Lesona 18 Anomea a le Faiaoga

Saunia mo Manaoga Faaletino

Ua tuuina e le Alii i matua le tiutetauave o le saunia o mea mo manaoga faaletino o a latou fanau. I lenei lesona, o le a vaili ai e tagata aoga pe mafai faapefea e le ola tutoatasi ona faaleleia ai o latou tomai e faataunuu lenei tiutetauave. O le a valaaulia foi tagata aoga e filimaoti pe mafai faapefea ona latou faaleleia a latou taumafaiga e ola i mataupu faavae poto o mea tautupe.

Fautuaga mo le Aoao Atu

O matua e nafa ma le saunia mo manaoga faaletino o o latou aiga.

Faaali le upumoni lea i luga o le laupapa: Ua i ai i matua se tiute paia e saunia mea mo manaoga faaletino a a latou fanau (tagai i le “O Le Aiga: O Se Folafolaga i le Lalolagi,” ChurchofJesusChrist.org).

• O a ni ou lagona po o ni fesili e uiga i lenei tiute paia?

• O a ni mea o e faia i le taimi nei e saunia ai pe faataunuuina lenei tiute?

Tusi le upu ola tutoatasi i luga o le laupapa. Valaaulia tagata aoga e lisi upu i luga o le laupapa e faamatala ai se tasi ua ola tutoatasi. Fai i ni nai tagata aoga e faasoa mai pe aisea ua latou filifilia ai na upu.

• Aisea e taua ai mo i tatou le atiina ae o le ola tutoatasi? (E avea o se vaega o lenei talanoaga, e mafai ona e faaaogaina ia aoaoga i le Mataupu Faavae ma Feagaiga 75:28–29 ma isi aoaoga i le vaega 1 o anomea mo sauniuniga. Ona mafai lea ona e fesoasoani i tagata aoga e faailoa mai upumoni e pei o nei: O le galue ma le filiga e fesoasoani i matua e ola tutoatasi ma saunia mea mo manaoga faaleagaga ma faaletino a o latou aiga. O le atiina ae o le ola tutoatasi e fesoasoani ia i tatou e avea atili ai e faapei o le Faaola. O le ola tutoatasi e faateleina ai lo tatou tomai e auauna atu ai i isi.)

Faaleleia o Lo Tatou Aoao Atu ma le Aoao Mai

Faalogologo totoa i manatu ma tali a tagata aoga. O nisi taimi e popole tele faiaoga po o le a le isi mea e fai atu ai pe fai, ae latou te le gauai atu i mea o loo fai mai ai tagata o le vasega. E ala i le matau ma faalogo atu ma le faaeteete i tagata o le vasega, e mafai ai e faiaoga ona iloatino o latou manaoga ma taiala le talanoaga i lalo o le taitaiga a le Agaga Paia. Ia naunau e fetuunai le fuafuaga o lau lesona e talanoaina ai fesili,manaoga, ma popolega o au tagata aoga.

Filifili mai fesili nei ia fesili e sili ona talafeagai ma au tagata aoga, ma talanoaina faatasi o se vasega po o ni vaega toaitiiti:

• O le a sou manatu e faapefea ona fetaui lelei le ola tutoatasi i le fuafuaga a le Tama Faalelagi?

• O a ni aafiaga na fesoasoani ia te oe e talisapaia ai le taua o le galue ma le filiga? O a ni faamanuiaga ua e oo i ai mai le galue malosi? (Mafaufau e toeiloilo faatasi le saunoaga a Elder D. Todd Christofferson i le vaega 2 o le anomea mo sauniuniga.)

• O a penefiti e mafai e le aotauina ona aumaia ia i tatou ma o tatou aiga? E mafai faapefea ona fesoasoani ia i tatou ia avea atili ai e faapei o le Atua?. (Afai e manaomia, tagai i le aoaoga e uiga i aoga i le vaega 2 o anomea mo sauniuniga ia loloto le talanoaga.)

• Na faapefea ona fesoasoani le Alii ia te oe, pe e mafai faapefea ona Ia fesoasoani ia te oe, e atiae se talitonuga filiga o le galue pe ia maua le aotauina atili? (A o talanoaina lenei fesili, fuafua e faaali le vitio “Wagner’s Story” [2:05], o loo aofia ai i le vaega o le “Want More?” vaega o le anomea mo sauniuniga.)

Faamatala e faapea, ina ia taiala ma faamanuiaina Ana fanau, na tofia e lo tatou Tama Faalelagi ni tiutetauave patino i tama ma tina. Tusi pe faaali atu le faamatalaga lenei i luga o le laupapa: O le mamanu faalelagi, o tama e nafa ma le tuuina atu o mea e tatau ai o le olaga mo o latou aiga (tagai i le “O Le Aiga: O Se Folafolaga i le Lalolagi”).

Fesoasoani ia malamalama tagata aoga e faapea, ona e eseese ia tulaga o ulugalii ma aiga, o nisi taimi, e taufai manaomia ai le tama ma le tina ona faigaluega e saunia ai mea autu e tatau ai mo lo latou aiga.

• O a mea ua e aoao mai le fautuaga a Peresitene M. Russell Ballard e uiga i le ala e mafai ai e se tane ma se ava ona faia nei ituaiga o faaiuga? (Fuafua e valaaulia tamaiti aoga e toe faamanatu le saunoaga a Peresitene Ballard i le vaega 2 o anomea mo sauniuniga.)

• O a ni ou lagona e uiga i lenei fautuaga? (E avea o se vaega o lenei talanoaga, mafaufau e aotele le tusiga “Striving to Become an Intelligent and Noble Mother” [Lilian Pagaduan-Villamor, Ensign, Aug. 2018, 16–17]. (O loo aofia lenei tusiga i le vaega o le “E Te Manao i Nisi Mea?” o anomea mo sauniuniga.)

Molimau atu o le a taiala le Tama Faalelagi i tagata aoga i o latou tulaga uiga ese a o latou suesue i aoaoga a perofeta ma fefautuaai faatasi ma o latou toalua ma Ia.

O mataupu faavae o le puleaina ma le poto o mea tautupe e mafai ona taialaina i tatou i le sauniaina o mea mo o tatou aiga.

Valaaulia tamaiti aoga e toe iloilo faapuupuu ia mau na latou filifilia mo le gaoioiga suesue i le vaega 3 o le anomea mo sauniuniga. (Atonu e te manaomia ona tuu atu i tagata aoga se taimi e toeiloilo ai nisi o fuaitau.)

Faatulaga le vasega i paga po o vaega laiti. Valaaulia i latou e fefaasoaai mataupu faavae tautupe sa latou aoaoina mai nei mau ma ia talanoaina le fesili lenei (atonu e te manao e faaali pe tusi le fesili i luga o le laupapa):

• E mafai faapefea e le faaaogaina o nei mataupu faavae poto o mea tautupe ona faamanuiaina oe lava ia po o lou aiga?

O se lisi lenei o mataupu faavae e mafai e tagata aoga ona faailoa mai mau o loo tuuina atu i le anomea mo sauniuniga:

• Usitai i le tulafono o sefuluai ma taulaga (tagai i le Malaki 3:8–10).

• Taumamao mai le tuu atu o lou loto i ’oa o le lalolagi (tagai i le Mataio 6:19–21).

• Faaaoga se paketi ma fuafua ma le poto (tagai i le Luka 14:28–30).

• Ia faamalieina oe i mea ua ia te oe (tagai i le 1 Timoteo 6:6–10).

• Saili le Atua ae e te lei sailia nei ’oa, ma afai e te sailia ’oa, ia saili mo faamoemoega amiotonu (tagai i le Iakopo 2:18–19).

• Faaaoga ou faamanuiaga faaletino e fesoasoani ai i e matitiva ma e le tagolima (tagai i le Mataupu Faavae ma Feagaiga 104:13–18).

• Totogi uma aitalafau (tagai i le Mataupu Faavae ma Feagaiga 104:78).

A uma ua lava se taimi, valaaulia ni nai tagata aoga e faasoa mai i le vasega ia mataupu faavae sa latou faailoaina. Ona tusi lea pe faaali i luga o le laupapa le mataupu faavae lenei: O le faaaogaina o mataupu faavae poto o mea tautupe, e mafai ai e tagata taitoatasi ma aiga ona faaleleia atili o latou lava tulaga mautu tautupe ma fesoasoani ai ia i latou e le tagolima.

• O anafea na e iloa ai pe iloa e lou aiga ia faamanuiaga mai le faaaogaina o mataupu faavae poto o mea tautupe?

• O le a se mea e mafai ona tatou aoao mai e uiga i le Alii ma Lona tagata mai le mea moni ua Ia tuuina mai ia i tatou nei ituaiga o mataupu faavae tautupe?

Mafaufau e tuu atu i tagata aoga se taimi e tomanatu ai i mea sa latou aoaoina e uiga i le ola tutoatasi, atiina ae talitonuga o le galue ma le filiga, maua le aotauina po o aoaoga faamasani faapolofesa, ma faaaoga nei mataupu faavae poto o mea tautupe. Valaaulia tagata aoga e tusi se mea se tasi e mafai ona latou amata ona fai, pe faifai pea, e faamalolosia ai lo latou ola tutoatasi ma a latou taumafaiga e ola ai i nei mataupu faavae. (E avea o se vaega o lenei gaoioiga, e mafai ona e valaaulia tagata aoga e toeiloilo mea sa latou tusia e tali ai i le uunaiga i le “Faamaumau Ou Manatu” i le vaega 3 o le anomea mo sauniuniga.)

Faaiu e ala i le faasoa atu o lau molimau e uiga i le finagalo o le Alii e fesoasoani ia i tatou e saunia mo o tatou manaoga faaletino.

Mo Le Isi Taimi

Valaaulia tamaiti aoga e mafaufau pe o a mea latou te talisapaia e uiga i o latou tina po o e ua avea ma tina i o latou olaga. Fautuaina i latou e mafaufau i le taua o tina a o latou suesue i le anomea mo sauniuniga mo le lesona 19. E mafai ona e valaaulia le vasega e tusi se faamatalaga o le agaga talisapaia i o latou tina po o se tina.