Lesona 26 Anomea a le Faiaoga

Iloaina ma le Faamaloloina mai Sauaga

Ua lapatai mai perofeta ma aposetolo e faapea “o tagata taitoatasi o e … faasaunoa i toalua po o fanau … o le a i ai se aso tou te tutu atu ai e tali atu i luma o le Atua” (“O Le Aiga: O Se Folafolaga i le Lalolagi,” ChurchofJesusChrist.org). O lenei lesona o le a fesoasoani i tagata aoga ia malamalama atili i le auala e iloa ai ma tali atu i tulaga o le sauaina. O le a talanoaina foi e tagata le mana o Iesu Keriso e ofo atu ai le faamalologa ia i latou uma o e na aafia i le sauaina.

Manatua: Atonu e i ai ni au tagata aoga na aafia i sauaga. Ona o le natura maaleale ma le faigata o le natura o le sauaina, o nisi o vaega o lenei lesona e ono afua ai ni lagona faanoanoa mai tagata aoga o e o afaina i sauaga, aemaise lava i latou e lei talanoa mai e uiga i ai. Atonu e te manao e faailoa muamua atu i tagata aoga faapea afai e i ai se tasi o i latou e le lagonaina le toafimalie e auai i le vasega mo lenei lesona, e mafai ona latou faia se isi fetuunaiga ma oe. Mafaufau i se isi aafiaga anoa e aoao ai e mafai ona e valaaulia i latou e auai i fafo atu o le vasega.

Afai e foliga mai e ono talanoa atu se tagata aoga ia te oe e uiga i aafiaga patino pe faaleaiga o le sauaina, e tatau ona e faamatala atu ma le mataalia e tatau ona e lipoti atu tuuaiga o ituaiga uma o sauaga e ala i le valaau atu i le laina fesoasoani a le Ekalesia po o se loia a le eria. Ia onosai, nofouta, faamautinoa, ma malamalama a o e faasino atu le tagata aoga i lona epikopo po o le peresitene o le paranesi e talanoaina le tulaga. Ia mulimuli ma le faaeteete i tulafono i le lotoifale e faatatau i tiutetauave ma faamoemoega mo le lipotia o sauaga faatautala.

Fautuaga mo le Aoao Atu

Faaleleia o Lo Tatou Aoao Atu ma le Aoaoina

Ia nofouta i manaoga ma lagona o tagata aoga. O le auala tou te talanoaina ai ma au tagata aoga le sauaina e mafai ona faateleina ai le tiga po o le mauaina foi o le faamoemoe. Atonu e te manao e talanoaina ma tagata aoga pe aisea e taua ai le malamalama ma ia nofouta i tiga ma mafatiaga e oo i ai tagata o loo aafia i sauaga. A o e mafaufau e uiga i le auala o le a e taitaia ai lenei talanoaga, atonu e aoga lou faitauina o le “E Mafai Faapefea Ona Ou Lagolagoina se Tasi Sa Sauaina?” (abuse.ChurchofJesusChrist.org).

O i latou o e sa sauaina isi o le a tali atu i luma o le Atua.

Faaali atu le faamatalaga lenei mai le “O Le Aiga: O Se Folafolaga i le Lalolagi”: O tagata taitoatasi o e faasaunoa i taitoalua po o fanau o le a i ai se aso e tutu atu ai e tali atu i luma o le Atua (tagai foi Faaaliga 20:12–13; 2 Nifae 9:15–17).

Tuu atu i tagata aoga ni nai minute e iloilo ai vaega 1 ma le 2 o anomea mo sauniuniga, ma valaaulia i latou e faasoa mai ni fesili po o ni uunaiga na latou maua a o latou suesueina nei vaega. Pe a manaomia, e mafai ona e fai atu fesili e pei o fesili nei:

• O le a le sauaga? O a mataupu faavae o le talalelei ua solia pe a tupu le sauaina?

• O a ni lapataiga ma ni fautuaga na tulagaese ia te oe i nei vaega o anomea mo sauniuniga?

• O a ni ou mafaufauga a o e iloiloina faailoga masani o le sauaina?

• E mafai faapefea e se tasi i se tulaga sauaina ona sailia ma le saogalemu se fesoasoani? Afai e te iloa se tulaga sauaina, e mafai faapefea ona e lipotia ma le saogalemu? (Mafaufau e faaalu se taimi e fesoasoani ai i tagata aoga e sue punaoa mo le lipotia o le sauaina. Tagai, mo se faataitaiga, “In Crisis? Talk Now” [abuse.ChurchofJesusChrist.org].)

E mafai e Iesu Keriso ona faamalolo i latou o e na aafia i sauaga.

Mafaufau e faaali le vaega muamua o le vitio “Living with the Pain of Childhood Abuse” (taimi 0:00–2:27). A o lei faaalia le vitio, faamalamalama atu o loo faamatala mai ai le tala moni o se tagata na sao mai le sauaina e igoa ia Erin. Valaaulia tagata aoga e vaavaai pe na faapefea ona aafia Erin i le sauaga sa ia oo i ai.

Mafaufau e fai atu fesili nei:

• O a ni auala e mafai ai ona oo mai ai le faamalologa mai sauaga? (Pe a manaomia, atonu e te manao e toe iloilo le faamatalaga lona lua a Elder Richard G. Scott i le vaega 3 o le anomea mo sauniuniga.)

• O le a se mea o le a e faasoa atu i se uo, e pei o Erin, o loo tauivi mai aafiaga o le sauaina? O a nisi o mea e faigata ai ona faamalolo mai le sauaina?

Faitau faatasi le Isaia 61:1–3, ma faailoa mai upumoni e mafai ona anoa i se tagata na aafia i sauaga faatautala (tagai foi i le 2 Nifae 2:1–2). Faatasi ai ma isi upumoni, atonu e faailoa mai e tagata aoga se upumoni e talitutusa ma lenei: Ua ia Iesu Keriso le mana e faamalolo ai e loto momomo ma faamafanafana i latou uma o e faanoanoa.

• O le a se mea ua e faia e valaaulia ai le faamafanafanaga, fesoasoani, ma le faamalologa mai le Faaola, i soo se tulaga?

• Na faapefea ona suia e le Faaola le leai o se faamoemoe po o le faanoanoa i le matagofie i lou olaga?

Afai na e faaalia le vaega muamua o le vitio “Living with the Pain of Childhood Abuse” i se taimi na muamua atu, faaali atu le vaega o totoe i le taimi nei (taimi 2:27–4:50). Fai atu i le vasega e faalogo mo le ala na fesoasoani ai le Faaola ia Erin.

• O le a se mea e mafai ona fesoasoani ia i tatou ia onosai ma faamaoni i le aluga o taimi e ono manaomia e faamalolo ai?

Tuu atu i tagata aoga ni nai minute e mafaufau ai pe mafai faapefea e aoaoga o i lenei lesona ona aafia ai o latou olaga i le taimi nei. Fautuaina i latou e tusifaamaumau soo se lagona atonu na latou mauaina.

Ina ia faaiuina le lesona, valaaulia tagata aoga e faasoa mai mea na latou aoaoina e uiga i le matafaioi a le Faaola i le fesoasoani atu i tagata uma ua aafia i le sauaina. E mafai ona e faaalia le vitio “The Prince of Peace” (2:32), lea foi o loo faasino i ai i le vaega 3 o anomea mo sauniuniga.

Mo Le Isi Taimi

Valaaulia tagata aoga e mafaufau i ni auala na latou vaai ai ia Satani ma isi o galulue e faaumatia le aiga. Fautuaina tagata aoga, a o latou suesue i anomea mo sauniuniga mo le lesona e sosoo ai, ia vaavaai mo taunuuga o aiga malepelepe i malo ma mafaufau loloto i mea e mafai ona latou faia e puipuia ai aoaoga a le Alii i le aiga.