Lesona 17 Anomea mo le Sauniuniga o le Vasega

Paaga Tutusa i le Faaipoipoga

I totonu o le aiga, ua tuuina mai ai e le Alii i tane ma fafine “ni matafaioi eseese ae tutusa le taua [lea] e faaatoatoa ai e le tasi le isi” (M. Russell Ballard, “The Sacred Responsibilities of Parenthood,” Ensign, Mar. 2006, 29). Ua aoao mai perofeta e faapea “i nei tiutetauave paia, e ao i tama ma tina ona fesoasoani le tasi i le isi o ni paaga tutusa” (“O Le Aiga: O Se Folafolaga i le Lalolagi,” ChurchofJesusChrist.org). O nei tiutetauave o le a talanoaina loloto atili i nai lesona e sosoo ai.

Vaega 1

E mafai faapefea ona avea au ma se paaga tutusa i le faaipoipoga?

E mafai ona tatou aoaoina upumoni taua e uiga i le sootaga ua faamoemoe le Alii mo se tane ma se ava mai le ala na Ia faamatalaina ai le foafoaga o Eva e pei ona tusia i le tusi a Mose.

Suesue e Sauniuni ai mo le Vasega

Faitau le Mose 3:18, 21–23, ma mafaufau i le uiga o le faailoga sa faaaoga e faamatala ai le foafoaga o Eva.

O le faamatalaga o le foafoaga o Eva mai le ivi asoaso o Atamu e faafaatusa (tagai Spencer W. Kimball, “The Blessings and Responsibilities of Womanhood,” Ensign, Mar. 1976, 71). Sa faamalamalama mai e Russell M. Nelson se tasi o uiga faafaatusa o le ivi asoaso:

O le ivi asoaso, e aumai mai le itu, e foliga o loo ta’u mai ai se faapaaga. Ua le faaali mai i le ivi asoaso se uiga faafia pule pe faatavini, ae ua faaali mai ai se soa tutusa e galulue ma ola faatasi. (“Lessons from Eve,” Ensign, Nov. 1987, 87)

Na aoao mai e Linda K. Burton, o le sa avea muamua ma Peresitene Aoao o le Aualofa, le mea lenei e faatatau i le uiga o le fesoasoani:

O le upu fesoasoani o lona uiga “o se fesoasoani e talafeagai, agavaa, pe fetaui lelei mo ia” [Kenese 2:18, vaefaamatalaga e]. Mo se faataitaiga, e talitutusa lava o tatou lima e lua peitai e le tutusa lelei. O le mea moni, o le faafeagai o le tasi le isi, ae e faaatoatoaina e le tasi le isi ma e fetaui lelei lava mo le tasi ma le isi. O le galulue faatasi, ua la malolosi atili ai. (“O Le A Tatou O Ae Faatasi i Luga,” Liahona, Me 2015, 30)

O nisi o talitonuga faaleaganuu po o amioga patino e mafai ona taofia ai i tatou mai le avea ma se paaga tutusa i le faaipoipoga. Sa faamatala e Peresitene Dallin H. Oaks o le Au Peresitene Sili nisi o nei tulaga ma le auala e faatoilalo ai:

O nisi … tane ua i ai le manatu sese faapea e fai uma e fafine le tele o galuega i le fale, po o le faapea foi o fafine ma tamaiti o ni auauna ia a le tane. E le o se mea lea e fiafia i ai le Alii, aua e faalavelave i le auala o le ituaiga o fegalegaleaiga faaleaiga lea e tatau ona i ai i le faavavau, ma e taofia ai le tuputupu ae lea e tatau ona tupu iinei i le fogaeleele, pe afai o le a tatou agavaa mo faamanuiaga o le faavavau. Suesue i tusitusiga paia ma o le a e iloa ai o Atamu ma Eva, o tatou uluai matua, o le faataitaiga mo i tatou uma, sa tatalo faatasi ma galulue faatasi (tagai Mose 5:1, 4, 10–12, 16, 27). E tatau ona avea lea ma a tatou mamanu mo le olaga faaleaiga—o le fefaaaloaloai o le tasi i le isi ma galulue faatasi i le alofa. (“The Gospel Culture,” Ensign, Mar. 2012, 44)

Mafaufau Loloto e Sauniuni ai mo le Vasega

O a faamanuiaga e mafai ona oo mai i se faaipoipoga pe afai e vaai ma lagolago e le tane ma le ava le tasi ma le isi o se paaga tutusa?

Vaega 2

O le a le uiga o le pulefaamalumalu i se nofoaga faaleaiga?

Ua tofia e le Alii ni tiutetauave tulaga ese i tane ma ava i le aiga e “tutusa le taua ma le aoga” (Quentin L. Cook, “Alofa Tele mo Fanau a lo Tatou Tama,” Liahona, Me 2019, 79). O nisi o nei tiutetauave o le a talanoaina i lesona o lumanai. Ae o se tasi o faataitaiga o le tiutetauave paia lenei ua tuuina mai e le Alii i tane ma tamā: “I le fuafuaga paia, e tatau ona pulefaamalumalu tamā i o latou aiga i le alofa ma le amiotonu” (“O Le Aiga: O Se Folafolaga i le Lalolagi,” ChurchofJesusChrist.org). I le leai ai o se tane po o se tama, o le ava po o le tina e pulefaamalumalu i le aiga (tagai Russell M. Nelson,“O Oa Faaleagaga,” Liahona, Nov. 2019, 79).

Mafaufau pe mafai faapefea e aoaoga nei ona faaopoopo atu i lou malamalama i le auala e mafai ai e se tama ona pulefaamalumalu i lona aiga i le alofa ma le amiotonu:

O le pulefaamalumalu i le aiga o le tiutetauave e fesoasoani e toe taitai atu tagata o le aiga e mau i le afioaga o le Atua. E faia lenei mea e ala i le auauna atu ma aoao atu i le agamaualalo, agamalu, ma le alofa mama, e mulimuli i le faataitaiga a Iesu Keriso (tagai i le Mataio 20:26–28). O le pulefaamalumalu i le aiga e aofia ai le taitaiina o tagata o le aiga i tatalo e le aunoa, suesue le talalelei, ma isi itu o le tapuaiga. E galulue matua i le lotogatasi e faataunuu nei tiutetauave. (“Matua ma Fanau,” Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 2.1.3)

Na aoao mai le Aposetolo o Paulo e uiga i le tiutetauave o se tane e pulefaamalumalu ma le le manatu faapito ina ua ia faapea mai: “O le tane o le ulu lea o le ava, pei o Keriso foi o le ulu ia o le ekalesia. … O outou tane, ia outou alolofa atu i a outou lava ava, faapei o Keriso foi ona alofa mai i le ekalesia, ma foaiina mai e ia ia te ia e fai mona sui” (Efeso 5:23, 25). Sa faamamafa mai e Peresitene Ezra Taft Benson, ina ua uma ona ta‘ua le Efeso 5:23, le ala e avea ai le Faaola o se faataitaiga atoatoa o le auala e pulefaamalumalu ai:

O le faataitaiga lena e tatau ona tatou mulimuli ai i la tatou matafaioi o le pulefaamalumalu i totonu o le aiga. Tatou te le’i tau i se mea na taitai ai le Faaola i le Ekalesia ma se aao saua pe faalealofa. Tatou te le’i tau i se mea e faapea na taulimaina ai e le Faaola Lana Ekalesia ma le le faaaloalo po o le tuulafoai. Tatou te le’i tau i se mea e faapea na faaaoga ai e le Faaola le pule malosi po o le fai faamalosi ina ia ausia ai Ana faamoemoega. E leai lava se mea na tatou tau i ai e faapea na faia ai e le Faaola soo se mea sei vagana ai mea faagaeetia, siitia, faamafanafana, ma faaea ai le Ekalesia. Uso e, ou te fai atu ia te outou ma le faamaoni atoa, o Ia o le faataitaiga e ao ona tatou mulimuli ai a o tatou taulamua faaleagaga i o tatou aiga. (Aoaoga a Peresitene o le Ekalesia: Ezra Taft Benson [2014], 196)

I se tusi musuia i tagata o le Ekalesia, sa faamatala ai e le Perofeta o Iosefa Samita le taua o le faaalia o uiga faaKeriso pe a taitaia isi. O nei uiga e faatatau i le pulefaamalumalu i le aiga.

Suesue e Sauniuni ai mo le Vasega

Faitau le Mataupu Faavae ma Feagaiga 121:41–43, ma mafaufau e faailoga uiga faaKeriso e te maua.

Faamaumau Ou Manatu

Filifili se tasi o uiga faaKeriso sa e faailogaina pe makaina, ma tusifaamaumau ou manatu e uiga i se tasi pe sili atu foi o fesili nei: Aisea e taua ai lenei uiga i le pulefaamalumalu i se aiga? E mafai faapefea e lenei uiga ona fesoasoani ia te au e avea ai ma se paaga tutusa i le faaipoipoga? O anafea na faaalia ai e Iesu Keriso lenei uiga i Lana matafaioi pulefaamalumalu? Ia saunia e faasoa atu ou manatu i le vasega.

Vaega 3

E mafai faapefea e taitoalua ona fefautuaai faatasi ma le amiotonu i le taitaiga o o latou aiga?

O le uiga o le “pulefaamalumalu i le aiga” e mafai ona malamalama sese i ai. Mo se faataitaiga, o nisi tagata ua faauiga seseina le gagana o fuaitau o mau e pei o le Kenese 3:16 (ua ta‘u atu e le Alii ia Eva o le a “pule” Atamu ia te ia) o lona uiga e mafai e se tane ona pulepuletutu pe pulea, e sese lea. O lenei faatonuga mai le Alii e faatatau i le tiutetauave o se tane e pulefaamalumalu i le alofa ma le amiotonu. E pei ona aoao mai Peresitene Gordon B. Hinckley e faatatau i le uiga o lenei fasifuaitau, o le “tiutetauave e pulea ai le tane o le saunia lea o mea e manaomia, ia puipuia, ia faamalosia ma puipuia le ava” (“O Afafine o le Atua,” Liahona, Ian. 1992; tagai foi Spencer W. Kimball, “The Blessings and Responsibilities of Womanhood,” Ensign, Mar. 1976, 72).

E tusa ai ma le faiga amioletonu a tane o le pulepuletutū po o le puleaina, na aoao mai ai Elder Richard G. Scott o le Korama a Aposetolo e Toasefululua:

Pe o lau aganuu o se aganuu e faaaoga ai e le tane se matafaioi pulepuletutū, ma le malosi, ma faia ai faaiuga taua uma mo le aiga? O lena mamanu e tatau ona fetuutuunai ina ia galulue ai le tane ma le ava o se soa e tutusa lelei i le faiga o tonu mo i laua lava ma lo la aiga. E leai se aiga e mafai ona tumau pe a atuatuvale pe pulea faamalosi; e na ona tau atu ai i le femisaai ma le fouvale. O le alofa o le faavae lea o se aiga fiafia. (“Removing Barriers to Happiness,” Ensign, May 1998, 86)

Faatasi ai ma le lotomaualalo, faaaloalo, ma le agalelei, e tatau i ulugalii ona fefautuaai faatasi i le faia o faaiuga mo o latou aiga. Na aoao mai Elder Quentin L. Cook o le Korama a Aposetolo e Toasefululua:

I le aufono faaleaiga o ava ma tane, i le avea ai ma ni paaga tutusa, la te faia ni faaiuga sili ona taua. La te filifili i auala e aoao ma aoai ai le fanau, o auala o le a faaaluina ai tupe, nofoaga o le a latou nonofo ai, ma le tele o isi faaiuga faaleaiga. O nei mea uma e faia faatasi i le maea ai ona saili atu i le taitaiga mai le Alii. (“O Le Alii o Lo’u Malamalama Ia,” Liahona, Me 2015, 64)

Ia manatua nei upumoni taua faaopoopo e fesootai i le fefautuaai faatasi o ni taitoalua ma faafaileleina aia tutusa i le faaipoipoga:

• O tane ma ava e tatau ona i ai “se leo tutusa ma se palota” i le faia o faaiuga (L. Whitney Clayton, “Faaipoipoga: Matau ma Aoao,” Liahona, Me 2013, 84).

• E manaomia ava e “tautala o se paaga saofaga ma atoatoa ’ [Spencer W. Kimball, “Privileges and Responsibilities of Sisters,” Ensign, Nov. 1978, 106] a o [latou] tutufaatasi ma [a latou] tane i le puleaina [o o latou] aiga” (Russell M. Nelson, “O Se Talosaga i O‘u Tuafafine,” Liahona, Nov. 2015, 97).

• Ua i ai i tane ma ava le “mana tutusa e maua ai faaaliga mo o latou aiga” (Quentin L. Cook, “Alofa Tele mo Fanau a lo Tatou Tama,” Liahona, Me 2019, 79).

• E mafai e matua ona faia fonotaga faaleaiga ma a latou fanau e fefautuaai faatasi ai e uiga i faaiuga po o luitau e ono faatatau i le aiga atoa (tagai M. Russell Ballard,“Aufono Faaleaiga,” Liahona, Me 2016, 63–65).

Mafaufau Loloto e Sauniuni ai mo le Vasega

E mafai faapefea e le fefautuaai faatasi i le amiotonu ona faamanuiaina ai ulugalii ma a latou fanau?

E Te Fia Aoao Atili? (Tuu i le faitalia)

O a isi mataupu faavae e mafai ona taialaina au i le avea ai ma se paaga tutusa i le faaipoipoga?

I le tusiga “Counseling Together in Marriage” (Ensign, Iuni 2012, 10–13), sa aoao mai ai e se tagata tomai mo faaipoipoga ma aiga ni mataupu faavae se tolu e mafai ona fesoasoani i taitoalua ia avea ma paaga tutusa a o latou fefautuaai faatasi ma taitai o latou aiga.

O fea e mafai ona ou aoao atili ai e uiga i le pulefaamalumalu i le aiga?

I lana saunoaga “O Le Perisitua Mekisateko ma Ki” (Liahona, Me 2020, 69–72), sa faamalamalama mai ai e Peresitene Dallin H. Oaks le uiga ma le faiga masani o le pulefaamalumalu i le aiga.

Faitau le saunoaga a Peresitene Nelson o le konafesi “Our Sacred Duty to Honor Women,” (Ensign, Iulai 1999, 38–40) e iloa ai pe faapefea ona pulefaamalumalu i auala e le manatu faapito.