Lesona 24 Anomea a le Faiaoga: Taulimaina o le Soifua Maloloina Faalemafaufau ma le Faamoemoe ma le Agaalofa
“Lesona 24 Anomea a le Faiaoga: Taulimaina o le Soifua Maloloina Faalemafaufau ma le Faamoemoe ma le Agaalofa,” Anomea a le Faiaoga O Le Aiga e Faavavau (2022)
“Lesona 24 Anomea a le Faiaoga,” Anomea a le Faiaoga O Le Aiga e Faavavau
Lesona 24 Anomea a le Faiaoga
Taulimaina o le Soifua Maloloina Faalemafaufau ma le Faamoemoe ma le Agaalofa
O luitau o le soifua maloloina faalemafaufau e mafai ona avea ma se vaega taua o lo tatou aafiaga faaletino. I lenei lesona, o le a maua ai e tagata aoga le avanoa e faailoa mai ai auala latou te faaleleia ai lo latou soifua maloloina faalemafaufau ma faalelagona. O le a mafaufau foi tagata aoga i auala latou te tali atu ai ma le agaalofa sili atu i tagata o le aiga ma isi o e atonu o feagai ma luitau o le soifua maloloina faalemafaufau po o tulaga e aofia ai le pule i le ola.
Fautuaga mo le Aoao Atu
Tatou te faamanuiaina i tatou lava ma o tatou aiga a o tatou taumafai e faatumauina ma faaleleia lo tatou soifua maloloina faalemafaufau.
Faaali atu mau nei: Iopu 6:1–3; 1 Nifae 18:17–18; Alema 26:26–27. Valaaulia tagata aoga e faitau le leoa se tasi o nei fuaitau ma vaavaai mo luitau i le manuia faalemafaufau pe faalelagona o tagata taitoatasi. Valaaulia tagata aoga e faasoa mai mea sa latou mauaina. A o latou tali mai, atonu e te manao e tusi a latou tali i le laupapa.
O a isi ituaiga o luitau ma tulaga e mafai ona afaina ai lo tatou manuia faalemafaufau pe faalelagona? (Lisi tali a tagata aoga i luga o le laupapa.)
Aisea e ono fesoasoani ai le iloa o le feagai ai ma luitau i lo tatou soifua maloloina faalemafaufau ma faalelagona e mafai ona avea o se vaega masani o lo tatou aafiaga i le olaga nei?
Faamanatu i tagata aoga o Iesu Keriso o “se tagata faanoanoa, ua masani foi ma le tiga” (Isaia 53:3). Valaaulia tagata aoga e faasoa mai ni aafiaga na maua e le Faaola e faapupula mai ai le faataunuuina o le valoaga a Isaia.
Faaali atu mau nei: Mataio 14:22–23; Mareko 1:35; 6:31, 46; Luka 5:16. Valaaulia tagata aoga e faitau le leoa se tasi pe sili atu o nei fuaitau ma vaavaai mo lesona e mafai ona tatou aoao mai faatinoga a le Alii. Fai atu ia i latou e faasoa mai mea ua latou maua, ma fesoasoani ia latou iloa le upumoni lenei: Tatou te mulimuli i le faataitaiga a Iesu Keriso a o tatou faaaluina le taimi e malolo ai, ia filemu, ma tatalo.
Aisea e taua ai le tausia lelei o lou soifua maloloina faalemafaufau ma faalelagona? (Mafaufau e faitau le saunoaga a Peresitene M. Russell Ballard i le vaega 1 o le anomea mo sauniuniga.)
Tuu atu i tagata aoga ni nai minute e toe manatunatu ai ma tusifaamaumau se auala se tasi e mafai ona latou faamalolosia ai o latou soifua maloloina faalemafaufau pe faalelagona ma fatu ai se fuafuaga faigofie mo le faia o lena mea. Mafaufau e faasino atu tagata aoga i fesili o i le vaega 1 o anomea o sauniuniga mo manatu.
E mafai ona tatou tali atu ma le alofa ma le agaalofa faaKeriso i tagata taitoatasi o e feagai ma luitau o le soifua maloloina faalemafaufau.
Faaali atu ma faitau tala nei e uiga i tagata taitoatasi o e na feagai ma luitau o le soifua maloloina faalemafaufau, e pei ona faasoa mai e Sister Reyna I. Aburto. Pe, afai e te manao ai, faaali le vaega muamua o le vitio “Like a Broken Vessel” (taimi faailo 0:00–3:16, ChurchofJesusChrist.org). Valaaulia tagata aoga e mafaufau i o latou lagona a o latou faalogo i nei tala.
Ata
Sister Reyna I. Aburto
Sa tusia e la’u tama teine i se tasi taimi: “Sa i ai se taimi … [sa] ou matua faanoanoa ai lava i taimi uma. Sa ou mafaufau i taimi uma o le faanoanoa o se mea e maasiasi ai, ma o se faailoga o se vaivaiga. O lea sa ou le ta’ua ai i se tasi o’u faanoanoaga. … Sa ou lagona le leai atoa o so’u taua” [Hermana Elena Aburto blog, hermanaelenaaburto.blogspot.com/2015/08].
Sa faamatalaina e se uo i le auala lenei: “Talu mai lava lo’u laitiiti, sa ou feagai ma se taua faifai pea ma lagona o le leai o se faamoemoe, pogisa, tuuatoatasi, ma le fefe ma le lagona ua olopalaina a’u pe faaletonu. Sa ou faia mea uma e nana ai o’u tiga ma ia lē tuuina atu le foliga o o’u tulaga faaletonu ae na o le ola manuia ma malosi” [fesootaiga patino]. (“I Mala i Manū, Iesu, Afio Mai!,” Liahona, Nov. 2019, 57)
O a ni ou mafaufauga ma ni lagona a o e faalogologo i nei tala?
Tuu atu i tagata aoga taitasi se kopi o le tufaaga o loo avatu faatasi ai, pe faaali atu fesili mo tagata uma e vaai i ai. Valaaulia tagata aoga e faitau ma mafaufau loloto i fesili na o i latou. A uma ua lava se taimi, faatulaga tagata aoga i ni vaega toalaiti ma fai atu i le vasega e faasoa mai o latou manatu e uiga i se fesili se tasi pe lua na uunaia ai i latou.
Luitau o le Soifua Maloloina Faalemafaufau
Anomea a le Faiaoga O Le Aiga e Faavavau—Lesona 24
E mafai faapefea e tagata taitoatasi o e aafia i luitau o le soifua maloloina faalemafaufau ona faamanuiaina e ala i le faailoaina ma talanoa e uiga ia i latou? Aisea e ono taua ai mo nei tagata taitoatasi le sailia o le fesoasoani mai se taitai o le Ekalesia po o se polofesa atamai faafomai?
Afai e faasoa atu e se tagata o le aiga po o se uo ia te oe o loo feagai o ia ma se luitau o le soifua maloloina faalemafaufau, mata o le a se mea e sili ona taua (po o mea) e mafai ona e fai atu pe faia? (Mafaufau e iloilo le saunoaga a Sister Reyna I. Aburto i le vaega 2 o anomea mo sauniuniga.) O a nisi o mea o le a le aoga e tautala atu ai pe faia? O anafea na e vaaia ai se tasi o tali atu i se auala faaKeriso i le luitau o le soifua maloloina faalemafaufau o se isi tagata?
Toe manatunatu i mea e malamalama i ai Iesu Keriso e uiga i o tatou luitau o le soifua maloloina faalemafaufau. (Atonu e te manao e faitau le Alema 7:11–12.) E faapefea ona e sailia Lana fesoasoani pe afai e te puapuagatia mai se luitau o le soifua maloloina faalemafaufau pe o loo e lagolagoina se tasi o loo maua ai?
A lava le taimi, valaaulia ni nai tagata aoga e faasoa mai ni mea na latou aoaoina i a latou vaega.
E mafai ona tatou fesoasoani e taofia le pule i le ola ma fesoasoani ia i latou ua maliu sē pele i le pule i le ola.
Faamanatu i tagata aoga o luitau ogaoga o le soifua maloloina faalemafaufau e mafai ona avea ma tulaga lamatia mo le pule i le ola. Valaaulia tagata e iloilo le Mosaea 18:8–9 ma faasoa mai pe mafai faapefea e aoaoga o i lenei fuaitau ona taialaina i tatou e fesoasoani atu ia i latou o loo tauivi ma mafaufauga o le pule i le ola. (A o faasoa mai tagata aoga, atonu latou te faailoa mai se upumoni e talitutusa ma lenei: I le avea ai ma soo o Iesu Keriso, ua valaauina i tatou e tauave avega a le tasi ma le isi ma faanoanoa faatasi ma i latou o e faanoanoa.)
O a ni auala na e vaai ai o faatino lenei mataupu faavae? O a isi faatinoga patino e mafai ona e faia o se soo o Iesu Keriso e fesoasoani ai e taofia le pule i le ola? (Atonu e te manao e faaali le vitio “Preventing Suicide” [1:43], o loo faaalia ai Sister Carol F. McConkie, lea o loo faasino i ai i le vaega 3 o anomea mo sauniuniga.)
E mafai faapefea e le Tama Faalelagi ma Iesu Keriso ona fesoasoani ia i latou o e tauivi ma mafaufauga o le pule i le ola? E mafai faapefea ona Laua fesoasoani i tagata ua maliliu se e pele i le pule i le ola?
Tuu atu i tagata aoga ni nai minute e tusifaamaumau ai mea e mafai ona latou faia e tali atu ai ma le alofa ma le agaalofa faaKeriso i le luitau o le soifua maloloina faalemafaufau o se isi tagata po o tulaga e aofia ai le pule i le ola.
Mo Le Isi Taimi
Mafaufau e fai atu fesili nei i le faaiuga o le vasega po o se savali i le aluga o le vaiaso. Faamalosiau i tagata aoga e suesue anomea mo sauniuniga mo le isi vasega ma mafaufau i nei fesili.
O a ni auala e mafai ai e lou salamo ona aafia ai le soifua manuia o lou aiga?
E mafai faapefea ona e maua le fesoasoani e faamagalo ai se tagata o le aiga na faatausuai pe faatiga ia te oe?