Lesona 17 Anomea a le Faiaoga

Paaga Tutusa i le Faaipoipoga

Mai le taimi o Atamu ma Eva, na faamoemoe le Alii ia avea tane ma ava ma paaga tutusa i le faaipoipoga. Ua toe faamautu mai e perofeta soifua lenei mataupu faavae i o tatou aso. I lenei lesona, o le a maua ai e tagata aoga le avanoa e faamalamalama ai aoaoga o le talalelei e uiga i le faigapaaga tutusa i le faaipoipoga ma le pulefaamalumalu i le aiga. O le a valaaulia foi tagata aoga e fuafua po o le a se mea e mafai ona latou faia i le taimi nei ina ia maua ai se faigapaaga tutusa i le faaipoipoga.

Fautuaga mo le Aoao Atu

O tane ma ava e tatau ona avea ma paaga tutusa i le faaipoipoga.

Mafaufau e amata le lesona i le faaali atu po o le tufatufaina atu o kopi o le saunoaga lenei a Peresitene Jean B. Bingham, Peresitene Aoao o le Aualofa. Fai i le vasega e faitau le faamatalaga, ma vaavaai pe o faapefea ona saili le fili e faaumatia faaipoipoga ma aiga.

Ua iloa e Lusifelo afai na te faataumaoia le lotogatasi e lagona e alii ma tamaitai, afai e mafai ona ia faalēmautonuina i tatou e uiga i lo tatou taua paia ma tiutetauave o le feagaiga, o le a ia malo i le faatamaiaina o aiga, o iunite e tatau ai o le faavavau.

E faaosooso e Satani le faatusatusa e faatupu ai ni lagona o le faasausili po o le vaai maulalo, a o natia ai le upumoni faavavau e faapea, o eseesega faalenatura o alii ma tamaitai, ua mai le Atua ma e tutusa lava le taua. … O lana sini o le uunaia lea o se tausiliga mo le paoa nai lo le patipatia o sao tulaga ese o alii ma tamaitai e fefaamaloa’i ai le tasi i le isi ma saofagā ai i le lotogatasi. (“Tutufaatasi i le Faataunuuina o le Galuega a le Atua,” Liahona, Me 2020, 60-61)

• O a luitau e mafai ona oo mai i se faaipoipoga pe afai e lagona e le tane po o le ava le faatauvaa po o le sili atu i le isi?

Toe iloilo faatasi ma tagata aoga le Mose 3:18, 21–23 ma fesili atu:

• O le a se mea e mafai ona tatou aoao mai le auala na faamatalaina ai e le Alii le foafoaga faaletino o Eva, e pei ona faamauina i lenei tusiga? (Pe a manaomia, faasino tagata aoga i faamatalaga a taitai o le Ekalesia o lenei fuaitau o mau i le vaega 1 o anomea mo sauniuniga. Fesoasoani i tagata aoga e faailoa mai se upumoni e pei o lenei: I totonu o le faaipoipoga, ua faamoemoe le Tama Faalelagi ia fesoasoani se tane ma se ava i le tasi ma le isi o se paaga tutusa.)

Ina ia fesoasoani i tagata aoga ia malamalama atili i lenei upumoni, mafaufau e faaali atu ni nai mea e ausia ai se mea pe a fai paga. O nei mea e ono aofia ai ni lau se lua o se seleulu, se tui ma se naifi, se mea faimusika e manaomia ai ni vaega se lua e ta ai (e pei o se vaiolini), o se pea seevae po o ni totinilima, o se pea monotaliga po o ni meafaalogo, ma isi mea faapena. Valaaulia tagata aoga e mafaufau pe o le a le mea e tupu pe afai latou te faaaogaina na o le tasi le vaega o le pea e faataunuu ai la latou galuega.

• E faatusa faapefea le tane ma se ava o galulue faatasi e pei o nei mea?

• O a faamanuiaga e mafai ona oo mai i se faaipoipoga pe afai e vaai ma lagolago e le tane ma le ava le tasi ma le isi o se paaga tutusa?

Faaleleia o Lo Tatou Aoao Atu ma le Aoaoina

Faailoa atu tali a tagata aoga i ni auala lelei. A tuu mai e se tagata aoga se tali, e tatau i le faiaoga ona talia aloaia i se auala lelei. E mafai ona avea o se “faafetai” faigofie po o se faamatalaga e uiga i le tali. O le faia o lena mea o le a fesoasoani ai i tagata aoga ia lagona o la na faalogo atu ma faatauaina. O lenei tali lelei e mafai ona fesoasoani i tagata aoga e lagona atili ai le toafimalie e faasoa mai tali, malamalamaaga, ma aafiaga i le lumanai.

Faamanatu i tagata aoga latou te faitau i anomea mo sauniuniga ua tofia e le Alii ni tiutetauave tulaga ese i tane ma ava i le aiga ia e “tutusa i le aoga ma le taua” (Quentin L. Cook, “Alofa Sili mo Fanau a lo Tatou Tama,” Liahona, Me 2019, 79). E faapena foi ona aoao mai perofeta, “O nei matafaioi paia, e ao i tamā ma tina ona fesoasoani le tasi i le isi o se paaga tutusa.” (“O Le Aiga: O Se Folafolaga i le Lalolagi,” ChurchofJesusChrist.org).

Atonu e te ta‘ua o le tele o nei tiutetauave o le a talanoaina i lesona o le a sosoo ai. Ae ina ia amata ona talanoaina se tasi o faataitaiga, faaali atu le upumoni lenei: “I le fuafuaga paia, e tatau ona pulefaamalumalu tamā i o latou aiga i le alofa ma le amiotonu” (“O Le Aiga:O Se Folafolaga i le Lalolagi”).

• E faapefea ona e faamatalaina le uiga o le pulefaamalumalu i le alofa ma le amiotonu? O le a sou manatu i le mea e mafai ona tatou aoaoina e uiga i le pulefaamalumalu mai le faataitaiga a le Faaola? (Afai e manaomia, iloilo faatasi ma tagata aoga le faamatalaga mai le Tusitaulima Aoao ma le saunoaga a Peresitene Ezra Taft Benson i le vaega 2 o anomea mo sauniuniga.)

Faamanatu i tagata aoga o le Mataupu Faavae ma Feagaiga 121:41–43 o loo faailoa mai ai ni uiga faaKeriso e mafai ona fesootai i le pulefaamalumalu ma le amiotonu i totonu o le aiga. Valaaulia tagata aoga e toeiloilo mea sa latou tusia e tali ai i le gaoioiga “Tusifaamaumau Ou Mafaufauga” o loo i le vaega 2 o anomea mo le sauniuniga. Valaaulia ni nai tagata aoga e faasoa mai mea na latou tusia i le vasega. Ona mafaufau lea e fai atu fesili nei:

• O a faataitaiga o le paaga tutusa ma le pulefaamalumalu amiotonu i le aiga ua e vaaia pe faalogo i ai?

E tatau i tane ma ava ona fefautuaai faatasi i le faia o faaiuga mo o latou aiga.

O le vaaiga faataitai lenei ua mamanuina e fesoasoani ai i tagata aoga e iloilo lo latou malamalama i le paaga tutusa i le faaipoipoga ma le pulefaamalumalu i le aiga. (Mafaufau pe faapefea ona e fetuunaia lenei tulaga pe a talafeagai e faaalia atili ai lau aganuu po o le faafetauiina o soo se manaoga faapitoa e ono i ai i au tagata aoga.)

Galulue o se vasega po o ni vaega toalaiti, iloilo le tulaga faataitai lenei, ma talanoaina fesili o loo i le faaiuga o le tufaaga.

Tala a Nikolao ma Elena

Anomea a le Faiaoga O Le Aiga e Faavavau—Lesona 17

Ua 10 tausaga talu ona faaipoipo ma le fiafia Nikolao ma Elena ma maua se fanau e toatolu. La te mananao uma ia faavae lo la aiga i luga o le faavae o Iesu Keriso ma Lana talalelei, ma e la te taumafai uma e faataunuu o la tiutetauave faaleaiga ua atofaina mai le lagi.

E pei foi o isi ulugalii faaipoipo, o Nikolao ma Elena e i ai feeseeseaiga. O o la feeseeseaiga e masani lava ona faatatau i tupe. E faigaluega Nikolao i le taimi atoa i fafo atu o le fale. E mafai e Elena ona tausi le la fanau ma teu le fale i le aso atoa, e faaopoopo atu i le galue i nisi taimi i ni galuega laiti. E talitonu Nikolao i lana matafaioi o le pulefaamalumalu i le fale, faapea foi ma lē e tele atu tupe e maua mai ai, o lona uiga o ia e tatau ona faia faaiuga i le ala e faaalu ai a latou tupe. E lagona e Elena e tatau ona tele atu lana pule i faaiuga e aofia ai tamaiti talu ai e sili atu lona taimi e faaalu ma i latou nai lo Nikolao. O nisi taimi i le tuanai, e aunoa ma le tauina atu ia Nikolao, sa ia faaaluina a latou tupe i le ala e manao ai o ia.

Sa talanoaina talu ai nei e Nikolao ma Elena le mea e fai i se tupe na la sefeina. E manao Nikolao e faaaoga e faatau ai se taavale e faafaigofie ai mo ia ona alu e faigaluega ma feoai ai le latou aiga. E manao Elena e faaaoga le tupe e ave ai le la fanau i se tafaoga e asiasi ai i aiga lautele ma maua faatasi ni aafiaga faagaeetia a o lei matutua tele tamaiti.

O le feeseeseaiga o Nikolao ma Elena sa mamafa ia i laua, ae e tatau ona faia se faaiuga.

• O le a se luitau ogaoga o e iloa o loo feagai ma Nikolao ma Elena i le filifilia o le mea e fai i le tupe?

• O le a sou manatu o le a le mea e manaomia ona la malamalama atili ai e uiga i le paaga tutusa ma le pulefaamalumalu e faatatau i le faia o faaiuga mo lo la aiga? (Tagai vaega 3 o anomea mo sauniuniga.)

• Afai o oe o Nikolao po o Elena, e mafai faapefea ona e faalatalata atu i lou toalua e fefautuaai faatasi e uiga i lenei faaiuga i se ala faaKeriso?

© 2022 Puletaofia e le Intellectual Reserve, Inc. Ua taofia aia tatau uma.

Tala a Nikolao ma Elena

A uma ua lava se taimi o tagata aoga e talanoaina ai le tulaga faataitai, e mafai ona e fesili:

• E mafai faapefea e le fefautuaai faatasi i le amiotonu ona faamanuiaina ai ulugalii ma a latou fanau?

Ina ia faaiu, faaali atu fesili nei, ma tuu atu i tagata aoga ia lava se taimi e mafaufau loloto le leoa ai ma tusifaamaumau soo se uunaiga latou te maua.

• O a uiga faaKeriso, uiga, po o faataitaiga e mafai ona ou atiina ae pe faamalolosia e fesoasoani ai ia te au e atiina ae se paaga tutusa i la‘u faaipoipoga? E mafai faapefea ona ou sailia le fesoasoani a le Alii i a’u taumafaiga?

Mo Le Isi Taimi

Faailoa atu i tagata aoga e masani lava o se popolega tele o ulugalii a o latou mafaufau i le faaipoipoga ma le fanau o le ala lea o le a mafai ai ona latou tuuina atu mea latou te manaomia i mea tautupe. Fautuaina tagata aoga e suesue ma le agaga tatalo anomea mo sauniuniga mo le lesona e sosoo ai ma faalogologo mo uunaiga e ono fesoasoani ia i latou e faia ai filifiliga poto i mea tautupe ma ia ola tutoatasi atili ai.