“Lesona 15 Anomea mo le Sauniuniga o le Vasega: O Le Poloaiga ia Fanafanau ma Uluuluola i le Lalolagi,“ Anomea a le Faiaoga O Le Aiga e Faavavau (2022)
“Lesona 15 Anomea mo le Sauniuniga o le Vasega,” Anomea a le Faiaoga O Le Aiga e Faavavau
Lesona 15 Anomea mo Sauniuniga o le Vasega
O Le Poloaiga ia Fanafanau ma Uluuluola i le Lalolagi
O a ni ou faamoemoega po o popolega e uiga i le faia o se fanau? A o e suesueina anomea nei, tatalo ia loloto lou malamalama i faamoemoega paia ua faataunuuina i le fuafuaga a le Tama Faalelagi pe a filifili tane ma ava e fai ni fanau. Mafaufau pe mafai faapefea e se tane ma se ava ona galulue i le faatuatua e faamamaluina le poloaiga faalelagi ia fanafanau ma uluola i le lalolagi.
Vaega 1
O le a le vaega o le i ai o se fanau e fai i le fuafuaga o le faaolataga a le Tama Faalelagi?
Mafaufau e uiga i manatu eseese na e faalogo o faaali mai e tagata e uiga i le i ai o se fanau. Na faasoa mai e Elder Neil L. Andersen o le Korama a Aposetolo e Toasefululua se manatu o se tasi o tina:
O le tele o leo i le lalolagi i le taimi nei o loo tuuitiitia ai le taua o le fanauina o se fanau pe o fautua mai ina ia tolopo pe faaitiitia ia fanau i totonu o se aiga. Talu ai nei na faasino ai au e la’u fanau teine i se uepisaite na tusia e se tina Kerisiano (e le auai i le tatou faatuatuaga) e toalima le fanau. Sa ia faaalia ai ni ona manatu: ‘[O le tuputupu ae] i lenei aganuu, ua matua faigata ai ona maua se vaaiga faaletusipaia e uiga i le tulaga faatina. … O fanau e matuai maualalo lava i le faasologa nai lo le kolisi. E mautinoa lava le i lalo ifo o le femalagaaiga i le lalolagi. E maualalo ifo i le tatau ona o e eva ma tafafao i po. E maualalo ifo i le faamanaia o lou tino i le falekoleni. E i lalo ifo o soo se galuega e te mauaina pe faamoemoe e maua.” Ona ia faaopoopo mai lea: “O le avea ma tina e le o se mea e te faifaia e te tafao ai, o se valaauga. E te le faaputuputuina tamaiti ona e te manatu e aulelei atu nai lo o faailogatusi. E le o se mea e te faia pe a mafai ona e faaofiofi i ai se taimi. O se mea na avatu e le Atua ia te oe le taimi e fai ai” [Rachel Jankovic, “Motherhood Is a Calling (and Where Your Children Rank),” Iulai 14, 2011, desiringgod.org]. (“Fanau,” Liahona, Nov. 2011, 28)
Ina ua mae’a ona foafoaina e le Atua ia Atamu ma Eva ma tuufaatasia i la’ua i le feagaiga fou ma tumau faavavau o le faaipoipoga, na Ia tuu atu ia i la’ua se poloaiga.
Suesue e Sauniuni ai mo le Vasega
Faitau le Kenese 1:27–28, ma mafaufau e uiga i le taua o lenei mea ua avea ma uluai poloaiga na tuu atu e le Atua ia Atamu ma Eva.
Ua faamamafa mai e perofeta o Aso e Gata Ai, “O le uluai poloaiga na tuuina e le Atua ia Atamu ma Eva, e faatatau i lo la agavaa mo le tulaga faamātua, o se tane ma se ava. Matou te folafola atu o le poloaiga a le Atua i Ana fanau ia fanafanau ma uluuluola i le lalolagi, o loo tumau pea ona faamalosia” (“O Le Aiga: O Se Folafolaga i le Lalolagi,” ChurchofJesusChrist.org).
Mafaufau pe aisea ua manaomia ai ona toe faamautuina lenei poloaiga i o tatou taimi. Na aoao mai e Peresitene Dallin H. Oaks o le Au Peresitene Sili e faapea, “O le fouvalega aupito sili ona malosi a Satani ua faasaga tonu lea i soo se mea e silisili ona taua i le fuafuaga a le Atua.” O lenei fouvalega e aofia ai le saili e “faalotovaivaia mai le fanauina o fanau---aemaise i matua o le a tausia fanau i le upumoni“ (“Upumoni ma le Fuafuaga,” Liahona, Nov. 2018, 27).
O le talalelei a Iesu Keriso e faamanuiaina ai i tatou i se vaaiga faalelagi e uiga i le taua o fanau (tagai, mo se faataitaiga, Salamo 127:3 ma le Mataio 19:13–15). Na aoao mai Elder Andersen:
O se faamanuiaga maoae mo se tane ma se ava le fanauina o ni fanau ina ia maua ni tino faaletino o nei fanau agaga a le Atua.
Pe a fanau mai se tamaitiiti i se tane ma se ava, ua la faataunuuina se vaega o le fuafuaga a lo tatou Tama Faalelagi i le aumaia o fanau i le lalolagi. Sa fetalai mai le Alii, “O la’u galuega ma lo’u mamalu lenei—ia aumaia le tino ola pea ma le ola faavavau o le tagata” [Mose 1:39], A o le’i oo mai le tino ola pea, e tatau ona i ai le tino faaletino. (“Fanau,” 28)
Na aoao mai e Peresitene M. Russell Ballard o le Korama a Aposetolo e Toasefululua e faapea, o le mauaina o fanau o se vaega o le faamoemoega o le olaga faitino.
O le faamoemoega o le olaga faitino ia avea atili ai faapei o le Atua e ala i le mauaina o ni tino faaletino, faaaoga le faitalia, ma le amataina o ni matafaioi lea sa i ai muamua i na o matua faalelagi—matafaioi o le tane, ava, ma matua.
… O se faamoemoega taua se tasi o le olaga faitino o le mafai lea ona tatou toe fausia lena aafiaga faaleaiga e i tatou lava, i le taimi la lenei o ni matua nai lo le na o ni fanau. …
E finagalo le Tama Faalelagi ia tatou … usiusitai i Lana poloaiga muamua e “fanafanau, ma uluola”---e le gata ina ia faataunuu ai Lana fuafuaga ae ia maua foi le olioli lea na mamanu ai Lana fuafuaga e tuuina mai i Ona atalii ma afafine. (“O Avanoa ma Tiutetauave a Faiaoga o le OAE i le Seneturi 21“ [o se faasauga ma se Pulega Aoao, Fep. 26, 2016], broadcasts.ChurchofJesusChrist.org).
Talanoa i Sauniuniga mo le Vasega
Talanoa i fesili nei ma se tasi e i ai se fanau. Afai ua e faaipoipo, ma ua i ai sau fanau, mafaufau e talanoaina nei fesili ma lou toalua.
-
O le a se mea ua e aoaoina e uiga i le Tama Faalelagi mai ou aafiaga o se matua?
-
Ua faapefea ona faamanuiaina ai lou olaga i le avea ai o se matua? (Mafaufau e aoao pe mafai faapefea e isi ulugalii faaipoipo ona tali i le fesili lenei e ala i le matamataina o le vitio “Having Children Enriches Your Life” [4:30].)
4:30
Vaega 2
E mafai faapefea e i ma’ua ma lo’u tolua ona filifili i le taimi e faia ai se fanau ma pe toafia se fanau e maua?
E feagai ulugalii faaipoipo ma fesili taua e uiga i le taimi e faia ai ni fanau ma pe toafia foi e maua.
Suesue e Sauniuni ai mo le Vasega
Faitau le Alema 37:37, ma vaavaai mo fautuaga e mafai ona fesoasoani i se ulugalii faaipoipo i le faia o nei faaiuga.
Sa saunoa Elder Andersen i le taua o le fefautuaai ma le Alii i le faia o nei faaiuga:
O le taimi e fanau ai se tamaitiiti ma pe toa fia foi le aofai o le fanau o ni faaiuga faalilolilo lea e faia i le va o se tane ma le ava ma le Alii. O ni faaiuga paia ia—o ni faaiuga e ao ona faia ma se tatalo faamaoni ma galue i ai ma le faatuatua tele. …
Uso e ma tuafafine, e le tatau ona tatou ola faamasinosino le tasi i le isi i lenei tiutetauave paia ma le patino. (“Fanau,” 28, 30)
O nisi tagata e naunau ma le amiotonu ia maua fanau atonu e le maua le avanoa e faaipoipo ai i lenei olaga. E tusa ai ma lena mea, na aoao mai ai Elder Andersen:
O le fanauina o se fanau e … mafai foi ona avea ma se mataupu e nutimomoia ai le loto mo ulugalii amiotonu o e ua faaipoipo ae iloa ifo e le mafai ona maua sa laua lava fanau na la faamoemoeina ma le naunautai pe mo se tane foi ma le ava o e fuafua ia maua se aiga toatele ae e faamanuiaina i se aiga toalaiti.
Tatou te le o mafai ona faamatalaina i taimi uma ia faigata o lo tatou olaga faaletino. O nisi taimi ua foliga mai ua le talafeagai le olaga—aemaise lava pe afai o lo tatou naunautaiga sili o le faia o le mea tonu lava lea ua poloai mai ai le Alii. I le avea ai ma auauna a le Alii, ou te faailoa atu ia te outou o lenei folafolaga e mautinoa: “O tagata faamaoni o le ekalesia o ē e le faatagaina e o latou tulaga i latou ina ia maua ia faamanuiaga o le faaipoipoga e faavavau ma le tulaga faamatua i lenei olaga, o le a mauaina faamanuiaga folafolaina uma i le faavavau, pe afai latou te tausia feagaiga sa latou osia ma le Atua” [Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 38.1.4, ChurchofJesusChrist.org]. (“Fanau,” 30)
Mafaufau Loloto i Tapenaga mo le Vasega
Aisea e taua ai mo tane ma ava ona fefautuaai ma le Tama Faalelagi e faatatau pe o afea e faia ai ni fanau ma pe toafia foi se fanau e maua?
Vaega 3
E mafai faapefea e le malamalama i le paia o le ola i le fuafuaga a le Atua ona tosina ai a tatou filifiliga?
E ala mai i perofeta soifua, ua faamamafa mai ai e le Alii le paia o le ola o le tagata ma mea e i ai le aia o tamaiti uma, e aofia ai fanau e lei fananau mai:
Matou te faamaonia le paia o le ola ma lona taua i le fuafuaga e faavavau a le Atua. …
… E tatau ona fanauina fanau i totonu o feagaiga o le faaipoipoga, ma ia tausia e se tamā ma se tina o ē ua faamamaluina ma le faamaoni atoatoa feagaiga faaleulugalii. (“O Le Aiga: O Se Folafolaga i le Lalolagi”)
E tusa ai ma le paia o le ola, na aoao mai ai Peresitene Russell M. Nelson:
E leai se tasi e mafai ona opoina se pepe meamea ta’umamaina, ma vaavaai atu i na mata matagofie, tagotago i tamatamailima laiti, ma kisi atu i alafau o lena pepe e aunoa ma le migao loloto mo le ola ma mo lo tatou Foafoa. O le ola e maua mai le ola. E le o se mea faafuasei. O se meaalofa mai le Atua. (“Faapau Pepe: O se Faaoolima i E le Mafai ona Tali Mai,” Ensign, Oke. 2008, 37)
O le tautinoga i le folafolaga i le aiga o loo talanoa tetee i faiga eseese ua talia lautele i le taimi nei, e pei o le faapau pepe ma le fanauina o fanau i fafo atu o le faaipoipoga. E tusa ai ma le faapau pepe, i le tele o vaega o le lalolagi, o le faapau pepe ua taliaina, ma e faitau miliona pepe e faapauu i tausaga taitasi.
Ua saunia e taitai o le Ekalesia ia faatonuga nei e uiga i le faapau pepe:
Na poloai mai le Alii, “Aua e te “ fasioti tagata, pe e te faia soo se mea faapena” (Mataupu Faavae ma Feagaiga 59:6). E tetee le Ekalesia i le filifiliga o le faapa’ū pepe mo le faamalieina faaletagata lava ia pe faaagafesootai. E lē tatau i tagata o le Ekalesia ona gauai atu, faatino, pe fuafuaina, totogi, ioe i ai, pe fautuaina le faapa’ū o se pepe. E na o le pau se tuusaunoaga pe afai:
O le ma’itaga na mafua mai i le fai’aiga faamalosi po o le toe ui i fanau.
Ua tonu i se fomai atamai faapea e lamatia ai le ola po o le soifua maloloina o le tina.
Ua tonu i se fomai atamai faapea ua i ai ni faaletonu matuia i le pepe e le’i fanau ma o le a lē ola pe a fanau mai.
E oo lava foi i nei tuusaunoaga e le otometi ai ona faamaonia le faapa’ū o se pepe. O le faapa’ū pepe o se mataupu ogaoga ma e tatau ona iloiloina mae’ae’a lelei pe afai ua mae’a ona feūtaga’i ia tagata o loo fitoitonu i ai ma o latou epikopo ma mauaina le faamaoniga faalelagi e ala i le tatalo. Tusitaulima Aoao, 38.6.1)
E filifili e nisi o matua e lei faaipoipo le faapau pepe ona latou te manatu e le mafai ona maua mea mo le la tamaitiiti faatasi ai ma le “sootaga malupuipuia, faafailele, ma le faifai pea” na te manaomia. I lea tulaga, o le vaetamaina e mafai ona avea o se faaiuga le manatu faapito, ma alofa lea e faamanuiaina ai le tamaitiiti, matua moni, ma matua ua vaetamaina i lenei olaga ma le faavavau atoa” (First Presidency statement, Oke. 4, 2006, e pei ona taua i le Ensign,Oke. 2008, 37).
Mafaufau Loloto i Tapenaga mo le Vasega
O le a se mea na e aoaoina mai aoaoga a lenei vaega e uiga i lo tatou Tama Faalelagi? E mafai faapefea ona e faaaogaina mea ua e iloa e uiga i le fuafuaga a le Atua e faamatala ai pe aisea e feteenai ai i Lona finagalo le “filifili e faapau se pepe mo le faafaigofieina mo le tagata lava ia pe faaleagafesootai“? (Tusitaulima Aoao, 38.6.1).