“Lesona 3 Anomea mo le Sauniuniga o le Vasega: O Lo Tatou Natura Paia ma le Taunuuga,” Anomea a le Faiaoga O Le Aiga e Faavavau (2022)
“Lesona 3 Anomea mo le Sauniuniga o le Vasega,” Anomea a le Faiaoga O Le Aiga e Faavavau
Lesona 3: Anomea mo le Sauniuniga o le Vasega
O Lo Tatou Natura Paia ma le Taunuuga
O nisi o a tatou fesili aupito sili ona taua i le olaga e fesootai i lo tatou amataga ma le taunuuga---pe o ai moni i tatou ma pe o le a le mea tatou te gafatia. A o e suesue i lenei lesona, mafaufau pe faapefea ona e taulima oe lava ma pe faapefea foi ona e taulimaina isi. E mafai faapefea e lenei suiga pe afai e te manatua pea lou natura paia ma le taunuuga?
Vaega 1
O ai a’u?
Sa aoao mai le Perofeta o Iosefa Samita, “Afai e le malamalama tagata i uiga o le Atua, latou te le malamalama ia i latou lava” (Aoaoga a Peresitene o le Ekalesia: Iosefa Samita [2007], 40). Ua ofo mai e tusitusiga paia se molimau mamana pe o ai le Atua ma pe o le a foi la tatou sootaga ma Ia.
Suesue e Sauniuni ai mo le Vasega
Faitau le Galuega 17:29, Eperu 12:9, ma le 1 Ioane 3:2, ma vaavaai pe o ai le Atua ma pe o le a foi le mea e mafai ona tatou aoaoina e uiga i la tatou sootaga ma Ia.
Na aoao mai e Peresitene Dieter F. Uchtdorf, a o i ai i le Au Peresitene Sili, le mea lenei e uiga i la tatou sootaga ma le Atua:
Ua foafoaina i tatou e le Atua Silisili ese. O Ia o lo tatou Tama Faalelagi. O i tatou moni o Ana fanau agaga. Ua foafoaina i tatou i anomea faalelagi sili ona taua ma silisili ona lelei, ma o lea o loo tatou tauaveina ai i totonu o i tatou lava se totino o le paia.
Peitai, iinei i le lalolagi, o o tatou mafaufauga ma amioga e faatosinaina e mea le lelei ia e piopio, e le paia, ma lē mama. O le pefu ma le eleelea o le lalolagi e pisipisia ai o tatou agaga, ma faigata ai ona iloaina ma manatuaina lo tatou tofi ma le faamoemoega.
Ae e le mafai ona suia ai o tatou tagata moni. O le paia autu o lo tatou natura e tumau pea. (“O Le a Ia Tuu Oe i Luga o Ona Tauau ma Ave Oe i le Aiga,” Liahona, May 2016, 104)
Matamata le vitioo “Your True Identity” (0:29), ma mafaufau pe o ai oe ma pe o fea na e sau ai.
Ua faamautinoa mai e perofeta ma aposetolo e faapea: “o tagata soifua uma—tane ma le fafine—ua foafoaina i le faatusa o le Atua. O tagata taitoatasi o se atalii po o se afafine agaga faapelepele a ni matua faalelagi,” (“O Le Aiga: O Se Folafolaga i le Lalolagi,” ChurchofJesusChrist.org). Mafaufau pe mafai faapefea e aoaoga nei ona faaopoopo i lou malamalama i ou matua faalelagi.
“O alii ma tamaitai uma ua faia i le faatusa o le Tama ma le Tina o le lalolagi ma o atalii ma afafine moni lava o le Atua. …
O le tagata, i le avea ai o se agaga, na fanauina e ni matua faalelagi, ma sa tausia seia oo ina matua i maota e faavavau o le Tama, a e lei sau i le lalolagi i se tino [faaletino]. (“Gospel Classics: The Origin of Man,” Ensign, Feb. 2002, 29, 30)
Na taua e Peresitene Harold B. Lee, “Ua galo ia i tatou e i ai so tatou Tama Faalelagi ma se Tina Faalelagi o e o loo sili atu ona popole, atonu, nai lo tatou tama ma le tina faalelalolagi, ma o na tosinaga mai luga o loo galulue pea lava pea e taumafai e fesoasoani mai ia i tatou pe a tatou faia mea uma tatou te mafaia” [Harold B. Lee, “The Influence and Responsibility of Women,” Relief Society Magazine, Feb. 1964, 85]. (Autu o le Talalelei, “Tina o i le Lagi,” topics.ChurchofJesusChrist.org)
Na aoao mai foi e Peresitene M. Russell Ballard o le Korama a Aposetolo e Toasefululua, “O le mea muamua ma le aupito taua, o oe ma o le a avea pea oe e le aunoa o se atalii/afafine agaga o le Atua” (“Children of Heavenly Father” [Brigham Young University devotional, Mar. 3, 2020], 2, speeches.byu.edu). N aoao mai e Peresitene Uchtdorf e faapea, o le mea moni o i tatou o fanau agaga moni a le Atua “e tatau ona suia ai le ala tatou te vaai ifo ai ia i tatou lava, o o tatou uso ma tuafafine, ma le olaga lava ia” (“O Faalaniga e Fa,” Liahona, Me 2013, 58).
Tusifaamaumau Ou Manatu
I se api po o se polokalama feaveai e faamaumau ai faamatalaga, tali se fesili se tasi po o le sili atu o fesili nei:
-
E mafai faapefea e le malamalama i lo tatou natura paia ona aafia ai lo tatou taulimaina o i tatou lava faapea ma isi? O anafea na i ai sou aafiaga na mafai ai ona faaseeloa atu ai lau vaai i se amioga faatuaupua a se tasi po o se uiga faaalia ma vaai atu i lo latou natura paia?
-
O a ni nai faataitaiga mai le soifuaga o le Faaola o loo faaalia ai na malamalama o Ia i natura paia o isi? O a ni auala e te ono sili atu ai ona faʻataʻitaʻi ia te Ia i se ala e te taulimaina ai isi?
Ia saunia e faasoa atu nisi o ou mafaufauga i le vasega.
Vaega 2
O le a se eseesega e mafai ona faia i le iloa o a’u o se atalii/afafine o le Atua?
Mafaufau i le saunoaga lea a Sister Michelle D. Craig, o se fesoasoani i le Au Peresitene Aoao o Tamaitai Talavou:
O le tele o lou malamalama i lou faasinomaga ma le faamoemoega moni, i le ta’ele o le agaga, o le tele foi lea o le a tosina ai mea uma i lou olaga. (“Eyes to See,” Liahona, Nov. 2020, 16)
O se aafiaga na maua e Mose ina ua mavae ona talanoa faafesagai ma le Atua ma aoaoina ai lona natura paia o loo faapupula mai ai le mana e mafai ona tatou maua mai lenei malamalama.
Suesue e Sauniuni ai mo le Vasega
Faitau le Mose 1: 3– 6, 12–, ma vaavaai pe na faapefea ona faamanaina Mose e ala i lona taliaina o lona natura paia.
Ua Faatoilalo e Mose ia faaosoosoga a Satani
Mafaufau Loloto i Sauniuniga mo le Vasega
Mafaufau toto’a pe fapefea e le malamalama i ou matua faalelagi ma le natura paia ona fesoasoani ia te oe e teena talapepelo ma faaosoosoga a le fili.
Vaega 3
O le a lo’u taunuuga paia?
Mafaufau pe o le a le tele ua e aoaoina ma tuputupu ae ai i le 10 tausaga ua tuanai. I le avea ai o se atalii po o se afafine o matua faalelagi, ua i ai sau malosiaga maoae e tuputupua’e ai. O le mea moni, e i ai sou taunuuga paia. Tagai i le “O Le Aiga: O Se Folafolaga i le Lalolagi,” ChurchofJesusChrist.org.)
Suesue e Sauniuni ai mo le Vasega
Faitau le Roma 8:16–17, ma vaavaai mo le mea na aoao mai e le Aposetolo o Paulo e uiga i le taunuuga paia.
O se suli-faatasi o se tasi ua mauaina se tofi tutusa ma isi suli. I le avea ai ma ulumatua ma na o le pau lea o le Alo atoatoa o le Tama Faalelagi, o le aia tatau a Iesu Keriso le mautofi i mea uma o loo i le Tama. O i latou o e usiusitai ma maua faamanuiaga atoatoa o le Togiola a le Faaola o le a mautofi i mea uma a le Tama [tagai Roma 8:14–18; Kalatia 3:26–29; Mataupu Faavae ma Feagaiga 93:21–22). O lona uiga, o i tatou uma lava ua i ai se tulaga gafatia e avea ai e faapei o lo tatou Tama Faalelagi.
Sa fesoasoani Peresitene Russell M. Nelson e faamanino mai le uiga o lo tatou taunuuga paia:
E tatau ona tatou saunia mo lo tatou lava taunuuga paia—mamalu, tino ola pea, ma le ola e faavavau. E mafai ona avea nei mea uma ma o tatou faamanuiaga, e ala i lo tatou faamaoni. (“O Le Foafoaga,” Liahona, Me 2000, 86)
I lesona o le a sosoo ai, o le a e aoao atili ai i le auala ua faia ai e Iesu Keriso ia mafai ai e i tatou on ausia lo tatou taunuuga paia o ni suli o le ola e faavavau. E pei ona sa aoao mai e Peresitene Uchtdorf, e faia lenei mea i le laa e tasi i le taimi.
Ua tatou vaai uma i se tamaitiiti laitiiti o aoao e savali. O si tamai laa lava ma tautevateva. E pau o ia. Pe tatou te otegiaina ea se taumafaiga faapena? E leai. O ai se tamā e faasalaina se tamaitiiti laitiiti ona o le tau pau? Tatou te faamalosiau, tatou te patipatia, ma tatou te viia, aua o tamai laa uma, e avea atili ai le tamaitiiti e pei o ona matua.
…E e faatusa atu i le atoatoa o le Atua, o i tatou o tagata faaletino ua le ese lava i tatou ma tamaiti laiti e tautevateva. Ae e finagalo lo tatou Tama Faalelagi agaalofa ia tatou avea atili e faapei o Ia, …e tatau foi ona avea lena ma a tatou sini e faavavau. E silafia e le Atua tatou te oo atu iina e le i se taimi vave ae e ala i ni laa taitasi i le taimi. (“O Faalaniga e Fa,” Liahona, May 2013, 58)
Mafaufau Loloto i Sauniuniga mo le Vasega
E suia faapefea i le saunoaga a Peresitene Uchtdorf lau vaai i au la’a tautevateva pei se tamaitiiti faatoa tau savali? O a ni auala e mafai ona e valaaulia ai le Alii e fesoasoani ia te oe e faaauau ona e agai i luma?