1 Oh mwurin Krais e pahn iasadahsang mehla e pahn ketin pwarodohng kumwail, nei seri kan, oh riei ohl kesempwalakan; oh mahsen akan me e pahn ketin mahsanihong kumwail pahn wiahla kosonned me kumwail pahn kapwaiada.

2 Pwe kilang, I ndaiong kumwail me I kilangadahr dih tohto pahn mehla, oh e pahn mie mahwen laud oh moromor kei nanpwungen nei aramas akan.

3 Oh mwurin Mesaiao e pahn ketido e pahn mie kilel kei pahn sansalehng nei aramas akan duwen sapwellime ipwidio, oh pil duwen sapwellime pwoula oh iasadao; oh rahno pahn wia rahn lapalap oh kamasepwehk ong me suwed akan, pwe irail pahn mwomwala; oh re pahn mwomwala pwehki arail kausala soukohp akan, oh souleng kan, oh katehkin irail takai, oh kemeirailla; eri ngilen ntahn souleng kan pahn kohdahsang nan pwehl kohdahla rehn Koht pwe en kedipei irail.

4 Eri, irail koaros me pohnmwahso, oh me kin wia me suwed, rahno me pahn kohdo pahn isikirailla, Kauno Wasa Lapalap me ketin mahsanih, pwe re pahn rasehng mwutin dihpw meng.

5 Oh irail me kemehla soukohp akan, oh souleng kan, pahn suhrla wasa loal nan sampah, Kauno Wasa Lapalap me ketin mahsanih; oh nahna kan pahn pwainiraildi, oh elipip kan pahn wairailsang, oh ihmw kan pahn rehngkidi pohrail oh kamwuteirailpene oh idangirailpene lao re wiahla pehs.

6 Oh posopos en nansapwe, oh lioal, oh rerrer en sahpw, oh soahngen kahpwal koaros pahn lellohng irail, pwehki kisiniei en engieng en Kauno pahn lellohng irail, irail pahn duwehte mwuten dihpw meng, oh rahn me pahn kohdo pahn isikirailla, Kauno Wasa Lapalap ketin mahsenih.

7 Ia uwen ngeniet kin medek, oh pwunod pwehki kamakamalahn nei aramas akan! Pwe ngehi, Nihpai, kilangadahr, oh met katoutouwihielahr mwohn silangin Kauno; ahpw I patohwan likwerih ei Koht: Sapwellimwomwi koasoandi kan me pwung.

8 Ahpw kilang, me pwung kan me pahn rong mwahu mahsen en soukohp akan, oh sohte kemeirailla, ahpw poadidi ong ar kasikasik Krais ong kilel kan me pahn sansalda, mendahte kalokeparail kan koaros—kilang, iei irail me sohte pahn lekidekla.

9 Ahpw Iehros Pwungo pahn ketin pwarohng irail; oh e pahn kamwahuirailla, oh irail pahn ahneki popohl reh, lao dih siluh pahn mehla, oh tohtohn dih kapahieu pahn mehla nan arail mour pwung.

10 Oh mwurin ahnsou me mepwukat pahn imwisekla, nei aramas akan pahn mwadangete kamwomwomwla; I kilangadahr, mendahte lokolok en palingeniet; met, I ese me e uhdahn pahn wiawi; oh re kin pangala pein irail; eriar pahn kamwomwomwala me pahn wia katingpen arail pohnmwahso oh arail pweipwei; pwehki arail dukiong tepilo oh pilada wiewiatiahk en rotorotlaudsang [tiahk en] marain, eri irail uhdahn pahn kohdihla nan ehl.

11 Pwe Ngehn en Kauno sohte pahn ketin ieiang aramas ahnsou koaros. Oh ahnsou me Ngehno solahr pahn ketin ieiang aramas a kamwomwomwla pahn mwadangetewiawi, oh met kansensuwedihada palingeniet.

12 Oh ni ei koasoia duwen mehn Suhs akan ahr anahne kamehlele, me Sises iei ih me Krais mehlelo, e pil konehng Mehn Liki kan en kamehlele me Sises iei ih me Krais, Koht Soutuko;

13 Oh e kin ketin kasalehda pein ih ong irail koaros me kin kamehlele ih, sang ni manaman en Ngehn Sarawi; ei, ong wehi kan, keinek kan, lokaia kan, oh aramas akan, [oh] ketin wiewia doadoahk me kapwuriamwei kan, kilel kan, oh manaman kan, nanpwungen aramas nin duwen arail pwoson.

14 Ahpw kilang, I pahn kohpadahng kumwail duwen imwin rahn akan; duwen rahno ahnsou me Kauno Koht pahn ketikihdo mepwukat rehn aramas akan.

15 Mwurin kadaudokei kan oh kadaudoken riei ohl akan arail pahn pwupwudi nan arail soupwoson, oh pahn kamakam rehn Mehn Liki kan; ei, mwurin Kauno Koht e pahn ketin kapilirailpene, oh pahn mahweniong irail, oh kauwada kehl en kaloweiraildi; oh mwurin arail pahn [kamakamala oh] wonohn nan pwelpar, mehnda ma irail sohrala, ahpw ngilen me pwung kan pahn ntingdi, oh kapakap en me loalopwoat kan pahn peipeido, oh irail koaros me pwupwudi nan arail soupwoson sohte pahn monokonokla.

16 Pwe irail akan me pahn kamwomwala pahn koasoi ong irail sang pahn pwehl, oh ngilerail peipeido sang nan pwelpar, oh ngilarail pahn duwehte ngil en emen soun katieni; pwe Kauno Koht pahn ketkihong manaman, pwe en kak koasoaiduwen irail ni ngiletik, duwehte ngihl me peido sang nan pwehl; oh arail lokaia pahn peipeido sang nan pwelpar.

17 Pwe Kauno Koht ketin mahsanih: Re pahn ntingihdi soahng kan me pahn wiawi nanpwungarail, oh re pahn ntingdi oh katengetengpene nan ehu pwuhk, oh irail akan me pwupwudi nan ar souwposon sohte pahn ale, pwe irail pahn rapahki en kawehla sapwellimen Koht koasoandi kan.

18 Eri, duwen kamwomwalahn irail akan me kamwomwalahr, e wiawimwadang; oh neirail karihs kan pahn duwehte kilin wahn pilawa me mengila—ei, Kauno Koht me ketin mahsanih: E pahn mwadangete wiawi—

19 Oh e pahn wiawi, me irail akan me pwupwidi nan arail peikasal pahn kamakam rehn Mehn Liki kan.

20 Oh Mehn Liki kan direkilahr ar pohnmwahso nan masarail akan, oh dipekelekelier, pwehki lapalapen arail takain kadipekelekelo, kahrehda re wiahda mwomwohdiso tohto; ahpw, irail pwilikihdi sapwellimen Koht manaman oh doadoahk kapwuriamwei kan, oh kalohki pein arail eripit oh pein arail loalokong, pwe irail en kak kepwehpewhkihla oh korehdasang ahn me semwehmwe kan.

21 Oh mwomwohdiso tohto me wiawihda me kahrehda noahrek, oh akupwung, oh lamalam oh ineng en kauwehla meteikan.

22 Oh pil mie pwihn mwersuwed rir kan, duwehte nan mwein kawao, nin duwen en tepilo tiahk suwed kan, pwe ih me wiahda mepwukat koaros; ei, me tapiada kamaramas, oh doadoahk rotorot kan; ei, oh e kin kahrehkinirail kisin sahl me pirapiriong ni tepinwararail kan, lao e katengehkiniraildi sahl kehlail kohkohlahte.

23 Pwe kilang, riei ohl kesempwal akan, I ndaiong kumwail me Kauno Koht sohte kin wia doadoahk rotorot kan.

24 Soahng koaros me e kin ketin wia kin wiawi ong kamwahupen sampah; pwe e ketin poakohng sampah, kahrehda e ketin mweidala pein eh mour pwe aramas koaros en kak kohdo reh. Eri, sohte me e ketin irehdihsang re en alehda sapwellime komouro.

25 Kilang, mie me e mahsanihong, ketihtihki: Kohkohweisang ie? Kilang, I ndaiong kumwail, Soh; ahpw e ketin mahsanih: Kohdo rehi kumwail koaros me mih pohn sampah, pwainda milik oh sukehn loangalap, ni sohte anahepen mwohni oh sohte isepe.

26 Kilang, mie me e mahsanihong re en kohkohlahsang nan imwen kapakap akan, de wasahn kaudok kan? Kilang, I ndaiong kumwail, Soh.

27 Mie ahnsou me e mahsanihong aramas en dehr alehda sapwellime komouro? Kilang I ndaiong kumwail, Soh; ahpw e ketikihong aramas koaros ni sohte pweipwei; oh e ketin mahsanihong sapwellime aramas akan re en koangoangehki aramas koaros en koluhla.

28 Kilang, mie aramas me Kauno ketin mahsanihiong me re sohte pahn alehda sapwellimekupwuramwahu? Kilang I ndaiong kumwail, Soh; ahpw mie en aramas koaros ar pai me duwepenehte, oh sohte me irairdihsang.

29 E ketin mahsanih me sohte me pahn wia doadoahk en prihskrap; pwe, kilang, prihskrap iei aramas me kin kalohk, oh wiahkinirail kamarainpen sampah, pwe irail en kepwehpwehla oh sampah en kepinga irail; ahpw re sohte kin nsenohki sawasepen Saion.

30 Kilang, Kauno ketin irehdi soahng wet; eri, Kauno Koht ketikidahr kosonned ehu me aramas koaros anahne ahneki limpoak unsek, limpoak unseko iei limpoak. Oh ma re sohte pahn ahneki limpoak unsek sohte kateparail. Eri, ma re pahn ahneki limpoak unsek re sohte pahn mweidehng tohn doadoahk en Saion en mehla.

31 Ahpw tohn doadoahk en Saion pahn doadoahk ong ni kamwahupen Saion; pwe ma mwohni me kin kahrehda ar doadoahk re pahn mehla.

32 Oh pil, Kauno Koht ketin mahsaniher me aramas akan sohte pahn kam aramas; me re sohte pahn likamw; me re sohte pahn pirap; me re sohte pahn kasaminehla mwaren Kauno arail Koht; me re sohte pahn noahrok; me re sohte pahn ahneki lamalam de ineng en kauwehla meteikan; me re sohte pahn akamaipene; me re sohte pahn netiki paliwararail akan; oh me re sohte pahn wia mepwukat; pwe mehmen me pahn wia mepwukat pahn mehla.

33 Pwe sohte ehu wiewia suwed pwukat kin kohsang rehn Kauno; pwe e kin ketin kupwur mwahu ong aramas akan; oh e sohte kin wia mehkot me sohte kin sansal ong aramas akan; oh e ketin lukehier irail koaros en kohdo reh oh alehda sapwellime kupwur mwahu; oh e sohte kin ketin soikala mehmen me kohdo reh, me toantoal oh pwetepwet, me sensel oh saledek, ohl oh lih; oh e kin ketin tamataman aramas rotorot akan; oh koaros duwepene rehn Koht, mehn Suhs oh Mehn Liki kan koaros.