Lesona 28 Anomea a le Faiaoga

Lagonaina o le Faamoemoe mo le Fausiaina o se Aiga e Faavavau

E mafai e i tatou uma ona i ai le faamoemoe e mafai ona tatou fausia se aiga e faavavau, po o a lava tulaga o o tatou aiga. O lenei lesona o le a fesoasoani i tagata aoga ia malamalama atili ai e mafai e le Alii ona fesoasoani ia i latou ia manuia i le fausiaina o se aiga e faavavau. O le a maua foi e tagata aoga le avanoa e faasoa ma fuafua ai pe faapefea ona faaaoga atili mea ua latou aoaoina ma maua i le kosi O Le Aiga e Faavavau.

Fautuaga mo le Aoao Atu

E finagalo le Alii e fesoasoani ia i tatou ia manuia i le fausiaina o aiga e faavavau.

Manatua: Filifili ma le faaeteete le filifiliga faafaiaoga mo le vaega muamua o le lesona o le a sili ona faamanuiaina ai au tagata aoga. Ia mautinoa e te tuua pe tusa ma le 20 minute mo le vaega mulimuli o le lesona.

Amata le lesona i le valaaulia o tagata aoga e mafaufau loloto ma tusi faamaumau o latou manatu e uiga i le fesili lenei:

• O a ni ou faamoemoega mo le fausiaina o se aiga e faavavau?

A uma ua lava se taimi, valaaulia ni nai tagata aoga e faasoa mai o latou manatu pe a latou lagonaina le lagolelei.

Faaali atu le upumoni lenei mai le saunoaga a Elder David A. Bednar i le vaega 2 o anomea mo sauniuniga: “Faatasi ai ma le fesoasoani a le Alii, e mafai ona e fatuina se aiga e faavavau” (“A Welding Link” [faigalotu i le lalolagi atoa mo le autalavou matutua, Sete. 10, 2017], broadcasts.ChurchofJesusChrist.org).

Filifili se tasi o gaoioiga nei e fesoasoani ai i tagata aoga ia loloto lo latou malamalama i lenei upumoni ma tuu atu ia i latou e faasoa mai mea na latou aoaoina a o sauniuni mo le vasega:

Filifiliga 1

Faamanatu i tagata aoga o le gaoioiga e “Tusifaamaumau ou Manatu” i le vaega 1 o anomea mo sauniuniga sa valaaulia ai i latou e faailoa mai se faataitaiga mai tusitusiga paia po o o latou lava aafiaga faaleaiga i le ala e fesoasoani ai le Alii ia i latou o e faalagolago ia te Ia ma saili Lana fesoasoani. Tuu atu i tagata aoga ni nai minute e iloilo ai a latou faataitaiga ma tali i fesili.

Faatulaga le vasega i paga po o vaega toalaiti. Tuu atu ia lava se taimi i tagata aoga e faasoa mai ai a latou faataitaiga ma tali.

A uma, tusi le fuaiupu lea e lei uma i luga o le laupapa: Manatua pea: . Tuu atu i tagata aoga taitasi se fasipepa laitiiti ma se fasi mea faapipii. Valaaulia tagata aoga e tusi pe faapefea ona latou faaumaina le fuaiupu o i le laupapa e fatu ai se upumoni e faavae i mea ua latou aoaoina i a latou talanoaga faavaega e fesoasoani latou te lagona ai le faamoemoe e uiga i le fausia o se aiga e faavavau. Ona fai atu lea i tagata aoga e faapipii solo a latou pepa i le potu. (Afai e toalaiti lau vasega, e mafai ona e fetuunaia lenei gaoioiga e ala i le valaaulia o tagata aoga e tusi a latou tali i luga o le laupapa.)

Tuu atu i tagata aoga ni nai minute e savavali faataamilo ai i le potu ma faitau e le tasi le faamatalaga a le isi. A uma, fautuaina i latou e tusifaamaumau soo se upumoni faaopoopo latou te mananao e manatua po o uunaiga atonu na latou mauaina.

Filifiliga 2

Faamalamalama atu o nisi o i tatou atonu o tauivi e lagona le faamoemoe e uiga i le fausiaina o se aiga e faavavau ona tatou te lei oo i ni mamanu amiotonu faaleaiga i o tatou lava aiga.

• O le a se mea e mafai ona tatou aoao mai le aafiaga o le perofeta o Aperaamo e mafai ona aumaia ia i tatou le faamoemoe? (Faamalosiau i tagata aoga ia manatua mea na latou aoaoina i le vaega 2 o anomea mo sauniuniga. Mafaufau e faitau faatasi le Aperaamo 1:2. Ona fesoasoani lea i tagata aoga e faailoa mai se upumoni e pei o lenei: E mafai ona avea i tatou ma suiga mo o tatou aiga ma filifili le amiotonu e tusa lava po o a tulaga na i ai o tatou aiga.)

• O ai, pe afai e i ai se tasi, na avea ma meafaigaluega i le amataga (po o le faaauauina) o mamanu amiotonu faaleaiga i lou aiga? O le a se eseesega ua faia e faaiuga a lenei tagata i lou olaga?

Valaaulia se tagata aoga e faitau leotele ia parakalafa lona tolu ma le lima i le saunoaga a Elder David A. Bednar i le vaega 2 o anomea mo sauniuniga.

• E mafai faapefea e le Alii ona fesoasoani ia te oe e “faaopoopo le malosi i lau filifili ma atonu foi e fesoasoani e toe fuataiina sooga ua motusia”? (“A Welding Link”). (Atonu e te manao e valaaulia tagata aoga e tusi a latou tali i lenei fesili nai lo le talanoaina faatasi o se vasega.)

Valaaulia tagata aoga e mafaufau i fesili na valaaulia i latou e mafaufau loloto i ai e faatatau i mamanu faaleaiga e amata, faaauau, pe le toe faaauauina (tagai i le vaega 2 o anomea mo sauniuniga). Uunaia tagata aoga e faamaumau soo se manatu po o ni uunaiga na latou maua.

Ua faamanuiaina i tatou i le manatunatu i mea ua tatou aoaoina ma fuafuaina auala e faaaoga ai.

Faaleleia o Lo Tatou Aoao Atu ma le Aoaoina

Tuu atu i tagata aoga se taimi e tomanatu ai. E mafai e tagata aoga ona maua le faamoemoega loloto ma le uiga i lo latou aoaoina a o latou faaaluina se taimi e toe manatunatu ai pe na faapefea e upumoni o le talalelei ona faatosinaina o latou mafaufau, loto, ma olaga. O le uunaia o tagata aoga e mafaufau pe faapefea ona latou faaaogaina mea sa latou aoaoina ma lagonaina e mafai ona fesoasoani e faalolotoina ai lo latou liua.

Mafaufau e faaali atu se kopi o le “O Le Aiga: O Se Folafolaga i le Lalolagi” (ChurchofJesusChrist.org). Faamanatu i tagata aoga le avanoa sa latou maua i lenei kosi atoa e suesue ai aoaoga i le aiga mai se vaaiga e faavavau.

Faaali atu faaulutala o lesona mai lenei kosi, pe valaaulia tagata aoga e vaai i ai i luga o a latou masini. Tuu atu i tamaiti aoga se taimi e toe faamanatu ai faaulutala o lesona e fesoasoani ai ia i latou e toe manatunatu i mea sa latou aoaoina, lagonaina, ma oo i ai i lenei kosi atoa. Ona valaaulia lea o tamaiti aoga e faasoa mai o latou manatu. E mafai foi ona e faia ni fesili e pei o nei e fesoasoani e faalautele ai le talanoaga:

• Na faapefea ona uunaia e lenei kosi lou malamalama ma le molimau i aoaoga a le Alii e uiga i le faaipoipoga ma le aiga?

• O le a se mea ua avea ma se tasi o au mea sili ona taua na maua mai lenei kosi?

• O le a se mea ua e aoaoina e uiga i le Tama Faalelagi ma Iesu Keriso i le aluga o lenei kosi? Na faapefea ona faamalosia lau tou sootaga ma i Laua?

Ina ia faaiu lenei lesona, e mafai ona e valaaulia se tagata aoga e faitau leotele le saunoaga a Peresitene M. Russell Ballard i le vaega 3 o anomea mo sauniuniga. Atonu e aoga le faaali atu o fesili nei ma tuu atu i tagata aoga ni nai minute e tusifaamaumau ai o latou manatu po o uunaiga e uiga ia i latou:

• O le a faapefea ona ese lou olaga o se taunuuga o mea ua e aoaoina ma aafia ai i lenei kosi? E faapefea ona e avea atili e faapei o Iesu Keriso?

Mafaufau e valaaulia soo se tagata aoga e fia faasoa mai a latou molimau e uiga i le taua o le aiga i le fuafuaga o le fiafia a le Tama Faalelagi e faia, pe a lava le taimi. Mafaufau e faasoa atu foi lau lava molimau. Ma faamalosiau i tagata aoga ia faaauau pea ona auai i le inisitituti.