Lesona 4 Anomea a le Faiaoga

O Le Aiga e Totonugalemu i le Fuafuaga a le Tama Faalelagi

O le aiga e totonugalemu i le fuafuaga a le Tama Faalelagi mo lo tatou taunuuga e faavavau. I le lesona lenei, o le a maua ai e tamaiti aoga le avanoa e faamatala ai le ala na foafoa ai le lalolagi, le Pa’ū o Atamu ma Eva, ma le Togiola a Iesu Keriso ia maua ai e aiga e faavavau ina ia faatuina ma ia agaigai i luma. O le a valaaulia foi tamaiti aoga e iloilo a latou taumafaiga patino i le fatuina ma le faamalolosia o o latou lava aiga e faavavau.

Fautuaga mo le Aoao Atu

O le Foafoaga o le lalolagi ma le Pau o Atamu ma Eva ua faatagaina ai ona faatuina aiga ma tuputupu ae ai.

Faaleleia o Lo Tatou Aoao Atu ma le Aoaoina

Faatulaga le talafeauga ma le faamoemoega. O le amataina o se lesona i se fesili talafeagai, tulaga, po o faafitauli e mafai ona tata’i ai tamaiti aoga e punouai i le lesona ma saili le malamalama atili. E mafai foi ona fesoasoani lea mea ia latou vaai ai pe faapefea e aoaoga a tusitusiga paia ma taitai o le Ekalesia i ona po nei, e saunia tali ma le taitaiga e mafai ona taiala ai i latou i tulaga moni o le olaga. A oo ina iloa e le vasega le taua o le mea o loo latou suesueina i o latou lava olaga ma tulaga, ua atili ai ona faaosofia i latou lava e aoao ma faaaoga ia aoaoga o le talalelei.

Faatulagaga tamaiti aoga i ni nai vaega toalaiti, ma totofi ni taitai mo vaega taitasi. Faaali pe avatu i vaega taitasi se kopi o ata faataitai nei ma fesili. (Mafaufau pe mafai faapefea ona fetuunai lenei ata faataitai e pei ona manaomia ai ina ia talafeauga atili i la outou aganuu ma olaga o au tamaiti aoga.)

A o sailiili ai i luga o upega tafailagi mo se galuega e faatino e le vasega, sa maua e Lasela ni nai tusiga o loo finauina ai faapea o le “aiga masani” (se alii ma se tamaitai ua faaipoipo ma ni fanau) ua le o toe manaomia i faiganuu. I le taimi o le vasega i nai aso mulimuli ane, sa iloa ai e Lasela ua na o ia sa taumafai e puipuia le taua o le aiga masani. O le toatele o tagata o lana vasega ua itiiti pe ua leai foi se faamuamua o faaipoipoga po o le faia o ni fanau. Ia i latou, o le faaipoipoga ma fanau ua faalavelave i mea e faataunuuina e tagata taitoatasi. O lea aafiaga na tuua ai Lasela ma ni nai fesili ma lagona le mautonu.

• Aisea e te manatu ai ua faapena ni lagona o nisi o tagata e uiga i le faaipoipoga ma le aiga?

• O a ni mea sa e aoaoina e uiga i aiga ma le fuafuaga a le Tama Faalelagi e mafai ona fesoasoani ia Lasela? (Afai e manaomia, e mafai ona e iloiloina le vaega 1 o le vaega o anomea mo sauniuniga e fesoasoani ai i le talanoaga.)

A uma ua lava se taimi e talanoaina ai e tagata o le vasega le ata faataitai, valaaulia i latou e lisi i luga o le laupapa ni nai mea moni sa latou talanoaina. Fau i luga o nei upumoni i le gasologa atoa o le lesona.

E mafai ona e valaaulia se tamaitiiti e tauloto mai pe faitau le Mose 1:39 ona fesili lea i le vasega e faamatala mai pe o a mea o aoao mai e lenei fuaiupu e uiga i faamoemoega o le fuafuaga a le Tama Faalelagi. Afai e manaomia, fesili i le vasega pe faapefea ona latou faauigaina le “ola e faavavau” ma pe fesootai faapefea lena faamoemoega i le aiga. (Tagai i le vaega muamua i le anomea mo sauniuniga mo se fesoasoani i se faauigaga.)

Mafaufau e faaali ia ata o le Foafoaga ma le Pau o Atamu ma Eva. Valaaulia tamaiti aoga e toe iloilo le Mataupu Faavae ma Feagaiga 49:15–17 ma le 2 Nifae 2:22–23. Ona fai atu lea o fesili nei:

• Na faapefea ona fesoasoani le Foafoaga o le lalolagi e faataunuu ia faamoemoega e faavavau o le Tama Faalelagi mo Ana fanau? (O tali a tamaiti aoga e ono tutusa ma lea: Na foafoaina le lalolagi ina ia saunia se nofoaga e mafai ona fananau ai fanau a le Atua i totonu o aiga ma agaigai faatasi ai i luma.)

• Na faapefea ona fesoasoani le Pau o Atamu e faataunuu ia faamoemoega o le Tama ma faataga ai le lalolagi e “tali le iuga [po o le faamoemoega] o lona foafoaga”? (Mataupu Faavae ma Feagaiga 49:16). (E ono tuuina mai e tamaiti aoga ni tali eseese, e aofia ai le tau mai o se mea moni e pei o lenei: Ona o le Pau, ua mafai ai e Atamu ma Eva ona fanauina ni fanau ma mafai ai e a la fanau ona agaigai i luma i le ola e faavavau.

• E mafai faapefea e le malamalama i nei faamoemoega o le Foafoaga ma le Pau ona tosina ai a tatou taumafaiga e faamuamua ma fausia o tatou lava aiga e faavavau?

E ala i Lana Togiola, ua mafai ai ona maua aiga e faavavau ona o Iesu Keriso.

Mafaufau e talanoaina faapuupuu o se vasega le fesili lenei:

• O le a le matafaioi a le Faaola ma Lana Togiola i le faia ia mafai ona maua aiga e faavavau? (Mafaufau e toeiloilo le 2 Nifae 9:6–8, 10, 18 e fesoasoani ai i tamaiti aoga e faailoa faapea e ala i Lana Togiola, ua saunia ai e Iesu Keriso le ala mo fanau uma a le Tama Faalelagi e faatoilalo le agasala ma le oti.)

Faaali atu le saunoaga lenei a Elder M. Russell Ballard o le Korama a Aposetolo e Toasefululua.

O le elemene taua e fesootai ai mea uma—lea e faalagolago ai le fuafuaga a le Atua ma lo tatou taunuuga e faavavau ma faalagolago ai isi mea uma—o lo tatou Faaola, o Iesu Keriso. O Lana taulaga togiola ua mafai ai mea uma lava, e aofia ai ae le o faatapulaa ai i se aiga ma se faaipoipoga alofa, agaalofa ma faavavau. (M. Russell Ballard, “O Avanoa ma Tiutetauave a Faiaoga o le OAE i le Seneturi 21” [o se faasauga ma se Pulega Aoao, Fep. 26, 2016), ChurchofJesusChrist.org)

Valaaulia tamaiti aoga e toeiloilo mea sa latou tusia e tali ai i fesili i le faaiuga o le vaega 2 o anomea mo sauniuniga. (Afai e tatau ai, tuu i tamaiti aoga e tusifaamaumau pe faaopoopo ia latou tali.) Valaaulia nisi o tamaiti aoga e faasoa mai mea sa latou tusia. Mafaufau e faasoa atu foi ou lagona.

Ina ia fesoasoani i tamaiti aoga e faatino mea sa latou aoaoina i le aso, filifili se manatu se tasi po o manatu uma foi e lua---pe o le fea lava e sili ona aoga mo au tamaiti aoga.

Fai i se tamaitiiti aoga e faitau leotele le saunoaga a Elder Robert D. Hales o i le vaega 3 o le anomea mo sauniuniga.

• O a ni auala e mafai ona e vaai ai ia Satani o galue e osofa’ia faaipoipoga ma aiga i o tatou taimi?

Valaaulia tamaiti aoga e faaaoga se minute pe lua e mafaufau ai i auala e ono taumafai Satani e osofa’ia a latou lava faaipoipoga ma aiga (i le taimi nei ma le lumanai). Fautuaina i latou e manatunatu loloto foi ma tusifaamaumau o latou lagona pe mafai faapefea e le tausisia o se vaaiga faavavau ona fesoasoani ia i latou e faamuamua ma puipuia o latou aiga.

Tuu i tamaiti se taimi e toe tomanatu atili ai e uiga i fesili nei mai le vaega 1 o le anomea mo sauniuniga ma ia tusifaamaumau ni uunaiga e mafai ona latou maua.

• E mafai faapefea ona avea atili lou aiga ma totonugalemu i lou olaga?

• E mafai faapefea ona e valaaulia le mana o le Alii i au taumafaiga e fatufatu pe faamalosia lou lava aiga e faavavau?

A uma ua lava se taimi, valaaulia ni nai tagata o le vasega e naunau e faasoa mai. Fautuaina le vasega e faatino mea sa latou lagonaina.

Mo Le Isi Taimi

Mafaufau e toeiloilo faapuupuu ma tamaiti o le vasega mea sa latou aoaoina i lesona muamua e fa o le kosi. E mafai ona e fautuaina faapea o le isi taimi o le a outou tauaofia ai, o le a e tuu atu ia i latou se avanoa e faasoa mai ai mea sa latou faaaogaina ma o latou aiga po o isi Valaaulia tamaiti aoga a o latou sauniuni mo le isi vasega e mafaufau toto’a pe faapefea e filifiliga latou te faia i o latou lava tino faaletino, ona aafia ai o latou aiga ma le fuafuaga a le Atua mo i latou.