Lesona 20 Anomea a le Faiaoga

O Tiutetauave Paia o Tama

Ua tofia atu e le Tama Faalelagi i Ona atalii le tiutetauave paia e puipui o latou aiga. I lenei lesona, o le a faamalamalama ai e tagata aoga auala e mafai ai e alii ona faataunuu lenei tiutetauave. O le a latou talanoaina pe na faapefea e le Tama Faalelagi ma Iesu Keriso ona faataitai ma le atoatoa le matafaioi a tama e puipuia o latou aiga. O le a manatunatu loloto foi tagata aoga ma fuafua pe mafai faapefea ona latou faalagolago i le fesoasoani mai le lagi a o latou fefaasoaai i lenei tiutetauave paia ma o latou taitoalua.

Manatua: O tiutetauave o alii e pulefaamalumalu ma saunia ma tuuina atu mea mo o latou aiga, sa talanoaina i lesona ua mavae.

Fautuaga mo le Aoao Atu

O le Atua o le faataitaiga atoatoa o le avea ai ma tama.

I le avea o se vaega o le faigalotu mo lenei lesona, mafaufau e usu le viiga o le “Lo‘u Tamā e” (Viiga, nu. 178) po o se isi viiga e faatatau i lo tatou Tama Faalelagi.

E mafai ona e amataina le lesona i le faaali atu o se ata o se tamā ma lona aiga ma fai atu i alii o le vasega le fesili lenei:

• O a ni ou mafaufauga, lagona, po o popolega e uiga i le avea ma se tamā?

Ona fesili atu lea i le vasega:

• O le a sou manatu o a nisi o luitau aupito tele o le avea ai o se tamā amiotonu i o tatou taimi? (Mafaufau e valaaulia tamaiti aoga e toe faamanatu le saunoaga a Peresitene Linda K. Burton i le vaega 1 o le anomea mo sauniuniga.)

• O a eseesega o loo i ai i le ala e vaai ai nisi tagata i le tulaga faatama ma le ala e silasila ai le Atua i le tulaga faatama?

Faamanatu i tagata aoga e faapea, a o latou suesueina le anomea mo sauniuniga, sa latou aoao ai o le Tama Faalelagi o le faataitaiga atoatoa lea o le avea ma tama amiotonu (tagai i le saunoaga a Elder D. Todd Christofferson i le vaega 1 o le anomea mo sauniuniga).

Faaleleia o Lo Tatou Aoao Atu ma le Aoaoina Mai

Faamamafa atu faataitaiga a le Tama Faalelagi ma Iesu Keriso. Na aoao e Ie Faaola Ona soo ia avea e faapei o Ia (tagai i le 3 Nifae 27:27). Vaavaai mo auala e faamamafa ai Ana faataitaiga atoatoa ma Lona Tama Faalelagi e pei ona outou talanoaina upumoni i le vasega.

Faamalamalama faapea e mafai foi ona tatou aoaoina mataupu faavae o le avea ma tamā amiotonu mai le suesue i faataitaiga a Iesu Keriso. Toeiloilo faatasi le Ioane 10:11–15 ma, talanoaina mea sa aoaoina e tagata aoga e uiga i le avea ma tama amiotonu mai le matafaioi a le Faaola o lo tatou Leoleo Mamoe Lelei.

• O le a se mea e ono manaomia e alii e “tuuina atu” (fuaiupu 15), pe lafoai, e faataunuu ai o latou tiutetauave paia o ni tamā? (Mafaufau e faasoa atu le saunoaga lea a Elder Christofferson e avea o se vaega o le talanoaga: “Ia tatou [alii] faataatia ese manatu soonafai o le fevaevaeai ma le manatu ifo faapito i le aganuu o nei ona po ma mafaufau muamua i le fiafia ma le soifua manuia o isi” [“Tama e,” Liahona, Me 2016, 96].)

Ina ia fesoasoani i tagata aoga e faailoa nisi mataupu faavae mai faataitaiga a le Tama Faalelagi ma Iesu Keriso, faatulaga tagata aoga i ni vaega toalaiti ma tofi se taitai mo vaega taitasi. Valaaulia tagata aoga e talanoa e uiga ia latou galuega atofa i le gaoioiga o le “Tusifaamaumau Ou Manatu” o loo i le vaega 1 o anomea mo sauniuniga e fai ma vaega o la latou talanoaga.

A uma ua lava se taimi, fai i ni nai tagata aoga e faasoa mai i le vasega mea na latou talanoaina i a latou vaega. E mafai ona e valaaulia se tagata aoga e fai ma tusiupu ma lisi i luga o le laupapa mataupu faavae nei.

Ua i ai i tama se tiutetauave paia e puipui o latou aiga.

Valaaulia tamaiti aoga e galulue i vaega toalaiti lava e tasi mo le gaoioiga lea. Tuu atu i le afa o taitai o vaega se kopi o le “Tufaaga a le Vaega A” ma le isi afa se kopi o le “Tufaaga a le Vaega E” Valaaulia tagata aoga e mulimuli i faatonuga o loo i tufaaga.

Tufaaga a le Vaega A---O Le Tosinaga Faalepuipuiga a se Tama Alofa ma le I Ai Atoatoa.

Anomea a le Faiaoga O Le Aiga e Faavavau---Lesona 20

Valaaulia se tasi o se vaega e faitau leotele le saunoaga a Peresitene M. Russell Ballard i le vaega 2 o anomea mo sauniuniga. Ona fesili lea i lau vaega:

• O a ni nai auala e mafai e se tamā ona faataunuu ai lona tiutetauave paia e puipui lona aiga?

Faasoa atu i lau vaega le saunoaga lea a Elder D. Todd Christofferson: “O tamā e tulagaese ma e le mafai ona suia” (“Tama,” Liahona, Me 2016, 93). Ona fesili lea i lau vaega:

• E faapefea ona “tulaga ese ma lē masuia” tamā? (Atonu e te manao e faasino tamaiti aoga i aoaoga o loo i le vaega 2 o anomea mo sauniuniga a o latou talanoaina lenei fesili.)

• O a ni auala ua faamanuiaina ai oe ma puipuia e le alofa ma le auai ai o se tamā amiotonu po o se ua avea ma tamā i lou olaga?

© 2022 Puletaofia e le Intellectual Reserve, Inc. Ua taofia aia tatau uma.

Tufaaga a le Vaega A---O Le Tosinaga Faalepuipuiga a se Tama Alofa ma le I Ai Atoatoa

Tufaaga a le Vaega E---Puipuia o Aiga e ala i Faaaliga Paia ma le Mana o le Perisitua

Anomea a le Faiaoga O Le Aiga e Faavavau---Lesona 20

Toeiloilo faatasi le Mataio 2:13–15, ma vaavaai pe na faapefea ona puipuia e Iosefa ia Maria ma Iesu.

• O le a se mea e mafai ona tatou aoao mai i lenei tala e uiga i le mea e mafai e tamā ona maua mai ai le fesoasoani e taiala ai ma puipuia o latou aiga? E mafai faapefea ona fesoasoani faaaliga i tamā i o tatou aso?

Valaaulia se tasi o se vaega e faitau leotele ia saunoaga a Peresitene Boyd K. Packer ma Peresitene Russell M. Nelson i le vaega 3 o anomea mo sauniuniga. Ona fesili lea i lau vaega:

• O le a se mea o tumatila mai ia te oe i nei faamatalaga, ma aisea?

• O faapefea ona puipuia oe e faaaliga paia po o le mana o le perisitua o se tamā amiotonu po o se ua avea ma tamā i lou olaga?

© 2022 Puletaofia e le Intellectual Reserve, Inc. Ua taofia aia tatau uma.

Tufaaga a le Vaega E---Puipuia o Aiga e ala i Faaaliga Paia ma le Mana o le Perisitua

A ua lava se taimi, valaaulia se tagata aoga e toatasi sa suesue e lana vaega le “Tufaaga a le Vaega A” ma se tagata aoga e toatasi sa suesue e lana vaega le “Tufaaga a le Vaega E” e faasoa mai mea sa latou aoaoina mai a latou talanoaga. Ina ia faaopoopo i mea na aoaoina e tagata aoga, mafaufau e faasoa atu se faataitaiga pe na faapefea ona faamanuiaina oe ma puipuia e le alofa, auai, faaaliga paia, po o le mana o le perisitua o se tamā amiotonu po o se ua avea ma tamā i lou olaga. (Pe, e mafai foi ona e faasoaina se faataitaiga mai le soifuaga o Elder Gary E. Stevenson o le Korama a Aposetolo e Toasefululua. Na maua e le tamā o Elder Stevenson se lapataiga mai le Agaga na puipuia ai Elder Stevenson mai se gata a o talavou o ia [tagai i le Robert D. Hales, “Elder Gary E. Stevenson: An Understanding Heart,” Ensign, June 2016, 26].)

Atonu e te manao e faamatala faapea o le avea ai o se paaga tutusa i le faaipoipoga, e fefaasoaai e ava ma tina le tiutetauave e puipuia o latou aiga. E ao ona galulue tane ma ava ma fefautuaai faatasi a o latou faataunuuina lenei tiute paia.

Tuu i le vasega se taimi e manatunatu ai i fesili nei ma tusifaamaumau soo se uunaiga latou te maua (atonu e te manao e faaali ia fesili):

• O le a se mea e mafai ona e faia e alofa atili ai ma puipuia lou aiga ma isi?

• E mafai faapefea ona e lagolagoina alii i lou olaga i le avea ai ma e agavaa e puipuia o latou aiga ma isi?

• E mafai faapefea ona fesoasoani le Alii ia te oe i nei taumafaiga?

Ina ia faaiu le lesona, e mafai e oe po o se tagata aoga ona molimau atu i le taua o tamā ma le manaomia ona latou mulimuli i faataitaiga a le Tama Faalelagi ma Iesu Keriso i le faataunuuina o o latou tiutetauave paia i le aiga.

Mo Le Isi Taimi

Mafaufau e fautuaina tagata aoga e mafaufau i a latou fanau i le taimi nei po o le lumanai a o latou suesueina le anomea mo sauniuniga mo le vasega e sosoo ai. E mafai foi ona e fai i tagata aoga e manatua taimi a o laiti ina ua latou lagonaina le alofa, manaomia ona aoaiina, pe aoao e auauna atu i isi.