1 Oh met, Seikop, I pahn koasoai ong uhk: Nan rahn en ei kahpwal akan nan sapwtehno kowe me tepin ipwidi. Oh kilang, ke lokolongki apwal akan oh pahtou laud ni ahmw pwulopwul, pwehki lemei en riomw pwutak kan.

2 Ahpw, Seikop, nei seri me tepin ipwidi nan sapwtehno, ke wehwehkiher duwen lapalap en Koht; oh e pahn kasarawihla ahmw lokolok kan pwe en wiahla kamwahupemw.

3 Eri, palingenomw pahn kapaiada, oh ke pahn koukousoan rehn riomw pwutak, Nihpai, nan popohl; oh erein ahmw mour ke pahn kin papah ahmw Koht. Eri, I ese me ke pahn komourla, pwehki ieias pwung en ahmw Soundoaro; pwe ke kilangehr me ni unseklahn ahnsou e pahn ketido pwe en ketikihong aramas komourparail.

4 Oh ni ahmw pwulopwul ke kilangehr sapwellime lingan; eri, meid pai kowe duwehte irail akan me e pahn ketin pwarohng oh kapaiada ni paliwar; pwe Ngehno kin duduwehte, aio, rahnwet, oh kohkohlahte. Oh ahlo kaunopdahr sangete pwupwudi en aramas, oh komourla mweimweidahr.

5 Oh aramas akan aledier kaweid me itarong irail en kak ese me mwahu sang me suwed. Oh kosonnedo kohiengehr aramas akan. Oh sang ni kosonnedo sohte war ehu me pwung; de, sang ni kosonnedo aramas akan kalipilipalahr. Ei, sang ni kosonned en sampah irail kalipilipalahr; oh pil, sang ni kosonned en palingehn irail irairdisang me mwahuo, oh pahn paisuwed kohkohlahte.

6 Eri, Mesaia Sarawio me kin ketin komourala aramas; pwehki e mediren kalahngan oh mehlel.

7 Kilahng, e meirongkihla pein ih pwehki dihp, pwe en kak kapwaiada kaimwseklahn kosonnedo, ong irail akan me pahn ahneki mohngiong karakarahk oh ngehn peik; oh ihte me kak kapwaiada kaimwseklahn kosonnedo.

8 Eri, ia uwen kesempwalpen mepwukat en kak sansalohng aramas koaros nan sampah, pwe irail en kak ese me sohte aramas emen kak pato mwohn silangin Koht, ihte sang ni wiewia pwung kan, oh mahk, oh kalahngan en Mesaia Sarawio, me ketin tohnmeteikihla pein ih nin duwen mehlahn paliwar, oh pwurehng iasada sang ni manaman en Ngehno, pwe en kak ketin kaiasada me melahr akan, pwe ih me tepin iasada.

9 Eri, ih me ketin wia tepin meirong ong Koht, nin duwen eh pahn ketin wia weliepen aramas koaruhsie; oh irail koaros me pahn pwosonla ih pahn komourla.

10 Oh pwehki e wia weliepen aramas koaros, aramas koaros pahn kohdo rehn Koht; eri, irail pahn kesihnen mwohn silangi, pwe re en pakadeikda reh nin duwen mehlel oh sarawi me e sapwellimanki. Eri, pwehki pweidahn imwilahn kosonnedo me [Ih] me Sarawio ketikidahr, kahrehda kalokoloko me wia kisehn kosonnedo, kalokoloko me wia kisehn kosonnedo kin uhwong pereno me pil wia kisehn kosonnedo, [oh pereno] me kin kapwaiada imwilahn tomwo.

11 Pwe e konehng en mie pelien soahng koaros. Ma soh, nei pwutak me tepin ipwidi nan sapwtehno, mour pwung sohte kak mie, pil duwehte mour suwed, pil duwehte mour sarawi de paisuwed, duwehte mwahu oh sakanakan. Eri, soahng koaros kin anahne patpene oh wiahla ehu; eri, ma [e pahn] wartehieu, e duwehte me e mehla, me sohte mour de pil sohte mehla, sohte kasuwedpe de pil kamwahupe, sohte kaperenpe de paisuwedpe, de pil wehwehpe de sawehwehpe.

12 Eri, e pahnwiawihda ni eh wia mehkot memwahl; eri e pahn sohte kahrepen eh kepikipikda. Eri, met pahn kawehla erpit en Koht oh kahrepen sapwellime doadoahk poatopoat kan, oh pil manaman, oh kalahngan, oh pwuhng en Koht.

13 Oh ma ke pahn nda me sohte kosonned, ke pahn pil nda me sohte dihp. Ma ke pahn nda me sohte dihp, ke pahn pil nda me sohte pwung. Oh ma sohte pwung eri e pahn pil sohte peren. Oh ma sohte pwung de peren, eri e pahn sohte kalokolok de nsensuwed. Oh ma sohte mepwukat, e pil pahn sohte Koht. Oh ma sohte Koht sohte kitail, oh pil sampah; pwe e sohte pahn mie kepikipikdahn soahng kan, de pil saledek en pein mwekid de mwekidiki mehkot; eri, soahng koaros sohte pahn mie.

14 Oh ahnsouet, nei pwutak kan, I padahkihong kumwail mepwukat pwe en wia kamarainpamwail oh kamwahupamwail; pwe mie Koht emen, oh e ketin kapikadahr soahng koaros, nanleng oh sampah, oh audapara koaros, soahng koaros me kin pein mwekid oh soahng koaros me kin kamwakidada.

15 Oh pwe en kak kapwaiada kaimwsekpen kahrepen sapwellime [doadoahk] poatoapoat kan ong aramas, mwurin eh ketin kapikada tepin samatail oh inatail, oh mahn en nan mohs oh menpihr kan, oh ni mehlel, soahng koaros me kepikipikda, e konehng en mie pelien mehkoaros; duwehte wahntuhke me keinepwio eh pelian tuhkehn komouro; me ehu mem a ehu katik.

16 Eri, Kauno Koht ketin mweidehng aramas en pein wia nsene. Eri, aramas sohte kak pein wia nsene ihte ma e pahn alehdi kasongosong sang emen de mehteio.

17 Oh ngehi, Lihai, nin duwen soahng koaros me I wadekehr, nin duwen dahme ntingdier, me mie tohnleng en Koht men, me pahn anahne pwupwudisang nanleng; eri, e wialahr tepil men, sang ni e wiahda me suwed mwohn silangin Koht.

18 Oh pwehki eh pwupwudihsang nanleng, oh nsensuwedla mehlel kohkohlahte, e kin songosongen kansensuwediala aramas koaros. Eri, serpent en kawaho, me iei tepilo, me wia pahpahn likamw koaros, ndahieng Ihp: Tungoale wahntuhke me sohte mweimweien, a ke sohte pahn mehla, ahpw ke pahn duwehla Koht, me mwahngih me mwahu oh me suwed.

19 Oh mwurin Adam oh Ihp ara tungoalehda wahntuhke me sohte mweimweio, ira ahpw pokouslahsang nan mwetuwel en Iden, pwe ira en koadoahke pwehlen sampah.

20 Oh ira nainekihda seri kei; mehlel, peneinei en sampah pwohn.

21 Oh ahn aramas ahnsou kareireila, nin duwen kupwur en Koht, pwe irail en kak koluhla ni arail momour; eri, arail ahnsou wialahr ahnsoun kasongosong, oh arail ahnsou kareireila, nin duwen sapwellimen Kauno Koht kosonned akan me e ketikihongehr sapwellime aramas akan. Pwe e ketikidahr kosonned pwe aramas koaros en koluhla; pwe e ketin kasalehiengehr aramas koaros me irail salongalahr, pwehki sapwungalahn arail nohno oh pahpao.

22 Oh met, kilang, ma Adam sohte sapeik e sohte pahn pwupwudi, ahpw e pahn mihmihte nan mwetuwel en Iden. Oh soahng koaros me kepikipikda pahn duduwehte ni mwomwen ar kepikipikdao; oh re pahn duwehwehte kohkohlahte, oh sohte imwi.

23 Oh ira sohte pahn nainekihda seri; eri ira pahn mihmihte nan mour me mwakelekel, sohte ahniki peren, pwe ira sohte ese nsensuwed; sohte wiewia mwahu, pwe ira sohte ese dihp.

24 Ahpw kilang, soahng koaros wiawidahr nin duwen erpit en Ih me mwahngih soahng koaros.

25 Adam pwupwidi pwe aramas en kak miehda; oh aramas mie, pwe irail en kak peren.

26 Oh Mesaiao pahn ketido ni unseklahn ahnsou, pwe en ketin doarehla aramas akan sang ni pwupwilao. Oh pwehki arail mwakelekeladahr oh pitisangehr pwupwilao irail saledeklahr kohkohlahte, esehlahr me mwahu sang me suwed; kakehr pein wia nsenerail oh sohte anahnepen mwekidiki nsenen emen, ihte sang ni kalokolok en kosonnedo me [pahn wiawi] ni keimwseklahn rahn lapalapo, nin duwen kosonned akan me Koht ketikidohr.

27 Eri, aramas akan ahneki saledek en momour; oh soahng koaros me aramas anahne kohiengirailehr. Oh irail ahneki saledek en pilada mour saledek oh mour soutuk, sang ni sawasepen Sounsawas lapalapo me wia sounsawas en aramas koaros, de irail ahneki saledek en pilada mour selidi oh mehla, nin duwen tepilo eh kin saliedi oh powehdi; pwe e kin nannantihong aramas koaros en nsensuwedla mehlel duwehte ih.

28 Oh met, nei pwutak kan, I men kumwail en kilenglahng Sounsawas lapalapo, oh rong mwahu sapwellime kosonned kesempwal akan; oh loaloapwoatieng sapwellime mahsen akan, oh pilada mour soutuk, nin duwen kupwur en sapwellime Ngehn Sarawio.

29 Oh dehr pilada mehla soutuk, nin duwen ineng en paliwar oh me suwedo me kin ieiang, me kin kiheng ngehn en tepilo manaman en kalowehdi, pwe en waikuhkedihla nan ehl, pwe en kaunuhkada nan pein eh wehi.

30 I koasoia kaweid mwotomwot pwukat ong kumwail koaruhsie, nei pwutak kan, ni imwilahn ei mour; oh I pilada palien kaweid me kesempwalo, nin duwen mahsen akan en soukohp. Oh sohte ehu soahng tohrohr me I mwahuki ihte kamwahupen palingenimwail kan kohkohlahte. Ahmen.