Lesona 23 Anomea a le Faiaoga

Pe a Faatuai Faamanuiaga o le Faaipoipoga e Faavavau po o Fanau

E toatele tagata o le Ekalesia e i ai manaoga amiotonu mo faamanuiaga o le faaipoipoga po o fanau e faavavau ia e faatuai pe faalavelaveina. I lenei lesona, o le a talanoaina ai e tagata aoga auala e mafai ai ona latou galulue ma le faatuatua ia Iesu Keriso pe afai latou te feagai ma nei ituaiga o luitau. O le a fuafua foi e tagata aoga mea e mafai ona latou faia e faaaofia ai isi i a latou uarota po o paranesi, e tusa lava po o a o latou tulaga faaleaiga.

Fautuaga mo le Aoao Atu

E mafai ona tatou filifili e faatino le faatuatua ia Iesu Keriso pe a faatuai faamanuiaga manaomia.

Faaali atu ma faitau faatasi le saunoaga a Elder Neil L. Andersen i le vaega 1 o anomea mo sauniuniga. E mafai ona e valivaliina pe lisi i luga o le laupapa ia tulaga na ia ta‘ua e le fetaui lelei i taimi uma ma tulaga lelei o loo aoaoina i le folafolaga i le aiga.

• Aisea e te manatu ai e faaauau pea e taitai o le Ekalesia ona aoao atu ni tulaga lelei o le olaga faaleaiga pe afai e le o aafia ai i le taimi nei le toatele o tagata o le Ekalesia i nei tulaga? (Mafaufau e faatatau atu i le saunoaga a Sister Sharon Eubank i le vaega 1 o anomea mo sauniuniga.)

Faaali atu le ata o Aperaamo ma Sara mai le vaega 2 o anomea mo sauniuniga, ma fai i tagata aoga e aotele mai faamanuiaga a le o le tolopoina po o le lei faataunuuina i olaga o Aperaamo ma Sara.

Valaaulia tagata aoga e iloilo taitoatasi le Eperu 11:8, 11–13 ma vaavaai mo fasifuaitau o loo faamamafa mai ai le faatuatua o Aperaamo ma Sara. Fai i ni nai tagata aoga e faasoa mai mea na latou mauaina.

• E mafai faapefea e le faataitaiga a Aperaamo ma Sara ona fesoasoani i tagata o le Ekalesia i ona po nei o luitauina o latou faatuatua pe a faatuai pe le faataunuuina faamanuiaga folafolaina i lenei olaga? (A uma ona faasoa mai e tagata o le vasega o latou manatu, tusi le mataupu faavae lenei i luga o le laupapa: A o tatou faamaoni i le Alii ma faalagolago i Lana taimi, o le a tatou maua Ana faamanuiaga folafolaina i le olaga nei po o le faavavau.)

E mafai ona e faamanatu i tagata aoga o le mauaina o faamanuiaga folafolaina e masani lava e le o se mataupu o le amiotonu ae o le taimi a le Alii. Faaali atu le saunoaga lenei a Elder Jeffrey R. Holland o le Korama a Aposetolo e Toasefululua:

E vave oo mai nisi faamanuiaga, o nisi e tuai, o nisi e le oo mai vagana le lagi; ae mo i latou e taliaina le talalelei a Iesu Keriso, e oo mai lava. O lena mea ou te molimau atu ai. (“O se Faitaulaga Sili i Mea Lelei Atali,” Liahona, Ian. 2000)

Mafaufau e talanoaina nisi o fesili nei e fesoasoani ai i tagata aoga e faaloloto lo latou malamalama e uiga i le mataupu faavae o loo i luga o le laupapa:

• E mafai faapefea e tagata o le Ekalesia i se tasi o tulaga na taua e Elder Andersen (i lana saunoaga i le vaega 1 o anomea mo sauniuniga, o loo ta‘ua i le amataga o le vaega lenei) ona faaauau pea ona faatino le faatuatua ia Iesu Keriso ma Ana aoaoga i le aiga?

• O a ni aafiaga po o ni aoaoga ua mamanuina ai lou talitonuga o le a faataunuuina e le Alii Ana folafolaga e tusa lava pe faatuai faamanuiaga e manaomia? (Valaaulia tagata aoga e toeiloilo mea sa latou tusia e tali ai i le gaoioiga “Tusifaamaumau Ou Mafaufauga” o loo i le vaega 2 o le anomea mo le sauniuniga.)

• O anafea na e, po o se tasi e te iloa, agai ai i luma ma le faatuatua i le Alii ina ua i ai se faamanuiaga e faatatau i le faaipoipoina po o le faatuai o le mauaina o se fanau? O le a se mea na e aoaoina e uiga i le Alii mai lena aafiaga?

I le avea ai ma se vaega o le talanoaga, mafaufau e faasoa atu le tala lenei i se talavou nofofua matua lea na faasoa mai e Peresitene Dallin H. Oaks o le Au Peresitene Sili:

Sa ou maua se tusi mai se tamaitai sa aoga i le Iunivesite o Harvard. Sa faagaeetia au i lona anotusi.

Sa ia fai mai, “Ua na o le 26 ou tausaga ma ua ou lagonaina le faatoilaloina o au i tofotofoga o le nofofua.”

Ina ua uma ona faasoa atili mai i lana tusi, sa ia faaiuina: “Sa ou savali atu i le fale mai le galuega i se tasi aoauli i le tasi le tausaga talu ai, ma sasaa atu lo‘u loto i le Atua, ma tau atu ia te Ia lo’u manaoga loloto o le avea ma se ava ma se tina. Sa taofia la‘u tatalo ina ua oo mai se manatu ma se lagona mamana i lo‘u loto ma lo’u mafaufau. O le manatu e faapea sa ou sese. O le manaoga aupito loloto o lo‘u loto e tatau ona avea ma soo o Iesu Keriso ona lona lua ai lea le avea ma se ava ma se tina. Ua suia la‘u vaaiga i le olaga talu mai lena taimi. Sa ou fesuiaia au vaaiga. Ou te iloa o faamanuiaga uma ua folafola mai o le a fai mo a‘u, ae o le a tupu lenei mea i le taimi a le Alii ae lē o la’u.” O se manatu mamana! (Facebook, 11 Iulai, 2016, facebook.com/dallin.h.oaks)

Valaaulia tagata aoga e tusifaamaumau mea e mafai ona latou faia e faaauau ai ona faatino le faatuatua ia Iesu Keriso a o latou faatalitali mo le mauaina o faamanuiaga faaleaiga latou te mananao ai.

E mafai ona e fautuaina tagata aoga e saili le taitaiga a le Alii ma le lagolago i le aoaoina pe faapefea ona maua le olioli, faamalieina, ma le tuputupu ae i le taimi nei, po o a lava o latou tulaga faaleaiga.

O tagata taitoatasi o le Ekalesia o se vaega taua o le tino o Keriso.

Valaaulia tagata aoga e iloilo le 1 Korinito 12:12–27, ma vaavaai mo mea ua aoao mai e le talafaatusa a le Aposetolo o Paulo ia i tatou e uiga i le Ekalesia ma ona tagata.

• O a ni upumoni e mafai ona tatou aoao mai i lenei talafaatusa? (Faatasi ai ma upumoni e mafai ona faailoa mai e tagata aoga, ia mautinoa e faamamafa atu le upumoni lenei: O tagata uma o le Ekalesia e tatau ma e mafai ona faia se sao taua i le Ekalesia.)

Ina ia faaalia o tagata uma o le Ekalesia e i ai le taua e saofaga ai, e mafai ona e faaali atu le vitio “Songs Sung and Unsung” (2:56), o loo maua i le vaega o le “Manao Atili?” i anomea mo sauniuniga.

Ina ia fesoasoani i tagata aoga e mafaufau i auala e faaaofia ai isi ma filifili ia faaaofia i latou lava i faatulagaga faale-Ekalesia, e mafai ona e faasoa atu le tulaga faataitai lenei (pe fetuunai le tulaga faataitai pe a talafeagai ai ina ia sili atu ona talafeagai i au tagata aoga):

Talu ai nei na tatala ai le faaipoipoga a Vitoria. Ua ia ta‘u atu ia te oe e le o toe fetaui o ia i le Ekalesia. E nofo na o ia i sauniga lotu ma lagona le le fiafia i le taimi o talanoaga a le Aualofa e faatatau i le faaipoipoga ma le aiga. Sa ia fesili pe i ai sana mea e saofaga ai i lana uarota i lona tulaga o i ai nei.

Mafaufau e faatulaga tagata aoga i ni paga ma faaali atu fesili nei. Valaaulia se tagata aoga se toatasi mai paga taitasi e mafaufau loloto pe faapefea ona ia tali atu i fesili a Vitoria mai le vaaiga a Vitoria. Valaaulia le isi tagata aoga e mafaufau loloto i le isi seti o fesili mai le vaaiga a se tasi i le uarota a Vitoria. A mavae ni nai minute, valaaulia tagata aoga e talanoaina a latou tali ma isi.

Vitoria	Tagata o le Uarota
Ou te le lagona o a‘u o so o le uarota. O le a se mea e mafai ona ou faia e lagona atili ai lo‘u aofia ai?	E mafai faapefea ona ou lagolagoina Vitoria i lona tulaga o i ai nei?
O a nisi o vaaiga ma saofaga tulaga ese e mafai ona ou faaopoopo atu i la‘u uarota?	O le a se mea e mafai ona ou faia ia malamalama atili ai ia Vitoria ma fesoasoani ia te ia ia lagona le faatauaina ma le faaaofia ai i le matou uarota?
O le a se mea e mafai ona ou faia e faataga ai le Faaola e fesoasoani ia te au ia malamalama ma lagonaina lo‘u taua ma lo‘u tulaga i Lana Ekalesia?	E mafai faapefea ona ou faaaofia atili tagata o le uarota o e aafia i tulaga e pei o le avea ma se tagata matua nofofua, avea ma se matua nofotoatasi, po o le faaipoipo ae le mauaina ni fanau?

A uma se taimi talafeagai, ona valaaulia lea o ni tagata aoga e faasoa mai i le vasega mea na latou aoaoina mai lenei gaoioiga.

Tuu atu i tagata aoga se taimi e faamaumau ai ma fuafua pe faapefea ona latou faatinoina o latou lagona e lagolago ai uso a tagata o le Ekalesia, e tusa lava po o a o latou tulaga faaleaiga. E mafai ona e valaaulia tagata aoga e mafaufau e uiga i tagata patino o a latou uarota po o paranesi e mafai ona latou lagolagoina.

Mafaufau e faaiu le lesona e ala i le molimau atu i le alofa ma le lagolago le mafaatoilaloina a le Tama Faalelagi mo i latou e luitauina o latou tulaga faaleaiga. Ia molimau atu foi e manaomia tagata uma o le Ekalesia a le Alii ma e mafai ona faia se saofaga anoa.

Mo Le Isi Taimi

Valaaulia tagata aoga e mafaufau e uiga i tagata latou te iloa ua feagai ma luitau o le soifua maloloina faalemafaufau pe faalelagona. Fautuaina tagata aoga e suesue ma le loto tatalo le anomea mo sauniuniga mo le isi lesona faatasi ai ma mea nei e mafaufau i ai. E mafai foi ona e fautuaina tagata aoga e vaai sina taimi paganoa e iloilo ai o latou lava soifua maloloina faalemafaufau.