“Lesona 22 Anomea mo le Sauniuniga o le Vasega: Tausiaina o Fanau i le Amiotonu,” Anomea a le Faiaoga O Le Aiga e Faavavau (2022)
“Lesona 22 Anomea mo le Sauniuniga o le Vasega,” Anomea a le Faiaoga O Le Aiga e Faavavau
Lesona 22 Anomea mo Sauniuniga o le Vasega
Tausiaina o Fanau i le Amiotonu
O le tausia o fanau ia malolosi faaleagaga i le lalolagi o aso nei e mafai ona lofituina. Peitai, o se folafolaga na tuuina atu e le Faaola ia sa Nifae, e faatatau foi ia i tatou i o tatou taimi: “E aoaoina au fanau uma lava e le Alii; ma o le a tele lava le filemu o lau fanau” (3 Nifae 22:13). A o e suesueina lenei lesona, mafaufau pe mafai faapefea ona e faataunuuina lou “tiute paia e tausia [lau] fanau i le … amiotonu” (“O Le Aiga: O Se Folafolaga i le Lalolagi,” ChurchofJesusChrist.org).
Vaega 1
O le a le mea ua faamoemoeina e le Alii mai ia te au o se matua?
I le popofou o lenei tisipenisione, na aoao mai ai e Iesu Keriso ia matua e uiga i lo latou tiutetauave e tausia a latou fanau i le amiotonu. Na Ia fetalai “Ua ou poloaiina outou e “tausi a’e a outou fanau i le malamalama ma le upumoni” (Mataupu Faavae ma Feagaiga 93:40). Ona apoapoai mai lea o le Faaola i le Perofeta o Iosefa Samita ma isi taitai o le Ekalesia e faatulaga lelei o latou aiga ma ia “atili maelega ma popole i le aiga” (fuaiupu 50; tagai i fuaiupu 41–50).
E faapena foi ona faaalia mai e perofeta o Aso e Gata Ai le manaomia e matua ona faia ma le loto a latou taumafaiga e aoao atu le talalelei i o latou aiga. Ua latou faamamafaina mai foi e faapea o le aoaoina o le talalelei e tatau ona “totonugalemu i le aiga ae lagolagoina e le Ekalesia” (David A. Bednar, “Saunia e Maua Mea Manaomia Uma,” Liahona, Me 2019, 101; tagai foi i itulau 102–4).
A o galue ai i le Au Peresitene Aoao o le Aoga Sa, sa aoao mai e Peresitene Tad R. Callister:
I le avea ma matua o i tatou o ni faiaoga ma faataitaiga sili ona taua o le talalelei mo a tatou fanau—e le o le epikopo, e le o le Aoga Sa, Tamaitai Talavou po o Alii Talavou, ae o matua. I le avea ma o latou uluai faiaoga o le talalelei, e mafai ona tatou aoao ia i latou le mana ma le moni o le Togiola—lo latou faasinomaga ma le taunuuga paia—ma i le faia o lea mea o le a tuu atu ai se faavae malosi e fausia ai i luga. I le taunuuga lava, o le aiga o se siosiomaga sili lea mo le aoaoina o le talalelei a Iesu Keriso. (“O Matua: O Uluai Faiaoga o le Talalelei mo a Latou Fanau,” Liahona, Nov. 2014, 32–33)
Suesue e Sauniuni ai mo le Vasega
Faitau le Mataupu Faavae ma Feagaiga 68:25, 28, ma mafaufau e faailoga upumoni e tatau i matua ona fesoasoani i a latou fanau ia malamalama.
I le mae’a ai ona ta’ua o nei fuaiupu, sa saunoa Sister Cheryl A. Esplin, o le sa avea ma fesoasoani i le Au Peresitene Aoao o le Peraimeri:
O le aoao o a tatou fanau ia malamalama e sili atu i le na ona tuu atu i ai o faamatalaga. O le fesoasoani ia tatou fanau ia oo atu aoaoga faavae i o latou loto, i se auala e avea ai ma se vaega o o latou lava tagata, ma ia atagia mai i o latou uiga faaalia ma amioga i o latou olaga. (“O Le Aoao Atu o a Tatou Fanau ia Malamalama,” Liahona, Me 2012, 10)
A o galue ai i le Au Peresitene Aoao o le Peraimeri, sa aoao mai ai Peresitene Joy D. Jones:
E le mafai ona tatou faatalitali mo le liuaga ia na ona tupu i a tatou fanau. O le liua faafuasei e lē o se mataupu faavae o le talalelei a Iesu Keriso. O le avea ai e faapei o lo tatou Faaola o le a le tupu fua mai. O le i ai o le loto faamaoni i le alofa, aoao atu, ma le molimau atu e mafai ona fesoasoani i tamaiti e amata ai a o laiti, ia lagonaina le tosinaga a le Agaga Paia. O le Agaga Paia e tatau ai i molimau a ā tatou fanau ma le liua ia Iesu Keriso; tatou te mananao ia i latou ia “manatua pea o ia, ina ia latou maua lona Agaga e faatasi ma i latou“ [Mataupu Faavae ma Feagaiga 20:79]. (“Talanoaga E Tatau Ai,” Liahona, Me 2021, 12–13)
Mafaufau Loloto i Tapenaga mo le Vasega
E mafai faapefea e matua ona fesoasoani i a latou fanau “ia maua le aoaoga faavae i o latou loto i se ala e avea ai o se vaega o o latou lava tagata”? E mafai faapefea e matua ona fesoasoani i a latou fanau ia lagona ma aoao mai le Agaga Paia?
Vaega 2
O a faiga e mafai ona fesoasoani ia te au e taitai la’u fanau i le Faaola?
Na saili ma le filiga e Nifae ma lona nuu e fesoasoani ia latou fanau e aoao e uiga i le Faaola.
Suesue e Sauniuni ai mo le Vasega
Faitau le 2 Nifae 25:26, ma mafaufau pe mafai faapefea e matua i o tatou taimi ona mulimuli i le faataitaiga a nei sa Nifae.
Na tuuina mai e Elder Neil L. Andersen o le Korama a Aposetolo e Toasefululua le fautuaga lenei e taiala ai matua e fesoasoani ai ia latou fanau e aoao i le Faaola ma mai le Faaola.
Pe o i ai ni ata o le Faaola i totonu o o tatou maota? Pe o tatou talanoa soo ia tatou fanau e uiga i faataoto a Iesu? “O tala ia Iesu [ua] pei o se matagi e tapili ai malala ola o le faatuatua i loto o a tatou fanau” [Neil L. Andersen, “Tau Mai Tala ia Iesu,” Liahona, Me 2010, 108]. A fesili atu lau fanau ia te oe, ia mafaufau ma le iloa lelei e aoao atu e uiga i mea na aoao mai e le Faaola. Mo se faataitaiga, afai e fesili atu lou atalii, “Tama, aisea tatou te tatalo ai? Atonu e te tali atu, “Manaia tele lena fesili. E te manatua le taimi na tatalo ai Iesu? Ta talanoa i le mafuaaga na Ia tatalo ai ma le ala na Ia tatalo ai.” (“Matou te Tautalatala e uiga ia Keriso,” Liahona, Nov. 2020, 91)
O le fautuaga na tuuina atu e le perofeta o Mose i matua o Isaraelu e mafai ona faatatau ia i tatou: “Ia e matua aoao soo [nei upu] i lau fanau, ma ia e tautalatala a’i, pe a e nofo i lou fale, pe a e savali foi i le ala, pe a e taoto, pe a e tulai foi” (Teuteronome 6:7).
Na toetomanatu Peresitene Jones i le agaga o le fautuaga a Mose ina ua ia aoao mai:
O le ki e [tasi] e fesoasoani ai i fanau ia mafai ona tetee atu i le agasala o le amata aoao atu ma le alofa i latou i aoaoga faavae ma mataupu faavae autu o le talalelei ao laiti lava—mai tusitusiga paia, o Mataupu Faavae o le Faatuatua, le tamaitusi Mo Le Malosi o le Autalavou , pese a le Peraimeri, viiga, ma a tatou lava molimau—lea o le a taitaina atu ai fanau i le Faaola.
O le fatuina o mausa faifaipea o le tatalo, suesue i tusitusiga paia, afiafi faaleaiga, ma tapuaiga i le Sapati e taitai atu ai i le atoatoa, tumau, ma tulaga faatauaina lelei malolosi—i se isi faaupuga, amiosa’o faaleagaga. …
Uso e ma tuagane, opo faalatalata mai a outou tamaiti laiti—ia matua faalatalata mai ia latou vaai i au amioga faalelotu i aso taitasi ma matamata o e tausia au folafolaga ma feagaiga. “O fanau o ni faataitaiga maoae, o lea ia tuu atu ia i latou se mea maoae e faataitai” [e le o iloa le tusitala]. (“O Se Tupulaga e Mafai Ona Tetee Atu i le Agasala,” Liahona, Me 2017, 88–89)
Faamaumau Ou Manatu
Faaaoga ni nai minute e tusifaamaumau ai amioga amiotonu po o mausa e mafai ona e amataina pe faaauau le atiina ae nei ma o le a faateleina ai lou tomai e tausia lau fanau i le amiotonu. O a ni faiga faaleagaga e te manao e amatalia ma lou aiga i le lumanai?
Vaega 3
O le a se mea e mafai ona ou fai pe afai e se ese se tagata o le aiga mai le ala o le talalelei?
Na aoao mai Elder David A. Bednar o le Korama a Aposetolo e Toasefululua e faapea:
O se tasi o mafatiaga sili e mafai ona mafatia ai se matua lototoa i Siona o se tamaitiiti lea e se ese mai ala o le talalelei. O fesili o le “Aisea?” po o le “O le a sa’u mea na sese ona fai?” ma le “E mafai faapefea ona fesoasoani i lenei tamaitiiti i le taimi nei?” e le uma le manatunatu pea i ai le mafaufau ma le loto o na matua. (“Faithful Parents and Wayward Children: Sustaining Hope While Overcoming Misunderstanding,” Ensign, Mar. 2014, 28)
Sa malamalama Liae ma Sarai i le lototiga e maua pe a se ese fanau mai le ala o le talalelei.
Suesue e Sauniuni ai mo le Vasega
Faitau le 1 Nifae 8:37–38, ma vaavaai pe na faapefea ona taumafai Liae e fesoasoani ia Lamana ma Lemuelu ina ua mavae ona ia vaai i le faaaliga o lo la teena o le Alii.
Matau le auala na folafola atu ai ma le agavaivai ia Liae, pe aoao atu, lana fanau. Sa aoao mai e Elder Ulisses Soares o le Korama o Aposetolo e Toasefululua ia auala e mafai ai ona tatou tali atu ai i se tagata o le aiga ua se ese mai le ala o le talalelei:
E faigata ona malamalama i mafuaaga uma pe aisea ua savavali ese ai nisi tagata i se isi ala. O le mea silisili e mafai ona tatou faia i nei tulaga o le alolofa atu pea i ai ma talia i latou, tatalo mo lo latou manuia, ma saili mo le fesoasoani a le Alii ia iloa po o le a le mea e fai ma ta’u atu. Ia olioli ma le faamaoni faatasi ma i latou i o latou tulaga manuia; avea ma a latou uo ma tagai mo mea lelei ia i latou. E lē tatau ona tatou fiu ia i latou ae ia faasaoina a tatou mafutaga. Aua ne’i teenaina pe faamasino atu ia i latou. Tau lava o le alofa atu ia i latou! Ua aoao i tatou e le faataoto o le atalii faamaumau oa e faapea a oo ina atamamai le fanau lava ia, e masani lava latou te mananao e o mai i le fale. Afai e tupu lena mea i ē pele ia te oe, ia faatumulia o outou loto i le agaalofa, taufetuli atu ia i latou, fusi mai i latou, ma sogi ia i latou, e pei ona faia e le tama o le atalii faamaumau oa [tagai i le Luka 15:20].
Mea mulimuli, faaauau pea ona ola i se olaga agavaa, ia avea ma se faataitaiga lelei ia i latou o mea ua e talitonu i ai, ma ia faalatalata atili atu i lo tatou Faaola, o Iesu Keriso. Ua Ia silafia ma malamalama i o tatou faanoanoaga ma tiga matuitui, ma o le a Ia faamanuia i a outou taumafaiga ma le tuuto atu i o outou aiga pele afai e le o le olaga nei, o le olaga a sau. (“E Mafai Faapefea Ona Ou Malamalama?,” Liahona, Me 2019, 8)
Mafaufau Loloto i Tapenaga mo le Vasega
O a isi faataitaiga mai tusitusiga paia o matua amiotonu na se ese se tamaitiiti po o le fanau mai le ala o le talalelei? (Mafaufau, mo se faataitaiga, o Liae ma ona atalii o Lamana ma Lemuelu po o Alema ma lona atalii o Alema le Itiiti.) O le a se mea e mafai ona e aoao mai tali a nei matua e mafai ona taiala ai oe i le tali atu i tagata o le aiga atonu e se ese?