i latou e i ai fesili e uiga i o latou itupa po o e oo i lagona o le le talafeagai o le itupa e mafai ona olioli i faamanuiaga uma o le faavavau ma le auai i le Ekalesia a le Faaola pe afai latou te faamamaluina a latou feagaiga ma aloese mai le suia o o latou itupa. Atonu e te iloiloina faatasi ma tagata aoga le lapataiga a Peresitene Oaks i le vaega 3 e uiga i le faaigoaina faalauaitele o i tatou lava i auala e ono faatapulaaina ai o tatou gafatia e ausia a tatou sini e faavavau.

Ina ia faaiuina le lesona, valaaulia tagata aoga e tusifaamaumau mea o le a latou faia e faaali atu ai le alofa, agaalofa, ma le faaaofia ai i soo se tasi e i ai lagona o le le talafeagai i le va o lo latou itupa na fanau mai ai ma lo latou faasinomaga faaleitupa, o e ua faailoa mai o ni tagata e faafoliga i le itupa faafeagai, po o e o i ai isi fesili e faatatau i itupa.

E mafai ona e faasoa atu lau molimau e ui atonu tatou te le malamalama i mea uma e uiga i le le talafeagai o le itupa po o isi autu e faatatau i itupa, ae e silafia lava e le Faaola. E mafai ona Ia taialaina ma lagolagoina i latou o e liliu atu ia te Ia.

Mo Le Isi Taimi

Fautuaina tagata aoga e faitau ma mafaufau ma le toto‘a i anomea mo sauniuniga i le lesona e sosoo ai e uiga i le tosina atu i le itupa tutusa. E mafai ona e valaaulia tagata aoga e vaavaai mo ni auala e malamalama atili ai i le tosina atu i le itupa tutusa ma mafaufau pe faapefea ona latou talanoaina ma le faaaloalo ma le nofouta.