Lesona 3 Anomea a le Faiaoga

O Lo Tatou Natura Paia ma le Taunuuga

O i tatou o atalii ma afafine faapelepele a ni matua faalelagi, ua i ai gafatia paia. I le lesona lenei, o le a vaili ai e tamaiti aoga le ala e mafai ai e le malamalama i o latou natura paia ona tosina ai a latou sootaga ma le Atua ma le ala latou te vaai ai ma taulima i latou lava ma isi. O le a faamautinoa ai foi e tamaiti aoga le ala e mafai ona latou faaaogaina le malamalama i lo latou natura paia ma le taunuuga e tosina ai filifiliga latou te fai.

Fautuaga mo le Aoao Atu

O i tatou o atalii ma afafine agaga a ni matua faalelagi.

E avea o se vaega o le faigalotu a le vasega, mafaufau e usu se viiga e pei o le “Lo‘u Tamā e” (Viiga, nu. 178) po o le “O le Atua lo‘u Tamā” (Viiga, nu. 184).

Ina ia amata le vasega, e mafai ona e valaaulia tamaiti aoga e faasoa mai fasifuaitau mai le viiga amata lea e aoao ai i latou e uiga i le Atua ma i latou lava ma faasoa mai ai mea na latou aoaoina. Pe e mafai foi ona e faaali atu i tamaiti se ata o ou matua po o se isi tagata na tosina lelei oe a o e tuputupu ae. Faasoa atu ni nai uiga faaletino po o ni ou lava uiga e te manatu na e maua mai ia i la’ua. Fesili i tamaiti o le vasega e faasoa mai se mea ua latou maua faasolo mai pe aoaoina mai o latou matua po o se isi tagata.

Faaali i luga o le laupapa le faamatalaga lea mai le “O Le Aiga: O Se Folafolaga i le Lalolagi” (ChurchofJesusChrist.org): “O tagata soifua uma—tane ma le fafine—ua foafoaina i le faatusa o le Atua. O i latou taitoatasi o se atalii po o se afafine agaga faapelepele a ni matua faalelagi, ma, o lea ua tofu ai ma se natura paia.”

• O le a se mea o tumatila mai ia te oe i lenei faamatalaga, ma aisea? (Atonu e te manao e utuvai mai le vaega 1 o le anomea mo sauniuniga e fesoasoani e faalolotoina ai le malamalama o tamaiti aoga i lenei upumoni.)

• O a isi mea ua fesoasoani perofeta ia tatou iloa e uiga i le Atua ma la tatou sootaga ma Ia? Ma o le a se mea o aoao mai e lena malamalama ia i tatou e uiga ia i tatou lava? (E mafai ona e avatu i tamaiti ni nai minute e toe iloilo ai le vaega 1 o le anomea mo sauniuniga ae latou te lei faasoa maia a latou tali i fesili nei.)

• E mafai faapefea e le malamalama faapea o oe o se atalii/afafine o le Atua ona tosina ai le ala e te tapuai ai ia te Ia?

Faaleleia o Lo Tatou Aoao Atu ma le Aoaoina

Ia e faatuatuaina sauniuniga a au tagata aoga. Saili ni auala e faamalosiau ai tagata aoga e suesue i anomea mo sauniuniga mo le vasega a o le’i faia le vasega. Ona utuvai mai lea i a latou sauniuniga i le taimi o le vasega. O le faia o lena mea o le a musuia ai tagata aoga e tauave ni tiutetauave tetele atu mo lo latou lava aoaoina. I le aluga o le kosi, ia tuu atu i tagata aoga ni avanoa e faasoa mai ai pe o faapefea ona faaloloto e anomea mo sauniuniga lo latou malamalama i le aoaoga faavae autu i le aiga ma siitia ai lo latou aafiaga i le vasega.

E faalagolago i le tele o lau vasega, faatulaga tamaiti i ni vaega toalaiti e talanoaina ai a latou tali i fesili nei (na maua e tamaiti le avanoa a o latou suesueina anomea mo sauniuniga e tusi ai ni nai o latou mafaufauga e uiga i se tasi pe sili atu foi o fesili nei):

• E mafai faapefea e le malamalama i lo tatou natura paia ona aafia ai lo tatou taulimaina o i tatou lava faapea ma isi? O anafea na i ai sou aafiaga na mafai ai ona faaseloa ai lau vaai i se amioga faatuaupua a se tasi po o se uiga faaalia ma vaai atu i lo latou natura paia?

• O a ni nai faataitaiga mai le soifuaga o le Faaola o loo faaalia ai na malamalma o Ia i natura paia o isi? O a ni auala e mafai ona lelei atili lou faata’ita’i o Ia i se ala e te taulimaina ai isi?

Toe famanatu faatasi pe fai i se tamaitiiti e toe faamatala le aafiaga o le fegalegaleaiga a Mose ma le Atua ona sosoo ai lea ma Satani e pei ona tusia i le Mose 1:4–6, 12–16 (tagai i le vaega 2 o anomea mo sauniuniga).

• O le a se mea e mafai ona tatou aoao mai i le aafiaga o Mose? (Faatasi ai ma isi mea moni, e mafai ona faailoa mai e tamaiti aoga le mea lenei: O le malamalama i lo tatou natura paia e mafai ona faamanaina ai ma puipuia i tatou mai le fili.)

• Aisea e te manatu ai e mafai e lo tatou malamalama i le natura paia ona faamanaina i tatou faasaga i le fili?

• E mafai faapefea ona e fesoasoani ia te oe lava ia manatua pe o ai oe, pe a taumafai Satani e faatalitonu oe i se isi mea? (E mafai ona e valaaulia tamaiti aoga e vaavaai i le faamatalaga a Elder Brian K. Taylor o loo i totonu o le vaega “Manao i Nisi Mea?” o anomea mo sauniuniga mo se faataitaiga.)

Faaali atu le saunoaga lenei a Peresitene Russell M. Nelson:

O la’u fautuaga muamua o le aoao mo outou lava po o ai moni lava outou. Ole atu i lou Tama Faalelagi i le suafa o Iesu Keriso po o a Ona lagona e uiga ia te oe ma lau misiona iinei i le lalolagi. Afai e te ole atu ma le manatu moni i ai, e oo mai le taimi o le a musumusu mai e le Agaga ia te oe le upumoni e suia ai le olaga. Tusi i lalo na uunaiga, fai ma iloilo, ma mulimuli sao i ai. (“Tutu Atu o ni Tagata Moni o le Meleniuma,” Liahona,, Oke. 2016, 49).

Tuu atu i tamaiti ni nai minute e manatunatu loloto filemu ai i mea e finagalo le Alii latou te faia ina ia atili malamalama ai i o latou natura paia ma natura paia o isi. E mafai ona e fautuaina i latou e tatalo faalilolilo e pei ona fautuaina ai e Peresitene Nelson ma tusifaamaumau, i le taimi nei ma isi, soo se uunaiga latou te mauaina.

E tofu i tatou ma se taunuuga paia.

Faaopoopo le fasifuaitau lea i le faamatalaga mai le folafolaga i le aiga o loo faaalia i luga o le laupapa: “ma le taunuuga.”

Valaaulia se tamaitiiti aoga e faitau leotele le Roma 8:16–17. Fai i le vasega e mulimuli i le faitauga, ma vaavaai mo le mea na aoao mai e le Aposetolo o Paulo e uiga i lo tatou taunuuga paia.

• O le a se mea ua aoao mai e lenei mau ia te oe e uiga i le mea e finagalo lou Tama o i le Lagi ma le Faaola mo oe? (Afai e manaomia, fesoasoani i tamaiti o le vasega ia malamalama i le uiga o le avea ma “suli-faatasi ma Keriso.” Tagai i le vaega 3 o anomea mo sauniuniga mo se faamalamalamaga.)

(E mafai ona e fai i se tamaitiiti a o lei amataina le vasega e sauniuni e aotele ma faasoa mai ona lagona e uiga i le faamatalaga a Peresitene Dieter F. Uchtdorf i le vaega 3 o le anomea mo sauniuniga.

Tuu i tamaiti se taimi e tomanatu ai i fesili nei, ma fautuaina i latou e tusifaamaumau soo se uunaiga latou te maua:

• E mafai faapefea e le malamalama i lou natura paia ma le taunuuga ona faafoliga ia filifiliga e te faia i le aso?

• E suia faapefea i le saunoaga a Peresitene Uchtdorf lau vaai i au la’a tautevateva pei se tamaitiiti faatoa tau savali? O a ni auala e mafai ona e valaaulia ai le Alii e fesoasoani ia te oe e faaauau ona e agai i luma?

Valaaulia ni nai tagata e faasoa mai o latou mafaufauga po o molimau e uiga i mea sa latou aoaoina i lenei lesona.

E mafai ona e faaiuina i le faasoa atu o le eseesega o le iloaina o lou natura paia ma le taunuuga ua faia i lou olaga. Fautuaina tamaiti aoga e sue ni auala e manatua ai pe o ai i latou faapea ma isi, ma taulimaina i latou lava ma isi e tusa ai.

Mo Le Isi Taimi

Mafaufau e fai i tamaiti aoga e mafaufau pe faapefea ona fetaui lelei le aiga i le fuafuaga a le Tama. A o latou suesue i le fuafuaga maoae a le Atua mo aiga, fautuaina tamaiti o le vasega e mafaufau pe o le a le totonugalemu o lo latou aiga ia latou lava fuafuaga mo o latou olaga.