Lesona 1 Anomea a le Faiaoga

Suesueina o le Aoaoga Faavae Autu o le Aiga e Faavavau

O le aoaoga faavae autu o le aiga e faatatau ia i tatou uma lava. I le lesona lenei, o le a valaaulia ai tamaiti aoga e iloilo lo latou faatuatuaga i le poto o le Tama Faalelagi ma Lana fuafuaga mo aiga. O le a mafaufauina foi e tagata aoga mea e mafai ona latou faia e fesoasoani ai e faatuina se siosiomaga o le alofa faaKeiso, magafagafa, ma le faaaloalo pe a oo ina talanoaina le aoaoga faavae autu o le aiga.

Manatua: Afai e mafai, ia faafesootai tagata aoga o e ua lesitala mo le kosi lenei a o le’i oo i le latou aso muamua o le vasega ma valaaulia i latou e suesue anomea mo sauniuniga mo le lesona muamua. Ia mautinoa ua tofu uma isi tagata aoga ma se kopi o le anomea mo sauniuniga i le amataga o le vasega. I le taimi o le talanoaga a le vasega, faaaoga anomea mo sauiuniga ina ia mafai ai ona iloa e tamaiti aoga le auala o le a fesoasoani ai ia latou saunia mo, ma faamauoaina o latou aafiaga e aoao mai ai. Ia lagona lou saoloto e faaalu se 5 i le 10 minute i le amataga o le lesona lenei e fefaamasania’i ai le tasi ma le isi ma talileleia tagata aoga i le kosi.

Fautuaga mo le Aoao Atu

E mafai ona tatou talitonuina le alofa atoatoa ma le poto o le Tama Faalelagi ma Iesu Keriso.

Ia avea o se folasaga i le kosi lenei, e mafai ona e faaali i tagata aoga le lisi o anotusi po o le silapasi mo le afa muamua o le kosi. Ina ia masani atili ma manaoga o au tamaiti aoga, valaaulia i latou e tusi se feau puupuu, e le sainia ia te oe pe o a autu e sili ona latou fiafia i ai pe fia mananao ia malamalama atili i ai. E mafai foi ona e valaaulia i latou e tusi soo se fesili latou te faamoemoe o le a fesoasoani lenei kosi e tali mo i latou. Ao mai a latou tali ma faitaulia a o e sauniuni mo lesona i le lumanai.

Faaleleia o Lo Tatou Aoao Atu ma le Aoaoina

Ia iloa manaoga ma mea e fiafia i ai tamaiti aoga. O le a lagonaina e tamaiti aoga se manaoga tele atu e aoao ai pe a latou lagonaina o loo mamanuina lesona ina ia fetaui ma o latou manaoga ma mea e fiafia i ai. Ia saunia ni avanoa mo tamaiti aoga e talanoaina ai mea latou te fiafia i ai ma fesili e uiga i le aiga. E faavae i luga o tali a tagata aoga, ia mulimuli i le Agaga e iloa ai le taimi e faamamafa ai ma talanoaina mea latou te fiafia i ai ma fesili i le taimi o le kosi.

Mafaufau e fai atu fesili nei:

• O ai ni nai tagata e te faatuatuaina, ae aisea foi?

• O le a se mea e te faatuatuaina i nei tagata?

Faatulaga le vasega i ni vaega se tolu. Tuu atu i vaega taitasi se kopi o le tufaaga lenei, ma fai i ai e mulimuli i faatonuga.

Faatuatuaina o le Tama Faalelagi ma Iesu Keriso.

Anomea a le Faiaoga O Le Aiga e Faavavau---Lesona 1

Valaaulia tagata taitasi o le vaega e faitau mai se tasi o fuaitau nei, ma vaavaai mo mea moni e uiga i le Tama Faalelagi ma Iesu Keriso ia e mafai ona fesoasoani tatou te faatuatuaina ai i La’ua: 2 Nifae 26:24; Mosaea 4:9; ma le Isaia 55:8–9. Ona talanoaina lea o fesili nei:

• O le a se mea e mafai ona tatou aoao e uiga i le Tama Faalelagi ma Iesu Keriso mai nei fuaitau? E faapefea e upumoni ua e maua ona tosina ai lou manao e faatuatuaina i La’ua?

• O anafea na e iloa pe molimauina le taua o le faatuatuaina o le Tama Faalelagi ma Iesu Keriso?

© 2022 Puletaofia e le Intellectual Reserve, Inc. Ua taofia aia tatau uma

Faatuatuaina o le Tama Faalelagi ma Iesu Keriso.

Faamalamalama faapea o se tasi o faamaoniga aupito sili o le alofa ma le poto o le Tama Faalelagi ma Iesu Keriso o le aoaoga faavae o le aiga e faavavau. O lo tatou talitonuga ia i La’ua ma i le fuafuaga a le Tama e mafai ona fesoasoani tatou te asaina vaaiga eseese o le lalolagi e uiga i mataupu faaleaiga.

Ia tuuina atu i tamaiti aoga se kopi o le “O Le Aiga: O Se Folafolaga i le Lalolagi” (ChurchofJesusChrist.org), pe fai i ai e mafai ona latou maua i le initoneti. Valaaulia tamaiti aoga e filifili ni nai parakalafa e faitau ma faailoa ia fasifuaitau o loo faamatala mai ai faamanuiaga ma le olioli e finagalo ai le Tama Faalelagi mo i latou ma o latou aiga. A ua lava loa le taimi, valaaulia tagata aoga e faasoa mai mea sa latou faailogaina ma pe aisea foi.

• E faapefea ona ogatusa ou naunauga ma le finagalo o le Tama Faalelagi mo lou aiga?

• O le a se taua o i ai iina i le faatuatuaina o le poto ma le vaaiga faavavau a le Tama Faalelagi ma Iesu Keriso i lo le poto ma le vaaiga a le lalolagi?

Molimau atu pe valaaulia tagata o le vasega e uiga i le poto ma finagalo o le Tama Faalelagi ma Iesu Keriso mo o tatou aiga i le taimi nei ma le lumanai.

E mafai ona tatou fatufatuina se siosiomaga e aoao ai e uiga i le alofa ma le faaaloalo.

Faaali se ata o lou aiga. Faasoa mai ni nai mea e te fiafia i aie uiga i lou aiga ma ni nai auala e tulagaese ai lou aiga.

Valaaulia se tagata aoga e faitau leotele le saunoaga a Elder Neil L. Andersen i le vaega 2 o le anomea mo sauniuniga.

• O le a se mea o tulagaese mai ia te oe e uiga i le mea na aoao mai e Elder Andersen? (E mafai ona e fesoasoani i tagata aoga e faailoa le upumoni lenei: Ona e eseese aiga uma, e manaomia ona tatou talanoaina le mamanu a le Alii mo aiga i se ala magafagafa ma maaleale.)

E mafai ona e valaaulia tamaiti aoga e faasoa mai mea e mafai ona latou aoao mai le faataitaiga a le Faaola o le alofa, magafagafa, ma le alofa mutimutivale mo isi o e na oo i faigata faaletagata lava ia pe o tulaga faaleaiga. (E mafai ona maua faataitaiga i le vaega o le “E Te Manao i Nisi Mea?” o anomea mo sauniuniga.)

Mafaufau e tuu atu i tagata aoga ni nai minute e tusifaamaumau ai o latou mafaufauga e uiga i le fesili lenei:

• O le a se mea e mafai ona e faia e fesoasoani ai i isi ia lagonaina le alofagia ma le faaaloalogia a o talanoaina le aiga ma isi autu maaleale? (Afai na suesue e tagata aoga le vaega 2 o le anomea mo sauniuniga, atonu ua uma ona latou tusifaamaumauina ni mafaufauga e uiga i le fesili lenei. E mafai ona tuu atu ia i latou se taimi e toe iloilo ai mea sa latou tusia.)

Valaaulia ni nai tagata aoga e faasoa mai nisi o mafaufauga sa latou tusia.

I au lava upu, atonu ia e faamatalaina ai faapea i le aluga o lenei kosi o le a talanoaina ai e tagata aoga mea moni e tele e manaomia ai le fesoasoani a le Agaga Paia ia malamalama ai. Ona o le tulagaese i tulaga faaletagata ma faaleaiga, o le a manaomia ai e tagata aoga faaaliga patino e malamalama ai i le ala e faaaoga ai ia aoaoga. Ona o nisi o lagona aupito malolosi e fesootai ma o tatou aiga, o lea e manaomia ai lo tatou tomai e aoao ai mai le tasi ma le isi ma le Agaga ia i ai so tatou siosiomaga o le alofa faaKeriso, magafagafa, ma le faaaloalo. Valaaulia tagata aoga e fai la latou vaega e saofaga ai i se siosiomaga faapena.

E mafai ona e faaiuina le vasega e ala i le faaali atu i tamaiti o le vasega le ala e maua ai anomea mo sauniuniga. Faatonu i latou e mafaufau pe faapefea e a latou suesuega faaletagata lava ia o anomea mo sauniuniga a o lei faia le vasega, ona fesoasoani i le vasega atoa e aoao atili ai i le loloto o le aoaoga faavae autu o le aiga. Valaaulia i latou e saunia ma le faamaoni mo vasega taitasi.

Mo Le Isi Taimi

Fautuaina tamaiti o le vasega ia latou suesuega mo le isi vasega e vaavaai mo le mafuaaga e taofimamau ai taitai o le Ekalesia i le aoaoga faavae mautu o le aiga o loo folasia mai i le folafolaga i le aiga, tusa lava pe faasagatau mai manatu lauiloa i lenei aoaoga faavae autu.