Lesona 16 Anomea a le Faiaoga: Mauaina o le Fiafia i le Olaga Faaleaiga e ala ia Iesu Keriso
“Lesona 16 Anomea a le Faiaoga: Mauaina o le Fiafia i le Olaga Faaleaiga e ala ia Iesu Keriso,” Anomea a le Faiaoga O Le Aiga e Faavavau (2022)
“Lesona 16 Anomea a le Faiaoga,” Anomea a le Faiaoga O Le Aiga e Faavavau
Lesona 16 Anomea a le Faiaoga
Mauaina o le Fiafia i le Olaga Faaleaiga e ala ia Iesu Keriso
“O le fiafia i le olaga faaleaiga, e tele lava ina ausia, pe a faavae i luga o aoaoga a le Alii o Iesu Keriso” (“O Le Aiga: O Se Folafolaga i le Lalolagi,” ChurchofJesusChrist.org). I le lesona lenei, o le a vaili ai e tamaiti a’oga pe mafai faapefea ona latou fauina le faavae o o latou olaga patino ma le aiga i luga o Iesu Keriso ma Ana aoaoga. O le a valaaulia i latou e faailoa mai faalavefau e ono taofia ai i latou mai le faia o lena mea ma ala e faatoilaloina ai.
Fautuaga mo le Aoao Atu
O le fauina o o tatou olaga patino ma faaleaiga i luga o le faavae o Iesu Keriso e puipuia ai ma faamalolosia i tatou.
Mafaufau e faaali le ata o le Malumalu o Philadelphia Penisilevania o loo avatu ii. Faamanatu i tagata aoga le faamoemoega o se faavae o se fale (tagai i le vaega 1 anomea mo sauniuniga).
Faitau faatasi le saunoaga lea a Elder Donald L. Hallstrom, lea na ia faamatala ai ia taumafaiga faaenisinia na faia e fatu ai se faavae malosi mo le Malumalu o Philadelphia Penisilevania.
Ata
Elder Donald L. Hallstrom
O lenei fausaga o le a … mafai ona lolo atu i matagi faataumaoi ma vailalo faatafega. O nei tulaga matautia, afai e le siakia, e mafai ona matua faaleagaina ai ma oo ai lava ina faatamaiaina lenei maota malualii.
O le iloa ai faapea o nei malosiaga o le a matuai osofai ai le malumalu, sa mamanuina e enisinia ma sa viliina e le konekarate se lua e 32-futu (10 m) le loloto i lalo o le fuatifaavae atoa o le fausaga. Sa eliina le lua e tau i le papa’alā masani o Penisilevania ia maua ai se faavae e le maluelue lea e fau ai i luga. Ona noanoa ai lea o fusifaavae ma faavae i le papa’alā mausali faatasi ai ma taula papa e tetee atu ai e oo lava i matagi fesasaa’i ma vaialalo malolosi. Sa viliina taula i le 50 i le 175 futu (15 i le 53 m) e tau i le papa’alā. …
Ua ou tuuina atu na auiliiliga e aoao atu ai le manatu: e le pei o le fauina o se fale (e le tumau), i le fauina o lo tatou faavavau (ma, tatou te faamoemoe, e faavavau) ola, o nisi taimi tatou te tuu atu ai ma le faanoanoa sina gauai itiiti i le enisiniaina ma le fauga o o tatou faavae. O lea ua tuua i tatou ua maualuga le aliali atu, ma ua faigofie ai ona faafefeteina e malosiaga matautia. (“Jesus Christ: Our Firm Foundation,” Ensign, Apr. 2016, 58)
Valaaulia tagata aoga e teu i mafaufau le faamatalaga o le faavae o le malumalu lea a o outou iloiloina faatasi le Helamana 5:12
O a mea o aoao mai e le fuaiupu lenei e uiga i mafuaaga e manaomia ai e tagata taitoatasi ma aiga ona fausia se faavae faaleagaga i luga o Iesu Keriso? (Fesoasoani i tagata aoao e faailoa mai se mataupu faavae e pei o nei: A o fausia e tagata taitoatasi ma aiga o latou faavae i luga o Iesu Keriso, o le a leai se mana o Satani e faataumaoia ai i latou.)
O a ni nai “matagi malolosi, … ufanafana i le asiosio, … uato’a ma … afa malolosi” … e aumaia e le fili faasaga i aiga i o tatou taimi?
O a ni nai auala e mafai e tagata taitoatasi ma aiga ona fausia ai lo latou faavae i luga o Iesu Keriso? (E avea o se vaega o lenei talanoaga, mafaufau e valaaulia tagata aoga e faasoa mai mea sa latou aoaoina mai saunoaga a Elder David A. Bednar ma Elder Hallstrom, faapea foi le gaoioiga o le “Faamaumau Ou Manatu” i le vaega 1 o anomea mo sauniuniga.)
O le a se aafiaga ua e oo i ai pe ua oo i ai lou aiga ina ua fesoasoani le fauina o se faavae i luga o Iesu Keriso i le tatalia po o le faatoilaloina o ituaiga eseese o afa?
O le ola ai i aoaoga a Iesu Keriso e aumaia ai le fiafia i le olaga faaleaiga.
Faaali le saunoaga lea mai le folafolaga i le aiga: “O le fiafia i le olaga faaleaiga e tele lava ina ausia pe a faavae i luga o aoaoga a le Alii o Iesu Keriso” (“O Le Aiga: O Se Folafolaga i le Lalolagi,” ChurchofJesusChrist.org).
Faaleleia o Lo Tatou Aoao Atu ma le Aoaoina
Ia uunaia le auai o tagata aoao e faasoa mai. Vaavaai mo auala e valaaulia ai tagata aoga uma e fai so latou sao i le vasega. E tofu le tagata ma se talaaga tulagaese, o mea e fiafia i ai, faamoemoega, ma luitau e faaopoopo i ona malamalaamaaga ma fesili. O manatu iloga o tagata aoga e mafai ona faamanuia ai isi i le vasega i ala patino. O le faalogologo ma le toto’a a o faasoa mai tagata aoga e mafai foi ona fesoasoani ia te oe e iloilo ai o latou manaoga ma popolega.
Valaaulia tamaiti aoga e sue i le fuaitau o le tusipaia sa latou maua o loo i ai le aoaoga a Iesu Keriso na aumaia ai ia i latou le fiafia i o latou tulaga patino po o olaga i le aiga e pei ona latou faia. (Tagai i le vaega 2 o anomea mo saunuiuniga. Atonu e manaomia ona e tuu atu i tagata aoga ni nai minute e faailoa ai se fuaitau.)
Vaevae le vasega i ni vaega toalaiti. Valaaulia tagata aoga e faasoa mai a latou fuaitau o mau, faatasi ai ma a latou tali i le fesili lenei (atonu e te manao e faaali pe tusi le fesili i luga o le laupapa):
E mafai faapefea e le mulimuli i lenei aoaoga o le talalelei ona faamanuiaina ai se tagata, se faaipoipoga, po o se aiga?
A ua lava loa le taimi, mafaufau e valaaulia ni nai tagata aoga e faasoa mai i le vasega mea sa latou aoaoina mai a latou talanoaga faavaega.
Valaaulia tagata aoga e iloilo filemu le 4 Nifae 1:1, 11–13, 15–18 ma vaavaai mo upu po o fasifuaitau o loo ta’u mai ai ia aoaoga a le Faaola na filifili nei tagata e ola ai. Valaaulia tagata aoga e faasoa atu ni mea sa latou mauaina.
O a faamanuiaga e mafai e se aiga ona maua a o latou taumafai malosi e ola faatasi i aoaoga a le Faaola? O fea na e vaai ai i faataitaiga o nei ituaiga o faamanuiaga?
O a nisi o auala ua taumafai le fili e taofia ai i tatou mai le mauaina o nei faamanuiaga? (Afai e manaomia, valaaulia tamaiti aoga e toe iloilo faataitaiga i le vaega 3 o anomea mo sauniuniga.)
Faaali atu le saunoaga lenei a Elder Bradley D. Foster, o le na avea o se tasi o Fitugafulu:
Ata
Elder Bradley D. Foster
O se faalavefau e le tau faapea e tatau ona leaga ina ia iloga ai. (“Na Ta’u Mai e Tina ia te A’u,” Liahona, Me 2010, 99)
O a ni nai faalavefau atonu e le leaga faaletupuaga ae e mafai ona taofia ai i tatou mai le faavae mautu i luga o Iesu Keriso ma Ana aoaoga. O le a se mea ua e faia e faaitiitia pe aveesea ai se tasi pe sili atu foi o nei faalavefau i lou olaga?
O a faamanuiaga e ono le maua e tagata pe afai e fausia lo latou faavae i luga o se mea e pei o tu masani faaleaganuu, faafiafiaga, po o tupe?
Mafaufau i auala e mafai ona fesoasoani ai i tagata aoga e galulue ai ma le ’anoa i mea sa latou aoaoina i lenei lesona. Mo se faataitaiga, e mafai ona e avatu i tagata aoga ni nai minute e toeiloilo ai le saunoaga a Elder Gary E. Stevenson ma le gaoioiga o le “Faatinoga” i le vaega e 3 o le anomea mo sauniuniga. Ona valaaulia lea o tagata aoga e tusi soo se mafaufauga latou te mananao e fesootai ma a latou sini po o fuafuaga.
E mafai ona e faaiu e ala i le faasoa atu o lau molimau i le fiafia ua e oo i ai i lou olaga patino ma faaleaiga a o e fausia lou faavae i luga o Iesu Keriso ma Ana aoaoga.
Mo Le Isi Taimi
Valaaulia tagata aoga e mafaufau pe o anafea na latou vaai ai i se tane ma se ava o galulue faatasi o ni paaga tutusa. E mafai ona latou mafaufau foi i taimi atonu latou te molimauina ai ulugalii e le o galulue o ni paaga tutusa ona o ni mafuaaga. Fautuaina tagata aoga e suesue ia anomea mo le isi lesona faatasi ai ma nei faataitaiga i le mafaufau e filima’oti ai pe o le a le ituaiga o paaga latou te mananao ai ia latou lava faaipoipoga.