Lesona 11 Anomea a le Faiaoga

Filifilia o se Soa e Faavavau

E finagalo le Alii e fesoasoani ia i tatou i a tatou taumafaiga e saili se soa e faavavau. I le lesona lenei, o le a faamatala ai e tagata aoga pe mafai faapefea ona latou faatinoina le faatuatua ia Iesu Keriso a o latou faia ni taumafaiga e fausia ni sootaga ma tagata o le isi itupa ma faaipoipo. O le a valaaulia foi tamaiti aoga e filifili uiga faaKeriso e mafai ona latou taumafai e atiina ae lea o le a fesoasoani ia i latou e saunia ai mo se faaipoipoga e faavavau pe fetaui lelei ai foi ma se faaipoipoga e faavavau.

Fautuaga mo le Aoao Atu

Ua faamoemoe mai le Alii ia tatou galulue ma le faatuatua ia te Ia a o tatou sailia se soa e faavavau.

Vaevae le vasega i ni vaega toalaiti ma ia i ai se taitai mo vaega taitasi. Tuu atu i tamaiti aoga taitasi le vaega 1 o le ata faataitai lenei ma fesili o loo mulimuli mai. Faatonu tamaiti aoga e faitau leotele faatasi le ata faataitai ma talanoaina fesili. (Afai e mafai, atonu e te manao e auina atu le vaega 1 o le ata faataitai i tamaiti aoga i se taimi a o lei amataina le vasega ina ia mafai ona latou o mai ua uma ona faitau ma mafaufau i ai.)

Manatua: Mafaufau i ni auala e mafai ona e fetuunaia ai le ata faataitai ina ia talafeagai atili ai ma tulaga, fesili, po o aganuu a tamaiti aoga.

Faaleleia o Lo Tatou Aoao Atu ma le Aoaoina

O talanoaga i vaega toalaiti e mafai ona fesoasoani i tamaiti aoga e aoao loloto atili ai. O vaega toalaiti e faataga ai le toatele o tamaiti aoga e auai atoatoa i talanoaga. O le mauaina o le avanoa e faasoa atu ai i ni vaega toalaiti e mafai foi ona toto ai le talitonuga mautinoa i tamaiti aoga e sili atu ona loto taofiofi. Mafaufau e atofa se taitai vaega, tuu atu ni faatonuga manino o mea ua faamoemoeina tamaiti aoga e fai, seti se taimi faatapulaa, valaaulia tagata taitoatasi e auai, ma uunaia tamaiti aoga ia saunia e faasoa mai mea ua latou aoaoina.

Ata Faataitai, Vaega 1

Anomea a le Faiaoga O Le Aiga e Faavavau---Lesona 11

Ua toeitiiti atoa le lua tausaga talu ona i aiLui i le fale mai lana misiona. Ona e popole o ia i le tausiga o se aiga i le lumanai, ua tonu ai ia te ia e galue faavaitaimi a o alu i le aoga. E utiuti lona taimi, ae e fiafia o ia i lana vasega inisitituti faalevaiaso ma avea o se mea e faamuamua. E masani lava ona siaki e Lui ia ala o faasalalauga faaagafesootai ma taalo i taaloga i luga o le pasi pe a o lei amataina vasega. E le toetele ni teine ua feiloai i ai o ia talu ona foi mai i le fale. Ua ia ta‘u atu i lona aiga ua ia lagona e pei o le a sili atu ona lelei le faatalitali le tulimatai atu ma le manatu mamafa i le faaipoipoga seia maea lana aoga. E manatu o ia afai e tatau ona faaipoipo vave, o le a tupu.

E auaiEma i le vasega inisitituti lava lea e tasi ma Lui ae e lei feiloai lava ia te ia. E masani lava ona nofo o ia ma ana uo ma e seāseā ona talanoa i se isi lava tagata. E le fiafia o ia e feiloai atu i alii ma tafaoga faamasani i se tulaga lautele. Ua popole o ia afai na te amataina se isi mafutaga, o le a muta, e pei o isi mafutaga uma ua tuanai. Ua vaivai faalelagona o ia ma e le o lagonaina ua lava lona malosi e oo atu ai i se isi mafutaga. Sa ia faamaeaina le aoga i le tausaga talu ai ma ua i ai sana galuega tumau. Ua popole o ia atonu o le a ia le feiloai i le e alofa moni i ai pe faamauina i le malumalu ma ua mafaufau ai pe tatau ona ia tafao faamasani ma se tasi i fafo atu o le Ekalesia.

A uma ona faitau faatasi le ata faataitai, talanoa i fesili nei:

• O le a sou manatu i popolega o Lui ma Ema?

• Mafaufau i mea ua tatou aoaoina mai le vaega 1 o anmea o sauniuniga, o le a se fautuaga e ono fesoasoani mo Lui? O le a se fautuaga e ono fesoasoani ia Ema?

• Afai e te lei talanoaina nei fuaitau i la outou talanoaga faavaega, faitau faatasi ma talanoaina pe faapefea ona latou fesootai ia Lui ma Ema: Faataoto 3:5–6; 2 Nifae 22:2; Mataupu Faavae ma Feagaiga 58:26–28. Na faapefea ona e faaaogaina pe mafai faapefea ona e faatinoina le faatuatua i le Alii i au taumafaiga e saili se soa e faavavau?

© 2022 Puletaofia e le Intellectual Reserve, Inc. Ua taofia aia tatau uma.

Ata Faataitai, Vaega 1

A uma ua lava se taimi o tagata aoga e talanoaina ai le ata faataitai ma fesili, valaaulia nisi o i latou e faasoa mai mea na latou aoaoina pe na lagonaina i le taimi o a latou talanoaga. A o faasoa mai tamaiti aoga e mafai ona e fesoasoani ia i latou e faailoa mai upumoni e talitutusa ma lenei: O le faatuatua ia Iesu Keriso o le a fesoasoani tatou te maua ai le lototele ma le onosai i a tatou taumafaiga e saili se soa e faavavau. Ua faamoemoeina i tatou e le Atua e faaaoga lo tatou faitalia e faalautele ai Lana fuafuaga. Mafaufau e tusi i luga o le laupapa ia upumoni ua faailoa mai e tamaiti aoga.

O le atiina ae o uiga auaumama faaKeriso ma le sailia o faaaliga o le a fesoasoani tatou te saunia ai e faaipoipo.

Tuu atu i tamaiti aoga taitasi le vaega 2 o le ata faataitai. Faatonu i latou e faitau ma talanoaina i a latou vaega ia fesili o loo mulimuli mai.

Ata Faataitai, Vaega 2

Anomea a le Faiaoga O Le Aiga e Faavavau—Lesona 11

Ina ua maea se lesona inisitituti e uiga i le faaipoipoga e faavavau, sa taufai lagona uma e Lui ma Ema le faagaeetia e faia ni suiga ma faalagolago atili i le Alii. Ina ua taunuu atu Lui mo le vasega inisitituti i le vaiaso na sosoo ai, sa nofo o ia i autafa o Ema ma sa ia faailoa atu o ia. I le aluga o taimi, na avea i laua ma se uo lelei. Sa la fuafuaina le tele o gaoioiga e mafai ai ona ona faaalu faatasi so la taimi ma aoao ai e uiga i le tasi ma le isi. Sa i ai le taimi, ua la atiina ae ni lagona malolosi mo le tasi ma le isi.

E ui i lea, na i ai ni popolega o Ema. E i ai sana lisi o uiga auaumama e manao ai o ia i se tane. E tele nei uiga auaumama o Lui, ae e le o uiga uma ia.

Ua amata foi ona lagona e Lui le popole. Ua alofa o ia ia Ema, ae o le vaaia o le le taulau o le faaipoipoga a ona lava matua sa popole ai o ia i le faia o se mea sese i le filifilia po o ai e faaipoipo i ai. Sa ia mafaufauina ma le faaeteete mea uma sa ia aoaoina e uiga ia Ema mai le tele o a la talanoaga faatasi ma aafiaga. Na ia lagonaina ua ogatusa a laua sini ma ua manao e fai atu ia Ema la te faaipoipo, ae o loo i ai pea le tele o mea moni e le mailoa. Ua tatalo Lui mo se faailoga o Ema o le filifiliga sa‘o lea. E oo mai i le taimi nei, e leai se mea ua tupu.

• Mafaufau i mea ua e aoaoina mai le vaega 2 o anomea mo sauniuniga. O le a se mea e mafai ona fesoasoani ia Ema i lana faiga i le mea o loo ia sailia i se toalua faamoemoeina? O a ni faafitauli e mafai ona tatou feagai pe afai e maualalo tele pe maualuga tele foi o tatou faamoemoega mo se toalua?

• O le a se mea e ono fesoasoani mo Lui e malamalama ai e uiga i ona popolega? O le a se mea e ono fesoasoani ia te ia e malamalama ai e uiga i le mauaina o faaaliga? (Mafaufau e valaaulia tagata aoga e toe iloilo le vaega 3 o anomea mo sauniuniga.)

• O a gaoioiga po o aafiaga e mafai ona fesoasoani i ni tagata se toalua e atiina ae se faigauo ma aoao atili ai e uiga i uiga auaumama, uiga, ma tulaga faatauaina o le tasi ma le isi? O a ni uiga auaumama se tasi pe lua o le Faaola ua e faamoemoe e atiina ae i sauniuniga mo le faaipoipoga pe a e faaauau pea i lau faaipoipoga?

© 2022 Puletaofia e le Intellectual Reserve, Inc. Ua taofia aia tatau uma

Ata Faataitai, Vaega 2

A lava le taimi, valaaulia ni nai tamaiti aoga e faasoa mai ni mea na latou aoaoina ma lagonaina ao faia la latou talanoaga.

Toe iloilo soo se anomea o i le vaega 2 ma le 3 o anomea mo sauniuniga e ono manuia ai tamaiti aoga. E mafai ona e faailoa patino atu upumoni nei: Tatou te faaipoipo i le [tagata] e gafatia ona tuputupu ae, ae le o le [tagata] e atoatoa. Afai e te faamoemoe o loo i ai i se soa e faavavau ni uiga faaleagaga patino, saili e atiina ae e oe lava ia. Afai tatou te sailia le taitaiga a le Alii i a tatou faaiuga, o le a Ia fetalai mai le filemu i o tatou mafaufau ma o le a tatou lagonaina pe a sa‘o a tatou filifiliga.

Afai e i ai ni tagata ua faaipoipo i lau vasega, e mafai ona e valaaulia se tasi pe toalua o i latou e faasoa mai o latou aafiaga i soo se tasi o nei upumoni. Afai ua e faaipoipo, mafaufau e faasoa atu foi lou lava aafiaga. Molimau atu i le finagalo o le Alii e fesoasoani i tamaiti aoga i la latou malaga ia maua se soa e faavavau.

E mafai ona e fesili i le vasega pe i ai ni a latou fesili e faatatau i le lesona o le aso. Afai latou te faia, faaalu sina taimi e talanoaina ai a latou fesili o se vasega. Ona tuu atu lea i tamaiti aoga ni nai minute i le faaiuga o le vasega e tusifaamaumau ai soo se lagona atonu latou te lagonaina e uiga i o latou lava tulaga. Valaaulia i latou e fuafua pe mafai faapefea ona latou faaauau pea ona faaaoga lo latou faatuatua i le Alii i a latou taumafaiga i tafaoga faamasani po o mea atonu latou te manaomia ona fai e faaaoga ai le faatuatua sili atu ia te Ia.

Mo Le Isi Taimi

Valaaulia tagata aoga e sauni mo le isi vasega e sosoo ai e ala i le suesueina o anomea mo sauniuniga ma fai atu i se ulugalii faaipoipo fiafia pe faapefea ona la faafaileleina la laua faaipoipoga ma faatumauina le malosi o le la sootaga.