“Lesona 18 Anomea mo le Sauniuniga o le Vasega: Saunia mo Manaoga Faaletino,” Anomea a le Faiaoga O Le Aiga e Faavavau 2022)
“Lesona 18 Anomea mo le Sauniuniga o le Vasega,” Anomea a le Faiaoga O Le Aiga e Faavavau
Lesona 18 Anomea mo Sauniuniga o le Vasega
Saunia mo Manaoga Faaletino
E popole le Alii i lo tatou soifua manuia faaleolaga nei, po o le faaletino. Ua Ia faaalia mai upumoni e mafai ona fesoasoani ia te oe e saunia ai mo oe lava ma manaoga faaletino o lou aiga i ni ala o le a fesoasoani ai foi ia te oe e tuputupu ae faaleagaga. Aʻo e suʻesuʻeina lenei anomea, mafaufau pe mafai faapefea ona sili atu lou faaaogaina lelei o nei upumoni.
Vaega 1
O le a lo’u tiutetauave i le sauniaina o manaoga faaletino mo lo’u aiga?
E le’i leva ona toefuatai mai le Ekalesia a Iesu Keriso, ae faaali mai e le Alii ni tiutetauave faaletino o tagata o le Ekalesia.
Suesue e Sauniuni ai mo le Vasega
Faitau i le Mataupu Faavae ma Feagaiga 75:28–29; 83:4, ma mafaufau pe faapefea ona faatatau ia te oe le fautuaga a le Alii.
E ala mai i perofeta o Aso e Gata Ai, ua toefaamautu mai ai e le Alii e faapea “ua i ai i matua se tiute paia e faafailele a latou fanau i le alofa ma le amiotonu [ma] saunia mea mo o latou manaoga faaletino ma faaleagaga” (“O Le Aiga: O Se Folafolaga i le Lalolagi,” ChurchofJesusChrist.org).
Ina ia faataunuu lenei tiute e saunia mea mo manaoga faaletino o a latou fanau, e tatau i matua ona aoao ina ia ola tutoatasi. O le ola tutoatasi o se mataupu faavae autu o le talalelei. O “le tomai, tautinoga, ma le taumafaiga e saunia mea e manaomia o le olaga mo le tagata lava ia ma le aiga” (Faia i le Ala a le Alii: Aotelega o Taiala a le Taitai i le Uelefea [2009],1).
Na aoao mai e Elder Robert D. Hales o le Korama a Aposetolo e Toasefululua ia mataupu faavae nei e uiga i le faalagolago ia te oe lava:
O le ola faalagolago o le tagata ia te ia lava, o le tauaveina lea o le tiutetauave mo o tatou lava uelefea faaleagaga ma le faaletino, ma mo i latou ua tuuina mai e le Tama Faalelagi i la tatou tausiga. Seiloga lava ua tatou faalagolago ia i tatou lava ona mafai lea ona tatou faaa’aoa’o i le Faaola i le auauna atu ma faamanuiaina isi.
E taua le malamalama o le faalagolago o le tagata ia te ia lava o se auala e ausia ai se sini. O la tatou sini laualuga lava o le avea e faapei o le Faaola, ma e faalauteleina lena sini e ala i la tatou auaunaga lē manatu faapito i isi. E faateleina pe faaitiitia lo tatou tomai e auauna atu ai e ala i le maualuga o i ai lo tatou faalagolago ia i tatou lava. (“A Gospel Vision of Welfare: Faith in Action,” i le O Mataupu Faavae Autu o le Uelefea ma le Faalagolago o le Tagata ia te Ia Lava [fonotaga faaleaoaoga a le au taitai i le lalolagi atoa, 2009], 1–2; tagai foi i le ChurchofJesusChrist.org)
Mafaufau i le taua o faatonuga nei e uiga i le faalagolago ia te oe lava:
Pe a e faaalgolago ia te oe lava, ua e faaaogaina ia faamanuiaga ma tomai ua tuu atu e le Atua ia te oe e tausia ai oe lava ma lou aiga ma maua vaifofo mo au lava faafitauli. O le faalagolago ia te oe lava e le faapea e tatau ona e mafaia ona faia na’o oe ia mea uma. Ina ia e faalagolago moni ia te oe lava, e tatau ona e aoao pe faapefea ona galulue faatasi ma isi ma liliu atu i le Alii ma Lana fesoasoani ma le malosi. (Mo Le Malosi o le Autalavou [tamaitusi, 2011),41)
Na aoao mai Peresitene Spencer W. Kimball, “E leai se Au Paia o Aso e Gata Ai moni, e ui ina mafai faaletino pe faalelagona, o le a tuuese atu fua le avega o le soifua manuia o ia lava po o lona aiga i se isi tagata” (Aoaoga a Peresitene o le Ekalesia: Spencer W. Kimball [2006], 116; tagai foi i le 1 Timoteo 5:8). Ia iloa o le a fesoasoani le Alii ia te oe i au taumafaiga ia e ola tutoatasi. Na aoao mai Iesu Keriso e faapea, “e ala mai [Lana] tausiga alofa,” e mafai ai e le Ekalesia ona “tu le faalagolago i isi tagata” i le faaletino ma le faaleagaga (Mataupu Faavae ma feagaiga 78:14). E faapena foi, o le Faaola “e ala i [Lana] tausiga alofa” e mafai ai ona fesoasoani ia te oe ia e ola tutoatasi ma mafai ona saunia mo oe lava ma lou aiga.
Mafaufau Loloto i Tapenaga mo le Vasega
O a ni manatu po o ni ou lagona e uiga i le tiutetauave e saunia mo manaoga faaletino o lou aiga?
Vaega 2
O le a se mea e mafai ona fesoasoani ia te au e atiae le ola tutoatasi ma avea ma se tagata ua sili atu ona saunia?
E tatau ona i ai se talitonuga lelei faalegalue mo le atiina a’e o le ola tutoatasi ma saunia mea mo o tatou aiga. Na amata ia Atamu, na poloaiina ai e lo tatou Tama Faalelagi Ana fanau e galulue (tagai i le Mose 4:25, 29; 2 Tesalonia 3:10–13). O le galue malosi ma le filiga o uiga ia o le Atua ma i latou o e taumafai malosi e mulimuli ia te Ia (tagai i le 2 Nifae 5:17; Mosaea 27:3–4).
Sa faamamafa mai e Elder D. Todd Christofferson o le Korama a Aposetolo e Toasefululua, le taua o le galue malosi ina ua ia aoao mai:
Na mamanuina e le Atua lenei olaga faaletino e manaomia ai le tauiviga faifai pea. … O le galue e mafai ai ona tatou tausia ma faatamaoaigaina le olaga. E mafai ai ona tatou sao mai i tulaga le fiafia ma malaia o aafiaga o le olaga faitino. O le ausia o mea e ala i le tautiga tele, e aumaia ai le lagona o le taua o le tagata lava ia. O le galue e atiina ae ma faaleleia ai uiga, e foafoa ai le matagofie, ma o le mea faigaluega o la tatou auaunaga i le tasi ma le isi ma i le Atua. O se olaga ua faapaiaina e tumu i galuega, e faisoo i nisi taimi, e faatauvaa i nisi taimi, e le faafetaia i nisi taimi ae ia galue pea i le na alualu i luma, faatonuga, lagolagoina, siitia, auauna atu, naunautai. (“Toe Manatunatuga i se Olaga Faapaiaina,” Liahona, Nov. 2010, 17)
E le gata i le tiutetauave a matua e “tuuina atu mea e manaomia mo manaoga faaletino ma faaleagaga o a latou [fanau],” “ae o le mamanu faalelagi, o tama … e nafa ma le tuuina atu o mea e tatau ai o le olaga … mo o latou aiga” (“O Le Aiga: O Se Folafolaga i le Lalolagi”). Sa fautuaina mai e Elder Christofferson i latou o e o loo sauniuni e avea ma ni tama ina ua ia saunoa:
Sauniuni nei e ala i le filiga i le a’oga ma fuafua mo aoaoga faamasani pe a mae’a aoga maualuga. O le aotauina, pe i le iunivesite, aoga faapitoa, aperenitisi, po o se polokalama talitutusa, o le ki lea i le atinaeina o tomai ma gafatia o le a tou manaomia. (“Tama,” Liahona, Me 2016, 96)
O le fautuaga e saili le aotauina e taua mo soo uma o Iesu Keriso. Sa aoao mai i tatou e le Alii ia “saili i le aoaoina, e ala lava lea i le suesue ma le faatuatua foi” (Mataupu Faavae ma Feagaiga 88:118; tagai foi i le 90:15). E tusa ai ma lenei tiutetauave, na aoao mai Peresitene Russell M. Nelson:
Ona o lo tatou manatu paia mo le atamai faaletagata, ua tatou mafaufau ai i le mauaina o se aoaoga ina ia avea ma se tiutetauave faalelotu. … Ua faamoemoe lo tatou Foafoa i Ana fanau i soo se mea ia aotauina i latou lava. (“Where Is Wisdom?,” Ensign, Nov. 1992, 6)
Mafaufau i isi faamanuiaga e mafai ona maua mai i le aotauina ia e oo i talaatu o le fesoasoani ia i tatou e saunia atili lelei ai mo manaoga tautupe a o tatou aiga. O le mauaina o aoaoga e mafai ona aumaia ai le faamalieina patino ma e mafai ona fesoasoani ia i tatou e faafetauia ai faamoemoega o le Alii e atiae ma faaaoga meaalofa ma tomai ua Ia tuuina mai ia i tatou (tagai i le Mataio 25:14–30). O le mauaina o aoaoga e mafai ona faaleleia ai o tatou tomai e faatautaia ai luitau o le olaga. O le aotauina e faateleina ai foi lo tatou malosiaga e auauna atu i isi ma fausia le malo o le Alii.
Na aoao mai Peresitene Thomas S. Monson:
O le a faalauteleina au taleni a o e suesue ma aoao. O le a mafai ona sili atu lau fesoasoani i ou aiga i lo latou aoaoina, ma o le a toafilemu lou mafaufau i lou iloa ua e saunia oe lava mo mea o le a oo mai atonu o le a oulua fetaiai i le olaga. (“O Sini e Tolu e Taialaina ai Oe,” Liahona, Nov. 2007, 119)
E i ai nisi tulaga, ona o le maliu po o le tatala o faaipoipoga po o isi tulaga matuia, e tatau ai i le tina ona saunia mea mo le aiga (tagai i le parakalafa 7 o le folafolaga i le aiga). I isi tulaga, e manaomia ai matua uma e toalua ona faigaluega e fesoasoani ai e faafetaiaia manaoga faavae o lo latou aiga. Na tuuina mai e Peresitene M. Russell Ballard o le Korama a Aposetolo e Toasefululua, se lapataiga taua ma se fautuaga aoga i le faia o faaiuga e tusa ai ma matua uma e toalua e faigaluega:
O aso nei, ua i ai se uunaiga tele i lo tatou lalolagi o ’oa faalelalolagi ia maua ma faaalu ai ni tupe tele. Ae paga lea, o lea tulaga ua taaina ai tina ua faaipoipo e faigaluega i fafo atu o le fale ina ia mafai ai ona maua se tupe maua lona lua. I le avea ai ma tane, ava, ma fanau e iloa le eseesega i le va o mea autu e tatau ona i ai ma le manao i oa o le lalolagi, latou te tuuitiitia avega mamafa tautupe a le aiga ma saofagā e fesoasoani i tina ia nonofo i le fale. O faaiuga e uiga i le faigaluega i fafo atu o le fale o ni faaiuga e faigata ma e manaomia ona faia ma le agaga tatalo, ma teuina pea i le mafaufau ia fautuaga a perofeta soifua e uiga i lenei mataupu lavelave. (“The Sacred Responsibilities of Parenthood,” Ensign, Mar. 2006, 31; tagai foi i le Alema 37:37)
Mafaufau Loloto i Tapenaga mo le Vasega
Na faapefea ona fesoasoani le Alii ia te oe, pe e mafai faapefea ona Ia fesoasoani ia te oe, e atiae se talitonuga filiga o le galue pe ia maua le aotauina atili?
Vaega 3
O a mataupu faavae tautupe e mafai ona taialaina a’u i le sauniaina o mea mo lo’u aiga?
O le lalolagi e a le Alii ia (tagai i le Salamo 24:1). Na aumai ia i tatou le mana ma le mafai e maua ai punaoa faalelaolagi e saunia ai mea mo o tatou manaoga faaletino ma faaleagaga (tagai i le Teuteronome 8:10, 18; Mataupu Faavae ma Feagaiga 59:18–20). I le Alii, o mea uma e faaleagaga, e oo lava i Ana tulafono faaletino (tagai i le Mataupu Faavae ma Feagaiga 29:34). O loo Ia silafia faamanuiaga ma tulaga lamatia faaleagaga o le sailia ma le mauaina o tupe ma meatotino. Ua Ia faaalia mai mataupu faavae e fesoasoani ia i tatou e pulea ai nei punaoa i ni ala e mafai ona faamanuiaina ma puipuia ai i tatou taitoatasi ma aiga.
Suesue e Sauniuni ai mo le Vasega
Filifili pe a ma le lua o mau nei, pe sue sau lava lua, ma faailoa mai mataupu faavae o le puleaina ma le poto o mea tautupe o loo aoao mai ai. Sau sauni i le vasega e talanoaina mea ua e maua.
Faamaumau Ou Manatu
Tusi ni nai filifiliga poto na e faia e saunia ai mo ou manaoga faaletino, faapea foi ni nai auala e te lagona e mafai ona e faaleleia i au taumafaiga e saunia mea mo ou manaoga faaletino.