“Lesona 28 Anomea mo le Sauniuniga o le Vasega: Lagonaina o le Faamoemoe mo le Fausiaina o se Aiga e Faavavau,” Anomea a le Faiaoga O Le Aiga e Faavavau (2022)
“Lesona 28 Anomea mo le Sauniuniga o le Vasega,” Anomea a le Faiaoga O Le Aiga e Faavavau
Lesona 28 Anomea mo le Sauniuniga o le Vasega
Lagonaina o le Faamoemoe mo le Fausiaina o se Aiga e Faavavau
Mafaufau i mea ua e aoaoina ma aafia ai i lau suesuega o le aiga e faavavau i le aluga o lenei kosi. Na faapefea ona uunaia e nei aoaoga lau molimau, manaoga, ma faatinoga? A o e suesueina lenei lesona faaiu, mafaufau po o le a se mea e finagalo le Alii e te faia ina ia mafai ai ona e ola ma se faamoemoe sili atu a o e taumafai e fausia ma faamalosia lou lava aiga e faavavau.
Vaega 1
Aisea e mafai ai ona ou maua le faamoemoe mo le fausiaina o se aiga e faavavau?
Na aoao mai Peresitene Henry B. Eyring o le Au Peresitene Sili e mafai ona tatou maua le faamoemoe mo le fausiaina o se aiga alofa e faavavau:
O i tatou uma lava e faamoemoe mo le olioli o le nonofo ai i ni aiga alofa. Mo nisi o i tatou, o se lagona tatou te le’i oo i ai—o se lagona ua tatou iloa e mafai ona maua ae le’i oo i ai. Atonu na tatou vaai i ai i olaga o isi. Mo nisi o i tatou, o le alofa i le aiga ua foliga mai e sili atu le moni ma le pele pe a tuueseeseina i tatou e le oti mai se tamaitiiti, se tina, se tama, se uso, se tuafafine, po o se matua o matua alofa ma peleina. …
… Afai ua faamanuiaina i tatou e maua le talalelei toefuataiina, e mafai ona tatou filifili e osia ma tausia feagaiga a le Atua lea tatou te agavaa ai mo le ola e faavavau. A o tatou tumau i lena faamaoni, o le a faamaonia e le Agaga Paia lo tatou faamoemoe ma le talitonu o loo tatou i ai i le ala i le ola e faavavau, ia nonofo faatasi i ni aiga e faavavau i le malo selesitila. (“The Hope of Eternal Family Love,” Ensign, Aug. 2016, 4)
O lo tatou faatuatua i le fuafuaga a lo tatou Tama Faalelagi ma i Lona Alo, o Iesu Keriso, e mafai ona aumaia ia i tatou le faamoemoe e mafai ona tatou fausia se aiga e faavavau. E finagalo le Alii e fesoasoani mai ia i tatou, ma e ala i Lona mana e mafai ai ona tatou faatoilaloina luitau. I le Feagaiga Fou tatou te faitau ai i le ala na maitaga ai Elisapeta i talaatu o tausaga o le fanauina o fanau ma Maria, o se taupou, na avea ma tina o le Alo o le Atua. O nei tamaitai taitoatasi sa feagai ma tulaga eseese, ae sa la malamalama uma “e leai lava se mea e tasi e le mafaia e le Atua” (Luka 1:37).
Tusi faamaumau Ou Manatu
Faailoa mai se faataitaiga mai tusitusiga paia po o lou lava aafiaga faaleaiga i le ala e fesoasoani ai le Alii ia i latou o e faalagolago ia te Ia ma saili Lana fesoasoani. Faaalu ni nai minute e tusi ai au tali i fesili nei i se api po o se polokalama e tusi ai faamatalaga:
-
O a upumoni e uiga i le Alii e mafai e le tagata (po o tagata taitoatasi) i lenei tala ona fautuaina oe e manatua?
-
O le a se mea e ono fautuaina oe e le tagata (po o tagata taitoatasi) e fai i au taumafaiga e fausia se aiga e faavavau?
Vaega 2
E mafai faapefea ona ou maua le faamoemoe mo le fausiaina o se aiga e faavavau pe afai ou te le sau mai se aiga e malosi i le mulimuli i le Faaola?
O nisi o talavou matutua e lei oo pe molimauina ni mamanu amiotonu faaleaiga i o latou aiga. O nisi ua maimoaina le faamutaina o faaipoipoga a o latou matua i le tatalaina o faaipoipoga. O i latou ua oo i nei aafiaga po o isi tulaga faigata e ono taumanatunatu pe mafai moni lava ona latou fausia se aiga e faavavau.
Na aoao mai Elder Yoon Hwan Choi o le Fitugafulu e uiga i le eseesega e mafai e a tatou filifiliga ona faia mo lo tatou aiga e faavavau:
O i tatou uma o se vaega o se aiga e faavavau. O la tatou matafaioi e mafai ona avea o se tulaga e mafai ai ona tutupu suiga taua i auala lelei pe faalelelei. …
… O loo i ai tupulaga e muamua atu ma mulimuli ia i tatou o loo faalagolago ia i tatou ia mulimuli ia Keriso ina ia mafai ona tatou avea o se aiga e faavavau o le Atua. (“Aua le Vaavaai Solo, Vaai i Luga!” Liahona, Me 2017, 91, 92)
O le perofeta o Aperaamo o se faataitaiga mamana o le auala e mafai ai ona tatou filifili e avea ma se “itu e liliu ai” lelei mo o tatou lava aiga. O nisi o le aiga o Aperaamo, e aofia ai lona lava tama, na liliuese mai poloaiga a le Alii. Nai lo lena sa latou filifili e tapuai i atua ese. (Tagai Aperaamo 1:5–6.)
Suesue e Sauniuni ai mo le Vasega
Faitau le Aperaamo 1:2, ma vaavaai mo mea na manao ma filifili e Aperaamo e ui lava i ona tulaga.
Ina ua taumafai faitaulaga amioleaga e ositaulaga Aperaamo i o latou atua ese, sa faasaoina faavavega e le Alii ia Aperaamo. Mulimuli ane, sa Ia taitaia Aperaamo ma nisi o lona aiga lautele i se isi laueleele. A o latou i ai iina, sa folafola atu e le Alii ia Aperaamo faamanuiaga taua, e aofia ai faamanuiaga o se aiga e faavavau. (Tagai Aperaamo 1:7–18; 2:3–4, 8–11.)
E pei o Aperaamo, e mafai ona tatou saili atu i faamanuiaga o se aiga e faavavau ma maua le fesoasoani a le Alii i le fausiaina o se aiga e faavavau, po o a lava tulaga sa i ai muamua o tatou aiga.
Na molimau mai Elder D. Todd Christofferson o le Korama a le Au Aposetolo e Toasefululua:
I fanau o loo faaletonu o latou tulaga faaleaiga, matou te faapea atu ai, e le o faaitiitia lo outou tulaga taua. O luitau i nisi taimi o se faaaliga lea o le faatuatuaina o oe e le Alii. E mafai ona Ia fesoasoani ia te oe, tuusao atu ma e ala atu i isi, e taulima mea o e feagai ai. E mafai ona tou avea ma augatupulaga, atonu o se augatupulaga muamua i lou aiga, lea e mafai ona faatulaga ia mamanu paia na faauuina e le Atua mo aiga ma faamanuia ai augatupulaga uma e mulimuli mai ia te oe. (“O Tamā,” Liahona, Me 2016, 96)
Sa faasoa mai e Elder David A. Bednar o le Korama a Aposetolo e Toasefululua lona lava aafiaga i le filifili e fausia se aiga e faavavau. Faitau le faamatalaga o loo i lalo pe faalogologo i ai, amata i le taimi 25:47 ma faaiu i le 28:15.
Faatasi ma le fesoasoani a le Alii, e mafai ai ona e fausia se aiga e faavavau, e tusa lava pe e te le’i sau mai le ituaiga o aiga o le Au Paia o Aso e Gata Ai lea e tuu mai i nisi taimi i le faavaa i luma o mekasini a le [Ekalesia]. Faamolemole ia manatua i taimi uma: e amata ia te oe!
O le mea moni lava i lo’u le oo i aafiaga o ni mamanu amiotonu faaleaiga i lo’u aiga a o tamaitiiti na fatua’i ai i totonu o a’u se manaoga malosi e galulue filiga ma Susan e faamautinoa le avea o nei mamanu i taimi uma o se vaega o le aiga ua ma fatua’ia faatasi. A o ma fefautuaai faatasi o le tasi ma le isi ma aioi atu mo se fesoasoani i a ma tatalo, sa musuia i ma’ua ma faamanuiaina e fesoasoani i le ma fanau e aoao ia mataupu faavae o le talalelei toefuataiina a le Faaola. E mautinoa lava e le o i maua o ni matua atoatoa, ae na ma mauaina ni meaalofa faaleagaga na ma manaomiaina ma maua le “fesoasoani … e sili atu i lo [ma] gafatia” [“Fa‘aola e ia ‘Ou Alofa,” Viiga, nu. 150].
E le o saisaitia oe ma a’u i o tatou aafiaga ua tuanai. E le o i tatou o ni tagata ua faamanualia atoatoa i o tatou tulaga o i ai nei pe o nofopologa i lo tatou siosiomaga. O le a aoaoina i tatou e le Agaga Paia i mea uma e tatau ona tatou faia, e aofia ai mamanu o le amiotonu faaleaiga lea tatou te lei auai ai muamua. E amata ia te oe! Ma e faatasi ai ma le fesoasoani a le Alii, e mafai ai ona e faia.
O nisi o outou na nutimomoia o outou loto e ni tagata o aiga po o ni taitai patino sa lei faamamaluina feagaiga paia o le faaipoipoga. Atonu e te fesili ifo ia te oe lava, “Afai na faamau o’u matua po o isi ulugalii ou te iloaina i le malumalu ma sa lei faamanuiaina a latou faaipoipoga, o le a la se faamoemoe e mafai ona ou maua o le a tumau ai la’u faaipoipoga e faavavau?”
Ia te oe o lē na lagona le lototiga ona o se tatalaga o se faaipoipoga i lou aiga pe sa e lagonaina le tiga i le solia o le faatuatuaga, faamolemole ia manatua e toe amata foi ia te oe! Atonu e tasi le sooga i le filifili o au augatupulaga ua motusia, ae o isi sooga amiotonu ma mea o totoe o le filifili e le faaitiitia le taua e faavavau. E mafai ona e faaopoopo i ai le malosi i lau filifili ma e masalo e oo lava i le fesoasoani e toefuatai mai sooga ua motusia. O lena galuega o le a faataunuuina auauai. (“A Welding Link” [worldwide devotional for young adults, Sept. 10, 2017], broadcasts.ChurchofJesusChrist.org)
Mafaufau Loloto e Sauniuni ai mo le Vasega
Mafaufau i lau fanau i le lumanai (po o le taimi nei). O a ni mamanu amiotonu faaleaiga latou te ono mananao ia te oe e amata pe faaauau ai? Pe o i ai ni mamanu o amioga amioletonu latou te mananao e te le toe faaauauina? E mafai faapefea ona fesoasoani le Alii ia te oe a o e faia lena mea?
Vaega 3
O le a se mea ua e aoaoina ma aafia ai i lau suesuega o le aiga e faavavau?
A o e latalata atu i le faaiuga o lenei kosi, mafaufau i mea ua e aoaoina e uiga i le taua o le aiga i le fuafuaga o le faaolataga a lo tatou Tama Faalelagi ma i lou lava olaga.
E faatatau i le taua o aiga, sa aoao mai ai Peresitene M. Russell Ballard o le Korama a Aposetolo e Toasefululua:
Uso e ma tuafafine, o le mafuaaga aupito taua o o tatou olaga, o o tatou aiga. Afai o le a tatou tuuto atu i tatou lava i lenei faamoemoe, o le a tatou faaleleia isi vaega uma o o tatou olaga, o ni tagata ma se ekalesia, o se faataitaiga ma se faailoilo mo tagata uma o le lalolagi. (“Ina Ia Maua Le Ua Leiloa,” Liahona, Me 2012, 98)
Mafaufau Loloto e Sauniuni ai mo le Vasega
Toe tepa i tua i autu o lesona i lenei kosi. Ao e faia, tomanatu i fesili nei:
-
Na faapefea ona uunaia e lenei kosi lou malamalama ma le molimau i aoaoga a le Alii e uiga i le faaipoipoga ma le aiga?
-
O le a se mea taua na e mauaina mai i lenei kosi?
-
O le a se mea ua e aoaoina e uiga i le Tama Faalelagi ma Iesu Keriso i lenei kosi atoa? Na faapefea ona faamalosia lou sootaga ma i Laua?