Lesona 9 Anomea a le Faiaoga

Tuufaatasia o Aiga mo le Faavavau

O le mauaina o sauniga o le malumalu mo i tatou lava ma mo o tatou tuaa ua maliliu e faamalolosia ai i tatou ma fesoasoani ai ia i tatou e fausia o tatou lava aiga e faavavau. O talafaasolopito o aiga ma auaunaga i le malumalu e taua foi e fesoasoani ai i lo tatou Tama Faalelagi e tuufaatasia Lona aiga. O se taunuuga o lenei lesona, o le a mafai ai e tagata aoga ona faamatala mai nisi o faamanuiaga e mafai ona tatou maua e ala i auaunaga i malumalu ma talafaasolopito o aiga. O le a valaaulia foi tamaiti aoga e filimaoti ni auala e mafai ona latou amataina pe faaauau ai a latou taumafaiga e iloa ai o latou tuaa ua maliliu ma faatino sauniga mo i latou i totonu o le malumalu.

Fautuaga mo le Aoao Atu

E finagalo le Tama Faalelagi e tuuina mai le mana ma le malosi i Ana fanau.

Mafaufau e amata le lesona i le faaali atu o le fesili lenei ma valaaulia tagata aoga e lisi a latou tali i luga o le laupapa:

I le avea ai ma talavou matutua i le lalolagi i aso nei, o a mana po o faamanuiaga faaleagaga o loo e manaomia faapitoa ma pe aisea foi?

Valaaulia se tagata aoga e faitau leotele le parakalafa lona tolu o le folafolaga i le aiga (tagai “O Le Aiga: O Se Folafolaga i le Lalolagi,” ChurchofJesusChrist.org). Fai i tamaiti aoga e faamatala mai mea ua latou iloaina e uiga i le matafaioi a feagaiga ma sauniga i le fuafuaga a le Atua.

(Tuu atu i tagata aoga le taimi e iloilo toto’a ai le saunoaga mai ia Peresitene Russell M. Nelson i le vaega 1 o anomea mo sauniuniga. Valaaulia i latou e faasoa mai mea na latou aoaoina mai ia Peresitene Nelson e uiga i sauniga o le perisitua ma feagaiga. A o faasoa mai tagata aoga, fesoasoani ia i latou e faailoa mai upumoni e pei o nei: O le mauaina o sauniga ma feagaiga e mafai ona faamalolosia ai a tatou faaipoipoga ma aiga. A tatou mauaina ma faamamaluina sauniga ma feagaiga o le perisitua, e faamanuia i tatou e le Atua i Lona mana (tagai foi Mataupu Faavae ma Feagaiga 109:22).

• O a ni auala ua faamanaina ai pe faamalosia ai oe ma lou aiga e sauniga ma feagaiga o le perisitua? (Sa valaaulia tamaiti aoga e mafaufau loloto i lenei fesili i anomea mo sauniuniga.)

E mafai ona e molimau atu i se tasi pe sili atu o nei faamanuiaga i lou lava olaga ma lou aiga. Fautuaina tagata aoga ia agai atu i luma i le mauaina o sauniga o le malumalu pe afai latou te lei mauaina lava ma faamamaluina feagaiga na latou osia.

E finagalo lo tatou Tama Faalelagi i le faaolataga mo Lona aiga atoa.

Mafaufau e vaevae tamaiti aoga i ni vaega toalaiti e fai le gaoioiga lenei. Tuu atu i vaegataitasi se kopi o le tufaaga lea. (Pe e mafai foi ona e saunia se ata faapenei pe afai e te manao e fetuunai le ata faataitai ina ia sili atu ona talafeagai i tulaga o au tamaiti aoga.) Valaaulia vaega e mulimuli i faatonuga o i le tufaaga.

O Le Aoaoga Faavae Autu o le Togiolaina o Ē ua Maliliu

Anomea a le Faiaoga O Le Aiga e Faavavau,—Lesona 9

Faitau le ata faataitai lenei, ma talanoaina faatasi o se vasega le fesili o loo avatu faatasi ai.

O se uo e auai i se isi faatuatuaga na auai talu ai nei i se fale tatala o le malumalu. O iina, sa ia faalogo ai i tagata o ta’ua le faatinoina o sauniga mo o tatou tuaa ua maliliu. I ni nai aso mulimuli ane, sa ia fesili atu ia te oe, “Aisea e faia ai e la outou ekalesia sauniga mo e ua maliliu?”

• E faapefea ona e tali atu i le fesili a lau uo? (A uma ona outou talanoaina lenei fesili, e mafai e lau vaega ona iloilo le saunoaga a Peresitene Iosefa F. Samita i le vaega 1 o anomea mo sauniuniga. E mafai foi ona outou iloiloina faatasi le 1 Korinito 15:29.)

• O le a se mea e mafai e le aoaoga faavae autu o le togiolaina o e ua maliliu ona aoao ai i tatou e uiga i le uiga, finagalo, ma le aapa atu o le Tama Faalelagi ma Iesu Keriso?

© 2022 Puletaofia e le Intellectual Reserve, Inc. Ua taofia aia tatau uma.

O Le Aoaoga Faavae Autu o le Togiolaina o Ē ua Maliliu

A ua lava le taimi, valaaulia se toatasi pe toalua o tamaiti aoga e faasoa mai ni mea na latou aoaoina mai i a latou vaega.

Toe faamanatu faatasi le Mataupu Faavae ma Feagaiga 128:15, ma talanoaina fesili nei:

• E tusa ai ma lenei fuaiupu, aisea e taua ai mo i tatou le mauaina o sauniga o le malumalu mo o tatou tuaa ua maliliu? (I le faaaogaina o upu a tagata aoga, tusi se upumoni e pei o lenei i luga o le laupapa: O le faaolataga o o tatou tuaa ua maliliu e tatau ai ma e taua i lo tatou lava faaolataga ma le atoatoaga.)

• Aisea e te manatu ai e manaomia le faaolataga o o tatou tuaa mo lo tatou lava faaolataga ma le atoatoaga?

• E faapefea ona avea atili i tatou e faapei o le Faaola e ala i le iloaina o o tatou tuaa ua maliliu ma le mauaina o sauniga i le malumalu mo i latou? (Atonu e te manao e valaaulia tagata aoga e toe faamanatu le faamatalaga a Peresitene Gordon B. Hinckley i le vaega 2 o le anomea mo sauniuniga.)

Valaaulia le vasega e mafaufau pe o a ni o latou lagona i le Faaola mo Ana taumafaiga e faia se mea mo i latou e le mafai ona latou faia mo i latou lava. Ona valaaulia lea o i latou e mafaufau pe o a ni lagona o o tatou tuaa ua maliliu pe a tatou maua sauniga faaola mo i latou ia e le mafai ona latou mauaina e i latou lava.

E faamanuia e le Alii i latou o e faia auaunaga faalemalumalu ma talafaasolopito o aiga.

Faaleleia o Lo Tatou Aoao Atu ma le Aoaoina

Fai ni valaaulia e uunaia ai le faaaogaaga. E faalolotoina e tamaiti aoga lo latou aoaoina o le talalelei pe a latou faaaogaina mataupu faavae moni ma upumoni faaleaoaoga faavae. O le faatinoina i le faatuatua e fesoasoani ia i latou e liua ai i le Faaola ma maua ai faamanuiaga ua Ia folafola mai ia i latou o e usiusitai. A o e sauni e fesoasoani i tamaiti aoga i le vasega, tuu atu le faamuamua talafeagai i fesili ma gaoioiga e uunaia ai le faaaogaina.

Mafaufau e valaaulia tagata aoga o e e mafai ona faaaoga a latou masini eletonika e o ai i le FamilySearch.org po o le polokalama FamilySearch Family Tree. (E mafai foi ona e faaali atu a le o le uepisaite po o le polokalama mo le vasega pe fautuaina tamaiti aoga e leai se masini e faasoa ma se tasi o le vasega e i ai se masini.) Suesue faatasi nisi o vaaiga o le uepisaite po o le polokalama. E mafai ona e faaaogaina le vaega “Tagata o aiga o loo siomia au” e fesoasoani ai i tamaiti aoga ia iloa pe faapefea ona latou aiga i le tasi ma le isi. Mafaufau po o fea o fesili nei e ono fesoasoani e talanoaina:

• O le a sou aafiaga i le faia o talafaasolopito o aiga?

• O le a se mea o taofia oe pe na taofia ai oe i le taimi ua tuanai mai le faia o talafaasolopito o aiga? Na faapefea ona e faatoilaloina nei ituaiga o faafitauli? E mafai faapefea ona fesoasoani le Alii i au taumafaiga?

• Afai ua e mauaina sauniga o le malumalu mo ou tuaa, o a ni ou lagona na i ai i lena taimi?

E mafai ona e faaalia le vitio “The Promised Blessings of Family History” (3:24) (lea foi o loo faasino i ai i le vaega 2 o anomea mo sauniuniga).

Mafaufau e fai atu i tagata aoga e lisi nisi o faamanuiaga ua folafola mai e le Alii ma Ana taitai o le Ekalesia ia i latou o e auai e faatino auaunaga i le malumalu ma talafaasolopito o aiga.

Valaaulia tagata aoga e toe manatunatu i le mana faaleagaga po o faamanuiaga latou te manaomia faapitoa i lenei taimi (valaaulia i latou e iloilo le lisi o i le laupapa mai le amataga o le lesona). Fai atu i tamaiti aoga e faasoa mai pe molimau atu i se taimi na latou maua ai nei ituaiga o faamanuiaga a o latou auai e faatino auaunaga i malumalu ma talafaasolopito o aiga.

Tuu atu i tamaiti ni nai minute e tusi ai pe mafai faapefea ona latou faaaogaina mea sa latou aoaoina i lenei lesona. Fautuaina i latou e faatu se sini latou te lagona e mafai ona latou ausia e auai ai e le aunoa i auaunaga faalemalumalu ma talafaasolopito o aiga. E mafai foi ona latou faamaumauina faamanuiaga latou te faamoemoe e maua mai le faia o lena mea.

Manatua: Saili ni avanoa a o e feiloai ma lau vasega i le lumanai e fesili atu ai pe o faapefea mai tagata aoga i a latou sini o le malumalu ma talafaasolopito o aiga.

Mo Le Isi Taimi

I le faaiuga o le vasega po o le aluga o le vaiaso, e mafai ona e valaaulia tamaiti aoga e faatalanoa se ulugalii ua faamauina i le malumalu. Valaaulia tagata aoga e fesili i le ulugalii pe na faapefea ona aafia le la faaipoipoga i feagaiga na la osia ina ua faamauina i laua ma pe o faapefea ona la saili faatasi e faalatalata atili atu i le Atua.