Lesona 2 Anomea a le Faiaoga

O Le Matafaioi a Perofeta i le Folafolaina o le Aoaoga Faavae Autu o le Aiga e Faavavau

“O Le Aiga: O Se Folafolaga i le Lalolagi” e faapea lona amataga: “O i matou, o le Au Peresitene Sili ma le Aufono a Aposetolo e Toasefululua o le Ekalesia a Iesu Keriso o le Au Paia o Aso e Gata Ai, matou te tautino atu ma le faamaoni …” (ChurchofJesusChrist.org). O le a fesoasoani lenei lesona i tagata aoga e malamalama ai i le tiutetauave paia o ni tagatavaai e folafolaina le finagalo o le Alii ma lapataia mai taufaamata’u i lo tatou soifua manuia faaleagaga. O le a maua e tagata aoga se avanoa e faamautinoa ai pe latou te mafaia faapefea ona faaaoga le onosai sili atu ma le faatuatua i le Alii a o latou saili e faalogo atu ma usitai i aoaoga a Ana perofeta soifua e uiga i le faaipoipoga ma le aiga.

Fautuaga mo le Aoao Atu

Ua valaauina e le Alii ia perofeta e galulue o ni tagatavaai i luga o le ‘olo.

Faaali le fesili lenei a o lei amataina le vasega:

• Aisea o le a filifili ai perofeta e talanoaina autu faigata ma talanoa faasagatau atu ai i faiga faaleagafesootai ua taliaina, ma e iloa ai o a latou upu o le a le fiafia ai nisi tagata?

Amata le vasega e ala i le fesili atu i tamaiti aoga i o latou mafaufauga e uiga i le fesili. E avea o se vaega o le tou talanoaga, e mafai ona e faitauina ma tagata aoga le faamatalaga a Peresitene Nelson mai le vaega 1 o anomea mo sauniuniga.

• E faapefea ona e aoteleina mea na aoao mai e Peresitene Nelson? (Fesoasoani i tagata aoga e faailoa mai upumoni e pei o nei: Ua faaalia e le Atua Lona alofa e ala i le valaauina o perofeta e lapatai ma puipuia i tatou. E faaalia e perofeta latou te amanaia tagata uma e ala i le aoao atu o upumoni.)

• Na faapefea ona e lagonaina le alofa o le Atua e ala i lapataiga, faasa’oga, ma fautuaga a perofeta soifua? (Mafaufau e faasoa atu lau molimau e uiga foi i lenei mea.)

Faaali se tasi o ata o se tagatavaai o loo maua i le anomea o sauniuniga, ma tuu i tagata aoga se taimi e toeiloilo ai le Esekielu 3:17–19.

• E faapefea ona faapei perofeta o tagatavaai i luga o se olo?

E mafai ona e uuina i luga se kopi o le folafolaga i le aiga ma fesili:

• E faapefea i le tuuina mai o le folafolaga i le aiga ona faapupula ai matafaioi a perofeta o ni tagatavaai i luga o le ‘olo? (E mafai ona e valaaulia tamaiti aoga e toeiloilo le saunoaga a Peresitene Gordon B. Hinckley ma le fuaitau mai le talaaga a Peresitene Russell M. Nelson i le vaega 2 o anomea mo sauniuniga.)

Ua poloaiina i tatou e le Alii e mulimuli i perofeta i le onosai ma le faatuatua.

E mafai ona e valaaulia tamaiti aoga e lisi mai ni nai mafuaaga na filifili ai e tagata i aso anamua e aua nei tali atu i se lapataiga a se tagatavaai.

Mafaufau e faasoa atu le ata faataitai lenei (pe fatufatu se tasi e sili ona talafeagai ma au tamaiti aoga) ma valaaulia le vasega e tali atu i fesili o loo mulimuli mai.

Na aoaoina Jorge i le aoaoga faavae o loo i ai i le folafolaga i le aiga talu mai lona laitiiti. Ae e talitonu nisi o ona tausoga vavalalata ma nisi o ana uo e faapea e papa’u aoaoga ma e le ogatusa ma nisi o filifiliga o tifiga o le olaga. Na talafeagai nisi o mea na latou fai atu ai ia Jorge. Ua taumanatunatu o ia pe ua le o toe aoga le folafolaga.

• O a ni ou mafaufauga e uiga i le tulaga o Jorge?

• O a ni tosinaga e mafai ona faafaigata ai mo tagata ona talia nisi o aoaoga i le folafolaga i le aiga?

Valaaulia tamaiti aoga e faitau pe toeiloilo le Mataupu Faavae ma Feagaiga 21:4--6. Faamanatu i ai o nei fuaiupu e faasino i le Perofeta o Iosefa Samita ma, pe a faalautele, e mafai ona faatatau i le Peresitene o le Ekalesia o i ai nei.

• O le a sou manatu i le uiga o le mauaina o upu a le perofeta “i le onosai uma ma le faatuatua” (fuaiupu 5)?

• E faapefea ona e aoteleina folafolaga a le Alii ia i latou o e maua ma uai atu i upu a Ana perofeta i le onosai ma le faatuatua? (E mafai ona e fesosoani i tamaiti aoga e faailoa mai se mataupu faavae e pei o lenei: Afai tatou te uai atu i upu a le perofeta, o le a faamanuia i tatou e le Alii ma tafiesea ai mana o le pouliuli.)

Faaleleia o Lo Tatou Aoao Atu ma le Aoaoina

fesoasoani i tagata aoga ia mauaina se aoaoga loloto atu. A o e aoao atu, taulai atu i mea e tatau e tamaiti aoga ona iloa ma fai e valaaulia ai faaaliga patino ma le liua loloto. E mafai faapefea ona e fesoasoani ia i latou e fausia mea ua uma ona latou iloa? E mafai faapefea ona ou fesoasoani ia i latou ia avea ma ni tagata aoao mataalia ma ia saofagā i le aoaoina o isi? E mafai faapefea ona e avatu ia i latou avanoa e iloa ai uunaiga mai le Agaga Paia?

Ina ia fesoasoani i tamaiti aoga e mafaufau i faataitaiga o lenei mataupu faavae, avatu i ai ni nai minute e faitau ai pe iloilo le tala faatusipaia sa latou filifilia mai le vaega 3 o anomea mo sauniuniga. E mafai ona e vavae le vasega i ni nai vaega toalaiti ma valaaulia tagata aoga e talanoaina a latou tali i fesili i le gaoioiga i le vaega 3 o le “Tusifaamaumau Ou Mafaufauga”. A leai, valaaulia tamaiti aoga e talanoaina a latou tali o se vasega.

E mafai foi ona e valaaulia vaega e talanoa e uiga i fesili uma po o nisi o fesili nei (pe e mafai foi ona outou talanoaina o se vasega):

• I lou lava olaga, o le a se mea na fesoasoani ia te oe e te uai atu ai iupu a perofeta a le Alii i le onosai ma le faatuatua? O le a se mea ua e iloa e uiga i le Alii e mafai ona e tali faapea atu ai i upu a Ana perofeta?

• O anafea na e lagonaina ai ua faamanuiaina oe pe tafiesea le pogisa ona o lou onosai ma le faatuatua i le uai atu i upu a perofeta?

• O le a se fautuaga lata mai nei na tuuina mai e le Alii e ala i Ana perofeta e ono manaomia ai le onosai ma le faatuatua e maua ai ma uai atu i ai?

Faaali atu fesili nei, ma ia lava se taimi e tuu atu i tamaiti aoga e tomanatu ai i fautuaga e sili ona fetaui ma i latou. Ia fautuaina tamaiti aoga e tusifaamaumau ma galulue i soo se uunaiga latou te maua.

• Afai e i ai se mea na aoao mai e se perofeta e uiga i le faaipoipoga po o le aiga e faigata mo au ona talia, e faapefea ona ou tali atu? O le a se mea e finagalo le Alii ou te faia i lenei tulaga?

• O faapei le fuafuaina ma le tumau ai o a’u taumafaiga e uai atu i fautuaga a perofeta a le Alii e tusa ai ma le faaipoipoga ma le aiga? O faapefea ona finagalo le Alii ia ou faaleleia atilli?

Molimau atu i upumoni o mea moni na aoao atu i lenei lesona. Faamautinoa atu i tamaiti aoga e naunau le Alii e fesoasoani atu ia i latou a o latou taumafai e uai atu i upu a perofeta i le onosai uma ma le faatuatua.

Mo Le Isi Taimi

E mafai ona e valaaulia tamaiti aoga e mafaufau pe na latou taumanatunatu pe o ai o le a avea ai i latou i se aso pe o a foi mea sa tatau ona latou faia i lenei olaga. Fautuaina tamaiti aoga e suesue ma le loto tatalo le anomea mo sauniuniga mo le isi lesona faatasi ai ma mea nei e mafaufau i ai.